پسندیدہ کتابوں میں شامل کریں

 

 

 

عقیدت کے رنگ

 

 

 

               جمع و ترتیب: اعجاز عنید

 

 

 

 

 

 

 

عاکف غنی

 

رحمتِ دو جہاں اے حبیبِؐ خدا

مصطفیٰ مصطفیٰؐ ،مصطفیٰؐ مصطفیٰؐ

 

آپؐ کا نام سنتے ہی پڑھنے لگا

جذب و مستی میں دل میرا صلِ علیٰؐ

 

ظلمتوں سے نکالا ہمیں آپؐ نے

آپ ؐ  نورِ خداؐ ،آپ نورِ ہُدیٰؐ

 

آپؐ نے دینِ حق کو مکمل کیا

خاتم الانبیاءؐ ،خاتم الانبیاءؐ

 

دہر میں آپؐ کی رہ پہ جو بھی چلا

آپؐ اس کی کریں گے یقیناً شفاء

 

غم میں امت کی روتے رہے عمر بھر

آپ خیر الوریٰؐ ،آپ خیر الوریٰؐ

 

آپؐ آئے چمن میں بہار آ گئی

آپ کے دم سے دنیا میں پھیلی ضیاء

 

ہادیِ انس و جاں ، حامیِ بیکساں

آپؐ اللہ کی ہیں اک احسن عطا

 

آپؐ بِن تو مکمل نہیں دین بھی

لاکھ کرتا رہے کوئی ذکرِ خدا

 

اتباع آپؐ کا میں ہمیشہ کروں

ہے خدا سے یہی بس مری التجا

٭٭٭

 

 

 

 

ڈاکٹر احمد علی برقی اعظمی

 

 

اے خاصہ ء خاصانِ رسل  شاہِ مدینہ

طوفانِ حوادث میں ہے اُمّت کا سفینہ

 

اِس دورِ پُر آشوب میں اب جائیں کہاں ہم

ہم بھول گئے ایسے میں جینے کا قرینہ

 

کچھ کہنے سے قاصر ہے زباں ذہن ہے ماؤف

اب بامِ ترقی کا بھی مسدود ہے زینہ

 

درکار ہمیں آپ کی ہے چشمِ عنایت

آنکھوں میں نمی اور ہے چہرے پہ پسینہ

 

وہ آپ ہیں جس سے ملا قرآن کا تحفہ

جو نوعِ بشر کی ہے ہدایت کا خزینہ

 

واللیل اذا یغشیٰ کی خوشبو سے معطّر

ہے آپ کی پیشانی ء اقدس کا پسینہ

 

بیشک ہے دو عالم کے لئے مطلعِ انوار

یہ آپ کی انگُشتِ شہادت کا نگینہ

 

احمد علی برقی کی ہے یہ شامتِ اعمال

ہے فضل خدا آپ کی بعثت کا مہینہ

٭٭٭

 

 

 

 

محمد اعظم عظیم اعظم

 

۱

میرے نبیﷺ کی بات نہ پوچھو

کچھ اُن کے حالات نہ پوچھو

 

رَب ہے اُن کا وہ ہیں اُس کے

مجھ سے اُن کی ذات نہ پوچھو

 

درِ بنیﷺ کا میں تو گدا ہوں

دیں گے وہ خیرات نہ پوچھو

 

چھوڑ کے دنیا کی لذت کو

کیسی گزری..؟ بات نہ پوچھو

 

اُن کے یہاں کے شام و سحر کے

کیسے ہیں…؟ لمحات نہ پوچھو

 

واپس ہوا جب اُن کے در سے

حالت و صدمات نہ پوچھو

 

اشکِ اَلم تھے  زیر مژگاں

میرے وہ جذبات نہ پوچھ

 

آنکھوں میں میری اشکِ اَلم تھے

مجھ سے وہ جذبات نہ پوچھو

 

اُن کے نگر میں رحمتِ حق کی

کتنی  ہے بہتات نہ پوچھو

 

بھیجو درودیں اعظم اُن پر

لوگوں یہ سوغات نہ پوچھو

٭٭٭

 

 

۲

 

سرکارﷺ کے روضے کو ترستی ہیں یہ آنکھیں

دیدارِ محمدﷺ میں  برستی ہیں یہ آنکھیں

 

اِس بات کی دھن ہے اِنہیں بس دیکھیں مدینہ

اِس شوقِ جنوں میں نہیں تھکتی ہیں یہ آنکھیں

 

شاید کہ کمی اِن میں ہے جلووں سے ہیں محروم

ہر روز یہی بات سمجھتی ہیں یہ آنکھیں

 

لب میرے خموشی کی زبان بول رہے ہیں

مالا شہِ  ابرارﷺ کی جپتی ہیں یہ آنکھیں

 

اِن آنکھوں کو اِس کے سوا بھاتا نہیں کچھ بھی

ہجرِ  غم سرورﷺ مچلتی ہیں یہ آنکھیں

 

اُٹھ جاتی ہیں جس سمت تو رحمت ہے برستی

پیغام خدا خلق کو دیتی ہیں یہ آنکھیں

 

اُمت کے لئے روئیں جو اِن آنکھوں کے صدقے

اعظم کو بھی تو اپنا سمجھتی ہیں یہ آنکھیں

٭٭٭

 

 

۳

 

اِسی کو مانو خدا کے بندوں ہے اِس میں لُطفِ دوام اُن کا

یقینِ  کامل سے کہہ رہا ہوں نِظام حق ہے نِظام اُن کا

 

نبی ہزاروں ہی آئے لیکن کسی نے یہ مرتبہ نہ پایا

یہ شان ہے بس مرے نبیﷺ کی ہے عرشِ اعلیٰ مقام اُن کا

 

جبینِ عرش علیٰ پہ لکھا خدا نے نامِ  رسول اکرمﷺ

خدا کا فضل و کرم ہے اُن پر بہت ہی اونچا ہے نام اُن کا

 

یہ ایک اُمی ّ کی شان دیکھو مثال اُن کی ملی نہ اَب تک

کہ ساری دنیا کے فلسفی بھی سمجھ نہ پائے مقام اُن کا

 

میں ناز کیسے کروں نہ خود پر؟کہ اُمتی ہوں حبیبِ حق کا

وہ میرے آقا ہیں سب سے اعلیٰ بہت ہے اچھا کلام اُن کا

 

جِسے کہ روح الامیں لائے وہی تو وحیِ خدا ہے بے شک

خدا کی جانب سے جو بھی آیا وہی بنا ہے کلام اُن کا

 

اِنہی کی رحمت کا ہے یہ صدقہ نصیب میرا کہاں ہے ایسا

کرم اِنہی کا ہوا ہے اعظم لکھا قلم نے جو نام اُن کا

٭٭٭

 

 

 

۴

 

لو آ گئے لو آ گئے سر کارﷺ آ گئے

بگڑی  بنانے سیدِ ابرارﷺ آ گئے

 

آنکھیں تھیں بند اور مقدر چمک اٹھا

آنکھوں میں دو جہان کے سردارﷺ آ گئے

 

دیکھا جسے تو ہو گیا اللہ کا یقیں

قدرت کا لے کے آپ وہ شاہکار آ گئے

 

دائی حلیمہ تو نے پایا ہے وہ  مقام

جھولے میں تیرے نبیوں کے سردارﷺ آ گئے

 

جس نے کیا ہے آن میں ظلمت گری کو دور

سرکارﷺ کے کرم سے وہ انوارﷺ آ گئے

 

مکے کے ریگزارو پہ بھی چھا گئی بہار

دامن میں لے کے اپنے وہ گُلزار آ گئے

 

دیکھا رسولِ پاکﷺ کو کفار کہہ اٹھے

صادق امینﷺ صاحبِ کردارﷺ آ گئے

 

کونین کی فضاؤں میں اِک نور چھا گیا

دنیا میں غم کے ماروں کے غمخوارﷺ آ گئے

 

میری نگاہِ شوق بھی سجدے میں گر گئی

جب سامنے وہ گنبد و مینار آ گئے

 

میں نے کیا جو ورد درود و سلام کا

جلوہ دکھانے احمدِ  مختارﷺ آ گئے

 

اعظم نے جب حضور کو دیکھا بروزِ  حشر

اِس کے لبوں پہ نعت کے اشعار آ گئے

٭٭٭

 

 

 

 

اسحاق ساجد

 

 

ہو جائے گا جس کو بھی دیدار محمد کا

فردوس میں جائے گا بیمار محمد کا

 

جو نام فقط لے گا اک بار محمد کا

بھرے گا وہ دامن میں سب پیار محمد کا

 

جنت کی ہواؤں کی سانسوں میں مہک ہو گی

جس دِل میں بسا ہو گا گلزار محمد کا

 

پڑھتا ہے مسلسل جو ہر روز درُود اُن پر

ہوتا ہے فدا اُس پر گھر بار محمد کا

 

دُنیا بھی اُسی کی ہے عُقبیٰ بھی اُسی کا ہے

جس دِل کو لگا ہو گا ازار محمد کا

 

رستہ بھی نہ بھٹکے گا منزل پہ بھی پہنچے گا

ہو جس کی نگاہوں میں کردار محمد کا

 

تھا قیصر و کسریٰ کے دربار سے بھی اعلی

لگتا تھا جو حجرے میں دربار محمد کا

٭٭٭

 

 

خورشید رضوی

 

 

لمس احمد کے لئے چشمِ براہ زنگ آلود

خانہ دل پہ پڑا قفل گنہ زنگ آلود

 

یا نبی ایک نظر، جو اسے محکم کر دے

جوش پیکار میں ہے میری زرہ زنگ آلود

 

نیم شب گریہ خلوت مجھے ارزانی ہو

دور حاضر کی ہوا سے ہے مژہ زنگ آلود

 

ہو وہ فیضان کہ سینہ مرا ہلکا ہو جائے

بار آہن ہے کوئی دل کی جگہ زنگ آلود

 

تیرے پیغام کی جدت نہیں کھلتی اس پر

کتنی صدیوں سے ہے امت کی نگہ زنگ آلود

 

منتظر پھر الف صیقل انگشت کا ہے

سالہا سال سے آئینہ مہ زنگ آلود

 

بخش دے ایک تسلسل اسے تابانی کا

گاہ تاباں دلِ خورشید ہے  کہ زنگ آلود

٭٭٭

 

 

 

اصغر گونڈوی

 

کچھ اور عشق کا حاصل نہ عشق کا مقصود

جزآنیکہ لطفِ خلش ہائے نالۂ بے سود

 

مگر یہ لطف بھی ہے کچھ حجاب کے دم سے

جو اٹھ گیا کہیں پردہ تو پھر زیاں ہے نہ سود

 

ہلائے عشق نہ یوں کائناتِ عالم کو

یہ ذرّے دے نہ اٹھیں سب شرارۂ مقصود

 

کہو یہ عشق سے چھیڑے تو سازِ ہستی کو

ہر ایک پردہ میں نغمۂ ’’ہُو الموجود‘‘

 

یہ کون سامنے ہے؟ صاف کہہ نہیں سکتے

بڑے غضب کی ہے نیرنگیِ طلسمِ نمود

 

اگر خموش رہوں میں، تو تُو ہی سب کچھ ہے

جو کچھ کہا، تو ترا حسن ہو گیا محدود

 

جو عرض ہے، اُسے اشعار کیوں مرے کہیے

اچھل رہے ہیں جگر پارہ ہائے خوں آلود

 

نہ میرے ذوقِ طلب کو ہے مدّعا سے غرض

نہ گامِ شوق کو پروائے منزلِ مقصود

 

مرا وجود ہی خود انقیاد و طاعت ہے

کہ ریشہ ریشہ میں ساری ہے اِک جبینِ سجود

 

مقامِ جہل کو پایا نہ علم و عرفاں نے

میں بے خبر ہوں باندازۂ فریب شہود

 

جو اڑ کے شوق میں یوں محوِ آفتاب ہوا

عجب بلا تھا یہ شبنم کا قطرۂ بے بود

 

چلوں، میں جانِ حزیں کو نثار کر ڈالوں

نہ دیں جو اہلِ شریعت، جبیں کو اذنِ سجود

 

وہ رازِ خلقتِ ہستی، وہ معنیِ  کونین

وہ جانِ حُسنِ ازل، وہ بہارِ صبحِ وجود

 

وہ آفتابِ حرم، نازنینِ کُنجِ حرا

وہ دِل کا نور، وہ اربابِ درد کا مقصود

 

وہ سرورِ دو جہاں، وہ مُحمّدِ عربی

بہ روحِ اعظم و پا کش درودِ لامحدود

 

صبائے حُسن کا ادنیٰ سا یہ کرشمہ ہے

چمک گئی ہے شبستانِ غیب و بزمِ شہود

 

نگاہِ ناز میں پنہاں ہیں نکتہ ہائے فنا

چھُپا ہے خنجرِ ابرو میں رمزِ ’’لا موجود‘‘

 

وہ مستِ شاہدِ رعنا، نگاہ سحر طراز

وہ جام نیم شبی نرگسِ خمار آلُود

 

کچھ اس ادا سے مِرا اُس نے مدّعا پوچھا

ڈھلک پڑا مری آنکھوں سے گوہرِ مقصود

 

ذرا خبر نہ رہی بوش و عقلِ ایماں کی

یہ شعر پڑھ کے وہیں ڈال دی جبینِ سجود

 

‘‘چو بعد خاک شدن یا زیاں بود یا سود

بہ نقد خاک شوم بنگرم چہ خواہد بُود‘‘ ×

× رومی

٭٭٭

 

 

 

حافظ مظہر الدین مظہر

 

اے کہ ہے حسن ترا زینت و عنوانِ جمال

اے کہ ہے ذات تری یوسف کنعانِ جمال

 

اے کہ ہے نور ترا روغنِ تصویرِ وجود

اے کہ ہے نام ترا رونقِ ایوانِ جمال

 

اے کہ زلفوں سے تری عشق کی شامیں روشن

اے کہ چہرہ ہے ترا صبح درخشانِ جمال

 

جز ترے کون ہے مخدومِ جہانِ خوباں

جز ترے کون ہے کونین میں سلطانِ جمال

 

یاد تیری ہے انیسِ دل جبریلِ امیں

تذکرہ تیرا ہے موضوعِ ثنا خوانِ جمال

 

تھی سلیماں کو فقط ملکِ سبا تک شاہی

دونوں عالم کے لیے تو ہے سلیمانِ جمال

 

زندگی مدحِ شہ کون و مکاں میں‌گزری

ہو سکا شعر کوئی پھر بھی نہ شایانِ جمال

 

کب ترا حسن ہے محتاجِ ثنائے دگراں

کہ تری ذات ہے خود حجت و برہانِ جمال

 

دیدہ ور ہوں ، مرا معیار نظر ٹھہرے ہیں

تیرے مشتاقِ لقا ، تیرے شہیدانِ جمال

 

آ کریں حلقہ بگوشانِ نبی کی باتیں

کہ ہے جاں بخش بہت ذکرِ ندیمانِ جمال

 

میری نظروں میں بھی اک دن تھا جمالِ طیبہ

میں بھی اک روز مدینے میں تھا مہمانِ جمال

 

مانگ اللہ سے اندازِ نگاہِ صدیق

کوئی آساں نہیں سرکار کا عرفانِ جمال

 

غمِ دنیا ہے نہ اندیشہ عقبی کوئی

بے نیازِ غمِ کونین ہیں مستانِ جمال

 

کوچہ کوچہ ہے شہِ دیں کے وطن کا فردوس

گوشہ گوشہ ہے مدینے کا گلستانِ جمال

 

حیدر و فاطمہ ہیں باغِ محمد کی بہار

ہیں حسین اور حسن سنبل و ریحانِ جمال

 

مظہرِ شانِ خدا ، خسرو ملکِ خوبی

ایک جلوے کو ترستے ہیں گدایانِ جمال

٭٭٭

 

 

 

 

محمد اعظم چشتی

 

 

ایسا کوئی محبوب نہ ہو گا نہ کہیں ہے

بیٹھا ہے چٹائی پہ مگر عرش نشیں ہے

 

مِلتا نہیں کیا کیا، دو جہاں کو ترے در سے؟

اِک لفظ ‘‘نہیں‘‘ ہے، کہ ترے لب پہ نہیں ہے

 

تُو چاہے تو ہر شب ہو مثالِ شبِ اسریٰ

تیرے لئے دو چار قدم عرش بریں ہے

 

رُکتے ہیں وہیں جا کے قدم اہلِ نظر کے

اُس کوچے کے آگے نہ زماں ہے نہ زمیں ہے

 

ہر اِک کو مُیّسر کہاں اُس در کی غُلامی

اُس در کا تو دربان بھی جبریلِ امیں ہے

 

دل گریہ کناں اور نظر سُوئے مدینہ

اعظم ترا اندازِ طلب کتنا حسیں ہے

٭٭٭

 

 

 

نوشی گیلانی

 

 

بہ احتیاطِ عقیدت بہ چشمِ تر کہنا

صبا حضور سے حالِ دل و نظر کہنا!

 

حصارِ جبر میں ہوں اور یہاں سے بھی ہجرت

مَیں جانتی ہُوں کہ ممکن نہیں مگر‘ کہنا

 

میں خاک شہرِ مدینہ پہن کے جب نکلوں

تو مُجھ سے بڑھ کے کوئی ہوگا معتبر کہنا

 

یہ عرض کرنا کہ آقا مِری بھی سُن لیجے

بحبز تمُھارے نہیں کوئی چارہ گر کہنا

 

مَیں اپنی پَلکوں سے لکھتی ہُوں حرفِ نامِ رسُول

مُجھے بھی آگیا لکھنے کا اب ہُنر کہنا

 

یہ کہنا اب تو ہمیں تابِ انتظار نہیں

کہ ہم کریں گے مدینے کا کب سفر کہنا

٭٭٭

 

 

 

 

محمد احمد

 

 

نہ رخشِ عقل، نہ کسب و ہنر کی حاجت ہے

بنی کی نعت ریاضت نہیں، سعادت ہے

 

یہ کافروں کا بھی ایماں تھا اُن کے بارے میں

جو اُن کے پاس امانت ہے، با حفاظت ہے

 

ہے امر اُن کا ہمارے لیے خدا کا امر

کہ جو ہے اُن کی اطاعت، خدا کی طاعت ہے

 

ہے اُن کا ذکرِ گرامی عروجِ نطق و بیاں

یہ اُن کی نعت مِرے شعر و فن کی عظمت ہے

 

مجھ ایسا عاصی و تقصیر وار کیسے کہے

رسولِ پاک مجھے آپ سے محبت ہے

 

کہاں ہے لائقِ شانِ نبی مرا لکھا

مگر یہ حرفِ شکستہ بھی رشکِ قسمت ہے

٭٭٭

 

 

 

 

 

شاہین رضوی

 

 

اقلیم قلم کو نۓ اطوار عطا کر

آنکھوں کو مری دیدہ بیدار عطا کر

 

بخشش کے طلب گار ہیں اے منبع رحمت

گریہ کو میری لذت تکرار عطا کر

 

لاریب ہے ہستی تری ہر سمت ہے قدرت

قرآن سے الفت کے تو اطوار عطا کر

 

آتی ہو مہک باغ ارم کی جہاں ہر دم

یارب مجھے ایسا کوئ گھر بار عطا کر

 

طلائے قلم سے لکھوں میں مدحت باری

فرہنگ محبت کے وہ معیار عطا کر

 

بجھ جاۓ نہ سورج میری افکار خرد کا

افکار کے حجرے کو وہ انوار عطا کر

٭٭٭

 

 

 

مولانا سبطین حسنی

 

شاید مرا قرینۂ دستک بجا نہ تھا

ورنہ جہاں میں کس کا وہ مشکل کشا نہ تھا

 

پہنچا ہے اسکا نام بھی باب قبول تک

تنہا اٹھا ہوا مرا دست دعا نہ تھا

 

شاید مری سماعت باطن ہی سرد تھی

وہ گنبد کرم تو کبھی بے صدا نہ تھا

 

اس کے درود پوش تصور کے رو برو

تھا کون سا فلک جو زمیں پر جھکا نہ تھا

 

بینا ہوں میں یہ فیض تری روشنی کا ہے

ورنہ تو کوئی چاند ستارا مرا نہ تھا

 

سونپی خود اپنے گھر کو وصیت میں کربلا

اس سے بڑا ثبوت وجود خدا نہ تھا

 

لایا جو اسکی نعت تو لہجہ سنور گیا

ورنہ رہ سخن میں کوئی راستا نہ تھا

 

مولا ترا نصاب مؤدت پڑھے بغیر

کوئی عمل بھی ضامن روز جزا نہ تھا

٭٭٭

 

 

 

عبداللہ ناظر

 

مدینہ جا کے دیکھیئے کہ ہیں جہاں تجلّیاں

خدا کے فضل سے حضور کی عیاں تجلّیاں

 

قرارِ فکر اور سکون قلب و جاں تجلّیاں

بنور مصطفی ہیں اپنی پاسباں تجلّیاں

 

نفس نفس میں بوئے گل رچی ہوئی بسی ہوئی

ہر ایک سو نبی کی ہیں تجلّیاں تجلّیاں

 

خدا کے ساتھ آپ کا بھی ذکر ہے زبان پر

ہمارے آس پاس ہیں یہاں وہاں تجلّیاں

 

کرم سے آپ کے نہ کیوں فضائے سرخوشی ملے

حریمِ ناز میں ہیں جب رواں دواں تجلّیاں

 

یقیں نہ آئے تو چلو دکھاؤں ہر نماز میں

نبوّت رسول کی ہیں ترجماں تجلّیاں

 

گناہگار ناظر جہانِ رائگاں ہوں میں

حضور سر پہ بن گئی ہیں سائباں تجلّیاں

٭٭٭

 

 

 

 

ثمینہ راجہ

 

 

 

عالمِ  ہست و بود میں اس کے سوا بھلا ہے کیا

پیشِ  نظر خدا کے بھی جُز رخِ  مصطفیٰ ہے کیا

 

وہم و گماں ہیں ہر طرف ،کذب و ریا ہیں ہر طرف

ذاتِ  رسول کے سوا، سچ کوئی دوسرا ہے کیا

 

خود ہی کِیا ہے ترک جب منزلِ  خوش خیال کو

اُمتِ  خستہ حال کا اب کوئی راستہ ہے کیا

 

رات نہ کیسے سخت ہو کیوں نہ سیاہ بخت ہو

اپنے ستارے کو کوئی راہ میں چھوڑتا ہے کیا

 

چاروں طرف ہے غم کا جال، چل گیا آسماں وہ چال

حاصلِ  عمر ہے ملال اور ہمیں ملا ہے کیا

 

شہر بہت اداس ہے چاروں طرف ہراس ہے

خیر کی ہم کو آس ہے، خیر ترے سوا ہے کیا

 

خواہشیں ہو گئیں قفس، قید ہوا نفس نفس

شمعِ  یقیں ہے اور بس، گھر میں بھلا دھرا ہے کیا

 

ٹوٹے ہوئے ہیں سارے لوگ،رونے لگے ہیں سارے لوگ

پوچھ رہے ہیں سارے لوگ،آپ کا آسرا ہے کیا

 

بارہ برس رہے تھے آپ بھی تو حلیف کے بغیر

ذات ہے کیا بھلا مری، رنج مرا بھلا ہے کیا

 

خواب میں میرے آئیے، در پہ کبھی بلائیے

اور ہے عرض کیا مری اور مری دعا ہے کیا

 

موجۂ عطر بیز کے ہم بھی ہیں کب سے منتظر

شہرِ حبیب کی ہَوا! اب ترا فیصلہ ہے کیا

 

جتنے بھی حرفِ سبز تھے مدح میں لوگ لکھ گئے

شاخِ  نیاز پر مری پھول کوئی نیا ہے کیا

٭٭٭

 

 

 

 

سہیل احمد صدیقی

 

 

ترجمہ جامیؔ

 

 

 

درود اُس نور پہ جس سے، ہوئے سب نور ہیں پیدا

زمیں ساکن ہوئی حُب میں، ہوا ہے آسماں شیدا

 

محمد ، احمد و محمودﷺ،  انھیں خالق نے فرمایا

کہ جن سے ہر کوئی موجود ،ہوا ہے دیدۂ بینا

 

اگر آدم(علیہ السلام) شفاعت کو محمد (ﷺ)نام نہ لیتے

نہ نوح(علیہ السلام)پاتے نجات آخر، قبول ہوتی نہ یوں توبہ

 

وہ اُن کی نرگسی آنکھیں کہ مازاغ البصر خانن

وہ اُ ن کی عنبریں زلفیں  کہ واللیلِ  اذا یغشیٰ

 

ہے اُن کے سینے سے جامی  الم نشرح لک برخیٰ

جو معراجِ نبی (ﷺ) پوچھے تو سبحان الذی اسریٰ

٭٭٭

 

 

 

 

مولانا احمد رضا خان

 

 

مصطفی صلی اللہ علیہ و سلم جان رحمت پہ لاکھوں سلام

شمعِ بزمِ ہدایت پہ لاکھوں سلام

 

شہر یار ارم ، تاجدارِ حرم

نو بہارِ شفاعت پہ لاکھوں سلام

 

ہم غریبوں کے آقا پہ بے حد درود

ہم فقیروں کی ثروت پہ لاکھوں سلام

 

جس کے ماتھے شفاعت کا سہرا رہا

اس جبینِ سعادت پہ لاکھوں سلام

 

جس کے سجدے کو محرابِ کعبہ جھکی

ان بھوؤں کی لطافت پہ لاکھوں سلام

 

جس طرف اٹھ گئی دم میں دم آگیا

اس نگاہِ عنایت پہ لاکھوں سلام

 

جس سے تاریک دل جگمگانے لگے

اس چمک والی رنگت پہ لاکھوں سلام

 

پتلی پتلی گلِ قدس کی پتیاں

ان لبوں کی نزاکت پہ لاکھوں سلام

 

وہ دہن جس کی ہر بات وحی خدا

چشمۂ علم و حکمت پہ لاکھوں سلام

 

وہ زبان جس کو سب کُن کی کنجی کہیں

اس کی نافذ حکومت پہ لاکھوں سلام

 

جس کی تسکیں سے روتے ہوئے ہنس پڑیں

اس تبسم کی عادت پہ لاکھوں سلام

 

ہاتھ جس سمت اُٹھا ، غنی کر دیا

موجِ بحرِ سخاوت پہ لاکھوں سلام

 

کُل جہاں ملک اور جو کی روٹی غذا

اس شکم کی قناعت پہ لاکھوں سلام

 

جس سہانی گھڑی چمکا طیبہ کا چاند

اس دل افروز ساعت پہ لاکھوں سلام

 

اللہ اللہ وہ بچپنے کی پھبن

اس خدا بھاتی صورت پہ لاکھوں سلام

 

جس کے آگے کھنچی گردنیں جھک گئیں

اس خدا داد شوکت پہ لاکھوں سلام

 

ایک میرا ہی رحمت پہ دعویٰ نہیں

شاہ کی ساری امت پہ لاکھوں سلام

 

مجھ سے خدمت کے قدسی کہیں ہاں رضا

مصطفیٰ (صلی اللہ علیہ و سلم) پہ لاکھوں سلام

٭٭٭

 

 

 

 

ساغر صدیقی

 

 

جاری ہے دو جہاں پہ حکومت رسول  کی

کرتے ہیں مہر و ماہ اطاعت رسول  کی

 

ایماں ایک نام ہے حب رسول  کا

ہے خلد کی بہار محبت رسول  کی

 

نوک مژہ پہ جن کی رہے اشک کربلا

پائیں‌گے حشر میں وہ شفاعت رسول  کی

 

غار حرا کو یاد ہیں سجدے رسول ‌کے

دیکھی ہیں پتھروں‌کے عبادت رسول کی

 

دامان عقل و ہوش سہارا نہ دے

چاہت خدا کی بن گئی چاہت رسول  کی

 

ساغر تمام عالم ہستی ہے بے حجاب

آنکھوں میں بس رہی ہے وہ خلوت رسول کی

٭٭٭

 

 

 

 

سعادت حسن آس

 

۱

تو روحِ کائنات ہے تو حسن کائنات

پنہاں ہیں تیری ذات میں رب کی تجلیات

 

ہر شے کو تیری چشمِ عنایت سے ہے ثبات

ہر شے میں تیرے حسنِ مکمل کے معجزات

 

کونین کو ہے ناز تیری ذاتِ پاک پر

احسان مند ہیں تیری ہستی کے شش جہات

 

پژ مردہ صورتوں کو ملی تجھ سے زندگی

نقطہ وروں کو سہل ہوئیں تجھ سے مشکلات

 

ظلمت کدوں میں نور کے چشمے ابل پڑے

رحمت سے تیری ٹل گئی ظلم و ستم کی رات

 

تاروں کو ضو فشانیاں تجھ سے ہوئیں نصیب

پھولوں کی نازکی پہ تیری چشمِ التفات

 

ہر شے میں زندگی کی کرن تیری ذات سے

افشا یہ راز کر گئی معراج کی وہ رات

 

اپنے دل و نگاہ کے آئینے صاف رکھ

گر دیکھنے کی چاہ ہے تجھ کو نبی کی ذات

 

کن الجھنوں میں پڑ گیا واعظ خدا سے ڈر

بالا ہے تیری سوچ سے سرکار کی حیات

 

انکی محبتوں کا گزر ہے خیال میں

یونہی نہیں ہیں آس کی ایسی نگارشات

٭٭٭

 

 

 

۲

 

ملے جس سے قلب کو روشنی وہ چراغِ مدحِ رسول ہے

نہیں جس میں یاد حضور کی وہ تمام عمر فضول ہے

 

تجھے دل میں جس نے بسا لیا تجھے جس نے اپنا بنا لیا

یہ جہان اس کی نگاہ میں فقط اک سراب ہے دھول ہے

 

جو ترا ہوا وہ مرا ہوا جو ترا نہیں وہ مرا نہیں

یہ کلام حق کا ہے فیصلہ یہ خدا کا واضح اصول ہے

 

تری رفعتیں کروں کیا بیاں ترے معترف سبھی انس و جاں

ترا تذکرہ ہے جہاں جہاں وہاں رحمتوں کا نزول ہے

 

کبھی اس کا رنگ نہ اڑ سکا کبھی اس کی باس نہ کم ہوئی

مری شاعری کی جبین پر جو تمہاری نعت کا پھول ہے

 

اسے تخت و تاج سے کیا عرض اسے مال و زر سے ہے کام کیا

جو پڑا ہے طیبہ کی خاک پر جو گدائے کوئے رسول ہے

 

وہی شمعِ محفلِ کن فکاں وہی دو جہانوں کا ناز ہے

جہاں کوئی آس نہ جا سکا وہاں ان کے قدموں کی دھول ہے

٭٭٭

 

 

 

صادق اندوری

 

 

زمین پہ تاج شہنشاہی ہے

فلک پہ اورنگ سروری ہے

حرا میں وہ قابلِ وحی ہے

جہاں میں سالار امتی ہے

زبان و دل کی صدا یہی ہے

رسول برحق مرا نبی ہے

 

وہ کوہ فاراں کی روشنی ہے

ہر اک طرف اس کی چاندنی ہے

دکھے دلوں کی وہ تازگی ہے

خدا کا محبوب واقعی ہے

پیمبر امن و آشتی ہے

رسول برحق مرا بنی ہے

 

عظیم سے ہے عظیم تر وہ

بھٹکتے انساں کا راہبر وہ

ہر  اک جگہ ذات معتبر وہ

وہ فاقہ کش، پھر بھی مفتخر،وہ

یتیم و بے کس کی زندگی ہے

رسول برحق مرا نبی ہے

 

کہیں ورا، ماورا کہیں وہ

قدم قدم آشنا کہیں وہ

اک آئینہ با صفا کہیں وہ

کہیں شروع ، انتہا کہیں وہ

اسی کے دم سے ہمہ ہمی ہے

رسول برحق مرا نبی ہے

 

جمال یوسف کا وہ انادہ

خلیل کے عزم کا وہ جادہ

کلیم کے قرب کا اعادہ

مسیح کی نفس کا ارادہ

ہر اک نبی کی صفت ملی ہے

رسول برحق مرا نبی ہے

 

 

کدورتوں کو مٹانے والا

وہ ظلمتوں کو ہٹانے والا

محبتوں کو لٹانے والا

ہر ایک کا دکھ اٹھانے والا

تمام مینار روشنی ہے

رسول برحق مرا نبی ہے

 

یتیم و بے کس کا آسرا وہ

غریب و مفلس کا حوصلہ وہ

خدائے اقدس کا لاڈلا وہ

تمام نبیوں کا سلسلہ وہ

ہر اک نظر اس کو دیکھتی ہے

رسول برحق مرا نبی ہے

 

حقوقِ ہستی دلانے والا

سوئے صداقت بلانے والا

بشر کو حق سے ملانے والا

خدا کا پیغام لانے والا

وہ جبرئیل اس کا ایلچی ہے

رسول برحق مرا نبی ہے

٭٭٭

 

 

 

مظفر وارثی

 

نہ میرے سخن کو سخن کہو نہ مری نوا کو نوا کہو

میری جاں کو صحنِ حرم کہو مرے دل کو غارِ حرا کہو

 

میں لکھوں جو مدحِ شہہِ اُمم اور جبرائیل بنیں قلم

میں ہوں ایک ذرۂ بے درم، مگر آفتابِ ثناء کہو

 

طلبِ شہِ عربی کروں، میں طوافِ حُبِ نبی کروں

مگر ایک بے ادبی کروں مجھے اُس گلی کا گدا کہو

 

نہ دھنک، نہ تارا، نہ پھول ہوں قدمِ حضور کی دھُول ہوں

میں شہیدِ عشقِ رسول ہوں مری موت کو بھی بقا کہو

 

جو غریب عشق نورد ہو اُسے کیوں نہ خواہشِ درد ہو

میرا چہرہ کتنا ہی زرد ہو میری زندگی کو ہرا کہو

 

ملے آپ سے سندِ وفا ہوں بلند مرتبۂ صفا

میں کہوں محمدِ مصطفیٰ کہو تم بھی صلے علیٰ کہو

 

وہ پیام ہیں کہ پیامبر وہ ہمارے جیسا نہیں مگر

وہ ہے ایک آئینۂ بشر مگر اُس کو عکسِ خدا کہو

 

یہ مظفر ایسا مکین ہے کہ فلک پہ جس کی زمین ہے

یہ سگِ براق نشین ہے اسے شہسوارِ صبا کہو

٭٭٭

 

 

 

پروفیسر محمد حسین آسی

 

 

 

نے سکندر کی ، نہ کچھ دارا و جم کی بات ہے

واہ ہم ہیں ،اور نبیِ محتشم کی بات ہے

 

اوج قسمت کا مرے اندازہ کر سکتا ہے کون

میرے لب پہ خواجہ لوح و قلم کی بات ہے

 

خود رفعنا کہہ کہ رفعت دی خدائے پاک نے

کتنی اونچی دیکھیئے شاہِ حرم کی بات ہے

 

مجھ سا ناداں معنی حم کیا سمجھے مگر

گیسوئے والیل کے کچھ پیچ و خم کی بات ہے

 

قوم و قریہ تک نہیں محدود ان کی رحمتیں

ان سے وابستہ تمام عرب و عجم کی بات ہے

 

بیوفائی اور وہ بھی رحمت کونین سے

مرد مومن! سوچ یہ کتنے ستم کی بات ہے

 

فیصلہ ایماں سے کر ، عقل تیرہ سے نہ کر

ان کا قرب و بعد ہی بود و عدم کی بات ہے

 

ان کے دشمن کی ذرا عزت نہیں دل میں مرے

مجھ کو اچھا ہی نہیں لگتا، قسم کی بات ہے

 

کون اے جان مسیحا سن سکے تیرے سوا

آہ یہ اک کشتہ رنج و الم کی بات ہے

 

نقش لاثانی کا آسی ذکر ہے وجہ سکوں

کیوں نہ ہو اک مظہر فیض اتم کی بات ہے

٭٭٭

واصف علی واصف

 

 

ائے شہ انس و جاں جمالِ جمیل

تجھ پہ تخلیقِ حسن کی تکمیل

 

رہبرِ انبیا و ختم رسل

ذاکر و تذکرہ ربِ جلیل

 

دمِ عیسی کہ ہو یدِ  بیضیٰ

والضحی کی نہ مثل ہے نہ مثیل

 

نورِ مطلق کا راز دار و امیں

افتخارِ جہاں ہے فخرِ خلیل

 

سایۂ نور مصطفی ناپید

نور لایا ہے تور ہی کی دلیل

 

بانی دینِ حق نبی کریم

دینِ فطرت سلامتی کا کفیل

 

ہے حلیمہ کی بکریوں والا

بزم ہستی میں نور کی قندیل

 

گوڈری پوش راز الا اللہ

تجھ پہ شیدا خدا تو ایسا شکیل

 

آپ کی بات آیتِ قرآں

آپ ہی کے لیے قول ثقیل

 

آپ ہی کی زباں ہے حق گویا

آپ پر ہے کلام کی تنزیل

 

نالہ نیم شب کا سرچشمہ

یا نبی جاگئے گا الا قلیل

 

تو شفیق اور رحمتِ عالم

محسن انس و جاں حسین و جمیل

 

عقل و دانش غلام ہیں تیرے

فہم و ادراک سے ورا ہے عقیل

 

مدعا ، منتہی ، مرادِ حیات

جادہ شوق میں امام سبیل

 

آستانِ نبی ہے فخر زمیں

آسماں سرنگوں پئے تقبیل

 

چشم مازاغ ، رخ کلام اللہ

اور والیل ہی ہے زلفِ طویل

 

مظہر کبریا ہے ذاتِ نبی

بزم امکان ہے اخیر و قبیل

 

خواجہ دوجہاں کی کیا ہو ثنا

خود ثنا خواں ہوا ہے ربِ جلیل

 

کیا بیاں ہو سکے گی شانِ نبی

بعد حق کے توئی شکیل و جزیل

 

اک نگاہِ کرم نبی کریم

مجھ پہ کیجے بحق اسمعیل

 

آپ کے در پہ سر رہے ہر دم

معصیت معرفت میں ہو تبدیل

 

یا محمد صدا ہو وردِ زباں

پائے ساقی پہ ہو میری تکمیل

 

راز شاہِ امم ہیں شاہِ نجف

قصہ کوتاہ ہے بات بالتفصیل

 

جب توجہ میں آگیا واصف

تو جنوں سے خرد کی ہے تشکیل

٭٭٭

 

 

 

خالد علیم

 

ترے فراق کا غم ہے مجھے نشاط انگیز

یہی ہے راہرو شوق کے لیے مہمیز

 

اِسی کے نم سے ہے باقی مری نگاہ کا نور

اِسی کے سوز سے ہے ساز دل نوا آمیز

 

اِسی کا جذب خوش آہنگ ہے نظر میں کہ آج

مرا کدو ہے مئے سلسبیل سے لبریز

 

یہی ہے نغمہ‘ دل افروز ساز جاں کے لیے

اِسی سرود سے پیدا ہے جوہر تبریز

 

اِسی کی ضرب سے تارِ ربابِ جاں میں سرور

اِسی کا لحن ہے دل کے لیے سکوں آمیز

 

مرے کلام میں تاثیر اِسی کے دم سے ہے

اِسی سے فکر کی بنجر زمین ہے زرخیز

 

یہ آرزو ہے بہشت حجاز میں پہنچے

یہی زمین ہے خالد کو خلد عنبر بیز

 

مرے کریم! کرم ہو کہ پھر زمانے میں

حریف ملت اسلام ہے جہان ستیز

 

ہو کوئی چارہ کہ غارت گری ہے شیوہ کفر

بپا ہے ارض مقدس پہ فتنہ چنگیز

 

اسی سے لرزہ بر اندام خاک بوسنیا

اسی کے شر سے دل سرب تھا شرار انگیز

 

نظر فروز ہو آئینہ نگاہ ترا

کہ کھا گئی ہے بصارت کو دانش انگریز

 

جہان کفر اسی کی عطا سے زندہ ہے

اسی کے فیض سے اب تک ہے جام جم لبریز

 

اُدھر یہود و نصاریٰ کے بڑھ رہے ہیں قدم

اِدھر ہوئی تری امت کے دل کی دھڑکن تیز

 

یہ تیرے چاہنے والے، یہ تیرے اہل صفا

کریں گے اور کہاں تک جہاد حق سے گریز

٭٭٭

 

 

 

احمد فراز

 

مرے رسول کہ نسبت تجھے اجالوں سے

میں تیرا ذکر کروں صبح کے حوالوں سے

 

نہ میری نعت کی محتاج ذات ہے تیری

نہ تیری مدح ہے ممکن مرے خیالوں سے

 

تُو روشنی کا پیمبر ہے اور مری تاریخ

بھری پڑی ہے شبِ ظلم کی مثالوں سے

 

ترا پیام محبت تھا اور میرے یہاں

دل و دماغ ہیں پُر نفرتوں کے جالوں سے

 

یہ افتخار ہے تیرا کہ میرے عرش مقام

تو ہمکلام رہا ہے زمین والوں سے

 

مگر یہ مفتی و واعظ یہ محتسب یہ فقیہہ

جو معتبر ہیں فقط مصلحت کی چالوں سے

 

خدا کے نام کو بیچیں مگر خدا نہ کرے

اثر پذیر ہوں خلقِ خدا کے نالوں سے

 

نہ میری آنکھ میں کاجل نہ مُشکبُو ہے لباس

کہ میرے دل کا ہے رشتہ خراب حالوں سے

 

ہے تُرش رو مری باتوں سے صاحبِ منبر

خطیبِ شہر ہے برہم مرے سوالوں سے

 

مرے ضمیر نے قابیل کو نہیں بخشا

میں کیسے صلح کروں قتل کرنے والوں سے

 

میں بے بساط سا شاعر ہوں پر کرم تیرا

کہ باشرف ہوں قبا و کلاہ والوں سے

٭٭٭

 

 

 

شمس جیلانی

 

 

 

فرشتوں سے بھی افضل ہیں مکینِ  گنبدِ  خضرا

زمیں جنت کا ٹکڑا ہے  زمینِ گنبدِ  خضرا

 

نہ ایسا حسن دنیا میں نہ یہ سیرتِ انسانی

حسینوں میں حسیں ٹھہرا ،حسینِ  گنبد خضرا

 

علی کو چھوڑ آئے وہ کہ پہنچائیں امانت کو

کوئی تم سا نہیں دیکھا امینِ  گنبد خضرا

 

بہت اغیار نے سوچا فنا کر دیں گے ہم دیں کو

رہا ا َدیان پر غالب ، یہ دینِ  گنبدِ  خضرا

 

بہت ہی وسوسے ڈالے شیاطیں نے بھی جھٹلایا

دلوں سے کب نکل پایا ! یقینِ  گنبدِ  خضرا

 

جو پایا شمس ہے میں نے عطا ہے میرے آقا کی

مری ہر ایک ہی کا وش رہینِ  گنبدِ  خضرا

٭٭٭

 

 

 

کنور مہندر سنگھ بیدی

 

ہم کسی دین سے ہوں صاحبِ کردار تو ہیں

ہم ثناء خوانِ شہِ حیدرِ کرار تو ہیں

 

نام لیوا ہیں محمد کے پرستار تو ہیں

یعنی مجبور پئے احمدِ مختار تو ہیں

٭٭

 

عشق ہو جائے کسی  سے کوئی چارہ تو نہیں

صرف مسلم کا محمد صلی پہ اجارہ تو نہیں

٭٭٭

 

ماخذ:

http://www.aalmiakhbar.com/index.php?mod=article&cat=naat

تدوین اور ای بک کی تشکیل: اعجاز عبید