پسندیدہ کتابوں میں شامل کریں

 

 

 

 

خلوتِ جاں

 

 

 

 

علامہ طالب جوہری

 

 

کتب: پسِ آفاق ، حرفِ نمو

انتخاب: نوید صادق، احمد فاروق

 

میرا آنسو تیری آنکھ سے ٹپکا ہے

 

جوگی رستہ بھول گیا تھا ڈیرے کا

 

****

 

 

ڈھل گیا دن اور لمبے ہو گئے پیڑوں کے سائے

 

تک رہا ہے کب سے تیری راہ گاڑی بان،جا

 

****

 

اُس کا ہر انداز سجیلا بانکا تھا

کچھ تو بتاؤ وہ خوش پوش کہاں کا تھا

 

ایک طرف سے کھلی ہوئی تھی شیر کی راہ

لیکن اس پر تین طرف سے ہانکا تھا

 

مت گھبرانا دوست، غبارِ ناقہ سے

ہم نے بھی اس دھول کو برسوں پھانکا تھا

 

اُس کے گھر سے نکل کر ہم نے شام ڈھلے

کچھ نہیں یاد کہ کتنے گھروں میں جھانکا تھا

 

****

یادوں کی الماری کھولے بیٹھا تھا

ایک اندھیرے کمرے میں بوڑھا لڑکا

 

وہ بوڑھا بھی کتنا دلکش بوڑھا تھا

یادوں کی دہلیز پہ چپکا بیٹھا تھا

 

شور مچاتے آنسو ٹپ ٹپ گرتے تھے

ہونٹوں پر اک کہر زدہ سناٹا تھا

 

ایک طرف پھن کاڑھے بیٹھی تھیں راتیں

ایک طرف پر شور دنوں کا میلا تھا

 

ٹوٹے پھوٹے چند کھلونوں کے ہمراہ

اک گوشے میں اس کا بچپن رکھا تھا

 

ہر شوخی پر ہر معصوم شرارت پر

ماں کے پاکیزہ آنچل کا سایہ تھا

 

کتنے آنچل اس کے لئے لہرائے تھے

کتنے رخوں نے اس پہ کرم فرمایا تھا

 

کیسے کیسے دوست سجیلے بانکے تھے

کیا کیا ان کے ساتھ میں گھومنا پھرنا تھا

 

پھر ماں کے اصرار پہ اک دن رات ڈھلے

اس کے شبستاں میں کوئی در آیا تھا

 

اس کو بوڑھا ہوتے دیکھ کے بھاگ گیا

اس کے اندر چھپا ہوا جو لڑکا تھا

 

 

*****

 

دشت کو دیکھ کے گھر یاد آیا

ہمیں یوسف کا سفر یاد آیا

 

میں نے تلوار پہ سر رکھا تھا

یعنی تلوار سے سر یاد آیا

 

وہ تری کم سخنی تھی کہ مجھے

بات کرنے کا ہنر یاد آیا

 

اے زمانے مرے پہلو میں ٹھہر

پھر سلامِ پسِ در یاد آیا

 

کسے اڑتے ہوئے دیکھا کہ تمہیں

اپنا ٹوٹا ہوا پر یاد آیا

 

آج میں خود سے ملا ہوں طالب

آج بھولا ہوا گھر یاد آیا

 

*****

 

محسنوں کی آنکھ سے کاجل چرا لیتے ہیں لوگ

سوچتے کیا ہو، نظر رکھا کرو سامان پر

 

*****

 

 

وہ اپنے جھاگ کو متھنے لگا ہے

نہ جانے کیا بنائے گا سمندر

 

*****

 

کس نام کے طلسم میں گم ہو گئے وہ لوگ

یعنی وہ لوگ بھول گئے اپنا نام تک

 

دیوار گر رہی ہے ہمارے مکان کی

پہنچاؤ بات خضر علیہ السلام تک

 

****

 

بام و در پر ہجوم کرتی شام

ایک آسیب ہے گزرتی شام

 

*****

مرے بچو! مجھے آواز دی ہے روحِ صحرا نے

سو اب گھر سے چلے جانے کی آسانی مجھے دے دو

 

 

****

 

 

خلوتِ جاں میں چیخ رہا ہوں کوئی نئی عریانی دے

جیسے دشت میں پیاسا چیخے میرے مولا پانی دے

 

یادوں کا ویران جزیرہ برسوں تک آباد رہے

ہجر کا موسم اچھا گزرے ایسی کوئی نشانی دے

 

رات سے پہلے گھر آ جانا دھُند اُترنے والی ہے

رات کہاں سے خوشیاں دے گی شام ہی جب ویرانی دے

 

****

 

حبس میں یوں ہوا چلی دل کا فراغ لے گئی

شہر سے امن لے گئی گھر سے چراغ لے گئی

 

پھر سرِ شاخِ مصلحت اُس کے لبوں کی فاختہ

امن کے جھوٹ دے گئی جنگ کے داغ لے گئی

 

****

 

 

یہ بستی اتنی پراسرار کیوں ہے

یہاں چاروں طرف دیوار کیوں ہے

 

***

 

کون جیت سکتا ہے عزمِ چرخ پیما سے

سانپ ہار جاتے ہیں چوبِ خشک صحرا سے

 

لے کے ہاتھ میں پانی پھینکنا بتاتا ہے

تشنگی نچوڑی ہے اس نے موجِ دریا سے

 

چاکِ پیرہن تسلیم، ہم پہ یہ کرم کیسا

ہم کہاں کے یوسف ہیں، پوچھنا زلیخا سے

 

ہم سے خوش نگاہی کی بھیک لینے آئے ہیں

دستِ گل فروشاں پر یہ دھرے ہوئے ہوئے کاسے

 

****

 

ماہی گیر اکیلا تھا، لوٹ کے کیسے گھر آتا؟

ناؤ کے چپو ٹوٹے تھے اور سمندر گہرا تھا

 

****

 

 

 

ہم آج آ بیٹھے ہیں تیرے در پر، سو ہم سے مل لے

کہ ہم قلندر ہیں، کیا بھروسہ قلندروں کا

 

****

 

 

اس سال کے سیلاب سے سارے کگارے کٹ گئے

دریا کے پیچ و تاب کا ساحل کو اندازہ نہ تھا

 

****

 

جیسے ہی زینہ بولا تہہ خانے کا

کنڈلی مار کے بیٹھا سانپ خزانے کا

 

بات کہی اور کہہ کر خود ہی کاٹ بھی دی

یہ بھی اک پیرایہ تھا سمجھانے کا

 

****

 

 

جسم نے اپنی عمر گزاری سندھ کے ریگستانوں میں

دل کم بخت بڑا ضدی تھا، آخر تک پنجاب رہا

 

****

 

 

مجھ کو مل پایا نہ کیوں اپنی ہی ہستی کا سراغ

آگہی میری چراغِ دستِ نابینا ہے کیا

 

****

 

 

کبھی عتابِ بزرگاں کے خوف سے پیدا

گلی کے موڑ پہ بے وجہ تیز رفتاری

 

 

****

 

یہ مرا مشکیزۂ بے آب، صحرا اور میں

جانتے ہیں پیاس کے آداب صحرا اور میں

 

یہ تو میں بھی جانتا ہوں، جس کا جو مقسوم ہے

ہو ہی جائے گا کبھی شاداب صحرا، اور میں؟

 

****

 

غاروں کی دیواروں پر یہ تصویروں کا جال

بوڑھا ماضی ہانپ رہا ہے سرد گپھاؤں میں

 

****

 

 

 

لفظوں کے گستاخ سفینے

سطحِ زباں پر ڈول رہے ہیں

 

جس مٹکے سے پیاس بجھائی

اس میں مٹی گھول رہے ہیں

 

****

 

 

چاروں اور تھی جھوٹ کی برکھا سانچ کی آنچ ہمیں تک تھی

ہم بیساکھ کی دھوپ سے سلگے ساون کی ہریالی میں

 

 

****

 

 

کہاں تک فلسفہ الفاظ کے آسیب سے بچتا

معانی ذہن کے اندر بھی حرف آلود ہوتے ہیں

 

****

 

 

 

کسی پیڑ کے سائے میں دھونی رما، کسی گھر میں نہ بن مہمان میاں

کوئی مکھڑا کھب گیا دل میں اگر، اسی ڈنک سے جائے گی جان میاں

 

نہ میں وارث شاہ نہ میر تقی، کشکول بدست گداگر ہوں

کچھ ادھر سے لیا کچھ اُدھر سے لیا، یوں ہی جمع کیا دیوان میاں

 

****

 

کوئی معشوق ہے اس پردۂ زنگار کے پیچھے

کہ یہ ہنگامۂ تخلیق بے علت نہیں برپا

 

****

 

دور افتادہ قصبے میں طالب ہم آباد ہوئے

ڈرے ہوئے تھے تہذیبوں سے، ڈسے ہوئے آگاہی کے

 

****

ماضی کے ہر دور میں دنیا والوں کا دستور رہا

پیغمبر سے بیر نکالا، نفرت تھی پیغام کے ساتھ

 

کس لکڑی کا ماضی کیا تھا جلتا چولہا کیا جانے

اس سے پوچھو جس کا ربط ہو باغ کے قتلِ عام کے ساتھ

 

ترک و طلب کا ہم دونوں میں کب سے تصادم جاری ہے

اس کا نام لیا جاتا ہے اب تک میرے نام کے ساتھ

****

 

 

بے مقصد پرواز سے تھک کر تتلی پھول پہ بیٹھ گئی

پھول تو اپنی جان سے ہارا تتلی بھی بدنام ہوئی

 

کوفے کے سارے دروازے آخر مجھ پر بند رہے

خوف زدہ گلیوں میں تنہا پھرتے پھرتے شام ہوئی

 

گاؤں کے پس منظر میں دن بھر چیخنے والی پن چکی

میرے کل کی خاطر اپنے آج میں بے آرام ہوئی

 

****

 

کتنی بے آواز ہے دن میں نیستاں کی فضا

شب کی تاریکی میں لیکن کتنی پراسرار تھی

 

 

****

 

 

شام ڈھلے منہ ڈھانپ کے سونا سورج کی مجبوری ہے

اپنی خوشی سے کون یہ چاہے اجلے دن کو رات کرے

 

****

 

 

خلوتِ بے نشان میں پھول کھلے نشان کے

وحشتِ دل بھی سو گئی چادرِ ماہ تان کے

 

اپنے لباسِ جاں پہ بھی صاحبو ٹک نظر کرو

ہنستے رہو گے کب تلک ہم کو غریب جان کے

 

خلوتیانِ کنج ہوش تشنہ لبانِ یم بہ دوش

میرے حریف تھے مگر لوگ تھے آن بان کے

 

موج بہ موج یم بہ یم بادِ مراد ساتھ تھی

ناؤ سے رد نہ ہو سکے فیصلے بادبان کے

 

تیری گلی میں جاگ کر ہم نے بھی جُگ بتائے ہیں

ہم پہ بھی فاش ہوں کبھی رنگ ترے مکان کے

 

کیا وہ نگاہِ رنگ و بو گاؤں سے کوچ کر گئی

گنگ ہے نیم کا درخت خشک ہیں کھیت دھان کے

 

****

 

 

لوگ اس طرح سے ملتے ہیں سرِ کوچۂ رزق

بڑھ کے تلوار سے جیسے کوئی تلوار ملے

 

****

 

وہ مجھ پہ فاش ہوا کل کھلی کتاب کی طرح

اس اتفاق کو ذوقِ مطالعہ کہیے

 

*****

 

 

دل کسی منزل کو پا لینے کی خواہش کیا کرے

کھیت ہی جب کم زراعت ہوں تو بارش کیا کرے

 

*****

 

 

سنا کے قید میں احوال راہگیروں کے

ہوا نے کھول دئے دست و پا اسیروں کے

 

کوئی سخی نظر آتا تو ہاتھ پھیلاتے

اس انتظار میں دن کٹ گئے فقیروں کے

 

*****

 

 

ایک کنویں کی گہرائی سے مصر کے تختِ شاہی تک

دیکھنے والی آنکھ کو کتنے نادیدہ بازار ملے

 

****

 

 

وقت نے میری ہی محنت سے اپنی ساکھ بنائی ورنہ

اس کا اتنا نرخ کہاں تھا پہیے کی ایجاد سے پہلے

 

****

 

وقت کی پگڈنڈیوں سے بستیوں تک آ گئے

ہم ابھی کچھ قرن پہلے تک چراگاہوں میں تھے

 

****

 

رموزِ فطرت کا داستاں گو شکار ہے کم بضاعتی کا

نئی کہانی میں ٹانکتا ہے پرانے ٹکڑے کہانیوں کے

 

****

 

ایک ہی کہانی ہے قصہ گو کے کیسہ میں

قصہ گو کے لہجوں سے رخ بدلتا جاتا ہے

 

کانچ کے کھلونوں پر اعتبار کیا کرنا

وہ بھی ٹوٹ جاتے ہیں جو خدا بناتا ہے

 

 

****

آج بھی آپ گئے ملنے اس کے گھر، پھر کل جائیں گے

طالب صاحب آگ سے مت کھیلیں، بالآخر جل جائیں گے

 

وہ اپنے گھر کی رونق بن جائے تو ہم وعدہ کرتے ہیں

اپنے گھر واپس جا کر گھر کے ماحول میں ڈھل جائیں گے

 

رسی جل گئی لیکن اس کے بل شعلوں پر خندہ زن ہیں

جب خاکستر بن کے اڑے گی تب رسی کے بل جائیں گے

 

حدِ نظارہ تک خشخاش کے نیلے پودے تھے اور میں تھا

دل نے کہا تھا آنکھ جھکا لے ورنہ پودے جل جائیں گے

 

ذہن کے سب کھڑکی دروازے کھول کے اندر جھاڑو دے دو

کب سے حجرہ بند پڑا ہے اس میں بچھو پل جائیں گے

 

اُس نے مجھ سے عذر تراشے یعنی وہ یہ جان رہا تھا

ایک یہی دوکان ہے جس پر کھوٹے سکے چل جائیں گے

 

****

 

دیارِ حسن میں تجدیدِ عاشقی کے لئے

ہم ایسے لوگ ضروری ہیں ہر صدی کے لئے

 

کنارِ نہر بنفشے کی جھاڑیوں کے قریب

وہ سوگوار کھڑی تھی اک اجنبی کے لئے

****

 

دھوپ جب تک سر پہ تھی زیرِ قدم پائے گئے

ڈوبتے سورج میں کتنی دور تک سائے گئے

 

آج بھی حرفِ تسلی ہے شکستِ دل پہ طنز

کتنے جملے ہیں جو ہر موقع پہ دُہرائے گئے

 

آج سے میں اپنے ہر اقدام میں آزاد ہوں

جھانکتے تھے جو مرے گھر میں وہ ہمسائے گئے

 

****

 

اس کی خوشی سے بزم میں آنا اس کی خوشی اٹھ کر جانا

دونوں عمل ہیں غیر ارادی، پیدا ہونا مر جانا

 

ڈول کنویں میں ڈال کے پانی کھینچنے والے پردیسی

پیاس بجھا کر بیٹھ نہ جانا گاؤں سے ہجرت کر جانا

 

رات بھری محفل میں طالب ایک ہی دکھ تھا دونوں کا

اس کو اپنے گھر جانا تھا مجھ کو اپنے گھر جانا

 

****

 

بستی بستی گھوم رہا ہوں اب بھی وہی درخواست لئے

وہ درخواست جو ہر دفتر میں یکساں نا منظور ہوئی

 

عطر فروشوں کے کوچے میں ایک شناسا خوشبو نے

میرا دامن تھام لیا تھا اتنی دیر ضرور ہوئی

 

 

****

 

 

جس چھتے کو توڑ رہے ہو اس میں شہد کی مکھی نے

صحرا صحرا جنگل جنگل پھر کر شہد بنایا ہے

 

کل تک اس نے وہم کہا تھا خوابوں کی ماہیت کو

آج وہ مجھ سے خوابوں کی تعبیریں پوچھنے آیا ہے

 

دھوپ اتری تھی آنگن میں اور دیواروں پر سایا تھا

دھوپ چڑھی ہے دیواروں پر اور آنگن میں سایا ہے

 

****

 

چاندنی میں اداسیاں کیوں ہیں

دھوپ میں یہ غبار سا کیا ہے

 

بات کو لوگ کیوں سمجھتے ہیں

لفظ و معنی میں رابطہ کیا ہے

 

****

 

 

میں نے ہر در پہ جا کے دستک دی

میں نے ایقاں کو وسعتِ شک دی

 

 

********

ٹائپنگ: : نوید صادق

پروف ریڈنگ اور ای بک کی تشکیل: اعجاز عبید