FavoriteLoadingپسندیدہ کتابوں میں شامل کریں

فہرست مضامین

انتخاب ولی دکنی

ولی محمد ولیؔ دکنی

ترتیب: اعجاز عبید

 

 

تجھ لب کی صِفَت لعلِ بدخشاں سوں کہوں گا

جادو ہیں ترے نین، غزالاں سوں کہوں گا

دی حق نے تجھے بادشَہی حسن نگر کی

یو کشورِ ایراں میں سلیماں سوں کہوں گا

تعریف ترے قد کی الف دار، سری جن

جا سرو گلستاں کوں خوش الحاں سوں کہوں گا

مجھ پر نہ کرو ظلم، تم اے لیلٰیِ خوباں

مجنوں ہوں، ترے غم کوں بیاباں سوں کہوں گا

دیکھا ہوں تجھے خواب میں اے مایۂ خوبی

اس خواب کو جا یوسفِ کنعاں سوں کہوں گا

جلتا ہوں شب و روز ترے غم میں اے ساجن

یہ سوز ترا مشعلِ سوزاں سوں کہوں گا

یک نقطہ ترے صفحۂ رخ پر نہیں بے جا

اس مُکھ کو ترے صفحۂ قرآں سوں کہوں گا

زخمی کیا ہے مجھ تری پلکوں کی انی نے

یہ زخم ترا خنجر و بھالاں سوں کہوں گا

بے صبر نہ ہو اے ولی اس درد سے ہر گاہ

جلدی سوں ترے درد کی درماں سوں کہوں گا

٭٭٭

 

میں عاشقی میں تب سوں افسانہ ہو رہا ہوں

تیری نگاہ کا جب سوں دیوانہ ہو رہا ہوں

ای آشنا کرم سوں یک بار آدرس دے

تجھ باج سب جہاں سوں بیگانہ ہو رہا ہوں

باتاں لگن کی مت پوچھ اے شمع بزم خوبی

مدت سے تجھ جھلک کا پروانہ ہو رہا ہوں

شاید وہ گنج خوبی آوے کسو طرف سے

اس واسطے سراپا ویرانہ ہو رہا ہوں

سوداےَ زلف خوباں رکھتا ہوں دل میں دائم

زنجیر عاشقی کا دیوانہ ہو رہا ہوں

بر جا ہے گر سنوں نیئں ناصح تیری نصیحت

میں جام عاشقی پی، مستانہ ہو رہا ہوں

کس سوں ولی اُپس کا احوال جا کہوں میں

سر تا قدم میں غم سوں دیوانہ ہو رہا ہوں

٭٭٭

خوب رو خوب کام کرتے ہیں

یک نگہ میں غلام کرتے ہیں

دیکھ خوباں کو وقت ملنے کے

کس ادا سوں سلام کرتے ہیں

کیا وفا دار ہیں کہ ملنے میں

دل سوں سب رام رام کرتے ہیں

کم نگاہی سوں دیکھتے ہیں ولے

کام اپنا تمام کرتے ہیں

کھولتے ہیں جب اپنی زلفاں کو

صبح عاشق کوں شام کرتے ہیں

صاحب لفظ اس کو کہہ سکھئے

جس سوں خوباں کلام کرتے ہیں

دل لجاتے ہیں اے ولی میرا

سرو قد جب خرام کرتے ہیں

٭٭٭

 

ہر رات اپنے لطف و کرم سے ملا کرو

ہر دن کو عید جان گلے سے لگا کرو

حق اُس کو ہمکلام رکھے مجھ سے رات دن

اس بات سے مدام رقیبو جلا کرو

وعدہ کیا تھا رات کو آؤں گا صبح میں

اے مہربان وعدہ کو اپنے وفا کرو

کب تک رکھو گے طرز تغافل کو دل میں تم

ٹک کان دھر کے حال کسی کا سنا کرو

آیا ہوں احتیاج سے تم پاس اے صنم

اپنے لبوں کے خضر کو حاجت روا کرو

اک بات ہے ولی کی سنو کان رکھ صنم

میرے رواق چشم میں دائم رہا کرو

٭٭٭

ہوا ہے دل مرا مشتاق تجھ چشمِ شرابی کا

خراباتی اُپر آیا ہے شاید دن خرابی کا

کیا مدہوش مجھ دل کو انیندی نین ساقی نے

عجب رکھتا ہے کیفیت زمانہ نیم خوابی کا

خطِ شب رنگ رکھتا ہے عداوت حسنِ خوباں سوں

کہ جیوں خفّاش ہے دشمن شعاعِ آفتابی کا

نہ جاؤں صحنِ گلشن میں کہ خوش آتا نہیں مجھ کوں

بغیر از ماہ رُو ہرگز تماشا ماہتابی کا

نہ پوچھو اب ہوا ہے ہم سخن وہ دلبرِ رنگیں

عجب تصویر پر ہے رنگِ دائم لاجوابی کا

پری رُخ کو اٹھانا نیند سوں بر جا نہیں عاشق

عجب کچھ لطف رکھتا ہے زمانہ نیم خوابی کا

نہ جانوں کس پری رُو سوں ہوا ہے جا کے ہم زانو

کہ آئینے نے پایا ہے لقب حیرت مآبی کا

ولی سوں بے حسابی بات کرنا بے حسابی ہے

نہیں وہ آشنا اے یار ہرگز بے حسابی کا

٭٭٭

 

الٰہی! رکھ مجھے تو خاکِ پا اہلِ معانی کا

کہ کھلتا ہے اسی صحبت سے نسخہ نکتہ دانی کا

کیا یک بات میں واقف مجھے رازِ نہانی کا

لکھوں غنچے اُپر حرف اُس دہن کی نکتہ دانی کا

کتابت بھیجنی ہے شمع بزمِ دل کوں اے کاتب

پرِ پروانہ اوپر لکھ سخن مجھ جاں فشانی کا

عزیزاں بعد مرنے کے نہ پوچھو تم کہ تنہا ہوں

لکھا ہوں پردۂ دل پر خیال اس یارِ جانی کا

چھپا کر پردۂ فانوس میں رخ شمع گریاں ہے

سنیا ہے جب سوں آوازہ تری روشن بیانی کا

پرت کی بزم میں تا سرخ روئی مجھکو ہو حاصل

نین سوں اپنے دے ساغر شرابِ ارغوانی کا

بجا ہے گر کرے پرواز رنگِ چہرۂ عاشق

ہوا ہے ذوق موہن کو لباسِ زعفرانی کا

ترے مکھ کی صفائے حیرت افزا لکھ سکے کیوں کر

قلم ہے جوہرِ آئینۂ ناصافِ مانی کا

رہے وہ مُو کمر جیوں دیدۂ تصویر حیراں ہو

لکھے گر خامۂ موسوں بیاں مجھ ناتوانی کا

شرابِ جلوۂ ساقی سوں مت کر منع اے زاہد

یہی ہے مقتضا عالم میں ہنگامِ جوانی کا

ولی جن نے نہ باندھا دل کوں اپنے نونہالوں سوں

نہ پایا اُن نے پھل ہرگز جہاں میں زندگانی کا

٭٭٭

 

ترا لب دیکھ حیواں یاد آوے

ترا مُکھ دیکھ کنعاں یاد آوے

ترے دو نین جب دیکھوں نظر بھر

مجھے تب نرگستاں یاد آوے

تری زلفاں کی طولانی کوں دیکھے

مجھے لیلِ زمستاں یاد آوے

ترے خط کا زمرد رنگ دیکھے

بہارِ سنبلستاں یاد آوے

ترے مُکھ کے چمن کے دیکھنے کوں

مجھے فردوس رضواں یاد آوے

تری زلفاں میں یومُکھ جو دیکھے

اُسے شمعِ شبستاں یاد آوے

جو میرے حال کی گردش کوں دیکھے

اُسے گردابِ گرداں یاد آوے

جو کُئی دیکھے میرے انکھیاں کو روتے

اُسے ابرِ بہاراں یاد آوے

ولی میرا جنوں جو کُئی کہ دیکھے

اُسے کوہ و بیاباں یاد آوے

٭٭٭

 

دل ہوا ہے مرا خرابِ سُخَن

دیکھ کر حُسن بے حجابِ سُخَن

راہِ مضمونِ تازہ بند نہیں

تا قیامت کھُلا ہے بابِ سُخَن

بزمِ معنی میں سر خوشی ہے اسے

جس کو ہے نشّۂ شرابِ سخن

جلوہ پیرا ہو شاہدِ معنی

جب زباں سوں اٹھے نقابِ سُخَن

گوہر اس کی نظر میں جا نہ کرے

جن نے دیکھا ہے آب و تابِ سخن

ہرزہ گویاں کی بات کیونکے سنے

جو سنا نغمۂ ربابِ سخن

ہے تری بات اے نزاکت فہم

لوح دیباچۂ کتابِ سخن

لفظِ رنگیں ہے مطلعِ رنگیں

نورِ معنی ہے آفتابِ سخن

شعر فہموں کی دیکھ کر گرمی

دل ہوا ہے مرا کبابِ سخن

عُرفی و انوَری و خاقانی

مجھ کوں دیتے ہیں سب حسابِ سُخَن

اے ولی دردِ سر کبھو نہ رہے

جو ملے صندل و گلابِ سخن

٭٭٭

 

میں تجھے آیا ہوں ایماں بُوجھ کر

 باعثِ جمعیتِ جاں بُوجھ کر

 بلبلِ شیراز کوں کرتا ہوں یاد

 حسن کوں تیرے گلستاں بُوجھ کر

 دل چلا ہے عشق کا جوہری ہو

 لب ترے لعلِ بدخشاں بُوجھ کر

 ہر نگہ کرتی ہے نظارے کی مشق

 خط کو تیرے خطِ ریحاں بُوجھ کر

 اے سجن آیا ہوں ہو بے اختیار

 تجھ کو اپنا راحتِ جاں بُوجھ کر

 زلف تیری کیوں نہ کھاوے پیچ و تاب

 حال مجھ دل کا پریشاں بُوجھ کر

 رحم کر اُس پر کہ آیا ہے ولی

 دردِ دل کا تجھ کو درماں بُوجھ کر

٭٭٭

 

صحبتِ غیر میں جایا نہ کرو

 درد مندوں کو کڑہا یا نہ کرو

 حق پرستی کا اگر ہے دعویٰ

 بے گناہوں کو ستایا نہ کرو

 اپنی خوبی کے اگر ہو طالب

 اپنے طالب کو جلایا نہ کرو

 ہے اگر خاطر عشاق عزیز

 غیر کو شکل دکھایا نہ کرو

 ہم کو برداشت نہیں غصہ کی

 بے سبب غصہ میں آیا نہ کرو

 مجھ کو ترشی کا ہے پرہیز صنم

 چین ابرو کی دکھایا نہ کرو

 دل کو ہوتی ہے صنم بے تابی

 زلف کو ہاتھ لگایا نہ کرو

 نگہِ تلخ سے اپنی ظالم

 زہر کا جام پلایا نہ کرو

 پاکبازوں میں ولی ہے مشہور

 اُس سے چہرے کو چھپایا نہ کرو

٭٭٭

 

بیوفائی نہ کر خدا سوں ڈر

 جگ ہنسائی نہ کر خدا سوں ڈر

 ہے جدائی میں زندگی مشکل

 آ جدائی نہ کر خدا سوں ڈر

 آر سی دیکھ کر نہ ہو مغرور

 خود نمائی نہ کر خدا سوں ڈر

 اے ولی غیر آستانۂ یار

 جبھ سائی نہ کر خدا سوں ڈر

٭٭٭

شغل بہتر ہے عشق بازی کا

 کیا حقیقی و کیا مجازی کا

 ہر زباں پر ہے مثلِ شانہ مدام

 ذکر اُس زلف کی درازی کا

 ہوش کے ہاتھ میں عناں نہ رہی

 جب سوں دیکھا سوار تازی کا

 تیں دکھا کر اُپَس کے مُکھ کی کتاب

 علم کھویا ہے دل سوں قاضی کا

 آج تیری نگہ نے مسجد میں

 ہوش کھویا ہے ہر نمازی کا

 گر نہیں راز فقر سوں آگاہ

 فخر بے جا ہے فخرِ رازی کا

 اے ولی سرو قد کوں دیکھوں گا

 وقت آیا ہے سرفرازی کا

٭٭٭

عیاں ہے ہر طرف عالمِ میں حسنِ بے حجاب اس کا

بغیر از دیدۂ حیراں نہیں جگ میں نقاب اُس کا

ہوا ہے مجھ پہ شمع بزمِ یک رنگی سوں یوں روشن

کہ ہر ذرے اُپر تاباں ہے دائم آفتاب اُس کا

کرے ہے عشاق کو جیوں صورت دیوار حسرت سوں

اگر پردے سوں وا ہووے جمالِ بے حجاب اس کا

سجن نے یک نظر دیکھا نگاہِ مست سوں جس کو

خراباتِ دو عالم میں سدا ہے وہ خراب اُس کا

مرا دل پاک ہے از بس، ولی زنگِ کدورت سوں

ہوا جیوں جوہرِ آئینہ مخفی پیچ و تاب اُس کا

٭٭٭

اُس کو حاصل کیوں کر ہوئے جگ میں فراغِ زندگی

گردشِ افلاک ہے جس کو ایاغِ زندگی

اے عزیزاں سیرِ گلشن ہے گلِ داغِ الم!

صحبتِ احباب ہے معنی میں باغِ زندگی

لب ہیں تیرے فی الحقیقت چشمۂ آبِ حیات

خضر خط نے اس سوں پایا ہے سراغِ زندگی

جب سوں دیکھا نئیں نظر بھر کا کلِ مشکینِ یار

تب سوں جوں سنبل پریشاں ہے دماغِ زندگی

آسماں میری نظر میں کُبّۂ تاریک ہے

گر نہ دیکھوں تجھ کو اے چشم و چراغِ زندگی

لالہ خونیں کفن کے حال سوں ظاہر ہوا

بستگی ہے خال سوں خوباں کے داغِ زندگی

کیوں نہ ہوے اے ولیؔ روشن شب قدر حیات

ہے نگاہِ گرمِ گُل رویاں چراغِ زندگی

٭٭٭

غفلت میں وقت اپنا نہ کھو، ہشیار ہو، ہوشیار ہو

کب تک رہے گا خواب میں، بیدار ہو بیدار ہو

گر دیکھنا ہے مدعا ، اس شاہدِ معنی کا رو

ظاہر پرستاں سوں سدا، بیزار ہو بیزار

جیوں چتر داغِ عشق کیوں رکھ سر پر اپنے اوّلاً

تب فوجِ اہل درد کا ، سردار ہو سردار ہو

وہ نو بہارِ عاشقاں، ہے جیوں سحر جگ میں عیاں

اے دیدہ وقتِ خواب تئیں، بیدار ہو بیدار ہو

مطلع کا مصرع اے ولیؔ وردِ زباں کر رات دن

غفلت میں وقت اپنا نہ کھو ہشیار ہو ہوشیار ہو

٭٭٭

جسے عشق کا تیر کاری لگے

اسے زندگی کیوں نہ بھاری لگے

نہ چھوڑے محبت دمِ مرگ تک

جسے یار جانی سوں یاری لگے

نہ ہوئے اُسے جگ میں ہر گز قرار

جسے عشق کی بے قراری لگے

ہر اک وقت مجھ عاشقِ پاک کوں

پیارے تری بات پیاری لگے

ولیؔ کوں کہے تو اگر ایک بچن

رقیباں کے دل میں کٹاری لگے

٭٭٭

دیکھنا ہر صبح تجھ رُخسار کا

ہے مطالعہ مطلعِ انوار کا

بلبل و پروانہ کرنا دل کے تئیں

کام ہے تجھ چہرۂ گلنار کا

یاد کرنا ہر گھڑی اُس یار کا

ہے وظیفہ مجھ دلِ بیمار کا

صبح تیرا درس پایا تھا صنم

شوقِ دل محتاج ہے تکرار کا

آرزوئے چشمۂ کوثر نہیں

تشنہ لب ہوں شربتِ دیدار کا

عاقبت کیا ہووے گا؟ معلوم نہیں

دل ہوا ہے مبتلا دِلدار کا

مسندِ غل منزلِ شبنم ہوئی

دیکھ رتبہ دیدۂ بیمار کا

ماہ کے سینے اُپر اے شمع رو

داغ ہے تجھ حُسن کی جھلکار کا

دل کو دیتا ہے ہمارے پیچ و تاب

پیچ تیرے طُرّۂ طرّار کا

جو سُنیا تیرے دہن سوں یک بچن

بھید پایا نسخۂ اسرار کا

چاہتا ہے اس جہاں میں گر بہشت

جا تماشا دیکھ اس رخسار کا

اے ولیؔؔ کیوں سن سکے ناصح کی بات

جو دِوانا ہے پری رخسار کا

٭٭٭

مدت ہوئے سجن نے دکھایا نہیں جمال

دکھلا اپس کے قدکوں کیا نئیں مجھے نہال

یک بار دیکھ مجھ طرف اے عیدِ عاشقاں

تجھ ابرواں کی یادسوں لاغر ہوں جیوں ہلال

وہ دل کہ تھا جو سوختۂ آتشِ فراق

پہنچا ہے جا کے رُخ کے برنگِ خال

ممکن نہیں کہ بدر ہوں نقصاں سوں آشنا

لاوے اگر خیال میں تجھ حُسن کا کمال

گر مضطرب ہے عاشقِ بے دل عجب نہیں

وحشی ہوئے ہیں تیری انکھاں دیکھ کر غزال

فیضِ نسیم مہر و وفا سو جہان میں

گلزار تجھ بہار کا ہے اب تلک بحال

کھویا ہے گُل رخاں نے رعونت سوں آب و رنگ

گردن کشی ہے شمع کی گردن اُپر وبال

٭٭٭

یاد کرنا ہر گھڑی اس یار کا

ہے وظیفہ مجھ دلِ بیمار کا

آرزوئے چشمۂ کوثر نہیں

تشنہ لب ہوں شربتِ دیدار کا

عاقبت کیا ہووے گا؟ معلوم نہیں

دل ہوا ہے، مبتلا دلدار کا

کیا کہے تعریف دل ہے بے نظیر!

حرفِ حرف اس مخزنِ اسرار کا

گر ہوا ہے طالبِ آزادگی

بند مت ہو سجۂ و زنار کا

مسند گل منزلِ شبنم ہوئی

دیکھ رتبہ دیدۂ بیدار کا

اے ولیؔ ہونا سری جن پر نثار

مدعا ہے چشم گوہر بار کا

٭٭٭

 

روح بخشی ہے کام تجھ لب کا

دمِ عیسیٰ ہے نام تجھ لب کا

حُسن کے خضر نے کیا لبریز

آبِ حیواں سوں جام تجھ لب کا

منطق و حکمت و معانی پر

مشتمل ہے کلام تجھ لب کا

رگِ یاقوت کے قلم سوں لکھیں

خط پرستاں پیام تجھ لب کا

سبزہ و برگ و لالہ رکھتے ہیں

شوق، دل میں دوام تجھ لب کا

غرق شکر ہوئے ہیں کام و زباں

جب لیا ہوں میں نام تجھ لب کا

ہے ولیؔ کی زباں کوں لذت بخش

ذکر ہر صبح و شام تجھ لب کا

٭٭٭

 

جب صنم کو خیالِ باغ ہوا

طالبِ نشّۂ فراغ ہوا

فوجِ عشاق دیکھ ہر جانب

نازنیں صاحبِ دماغ ہوا

رشک سے تجھ لباں کی سرخی پر

جگرِ لالہ داغ داغ ہوا

دلِ عشاق کیوں نہ ہو روشن

جب خیالِ صنم چراغ ہوا

اے ولی گل بدن کو باغ میں دیکھ

دلِ صد چاک باغ باغ ہوا

صحنِ گلشن میں جب خرام کیا

سرو آزاد کو غلام کیا

کاملیت کا تجھ کو تھا دعویٰ

حق نے دعویٰ ترا تمام کیا

غمزۂ شوخ نے بہ نیم نگاہ

کام عشاق کا تمام کیا

تجھ دہن نے کہ میم معنی ہے

دلِ سیماب میں مقام کیا

تا کہے خلق تجھ کو ماہِ تمام

زلف تیری کو حق نے لام کیا

گل رخاں خوف سے ہوئے یکسو

تجھ نگہ نے جب اہتمام کیا

تام تیرا ولیؔ نے اے اکمل

شوق سے ورد صبح و شام کیا

٭٭٭

 

کتاب الحسن کا یہ مکھ صفا ترا صفا دِستا

ترے ابرو کے دو مصرع سوں اس کا ابتدا دِستا

ترا مکھ حسن کا دریا و موجاں چین پیشانی

اُپر ابرو کی کشتی کے یو تل جیوں ناخدا دِستا

ترے لب ہیں‌برنگ حوضِ کوثر مخزنِ خوبی

یہ خال عنبریں تس پر بلال آسا کھڑا دِستا

٭٭٭

 

تجھ غمزہ ِ خوں ریز سوں لڑ کون سکے گا

تجھ ناز ستم گر سوں جھگڑ کون سکے گا

پھرتی ہیں سیہ مست ہو شمشیر نظر لے

بن نیند اس انکھیاں کو پکڑ کون سکے گا

دریائے برہ غم میں مجھے ہے یونس دن

اس بحر میں دل باج سو پڑ کون سکے گا

مانند ولی تجھ سوں جو پایا شرف وصل

اس باج آپس دل سوں بچھڑ کون سکے گا

٭٭٭

 

تیری نگہ کی سختی ہے دلبری کے مانند

تیری نگاہ موزوں ہے عبہوری کے مانند

ظاہر نہیں کسی پر تجھ لعل کی حقیقت

واقف ہوا ہوں اس سوں میں جوہری کے مانند

یہ ریختہ ولی کا جا کر اسے سناؤ

رکھتا ہے فکر روشن جو انوری کے مانند

٭٭٭

 

شوخ آتا نہیں ہزار افسوس

مکھ دکھاتا نہیں ہزار افسوس

مطرب نغمہ ساز محفل عشق

تان گاتا نہیں ہزار افسوس

بزم عشرت میں جام لب سوں پیا

مے پلاتا نہیں ہزار افسوس

وہ سجن ناز سوں بھلی ماتاں

من میں لاتا نہیں ہزار افسوس

پیم نگری کی راہ غیر ولی

کوئی پاتا نہیں ہزار افسوس

٭٭٭

 

مجھ درد پر دوا نہ کرو تم حکیم کا

بن وصل نہیں علاج برہ کے سقیم کا

جنت میں کب دے ہیں وہ رضوان کو مرتبہ

جو مرتبہ ہے تیری گلی کے مقیم کا

پیو کے نزدیک آنجھو کو مرے کچھ وقار نہیں

عالم میں گرچہ قدر ہے در یتیم کا

کرتا ہے اس کی زلف کی تعریف، اے ولی!

جو ہے مرید ِ سلسلہ ِ مستقیم کا

٭٭٭

 

مجھ کوں پہنچی اس شکر لب کی خبر

حق شکر خورے کوں دیتا ہے شکر

بو علی سینا اگر دیکھے اسے

قاعدے حکمت کے سب جائے بسر

سات پردوں میں رکھوں اس کوں چھپا

آوے گر انکھیاں میں وہ نور ِ نظر

اس لباں کا اے ولی! طالب ہے دل

جس کے غم میں لعل ہے خونیں جگر

٭٭٭

 

موسیٰ اگر جو دیکھے تجھ نور کا تماشا

اس کوں پہاڑ ہووے پھر طور کا تماشا

اے رشک باغ جنت! تجھ پر نظر کئے سوں

رضواں کو ہووے دوزخ پھر حور کا تماشا

کثرت کے پھول بن میں جاتے نہیں ہیں عارف

بس ہے موحداں کوں منصور کا تماشا

وہ سر بلند عالم از بس ہے مجھ نظر میں

جیوں آسماں عیاں ہے مجھ دور کا تماشا

تجھ عشق میں ولی کے آنچھو ابل چلے ہیں

اے بحر حسن آ دیکھ اس پور کا تماشا

٭٭٭

 

مژہ بتاں کی ہیں تجھ غم میں خواب مخمل سرخ

لگ ہے ترک کے ٹپکے کوں یا مسلسل سرخ

کتاب عشق پہ شنگرف اشک خونی سوں

پلک کی کر کے قلم کھینچتا ہوں جدول سرخ

شفیق نہ بوجھ کہ مجھ آ، آتشیں نے ولی

فلک کوں جا کے کیا ہے برنگ منقل سرخ

٭٭٭

 

پی کے ہوتے نہ کر توں مہ کی ثنا

معتبر نہیں ہے حسن دور نما

باعث نشہ دو بالا ہے

حسن صورت کے ساتھ حسن ادا

اے گل باغ، حسن مکھ سوں ترے

جلوہ پیرا ہے رنگ و بوئے حیا

نہیں ہے گل پی کے مکھ سا عالم میں

قائل اس بات کی ہے باد ِ صبا

اے ولی! مجھ سخن کوں وہ بوجھے

جس کوں حق نے دیا ہے فکر رسا

٭٭٭

ماخذ:

اردو محفل، صرف اردو، اردو مجلس اور ذیل کے ربط سے

اردو یوتھ فورم 

تدوین اور ای بک کی تشکیل: اعجاز عبید