پسندیدہ کتابوں میں شامل کریں

(تفسیر محمدی)

حصہ دوم

آل عمران تا مائدہ

عماد الدین ابن کثیر

سورۂ آل عمران

یہ سورت مدنی ہے اس کے شروع کی تراسی آیتیں حضور صلی اللہ علیہ و سلم کی خدمت میں سن ۹ ہجری کو حاضر ہونے والے نجران کے عیسائیوں کے ایلچی کے بارے میں نازل ہوئی ہیں  جس کا مفصل بیان مباہلہ کی آیت قل تعالوا الخ، کی تفسیر میں عنقریب آئے گا۔

انشاء اللہ، اس کی فضیلت میں جو حدیثیں وارد ہوئی ہیں  وہ سورۃ بقرہ کی تفسیر کے شروع میں بیان کر دی گئی ہیں ۔

۲

آیت الکرسی اور اسمِ اعظم

 آیت الکرسی کی تفسیر میں پہلے بھی یہ حدیث گزر چکی ہے کہ اسم اعظم اس آیت اور آیت الکرسی میں ہے اور الم کی تفسیر سورۃ بقرہ کے شروع میں بیان ہو چکی ہے جسے دوبارہ یہاں لکھنے کی ضرورت نہیں، (آیت اللہ لاالہ الا ھو الحی القیوم) کی تفسیر بھی آیت الکرسی کی تفسیر میں ہم لکھ آئے ہیں ۔ پھر فرمایا اللہ تعالیٰ نے تجھ پر اے محمد صلی اللہ علیہ و سلم قرآن کریم کو حق کے ساتھ نازل فرمایا ہے جس میں کوئی شک نہیں  بلکہ یقیناً وہ اللہ کی طرف سے ہے، جسے اس نے اپنے علم کی وسعتوں کے ساتھ اتارا ہے، فرشتے اس پر گواہ ہیں  اور اللہ کی شہادت کافی وافی ہے ۔ یہ قرآن اپنے سے پہلے کی تمام آسمانی کتابوں کی تصدیق کرنے والا ہے اور وہ کتابیں بھی اس قرآن کی سچائی پر گواہ ہیں، اس لئے کہ ان میں جو اس نبی صلی اللہ علیہ و سلم کے آنے اور اس کتاب کے اترنے کی خبر تھی وہ سچی ثابت ہوئی۔ اسی نے حضرت موسیٰ بن عمران پر توراۃ اور عیسیٰ بن مریم پر انجیل اتاری، وہ دونوں کتابیں بھی اس زمانے کے لوگوں کیلئے ہدایت دینے والی تھیں ۔ اس نے فرقان اتارا جو حق و باطل، ہدایت و ضلالت، گمراہی اور راہِ راست میں فرق کرنے والا ہے، اس کی واضح روشن دلیلیں اور زبردست ثبوت ہر معترض کیلئے مثبت جواب ہیں، حضرت قتادہ حضرت ربیع بن انس کا بیان ہے کہ فرقان سے مراد یہاں قرآن ہے، گو یہ مصدر ہے لیکن چونکہ قرآن کا ذِکر اس سے پہلے گزر چکا ہے اس لئے یہاں فرقان فرمایا، ابوصالح سے یہ بھی مروی ہے کہ مراد اس سے توراۃ ہے مگر یہ ضعیف ہے اس لئے کہ توراۃ کا ذِکر اس سے پہلے گزر چکا ہے واللہ اعلم۔ قیامت کے  دن منکروں اور باطل پرستوں کو سخت عذاب ہوں گے ۔ اللہ تعالیٰ غالب ہے بڑی شان والا ہے اعلیٰ سلطنت والا ہے، انبیاء کرام اور محترم رسولوں کے مخالفوں سے اور اللہ تعالیٰ کی آیتوں کی تکذیب کرنے والوں سے جناب باری تعالیٰ زبردست انتقام لے گا۔

۵

خالقِ کل

 اللہ تعالیٰ خبر دیتا ہے کہ آسمان و زمین کے غیب کو وہ بخوبی جانتا ہے اس پر کوئی چیز مخفی نہیں، وہ تمہیں  تمہاری ماں کے پیٹ میں جس طرح کی چاہتا ہے اچھی، بری نیک اور بد صورتیں عنایت فرماتا ہے، اس کے سوا عبادت کے لائق کوئی نہیں  وہ غالب ہے حکمت والا ہے، جبکہ صرف اسی ایک نے تمہیں  بنایا، پیدا کیا، پھر تم دوسرے کی عبادت کیوں کرو؟ وہ لازوال عزتوں والا غیر فانی حکمتوں والا، اٹل احکام والا ہے ۔ اس میں اشارہ بلکہ تصریح ہے کہ حضرت عیسیٰ بھی اللہ عزوجل ہی کے پیدا کئے ہوئے اور اسی کی چوکھٹ پر جھکنے والے تھے، جس طرح تمام انسان اس کے پیدا کردہ ہیں  انہی انسانوں میں سے ایک آپ بھی ہیں، وہ بھی ماں کے رحم میں بنائے گئے ہیں  اور میرے پیدا کرنے سے پیدا ہوئے، پھر وہ اللہ کیسے بن گئے ؟ جیسا کہ اس لعنتی جماعت نصاریٰ نے سمجھ رکھا ہے، حالانکہ وہ تو ایک حالت سے دوسری حالت کی طرف رگ و ریشہ کی صورت ادھر اُدھر پھرتے پھراتے رہے، جیسے اور جگہ ہے (آیت یخلقکم فی بطون امھاتکم خلقا من بعد خلق فی ظلمات ثلاث) وہ اللہ جو تمہیں  ماؤں کے پیٹوں میں پیدا کرتا ہے، ہر ایک کی پیدائش طرح طرح کے مرحلوں سے گزرتی ہے ۔

۷

ہماری سمجھ سے بلند آیات

یہاں یہ بیان ہو رہا ہے کہ قرآن میں ایسی آیتیں بھی ہیں  جن کا بیان بہت واضح بالکل صاف اور سیدھا ہے ۔ ہر شخص اس کے مطلب کو سمجھ سکتا ہے، اور بعض آیتیں ایسی بھی ہیں  جن کے مطلب تک عام ذہنوں کی رسائی نہیں  ہو سکتی، اب جو لوگ نہ سمجھ میں آنے والی آیتوں کے مفہوم کو پہلی قسم کی آیتوں کی روشنی میں سمجھ لیں یعنی جس مسئلہ کی صراحت جس آیت میں پائیں لے لیں، وہ تو راستی پر ہیں  اور جو صاف اور صریح آیتوں کو چھوڑ کر ایسی آیتوں کو دلیل بنائیں جو ان کے فہم سے بالاتر ہیں، ان میں الجھ جائیں تو منہ کے بل گر پڑیں، ام الکتاب یعنی کتاب اللہ اصل اصولوں کی وہ صاف اور واضح آیتیں ہیں، شک و شبہ میں نہ پڑو اور کھلے احکام پر عمل کرو انہی کو فیصلہ کرنے والی مانو اور جو نہ سمجھ میں آئے اسے بھی ان سے ہی سمجھو، بعض اور آیتیں ایسی بھی ہیں  کہ ایک معنی تو ان کا ایسا نکلتا ہے جو ظاہر آیتوں کے مطابق ہو اور اس کے سوا اور معانی بھی نکلتے ہیں، گو وہ حرف لفظ اور ترکیب کے اعتبار سے واقعی طور پر نہ ہو تو ان غیر ظاہر معنوں میں نہ پھنسو، محکم اور متشابہ کے بہت سے معنی اسلاف سے منقول ہیں، حضرت ابن عباس تو فرماتے ہیں  کہ محکمات وہ ہیں  جو ناسخ ہوں جن میں حلال حرام احکام حکم ممنوعات حدیں اور اعمال کا بیان ہو، اسی طرح آپ سے یہ بھی مروی ہے (آیت قل تعالوا اتل ما حرم ربکم علیکم الخ،) اور اس کے بعد کے احکامات والی اور (آیت  وقضی ربک ان لا تبعدوا الخ،) اور اس کے بعد کی تین آیتیں محکمات سے ہیں، حضرت ابو فاختہ فرماتے ہیں  سورتوں کے شروع میں فرائض اور احکام اور روک ٹوک اور حلال و حرام کی آیتیں ہیں، سعید بن جبیر کہتے ہیں  انہیں  اصل کتاب اس لئے کہا جاتا ہے کہ یہ تمام کتابوں میں ہیں، حضرت مقاتل کہتے ہیں  اس لئے کہ تمام مذہب والے انہیں  مانتے ہیں، متشابہات ان آیتوں کو کہتے ہیں  جو منسوخ ہیں  اور جو پہلے اور بعد کی ہیں  اور جن میں مثالیں دی گئیں ہیں  اور قسمیں کھائی گئی ہیں  اور جن پر صرف ایمان لایا جاتا ہے اور عمل کیلئے وہ احکام نہیں، حضرت ابن عباس کا بھی یہی فرمان ہے حضرت مقاتل فرماتے ہیں  اس سے مراد سورتوں کے شروع کے حروف مقطعات ہیں ۔ حضرت مجاہد کا قول یہ ہے کہ ایک دوسرے کی تصدیق کرنے والی ہیں، جیسے اور جگہ ہے (آیت  کتابا متشابھا مثانی) اور مثانی وہ ہے جہاں دو مقابل کی چیزوں کا ذِکر ہو جیسے جنت دوزخ کی صفت، نیکوں اور بدوں کا حال وغیرہ وغیرہ۔ اس آیت میں متشابہ محکم کے مقابلہ میں اس لئے ٹھیک مطلب وہی ہے جو ہم نے پہلے بیان کیا اور حضرت محمد بن اسحاق بن یسار کا یہی فرمان ہے، فرماتے ہیں  یہ رب کی حجت ہے ان میں بندوں کا بچاؤ ہے، جھگڑوں کا فیصلہ ہے، باطل کا خاتمہ ہے، انہیں  ان کے صحیح اور اصل مطلب سے کوئی گھما نہیں  سکتا نہ ان کے معنی میں ہیر پھیر کر سکتا ہے ۔ متشابہات کی سچائی میں کلام نہیں  ان میں تصرف و تاویل نہیں  کرنی چاہئے ۔ ان سے اللہ تعالیٰ اپنے بندوں کے ایمان کو آزماتا ہے جیسے حلال حرام سے آزماتا ہے، انہیں  باطل کی طرف لے جانا اور حق سے پھیرنا چاہئے ۔ پھر فرماتا ہے کہ جن کے دِلوں میں کجی ٹیڑھ پن گمراہی اور حق سے باطل کی طرف ہی ہے وہ تو متشابہ آیتوں کو لے کر اپنے بدترین مقاصد کو پورا کرنا چاہتے ہیں  اور لفظی اختلاف سے ناجائز فائدہ اٹھا کر اپنے مذموم مقاصد کی طرف موڑ لیتے ہیں  اور جو محکم آیتیں ان میں ان کا وہ مقصد پورا نہیں  ہوتا۔ کیونکہ ان کے الفاظ بالکل صاف اور کھلے ہوئے ہوتے ہیں  نہ وہ انہیں  ہٹا سکتے ہیں  نہ ان سے اپنے لئے کوئی دلیل حاصل کر سکتے ہیں ۔ اسی لئے فرمان ہے کہ اس سے ان کا مقصد فتنہ کی تلاش ہوتی ہے تاکہ اپنے ماننے والوں کو بہکائیں، اپنی بدعتوں کی مدافعت کریں جیسا کہ عیسائیوں نے قرآن کے الفاظ روح اللہ اور کلمۃ اللہ سے حضرت عیسیٰ کے اللہ کا لڑکا ہونے کی دلیل لی ہے ۔ پس اس متشابہ آیت کو لے کر صاف آیت جس میں یہ لفظ ہیں  کہ (آیت ان ھو الا عبد الخ، یعنی حضرت عیسیٰ اللہ کے غلام ہیں، جن پر اللہ کا انعام ہے، اور جگہ ہے (آیت ان مثل عیسیٰ عند اللہ کمثل ادم الخ،) یعنی حضرت عیسیٰ کی مثال اللہ تعالیٰ کے نزدیک حضرت آدم کی طرح ہے کہ انہیں  اللہ نے مٹی سے پیدا کیا پھر اسے کہا کہ ہو جا، وہ ہو گیا، چنانچہ اسی طرح کی اور بھی بہت سی صریح آیتیں ہیں  ان سب کو چھوڑ دیا اور متشابہ آیتوں سے حضرت عیسیٰ کے اللہ کا بیٹا ہونے پر دلیل لے لی حالانکہ آپ اللہ کی مخلوق ہیں، اللہ کے بندے ہیں، اس کے رسول ہیں ۔ پھر فرماتا ہے کہ ان کی دوسری غرض آیت کی تحریف ہوتی ہے تاکہ اسے اپنی جگہ سے ہٹا کر مفہوم بدل لیں، حضور صلی اللہ علیہ و سلم نے یہ آیت پڑھ کر فرمایا کہ جب تم ان لوگوں کو دیکھو جو متشابہ آیتوں میں جھگڑتے ہیں  تو انہیں  چھوڑ دو، ایسے ہی لوگ اس آیت میں مراد لئے گئے ہیں ۔ یہ حدیث مختلف طریق سے بہت سی کتابوں میں مروی ہے، صحیح بخاری شریف میں بھی یہ حدیث اس آیت کی تفسیر میں مروی ہے، ملاحظہ ہو کتاب القدر، ایک اور حدیث میں ہے یہ لوگ خوارج ہیں  (مسند احمد) پس اس حدیث کو زیادہ سے زیادہ موقوف سمجھ لیا جائے تاہم اس کا مضمون صحیح ہے اس لئے کہ پہلے بدعت خوارج نے ہی پھیلائی ہے، فرقہ محض دنیاوی رنج کی وجہ سے مسلمانوں سے الگ ہوا۔ حضور صلی اللہ علیہ و سلم نے جس وقت حنین کی غنیمت کا مال تقسیم کیا اس وقت ان لوگوں نے اسے خلافِ عدل سمجھا اور ان میں سے ایک نے جسے ذواخویصرہ کہا جاتا ہے اس نے حضور صلی اللہ علیہ و سلم کے سامنے آ کر صاف کہا کہ حضرت عدل کیجئے، آپ نے اس تقسیم میں انصاف نہیں  کیا، آپ صلی اللہ علیہ و سلم نے فرمایا مجھے اللہ نے امین بنا کر بھیجا تھا، اگر میں بھی عدل نہیں  کروں تو پھر برباد ہو اور نقصان اٹھائے، جب وہ پلٹا تو حضرت عمر فاروق نے درخواست کی کہ مجھے اجازت دی جائے کہ میں اسے مار ڈالوں، آپ صلی اللہ علیہ و سلم نے فرمایا چھوڑ دو، اس کے ہم خیال ایک ایسی قوم پیدا ہو گی کہ تم لوگ اپنی نمازوں کو ان کی نمازوں کے مقابلہ اور اپنی قرآن خوانی کو ان کی قرآن خوانی کے مقابلہ میں حقیر سمجھو گے لیکن دراصل وہ دِین سے اس طرح نکل جائیں گے جس طرح تیر کمان سے نکل جاتا ہے، تم جہاں انہیں  پاؤ گے قتل کرو گے، انہیں  قتل کرنے والے کو بڑا ثواب ملے گا، حضرت علی کی خلافت کے زمانہ میں ان کا ظہور ہوا اور آپ نے انہیں  نہروان میں قتل کیا پھر ان میں پھوٹ پڑی تو ان کے مختلف الخیال فرقے پیدا ہو گئے، نئی نئی بدعتیں دِین میں جاری ہو گئیں اور اللہ کی راہ سے بہت دُور چلے گئے، ان کے بعد قدریہ فرقے کا ظہور ہوا، پھر معتزلہ پھر جہمیہ وغیرہ پیدا ہوئے اور حضور صلی اللہ علیہ و سلم کی پیشین گوئی پوری ہوئی کہ میری اُمت میں عنقریب تہتر فرقے ہوں گے سب جہنمی ہوں گے سوائے ایک جماعت کے ۔ صحابہ نے پوچھا وہ کون لوگ ہوں گے ؟ آپ صلی اللہ علیہ و سلم نے فرمایا وہ جو اس چیز پر ہوں جس پر میں ہوں اور میرے اصحاب (مستدرک حاکم) ایویعلیٰ کی حدیث میں ہے کہ آپ صلی اللہ علیہ و سلم نے فرمایا میری اُمت میں سے ایک قوم پیدا ہو گی جو قرآن تو پڑھے گی لیکن اسے اس طرح پھینکے گی جیسے کوئی کھجور کی گٹھلیاں پھینکتا ہو، اس کے غلط مطالب بیان کرے گی، پھر فرمایا اس کی حقیقی تاویل اور واقعی مطلب اللہ ہی جانتا ہے، لفظ اللہ پر وقف ہے یا نہیں ؟ اس میں اختلاف ہے، حضرت عبد اللہ بن عباس تو فرماتے ہیں  تفسیر چار قسم کی ہے، ایک وہ جس کے سمجھنے میں کسی کو مشکل نہیں، ایک وہ جسے عرب اپنے لغت سے سمجھتے ہیں، ایک وہ جسے جید علماء اور پورے علم والے ہی جانتے ہیں  اور ایک وہ جسے بجز ذاتِ الٰہی کے اور کوئی نہیں  جانتا۔ یہ روایت پہلے بھی گزر چکی ہے، حضرت عائشہ کا بھی یہی قول ہے، معجم کبیر میں حدیث ہے کہ مجھے اپنی امت پر صرف تین باتوں کا ڈر ہے ۔ مال کی کثرت کا جس سے حسد و بغض پیدا ہو گا اور آپس کی لڑائی شروع ہو گی، دوسرا یہ کہ کتاب اللہ کی تاویل کا سلسلہ شروع ہو گا حالانکہ اصلی مطلب ان کا اللہ ہی جانتا ہے اور اہل علم والے کہیں  گے کہ ہمارا اس پر ایمان ہے ۔ تیسرے یہ کہ علم حاصل کرنے کے بعد اسے بے پرواہی سے ضائع کر دیں گے، یہ حدیث بالکل غریب ہے اور حدیث میں ہے کہ قرآن اس لئے نہیں  اترا کہ ایک آیت دوسری آیت کی مخالف ہو، جس کا تمہیں  علم ہو اور اس پر عمل کرو اور جو متشابہ ہوں ان پر ایمان لاؤ (ابن مردویہ) ابن عباس حضرت عمر بن عبدالعزیز اور حضرت مالک بن انس سے بھی یہی مروی ہے کہ بڑے سے بڑے عالم بھی اس کی حقیقت سے آگاہ نہیں  ہوتے، ہاں اس پر ایمان رکھتے ہیں ۔ ابن مسعود فرماتے ہیں  کہ پختہ علم والے یہی کہتے ہیں  اس کی تاویل کا علم اللہ ہی کو ہے کہ اس پر ہمارا ایمان ہے ۔ ابی بن کعب بھی یہی فرماتے ہیں، امام ابن جریر بھی اسی سے اتفاق کرتے ہیں، یہ تو تھی وہ جماعت جو الا اللہ پر وقف کرتی تھی اور بعد کے جملہ کو اس سے الگ کرتی تھی، کچھ لوگ یہاں نہیں  ٹھہرتے اور فی العلم پر وقف کرتے ہیں، اکثر مفسرین اور اہلِ اصول بھی یہی کہتے ہیں، ان کی بڑی دلیل یہ ہے کہ جو سمجھ میں نہ آئے اس بات کا ٹھیک نہیں، حضرت ابن عباس فرمایا کرتے تھے میں ان راسخ علماء میں ہوں جو تاویل جانتے ہیں، مجاہد فرماتے ہیں  راسخ علم والے تفسیر جانتے ہیں، حضرت محمد بن جعفر بن زبیر فرماتے ہیں  کہ اصل تفسیر اور مراد اللہ ہی جانتا ہے اور مضبوط علم والے کہتے ہیں  کہ ہم اس پر ایمان لائے پھر متشابہات آیتوں کی تفسیر محکمات کی روشنی کرتے ہیں  جن میں کسی کو بات کرنے کی گنجائش نہیں  رہتی، قرآن کے مضامین ٹھیک ٹھاک سمجھ میں آتے ہیں  دلیل واضح ہوتی ہے، عذر ظاہر ہو جاتا ہے، باطل چھٹ جاتا ہے اور کفر دفع ہو جاتا ہے، حدیث میں ہے کہ حضور صلی اللہ علیہ و سلم نے حضرت عبد اللہ بن عباس کیلئے دعا کی کہ اے اللہ انہیں  دِین کی سمجھ دے اور تفسیر کا علم تھے، بعض علماء نے تفصیل سے بات کرتے ہوئے کہا ہے، قرآن کریم میں تاویل دو معنی میں آئی ہے، ایک معنی جن سے مفہوم کی اصلی حقیقت اور اصلیت کی نشاندہی ہوتی ہے، جیسے قرآن میں ہے (آیت یابت ھذا تاویل رویای میرے باپ میرے خواب کی یہی تعبیر ہے، اور جگہ ہے (آیت ھل ینظرون الا تاویلہ یوم یاتی تاویلہ الآیہ) کافروں کے انتظار کی حد حقیقت کے ظاہر ہونے تک ہے اور یہ  دن وہ ہو گا جب حقیقت سچائی کی گواہ بن کر نمودار ہو گی، پس ان دونوں جگہ پر تاویل سے مراد حقیقت ہے، اگر اس آیت مبارکہ میں تاویل سے مراد یہی تاویل لی جائے تو الااللہ پر وقف ضروری ہے اس لئے کہ تمام کاموں کی حقیقت اور اصلیت بجز ذات پاک کے اور کوئی نہیں  جانتا تو راسخون فی العلم مبتدا ہو گا اور یقولون امنابہ خبر ہو گی اور یہ جملہ بالکل الگ ہو گا اور تاویل کے دوسرے معنی تفسیر اور بیان اور ہے اور ایک شئی کی تعبیر دوسری شے ہے، جیسے قرآن میں ہے (آیت نبئنا بتاویلہ) ہمیں اس کی تاویل بتاؤ یعنی تفسیر اور بیان، اگر آیت مذکورہ میں تاویل سے یہ مراد لی جائے تو فی العلم پر وقف کرنا چاہئے، اس لئے کہ پختہ علم والے علماء جانتے ہیں  اور سمجھتے ہیں  کیونکہ خطاب انہی سے ہے، گو حقائق کا علم انہیں  بھی نہیں، تو اس بنا پر امنا بہ حال ہو گا اور یہ بھی ہو سکتا ہے کہ بغیر معطوف علیہ کے معطوف ہو، جیسے اور جگہ ہے (آیت للفقراء المھاجرین الخ، سے یقولون ربنا اغفرلنا الخ،) تک دوسری جگہ ہے (آیت وجاء ربک والملک صفا صفا) یعنی وجاء الملائکۃ صفوفا صفوفا اور ان کی طرف سے یہ خبر کہ ہم اس پر ایمان لائے اس کے یہ معنی ہوں گے کہ متشابہ پر ایمان لائے، پھر اقرار کرتے ہیں  کہ یہ سب یعنی محکم اور متشابہ حق اور سچ ہے اور یعنی ہر ایک دوسرے کی تصدیق کرتا ہے اور گواہی دیتا ہے کہ یہ سب اللہ تعالیٰ کی طرف سے ہے اس میں کوئی اختلاف اور تضاد نہیں، جیسے اور جگہ ہے (آیت  افلا یتدبرون القران ولو کان من عند غیر اللہ لوجدوا فیہ اختلافا کثیرا) یعنی کیا یہ لوگ قرآن میں غوروفکر نہیں  کرتے، اگر یہ اللہ کے سوا کسی اور کی طرف سے ہوتا تو اس میں بہت سا اختلاف ہوتا، اسی لئے یہاں بھی فرمایا کہ اسے صرف عقلمند ہی سمجھتے ہیں  جو اس پر غور و تدبر کریں، جو صحیح سالم عقل والے ہوں جن کے دماغ درست ہوں، حضور صلی اللہ علیہ و سلم سے سوال ہوتا ہے کہ پختہ علم والے کون ہیں ؟ آپ صلی اللہ علیہ و سلم نے فرمایا جس کی قسم سچی ہو، جس کی زبان راست گو ہو، جس کا دِل سلامت ہو، جس کا پیٹ حرام سے بچا ہو اور جس کی شرم گاہ زناکاری سے محفوظ ہو، وہ مضبوط علم والے ہیں  (ابن ابی حاتم) اور حدیث میں ہے کہ آپ نے چند لوگوں کو دیکھا کہ وہ قرآن شریف کے بارے میں لڑ جھگڑ رہے ہیں ۔ آپ صلی اللہ علیہ و سلم نے فرمایا سنو تم سے پہلے لوگ بھی اسی میں ہلاک ہوئے کہ انہوں نے کتاب اللہ کی آیتوں کو ایک دوسرے کے خلاف بتا کر اختلاف کیا حالانکہ کتاب اللہ کی ہر آیت ایک دوسرے کی تصدیق کرتی ہے، تم ان میں اختلاف پیدا کر کے ایک کو دوسری کے متضاد نہ کہو، جو جانو وہی کہو اور جو نہیں  جانو اسے جاننے والوں کو سونپ دو (مسند احمد) اور حدیث میں ہے کہ قرآن سات حرفوں پر اترا، قرآن میں جھگڑنا کفر ہے، قرآن میں اختلاف اور تضاد پیدا کرنا کفر ہے، جو جانو اس پر عمل کرو، جو نہ جانو اسے جاننے والے کی طرف سونپو جل جلالہ (ایویعلی)

راسخ فی العلم کون؟

نافع بن یزید کہتے ہیں  راسخ فی العلم وہ لوگ ہیں  جو متواضع ہوں جو عاجزی کرنے والے ہوں، رب کی رضا کے طالب ہوں، اپنے سے بڑوں سے مرعوب نہ ہوں، اپنے سے چھوٹے کو حقیر سمجھنے والے نہ ہوں ۔ پھر فرمایا کہ یہ سب دعا کرتے ہیں  کہ ہمارے دِلوں کو ہدایت پر جمانے کے بعد انہیں  ان لوگوں کے دِلوں کی طرح نہ کر جو متشابہ کے پیچھے پڑ کر برباد ہو جاتے ہیں  بلکہ ہمیں اپنی صراطِ مستقیم پر قائم رکھ اور اپنے مضبوط دِین پر دائم رکھ، ہم پر اپنی رحمت نازل فرما، ہمارے دِلوں کو قرار دے، ہم سے گندگی کو دُور کر، ہمارے ایمان و یقین کو بڑھا تو بہت بڑا دینے والا ہے، رسول اللہ صلی اللہ علیہ و سلم دعا مانگا کرتے تھے (حدیث یامقلب القلوب ثبت قلبی علی دینک) اے دِلوں کے پھیرنے والے میرے دِل کو اپنے دِین پر جما ہوا رکھ، پھر یہ دعا ربنا لاتزغ پڑھتے اور حدیث میں ہے کہ آپ بکثرت یہ دعا پڑتھے تھے (حدیث اللھم مقلب القلوب ثبت قلبی علی دینک حضرت اسماء نے ایک  دن پوچھا کیا دِل الٹ پلٹ ہو جاتا ہے ؟ آپ نے فرمایا ہاں ہر انسان کا دِل اللہ تعالیٰ کی انگلیوں میں سے دو انگلیوں کے درمیان ہے، اگر چاہے قائم رکھے اگر چاہے پھیر دے، ہماری دعا ہے ہمارا رب دِلوں کو ہدایت کے بعد ٹیڑھا نہ کر دے اور ہمیں اپنے پاس سے رحمتیں عنایت فرمائے، وہ بہت زیادہ دینے والا ہے ۔ ایک روایت میں یہ بھی ہے کہ میں نے کہا یا رسول اللہ صلی اللہ علیہ و سلم مجھے کوئی ایسی دعا سکھائیے کہ میں اپنے لئے مانگا کروں، آپ نے فرمایا یہ دعا مانگ (حدیث اللھم رب محمد النبی اغفرلی ذنبی و اذھب غیظ قلبی و اجرنی من مضلات الفتن) اے اللہ اے محمد نبی صلی اللہ علیہ و سلم کے رب میرے گناہ معاف فرما، میرے دِل کا غصہ اور رنج اور سختی دُور کر اور مجھے گمراہ کرنے والے فتنوں سے بچا لے، حضرت عائشہ صدیقہ نے بھی آپ کی دعا یا مقلب القلوب سن کر حضرت اسماء کی طرح میں نے بھی یہی سوال کیا اور آپ نے وہی جواب دیا اور پھر قرآن کی یہ دعا سنائی، یہ حدیث غریب ہے لیکن قرآنی آیت کی تلاوت کے بغیر یہی بخاری مسلم میں بھی مروی ہے، اور نسائی میں ہے کہ حضور صلی اللہ علیہ و سلم جب رات کو جاگتے تو یہ دعا پڑھتے (حدیث لا الہ الا انت سبحانک استغفرک لذنبی واسئلک رحمۃ اللھم زدنی علما ولا تزغ بعد اذ ھدیتنی وھب لی من لدنک رحمۃ انک انت الوھاب) اے اللہ تیرے سوا کوئی معبود نہیں، میں تجھ سے اپنے گناہوں کی بخشش مانگتا ہوں اور تجھ سے تیری رحمت کا سوال کرتا ہوں، اللہ میرے علم میں زیادتی فرما اور میرے دِل کو تو نے ہدایت دے دی ہے اسے گمراہ نہ کرنا اور مجھے اپنے پاس کی رحمت بخش تو بہت زیادہ دینے والا۔ حضرت ابوبکر صدیق نے مغرب کی نماز پڑھائی، پہلی دو رکعتوں میں الحمد شریف کے بعد مفصل کی چھوٹی سی دو سورتیں پڑھیں اور تیسری رکعت میں سورۃ الحمد شریف کے بعد یہی آیت پڑھی۔ ابوعبد اللہ صبالجی فرماتے ہیں  میں اس وقت ان کے قریب چلا گیا تھا، یہاں تک کہ میرے کپڑے ان کے کپڑوں سے مل گئے تھے اور میں نے خود اپنے کان سے ابوبکر صدیق کو یہ پڑھتے ہوئے سنا (عبدالرزاق) حضرت عمر بن عبدالعزیز نے جب تک یہ حدیث نہیں  سنی تھی آپ اس رکعت میں قل ھو اللہ پڑھا کرتے تھے لیکن یہ حدیث سننے کے بعد امیرالمومنین نے بھی اسی کو پڑھنا شروع کیا اور کبھی ترک نہیں  کیا۔ پھر فرمایا وہ یہ بھی کہتے ہیں  کہ اے اللہ تو قیامت کے  دن اپنی تمام مخلوق کو جمع کرنے والا ہے اور ان میں فیصلے اور حکم کرنے والا ہے، ان کے اختلافات کو سمیٹنے والا ہے اور ہر ایک کو بھلے برے عمل کا بدلہ دینے والا ہے اس  دن کے آنے میں اور تیرے وعدوں کے سچے ہونے میں کوئی شک نہیں ۔

۱۰

جہنم کا ایندھن کون لوگ؟

 فرماتا ہے کہ کافر جہنم کی بھٹیاں اور اس میں جلنے والی لکڑیاں ہیں، ان ظالموں کو اس دن کوئی عذر معذرت ان کے کام نہ آئے گی، ان پر لعنت ہے، اور ان کیلئے برا گھر ہے، ان کے مال ان کی اولادیں بھی انہیں  کچھ فائدہ نہیں  پہنچا سکیں گی، اللہ کے عذاب سے نہیں  بچا سکیں گے، جیسا اور جگہ فرمایا (آیت فلا تعجبک اموالھم الخ،) تو ان کے مال و اولاد پر تعجب نہ کرنا اس کی وجہ سے اللہ کا ارادہ انہیں  دنیا میں بھی عذاب دینا ہے، ان کی جانیں کفر میں ہی نکلیں گی، اسی طرح ارشاد ہے کافروں کا شہروں میں گھومنا گھامنا تجھے فریب میں نہ ڈال دے، یہ تو مختصر سا فائدہ ہے، پھر ان کی جگہ جہنم ہی ہے جو بدترین بچھونا ہے، اسی طرح یہاں بھی فرمان ہے کہ اللہ کی کتابوں کو جھٹلانے والے اس کے رسولوں کے منکر اس کی کتاب کے مخالف اس کی وحی کے نافرمان اپنی اولاد اور اپنے مال سے کوئی بھلائی کی توقع نہ رکھیں، یہ جہنم کی لکڑیاں ہیں  جن سے جہنم سلگائی اور بھڑکائی جائے گی، جیسے اور جگہ ہے (آیت انکم و ما تعبدون من دون اللہ حصب جہنم الخ،) تم اور تمہارے معبود جہنم کی لکڑیاں ہو، ابن ابی حاتم میں ہے حضرت عبد اللہ بن عباس عنہما کی والدہ صاحبہ حضرت ام فضل کا بیان ہے کہ مکہ شریف میں ایک رات رسول اللہ صلی اللہ علیہ و سلم کھڑے ہو گئے اور باآواز بلند فرمانے لگے، لوگو! کیا میں نے اللہ کی باتیں تم تک پہنچا دیں ؟ لوگو! کیا میں نے تبلیغ کا حق ادا کر دیا؟ لوگو! کیا میں وحدانیت و رسالت کا مطلب تمہیں  سمجھا چکا؟ حضرت عمر فرمانے لگے ہاں حضور صلی اللہ علیہ و سلم بیشک آپ نے اللہ کا دِین ہمیں پہنچایا پھر جب صبح ہوئی تو آپ نے فرمایا سنو اللہ کی قسم اسلام غالب ہو گا اور خوب پھیلے گا، یہاں تک کہ کفر اپنی جگہ جا چھپے گا، مسلمان اسلام اپنے قول و عمل میں لئے سمندروں کو چیرتے پھاڑتے نکل جائیں گے اور اسلام کی اشاعت کریں گے، یاد رکھو وہ زمانہ بھی آنے والا ہے کہ لوگ قرآن کو سیکھیں گے پڑھیں گے (پھر تکبر برائی اور اندھے پن کے طور پر) کہنے لگیں گے ہم قاری ہیں، عالم ہیں، کون ہے جو ہم سے بڑھ چڑھ کر ہو؟ کیا ان لوگوں میں کچھ بھی بھلائی ہو گی؟ لوگوں نے پوچھا حضور صلی اللہ علیہ و سلم وہ کون لوگ ہیں، آپ نے فرمایا وہ تم ہی مسلمانوں میں سے ہوں گے لیکن خیال رہے کہ وہ جہنم کا ایندھن ہیں، ابن مردویہ میں بھی یہ حدیث ہے، اس میں یہ بھی ہے کہ حضرت عمر نے جواب میں کہا ہاں ہاں اللہ کی قسم آپ نے بڑی حرص اور چاہت سے تبلیغ کی، آپ نے پوری جدوجہد اور دوڑ دھوپ کی، آپ نے ہماری زبردست خیرخواہی کی اور بہتری چاہی۔ پھر فرماتا ہے جیسا حال فرعونوں کا تھا اور جیسے کرتوت ان کے تھے، لفظ داب ہمزہ کے جزم سے بھی آتا ہے اور ہمزہ کے زبر سے بھی آتا ہے، جیسا نہر اور نہر، اس کے معنی شان عدالت حال طریقے کے آتے ہیں، امرا القیس کے شعروں میں بھی یہ لفظ اسی معنی میں آیا ہے، مطلب اس آیت شریف کا یہ ہے کہ کفار کا مال و اولاد اللہ کے ہاں کچھ کام نہ آئے گا جیسے فرعونوں اور ان سے اگلے کفار کو کچھ کام نہ آیا، اللہ کی پکڑ سخت ہے اس کا عذاب دردناک ہے، کوئی کسی طاقت سے بھی اس سے بچ نہیں  سکتا نہ اسے روک سکتا ہے، وہ اللہ جو چاہے کرتا ہے، ہر چیز اس کے سامنے حقیر ہے، نہ اس کے سوا کوئی معبود نہ رَب۔

۱۲

اولین معرکہ حق و باطل

 اللہ تعالیٰ فرماتا ہے کہ اے محمد صلی اللہ علیہ و سلم کافروں سے کہہ دیجئے کہ تم دنیا میں بھی ذلیل و مغلوب کئے جاؤ گے، ہارو گے، ماتحت بنو گے اور قیامت کے  دن بھی ہانک کر جہنم میں جمع کئے جاؤ گے جو بدترین بچھونا ہے ۔ سیرت ابن اسحاق میں ہے کہ جب بدر کی جنگ سے حضور صلی اللہ علیہ و سلم مظفر و منصور واپس ہوئے تو بنو قینقاع کے بازار میں یہودیوں کو جمع کیا اور فرمایا! اس سے پہلے کہ قریش کی طرح تمہیں  بھی ذلت و پستی دیکھنا پڑے اسلام قبول کر لو، تو اس سرکش جماعت نے جواب دیا کہ چند قریشیوں کو جو فنونِ جنگ سے ناآشنا تھے، آپ نے انہیں  ہرا لیا اور دماغ میں غرور سما گیا، اگر ہم سے لڑائی ہوئی تو ہم بتا دیں گے کہ لڑنے والے ایسے ہوتے ہیں، آپ کو ابھی تک ہم سے پالا ہی نہیں  پڑا۔ اس پر یہ آیت اتری اور فرمایا گیا فتح بدر نے ظاہر کر دیا ہے کہ اللہ اپنے سچے اچھے اور پسندیدہ دِین کو اور اس دِین والوں کو عزت و حرمت عطا فرمانے والا ہے، وہ اپنے رسول صلی اللہ علیہ و سلم کا اور آپ کی اطاعت گزار اُمت کا خود مددگار ہے ۔ وہ اپنی باتوں کو ظاہر اور غالب کرنے والا ہے ۔ دو جماعتیں لڑائی میں گتھم گتھا ہو گئی تھیں، ایک صحابہ کرام کی اور دوسری مشرکین قریش کی، یہ واقعہ جنگ بدر کا ہے، اس دن مشرکین پر اس قدر رعب غالب آیا اور اللہ نے اپنے بندوں کی اس طرح مدد کی گو مسلمان گنتی میں مشرکین سے کہیں  کم تھے لیکن مشرکوں کو اپنے سے دُگنے نظر آتے تھے، مشرکوں نے لڑائی شروع ہونے سے پہلے ہی جاسوسی کیلئے عمیر بن سعد کو بھیجا تھا جس نے آ کر اطلاع دی تھی کہ تین سو ہیں، کچھ کم یا زائد ہوں اور واقعہ بھی یہی تھا کہ صرف تین سو دَس اور کچھ تھے لیکن لڑائی کے شروع ہوتے ہی اللہ عزوجل نے اپنے خاص اور چیدہ فرشتے ایک ہزار بھیجے ۔ ایک معنی تو یہ ہیں، دوسرا مطلب یہ بھی بیان کیا گیا ہے کہ مسلمان دیکھتے تھے اور جانتے تھے کہ کافر ہم سے دوچند ہیں، پھر بھی اللہ عزوجل نے انہی کی مدد کی۔ حضرت ابن عباس فرماتے ہیں  کہ بدری صحابہ تین سو تیرہ تھے اور مشرکین چھ سو سولہ تھے ۔ لیکن تواریخ کی کتابوں میں مشرکین کی تعداد نو سو سے ایک ہزار تک بیان کی گئی ہے، ہو سکتا ہے حضرت عبداللہ کا قرآن کے الفاظ سے یہ استدلال ہو کہ ابن الحجاج قبیلہ کا جو سیاہ فام غلام پکڑا ہوا آیا تھا اس سے جب حضور نے پوچھا کہ قریش کی تعداد کتنی ہے ؟ اس نے کہا بہت ہیں، آپ نے پھر پوچھا اچھا روز کتنے اونٹ کٹتے ہیں، اس نے کہا ایک  دن نو دوسرے  دن دس، آپ نے فرمایا بس تو ان کی گنتی نو سو اور ایک ہزار کے درمیان ہے ۔ پس مشرکین مسلمانوں سے تین گنے تھے واللہ اعلم، لیکن یہ یاد رہے کہ عرب کہہ دیا کرتے ہیں  کہ میرے پاس ایک ہزار تو ہیں  لیکن مجھے ضرورت ایسے ہی دوگنا کی ہے اس سے مراد ان کی تین ہزار ہوتی ہے ۔ اب کوئی مشکل باقی نہ رہی، لیکن ایک اور سوال ہے وہ یہ کہ قرآن کریم میں اور جگہ ہے (آیت واذا یریکموھم اذالتقیتم فی اعینکم قلیلا ویقللکم فی اعینھم لیقضی اللہ امرا کان مفعولا) یعنی جب آمنے سامنے آ گئے تو اللہ نے انہیں  تمہاری نگاہوں کے سامنے کم کر کے دکھایا اور تمہیں  ان کی نگاہوں میں زیادہ کر کے دکھایا تاکہ جو کام کرنے کا فیصلہ اللہ کر چکا تھا وہ ہو جائے ۔ پس اس آیت سے معلوم ہوتا ہے کہ اصل تعداد سے بھی کم نظر آئے اور مندرجہ بالا آیت سے معلوم ہوتا ہے کہ زیادہ بلکہ دُگنے نظر آئے ۔ تو دونوں آیتوں میں تطبیق کیا ہو گی؟ اس کا جواب یہ ہے کہ اس آیت کا شان نزول اور تھا اور اس کا وقت اور تھا، حضرت ابن مسعود فرماتے ہیں  کہ بدر والے  دن ہمیں مشرکین کچھ زیادہ نہیں  لگے، ہم نے غور سے دیکھا پھر بھی یہی معلوم ہوا کہ ہم سے ان کی گنتی زیادہ نہیں، دوسری روایت میں ہے کہ مشرکین کی تعداد اس قدر کم معلوم ہوئی کہ میں نے اپنے پاس کے ایک شخص سے کہا کہ یہ لوگ تو کوئی ستر ہوں گے، اس نے کہا نہیں  نہیں  سو ہوں گے، جب ان میں سے ایک شخص پکڑا گیا تو ہم نے اس سے مشرکین کی گنتی پوچھی، اس نے کہا ایک ہزار ہیں ۔ اب جبکہ دونوں فریق ایک دوسرے کے سامنے صفیں باندھ کر کھڑے ہو گئے تو مسلمانوں کو یہ معلوم ہونے لگا کہ مشرکین ہم سے دوگنے ہیں ۔ یہ اس لئے کہ انہیں  اپنی کمزوری کا یقین ہو جائے اور یہ اللہ پر پورا بھروسہ کر لیں اور تمام تر توجہ اللہ کی جانب پھیر لیں اور اپنے رب عزوجل سے اعانت اور امداد کی دعائیں کرنے لگیں، ٹھیک اسی طرح مشرکین کو مسلمانوں کی تعداد دوگنی معلوم ہونے لگی تاکہ ان کے دِلوں میں رعب اور خوف بیٹھ جائے اور گھبراہٹ اور پریشانی بڑھ جائے، پھر جب دونوں بھڑ گئے اور لڑائی ہونے لگی تو ہر فریق دوسرے کو اپنی نسبت کم نظر آنے لگا تاکہ ایک دِل کھول کر حوصلہ نکالے اور اللہ تعالیٰ حق و باطل کا صاف فیصلہ کر دے، ایمان و کفر و طغیان پر غالب آ جائے ۔ مومنوں کو عزت اور کافروں کو ذلت مل جائے، جیسے اور جگہ ہے (آیت ولقد نصرکم اللہ ببدرو و انتم اذلتہ) یعنی البتہ اللہ تعالیٰ نے بدر والے دن تمہاری مدد کی حالانکہ تم اس وقت کمزور تھے ۔ اسی لئے یہاں بھی فرمایا اللہ جسے چاہے اپنی مدد سے طاقتور بنا دے، پھر فرماتا ہے اس میں عبرت و نصیحت ہے اس شخص کیلئے جو آنکھوں والا ہو جس کا دماغ صحیح و سالم ہو، وہ اللہ کے احکام کی بجا آوری میں لگ جائے گا اور سمجھ لے گا کہ اللہ اپنے پسندیدہ بندوں کو اس جہان میں بھی مدد کرتا ہے اور قیامت کے  دن بھی ان کا بچاؤ کرے گا۔

۱۴

دنیا کے حُسن اور آخرت کے جمال کا تقابل

 اللہ تعالیٰ بیان فرماتا ہے کہ دنیا کی زندگی کو طرح طرح کی لذتوں سے سجایا گیا ہے ان سب چیزوں میں سب سے پہلے عورتوں کو بیان فرمایا، اس لئے کہ ان کا فتنہ بڑا زبردست ہے ۔ صحیح حدیث میں ہے رسول اللہ صلی اللہ علیہ و سلم فرماتے ہیں  میں نے اپنے بعد مردوں کیلئے عورتوں سے زیادہ نقصان دہ اور کوئی فتنہ نہیں  چھوڑا، ہاں جب کسی شخص کی نیت نکاح کر کے زنا سے بچنے کی اور اولاد کی کثرت سے ہو تو بیشک یہ نیک کام ہے اس کی رغبت شریعت نے دلائی ہے اور اس کا حکم دیا ہے اور بہت سی حدیثیں نکاح کرنے بلکہ کثرت نکاح کرنے کی فضیلت میں آئی ہیں  اور اس اُمت میں سب سے بہتر وہ ہے جو سب سے زیادہ بیویوں والا ہو، نبی صلی اللہ علیہ و سلم فرماتے ہیں  دنیا کا ایک فائدہ ہے اور اس کا بہترین فائدہ نیک بیوی ہے کہ خاوند اگر اس کی طرف دیکھے تو یہ اسے خوش کر دے اور اگر حکم دے تو بجا لائے اور اگر کہیں  چلا جائے تو اپنے نفس کی اور خاوند کے مال کی حفاظت کرے ۔ دوسری حدیث میں ہے مجھے عورتیں اور خوشبو بہت پسند ہے اور میری آنکھوں کی ٹھنڈک نماز میں ہے ۔ حضرت عائشہ فرماتی ہیں  رسول اللہ صلی اللہ علیہ و سلم کو سب سے زیادہ محبوب عورتیں تھیں، ہاں گھوڑے ان سے بھی زیادہ پسند تھے، ایک اور روایت میں ہے  گھوڑوں سے زیادہ آپ کی چاہت کی چیز کوئی اور نہ تھی ہاں صرف عورتیں ۔ ثابت ہوا عورتوں کی محبت بھلی بھی ہے اور بری بھی۔ اسی طرح اولاد کی اگر ان کی کثرت اس لئے چاہتا ہے کہ وہ فخر و غرور کرے تو بری چیز ہے اور اگر اس لئے ان کی زیادتی چاہتا ہے کہ نسل بڑھے اور موحد مسلمانوں کی گنتی اُمت محمد صلی اللہ علیہ و سلم میں زیادہ ہو تو بیشک یہ بھلائی کی چیز ہے ۔ حدیث شریف میں ہے محبت کرنے والیوں اور زیادہ اولاد پیدا کرنے والی عورتوں سے نکاح کرو، قیامت کے  دن میں تمہاری زیادتی سے اور امتوں پر فخر کرنے والا ہوں ۔ ٹھیک اسی طرح مال بھی ہے کہ اگر ان کی محبت گرے پڑے لوگوں کو حقیر سمجھنے اور مسکینوں غریبوں پر فخر کرنے کیلئے ہے تو بیحد بری چیز ہے، اور اگر مال کی چاہت اپنوں اور غیروں سے سلوک کرنے، نیکیاں کرنے اور اللہ کی راہ میں خرچ کرنے کیلئے ہے تو ہر طرح وہ شرعاً اچھی اور بہت اچھی چیز ہے ۔ قنطار کی مقدار میں مفسرین کا اختلاف ہے، ماحصل یہ ہے کہ بہت زیادہ مال کو قنطار کہتے ہیں، جیسے حضرت ضحاک کا قول ہے، اور اقوال بھی ملاحظہ ہوں، ایک ہزار دینار، بارہ ہزار چالیس ہزار ساٹھ ہزار، ستر ہزار، اسی ہزار وغیرہ وغیرہ۔ مسند احمد کی ایک مرفوع حدیث میں ہے، ایک قنطار بارہ ہزار اوقیہ کا ہے اور ہر اوقیہ بہتر ہے زمین و آسمان سے، غالباً یہاں مقدار ثواب کی بیان ہوئی ہے جو ایک قنطار ملے گا (واللہ اعلم) حضرت ابوہریرہ سے بھی ایسی ہی ایک موقوف روایت بھی مروی ہے اور یہی زیادہ صحیح ہے ۔ اسی طرح ابن جریر میں حضرت معاذ بن جبل اور حضرت ابن عمر سے بھی مروی ہے، اور ابن ابی حاتم میں حضرت ابوہریرہ اور حضرت ابوالدرداء سے مروی ہے کہ قنطار بارہ سو اوقیہ ہیں، ابن جریر کی ایک مرفوع حدیث میں سو اوقیہ آئے ہیں  لیکن وہ حدیث بھی منکر ہے، ممکن ہے کہ وہ حضرت ابی بن کعب کا قول ہو جیسے اور صحابہ کا بھی یہی فرمان ہے ۔ ابن مردویہ میں ہے رسول اللہ صلی اللہ علیہ و سلم فرماتے ہیں  جو شخص سو آیتیں پڑھ لے غافلوں میں نہیں  لکھا جائے گا اور جس نے سو سے ہزار تک پڑھ لیں اسے اللہ تعالیٰ کی طرف سے ایک قنطار اجر ملے گا، اور قنطار بڑے پہاڑ کے برابر ہے، مستدرک حاکم میں ہی اس آیت کے اس لفظ کا مطلب رسول اللہ صلی اللہ علیہ و سلم سے پوچھا گیا تو آپ صلی اللہ علیہ و سلم نے فرمایا دو ہزار اوقیہ، امام حاکم اسے صحیح اور شرط شیخین پر بتلاتے ہیں ۔ بخاری مسلم نے اسے نقل نہیں  کیا، طبرانی وغیرہ میں ہے ایک ہزار دینار، حضرت حسن بصری سے موقوفاً یا مرسلاً مروی ہے کہ بارہ سو دینار، حضرت ابن عباس سے بھی مروی ہے، ضحاک فرماتے ہیں  بعض عرب قنطار کو بارہ سو کا بتاتے ہیں، بعض بارہ ہزار کا، حضرت ابوسعید خدری فرماتے ہیں  بیل کی کھال کے بھر جانے کے برابر سونے کو قنطار کہتے ہیں ۔ یہ مرفوعاً بھی مروی ہے لیکن زیادہ صحیح موقوفاً ہے، گھوڑوں کی محبت تین قسم کی ہے، ایک تو وہ لوگ جو گھوڑوں کو پالتے ہیں  اور اللہ کی راہ میں ان پر سوار ہو کر جہاد کرنے کیلئے نکلتے ہیں، ان کیلئے تو یہ بہت ہی اجر و ثواب کا سبب ہیں ۔ دوسرے وہ جو فخر و غرور کے طور پر پالتے ہیں، ان کیلئے وبال ہے، تیسرے وہ جو سوال سے بچنے اور ان کی نسل کی حفاظت کیلئے پالتے ہیں  اور اللہ کا حق نہیں  بھولتے، یہ نہ اجر نہ عذاب کے مستحق ہیں ۔ اسی مضمون کی حدیث آیت واعدولھم الخ، کی تفسیر میں آئے گی انشاء اللہ۔ "مسومہ” کے معنی چرنے والا اور پنج کلیان (یعنی پیشانی اور چار قدموں پر نشان) وغیرہ کے ہیں، رسول اللہ صلی اللہ علیہ و سلم فرماتے ہیں  ہر عربی گھوڑا فجر کے وقت اللہ کی اجازت سے دو دعائیں کرتا ہے، کہتا ہے اے اللہ جس کے قبضہ میں تو نے مجھے دیا ہے تو اس کے دِل میں اس کے اہل و مال سے زیادہ میری محبت دے، انعام سے مراد اونٹ گائیں بکریاں ہیں ۔ حرث سے مراد وہ زمین ہے جو کھیتی بونے یا باغ لگانے کیلئے تیار کی جائے، مسند احمد کی حدیث میں ہی انسان کا بہترین مال زیادہ نسل والا گھوڑا ہے اور زیادہ پھلدار درخت کھجور ہے ۔ پھر فرمایا کہ یہ سب دنیاوی فائدہ کی چیزیں ہیں، یہاں کی زینت اور یہاں ہی کی دلکشی کے سامان ہیں  جو فانی اور زوال پالنے والے ہیں، اچھی لوٹنے کی جگہ اور بہترین ثواب کا مرکز اللہ کے پاس ہے، مسند احمد میں ہے کہ جب یہ آیت نازل ہوئی تو حضرت عمر بن خطاب نے فرمایا اے اللہ جبکہ تو نے اسے زینت دے دی تو اس کے بعد کیا؟ اس پر اس کے بعد والی آیت اتری کہ اے نبی صلی اللہ علیہ و سلم آپ ان سے کہہ دیجئے کہ میں تمہیں  اس سے بہترین چیزیں بتاتا ہوں، یہ تو ایک نہ ایک روز زائل ہونے والی ہیں  اور میں جن کی طرف تمہیں  بلا رہا ہوں وہ صرف دیرپا ہی نہیں  بلکہ ہمیشہ رہنے والی ہیں، سنو اللہ سے ڈرنے والوں کیلئے جنت ہے جس کے کنارے کنارے اور جس کے درختوں کے درمیان قسم قسم کی نہریں بہہ رہی ہیں، کہیں  شہد کی، کہیں  دودھ کی، کہیں  پاک شراب کی، کہیں  نفیس پانی کی، اور وہ نعمتیں ہیں  جو نہ کسی کان نے سنی ہوں نہ کسی آنکھ نے دیکھی ہوں نہ کسی دِل میں خیال بھی گزرا ہو، ان جنتوں میں یہ متقی لوگ ابدالآباد رہیں  گے نہ یہ نکالے جائیں نہ انہیں  دی ہوئی نعمتیں گم ہوں گی نہ فنا ہوں گی، پھر وہاں بیویاں ملیں گی جو میل کچیل سے خباثت اور برائی سے حیض اور نفاس سے گندگی اور پلیدی سے پاک ہیں، ہر طرح ستھری اور پاکیزہ، ان سب سے بڑھ کر یہ کہ اللہ کی رضامندی انہیں  حاصل ہو جائے گی اور ایسی کہ اس کے بعد ناراضگی کا کھٹکا ہی نہیں، اسی لئے سورۃ برات کی آیت میں فرمایا ورضوان من اللہ اکبر اللہ کی تھوڑی سی رضامندی کا حاصل ہو جانا بھی سب سے بڑی چیز ہے، یعنی تمام نعمتوں سے اعلیٰ نعمت رضائے رب اور مرضی مولا ہے ۔ تمام بندے اللہ کی نگاہ میں ہیں  وہ بخوبی جانتا ہے کہ کون مہربانی کا مستحق ہے ۔

۱۶

متقیوں کا تعارف

 اللہ تعالی اپنے متقی بندوں کے اوصاف بیان فرماتا ہے کہ وہ کہتے ہیں  اے پروردگار ہم تجھ پر اور تیری کتاب پر اور تیرے رسول صلی اللہ علیہ و سلم پر ایمان لائے، ہمارے اس ایمان کے باعث جو تیری ذات اور تیری شریعت پر ہے تو ہمارے گناہوں کو اپنے فضل و کرم سے معاف فرما اور ہمیں جہنم کے عذاب سے نجات دے، یہ متقی لوگ اللہ کی اطاعت بجا لاتے ہیں  اور حرام چیزوں سے الگ رہتے ہیں، صبر کے سہارے کام لیتے ہیں  اور اپنے ایمان کے دعوے میں بھی سچے ہیں، کل اچھے اعمال بجا لاتے ہیں  خواہ وہ ان کے نفس کو کتنے بھاری پڑیں، اطاعت اور خشوع خضوع والے ہیں، اپنے مال اللہ کی راہ میں جہاں جہاں حکم ہے خرچ کرتے ہیں، صلہ رحمی میں رشتہ داری کا پاس رکھنے میں برائیوں کے روکنے آپس میں ہمدردی اور خیرخواہی کرنے میں حاجت مندوں، مسکینوں اور فقیروں کے ساتھ احسان کرنے میں سخاوت سے کام لیتے ہیں  اور سحری کے وقت پچھلی رات کو اٹھ اٹھ کر استغفار کرتے ہیں، اس سے معلوم ہوا کہ اس وقت استغفار افضل ہے، یہ بھی کہا گیا ہے کہ قرآن کریم کی اس آیت میں حضرت یعقوب نے اپنے بیٹوں سے یہی فرمایا تھا کہ (آیت سوف استغفرلکم) رب میں ابھی تھوڑی دیر میں تمہارے لئے اپنے رب سے بخشش طلب کروں گا، اس سے مراد بھی سحری کا وقت ہے، اپنی اولاد سے فرماتے ہیں  کہ سحری کے وقت میں تمہارے لئے استغفار کروں گا، بخاری و مسلم وغیرہ کی حدیث میں جو بہت سے صحابیوں سے مروی ہے کہ رسول اللہ صلی اللہ علیہ و سلم کا یہ فرمان موجود ہے کہ اللہ تبارک و تعالیٰ ہر رات آخری تہائی باقی رہتے ہوئے آسمان دنیا پر اترتا ہے اور فرماتا ہے کہ کوئی سائل ہے ؟ جسے میں دوں، کوئی دعا مانگنے والا ہے کہ میں اس کی دعا قبول کروں، کوئی استغفار کرنے والا ہے کہ میں اسے بخشوں، حافظ ابوالحسن دارقطنی نے تو اس مسئلہ پر ایک مستقل کتاب لکھی ہے اور اس میں حدیث کی تمام سندوں کو اور اس کے کل الفاظ کو وارد کیا ہے ۔ بخاری و مسلم میں حضرت عائشہ سے مروی ہے کہ رسول اللہ صلی اللہ علیہ و سلم نے اول رات درمیانی اور آخری رات میں وتر پڑھے ہیں، سب سے آخری وقت حضور صلی اللہ علیہ و سلم کے وتر پڑھنے کا سحری تک تھا، حضرت عبد اللہ بن عمر رات کو تہجذ پڑھتے رہتے اور اپنے غلام حضرت نافع سے پوچھتے کیا سحر ہو گئی، جب وہ کہتے ہاں تو آپ صبح صادق کے نکلنے کی دعا استغفار میں مشغول رہتے، حضرت حاطب فرماتے ہیں  سحری کے وقت میں نے سنا کہ کوئی شخص مسجد کے کسی گوشہ میں کہہ رہا ہے اے اللہ تو نے مجھے حکم کیا میں بجا لایا، یہ سحر کا وقت ہے مجھے بخش دے، میں نے دیکھا تو وہ حضرت عبداللہ بن مسعود تھے ۔ حضرت انس بن مالک فرماتے ہیں  ہمیں حکم کیا جاتا تھا کہ ہم جب تہجد کی نماز پڑھیں تو سحری کے آخری وقت ستر مرتبہ استغفار کریں اللہ سے بخشش کی دعا کریں ۔

۱۸

اللہ وحدہٗ لاشریک اپنی وحدت کا خود شاہد

 اللہ تعالیٰ خود شہادت دیتا ہے بس اس کی شہادت کافی ہے وہ سب سے زیادہ سچا گواہ ہے، سب سے زیادہ سچی بات اسی کی ہے، وہ فرماتا ہے کہ تمام مخلوق اس کی غلام ہے اور اسی کی پیدا کی ہوئی ہے ۔ اور اسی کی طرف محتاج ہے، وہ سب سے بے نیاز ہے، الوہیت میں اللہ ہونے میں وہ یکتا اور لاشریک ہے، اس کے سوا کوئی پوجے جانے کے لائق نہیں، جیسے فرمان ہے (آیت لکن اللہ یشھد بما انزل الیک الخ،) یعنی لیکن اللہ تعالیٰ بذریعہ اس کتاب کے جو وہ تیری طرف اپنے علم سے اتار رہا ہے، گواہی دے رہا ہے اور فرشتے بھی گواہی دیتے ہیں  اور اللہ تعالیٰ کی شہادت کافی ہے، پھر اپنی شہادت کے ساتھ فرشتوں کی شہادت پر علماء کی گواہی کو ملا رہا ہے ۔ یہاں سے علماء کی بہت بڑی فضیلت ثابت ہوتی ہے بلکہ خصوصی قائما کا نصب حال ہونے کی وجہ سے ہے وہ اللہ ہر وقت اور حال میں ایسا ہی ہے، پھر تاکیداً دوبارہ ارشاد ہوتا ہے کہ معبود حقیقی صرف وہی ہے، وہ غالب ہے، عظمت اور کبریائی والی اس کی بارگاہ ہے، وہ اپنے اقوال افعال اور شریعت قدرت و تقدیر میں حکمتوں والا ہے ۔ مسند احمد میں ہے کہ نبی صلی اللہ علیہ و سلم نے عرفات میں اس آیت کی تلاوت کی اور الحکیم تک پڑھ کر فرمایا وانا علی ذالک من الشاھدین یا رب، ابن ابی حاتم میں ہے آپ نے یوں فرمایا وانا اشھدای رب طبرانی میں ہے حضرت غالب قطان فرماتے ہیں  میں کوفے میں تجارتی غرض سے گیا اور حضرت اعمش کے قریب ٹھہرا، رات کو حضرت اعمش تہجد کیلئے کھڑے ہوئے پڑھتے پڑھتے جب اس آیت تک پہنچے اور (آیت ان الدین عند اللہ الاسلام) پڑھا تو فرمایا وانا اشھد بما شھد اللہ بہ  واستودع اللہ ھذہ الشھادۃ وھی لی عند اللہ ودیعۃ یعنی میں بھی شہادت دیتا ہوں اس کی جس کی شہادت اللہ نے دی اور میں اس شہادت کو اللہ کے سپرد کرتا ہوں، یہ میری امانت اللہ کے پاس ہے، پھر کئی دفعہ (آیت ان الدین عند اللہ الاسلام) پڑھا، میں نے اپنے دِل میں خیال کیا کہ شاید اس بارے میں کوئی حدیث سنی ہو گی، صبح ہی صبح میں حاضر خدمت ہوا اور عرض کیا کہ ابو محمد کیا بات تھی جو آپ اس آیت کو بار بار پڑھتے رہے ؟ کہا کیا اس کی فضیلت تمہیں  معلوم نہیں ؟ میں نے کہا حضرت میں تو مہینہ بھر سے آپ کی خدمت میں ہوں لیکن آپ نے حدیث بیان ہی نہیں  کی، کہنے لگے اللہ کی قسم میں تو سال بھر تک بیان نہ کروں گا، اب میں اس حدیث کے سننے کی خاطر سال بھر تک ٹھہرا رہا اور ان کے دروازے پر پڑا رہا جب سال کامل گزر چکا تو میں نے کہا اے ابو محمد سال گزر چکا ہے، سُن مجھ سے ابووائل نے حدیث بیان کی، اس نے عبد اللہ سے سنا، وہ فرماتے ہیں  رسول اللہ صلی اللہ علیہ و سلم نے فرمایا اس کے پڑھنے والے کو قیامت کے  دن لایا جائے گا اور اللہ عزوجل فرمائے گا میرے اس بندے نے میرا عہد لیا ہے اور میں عہد کو پورا کرنے میں سب سے افضل و اعلیٰ ہوں، میرے اس بندے کو جنت میں لے جاؤ۔ پھر اللہ تبارک و تعالیٰ فرماتا ہے وہ صرف اسلام ہی کو قبول فرماتا ہے، اسلام ہر زمانے کے پیغمبر کی وحی کی تابعداری کا نام ہے، اور سب سے آخر اور سب رسولوں کو ختم کرنے والے ہمارے پیغمبر حضرت محمد صلی اللہ علیہ و سلم ہیں، آپ کی نبوت کے بعد نبوت کے سب راستے بند ہو گئے اب جو شخص آپ کی شریعت کے سوا کسی چیز پر عمل کرے اللہ کے نزدیک وہ صاحبِ ایمان نہیں  جیسے اور جگہ ہے (آیت ومن یبتغ غیرالاسلام دینا فلن یقبل منہ) جو شخص اسلام کے سوا اور دین کی تلاش کرے وہ اس سے قبول نہیں  کیا جائے گا، اسی طرح اس آیت میں دین کا انحصار اسلام میں کر دیا ہے ۔ حضرت ابن عباس کی قرات میں (آیت شھد اللہ انہ) ہے اور ان الاسلام ہے، تو معنی یہ ہوں گے، خود اللہ کی گواہی ہے اور اس کے فرشتوں اور ذی علم انسانوں کے نزدیک مقبول ہونے والا دِین صرف اسلام ہی ہے، جمہور کی قرات میں ان زیر کے ساتھ ہے اور معنی کے لحاظ سے دونوں ہی ٹھیک ہیں، لیکن جمہور کا قول زیادہ ظاہر ہے واللہ اعلم۔ پھر ارشاد ہوتا ہے کہ پہلی کتاب والوں نے اپنے پاک اللہ کے پیغمبروں کے آنے اور اللہ کی کتابیں نازل ہونے کے بعد بھی اختلاف کیا، جس کی وجہ سے صرف ان کا آپس کا بغض و عناد تھا کہ میں اس کے خلاف ہی چلوں چاہے وہ حق پر ہی کیوں نہ ہو، پھر ارشاد ہے کہ جب اللہ کی آیتیں اتر چکی، اب جو اُن کا انکار کرے انہیں  نہ مانے تو اللہ تعالیٰ بھی اس سے اس کی تکذیب کا بہت جلد حساب لے گا اور کتاب اللہ کی مخالفت کی وجہ سے اسے سخت عذاب دے گا اور اسے اس کی اس شرارت کا لطف چکھائے گا۔ پھر فرمایا اگر یہ لوگ تجھ سے توحید باری تعالیٰ کے بارے میں جھگڑیں تو کہہ دو کہ میں تو خالص اللہ ہی کی عبادت کروں گا جس کا نہ کوئی شریک ہے نہ اس جیسا کوئی ہے، نہ اس کی اولاد ہے نہ بیوی اور جو میرے اُمتی ہیں  میرے دِین پر ہیں ۔ ان سب کا قول بھی یہی ہے، جیسے اور جگہ فرمایا (آیت قل ھذہ سبیلی ادعوا الی اللہ علی بصیرۃ انا و امن اتبغی الخ،) یعنی میری راہ یہی ہے میں خوب سوچ سمجھ کر دیکھ بھال کر تمہیں  اللہ کی طرف بلا رہا ہوں، میں بھی اور میرے تابعدار بھی یہی دعوے دے رہے ہیں، پھر حکم دیتا ہے کہ اے نبی صلی اللہ علیہ و سلم یہود و نصاریٰ جن کے ہاتھوں میں اللہ کی کتاب ہے اور مشرکین سے جو اَن پڑھ ہیں  کہہ دو کہ تم سب کی ہدایت اسلام میں ہی ہے اور اگر یہ نہ مانیں تو کوئی بات نہیں، آپ اپنا فرض تبلیغ ادا کر چکے، اللہ خود ان سے سمجھ لے گا، ان سب کو لوٹ کر اسی کے پاس جانا ہے وہ جسے سیدھا راستہ دکھائے جسے چاہے گمراہ کر دے، اپنی حکمت کو وہی خوب جانتا ہے اس کی حجت تو پوری ہو کر ہی رہتی ہے، اس کی اپنے بندوں پر نظر ہے اسے خوب معلوم ہے کہ ہدایت کا مستحق کون ہے اور کون ضلالت کا مستحق ہے ؟ اس سے کوئی باز پرس نہیں  کر سکتا۔ دوسری آیتوں میں بھی صاف صراحت ہے کہ رسول اللہ صلی اللہ علیہ و سلم تمام مخلوق کی طرف اللہ کے نبی بن کر آئے ہیں، اور خود آپ کے دِین کے احکام بھی اس پر دلالت کرتے ہیں  اور کتاب و سنت میں بھی بہت سی آیتیں اور حدیثیں اسی مفہوم کی ہیں، قرآن پاک میں ایک جگہ ہے (آیت یاایھا الناس انی رسول اللہ الیکم جمیعا) لوگو میں تم سب کی طرف اللہ کا رسول ہوں ۔ اور آیت میں ہے (آیت تبارک الذی نزل الفرقان علی عبدہ لیکون للعالمین نذیرا) بابرکت ہے وہ اللہ جس نے اپنے بندوں پر قرآن نازل فرمایا تاکہ وہ تمام دنیا والوں کیلئے تنبیہ کرنے والا بن جائے ۔ بخاری و مسلم وغیرہ میں کئی کئی واقعات سے تواتر کے ساتھ ثابت ہے کہ نبی صلی اللہ علیہ و سلم نے عرب و عجم کے تمام بادشاہوں کو اور دوسرے اطراف کے لوگوں کو خطوط بھجوائے جن میں انہیں  اللہ کی طرف آنے کی دعوت دی خواہ وہ عرب ہوں عجم ہوں اہل کتاب ہوں مذہب والے ہوں اور اس طرح آپ صلی اللہ علیہ و سلم نے تبلیغ کے فرض کو تمام و کمال تک پہنچا دیا۔ مسند عبدالرزاق میں حضرت ابوہریرہ سے روایت ہے کہ نبی صلی اللہ علیہ و سلم نے فرمایا اس اللہ کی قسم جس کے ہاتھ میں میری جان ہے، اس امت میں سے جس کے کان میں میری نسبت کی آواز پہنچے اور وہ میری لائی ہوئی چیز پر ایمان نہ لائے خواہ یہودی ہو خواہ نصرانی ہو مگر مجھ پر ایمان لائے بغیر مر جائے گا تو قطعاً جہنمی ہو گا، مسلم شریف میں بھی یہ حدیث مروی ہے اور آنحضرت صلی اللہ علیہ و سلم کا یہ فرمان بھی ہے کہ میں ہر ایک سرخ و سیاہ کی طرف اللہ کا نبی بنا کر بھیجا گیا ہوں، ایک اور حدیث میں ہے ہر نبی صرف اپنی قوم کی طرف بھیجا جاتا رہا اور میں تمام انسانوں کیلئے نبی بنا کر بھیجا گیا ہوں، مسند احمد میں حضرت انس سے مروی ہے کہ ایک یہودی لڑکا جو نبی صلی اللہ علیہ و سلم کیلئے وضو کا پانی رکھا کرتا تھا اور جوتیاں لا کر رکھ دیتا تھا، بیمار پڑا گیا۔ آنحضرت صلی اللہ علیہ و سلم اس کی بیمار پرسی کیلئے تشریف لائے، اس وقت اس کا باپ اس کے سرہانے بیٹھا ہوا تھا، آپ صلی اللہ علیہ و سلم نے فرمایا اے فلاں لاالہ الا اللہ کہہ، اس نے اپنے باپ کی طرف دیکھا اور باپ کو خاموش دیکھ کر خود بھی چپکا ہو گیا۔ حضور صلی اللہ علیہ و سلم نے دوبارہ یہی فرمایا اس نے پھر اپنے باپ کی طرف دیکھا باپ نے کہا ابوالقاسم کی مان لے (صلی اللہ علیہ و سلم) پس اس بچے نے کہا اشھد ان لا الہ الا اللہ وانک رسول اللہ وہاں سے یہ فرماتے ہوئے اٹھے کہ اللہ کا شکر ہے جس نے میری وجہ سے اسے جہنم سے بچا لیا، یہی حدیث صحیح بخاری میں حضرت امام بخاری بھی لائے ہیں، ان کے سوا اور بھی بہت سی صحیح حدیثیں بھی اور قرآن کریم کی آیتیں ہیں ۔

۲۱

 انبیاء کے قاتل بنو اسرائیل

 یہاں ان اہل کتاب کی مذمت بیان ہو رہی ہے جو گناہ اور حرام کام کرتے رہتے تھے اور اللہ کی پہلی اور بعد کی باتوں کو جو اس نے اپنے رسولوں کے ذریعہ پہنچائیں جھٹلاتے رہتے تھے، اتنا ہی نہیں  بلکہ پیغمبروں کو مار ڈالتے بلکہ اس قدر سرکش تھے کہ جو لوگ انہیں  عدل و انصاف کی بات کہیں  انہیں  بے دریغ تہ تیغ کر دیا کرتے تھے، حدیث میں ہے حق کو نہ ماننا اور حق والوں کو ذلیل جاننا یہی کبر و غرور ہے کہ مسند ابوحاتم میں ہے حضرت ابوعبیدہ بن جراح رضی اللہ تعالیٰ عنہ نے رسول اللہ صلی اللہ علیہ و سلم سے پوچھا کہ سب سے زیادہ سخت عذاب کسے ہو گا؟ آپ نے فرمایا جو کسی نبی کو مار ڈالے یا کسی ایسے شخص کو جو بھلائی کا بتانے والا اور برائی سے بچانے والا ہو تکبر و غرور ہے، پھر حضور صلی اللہ علیہ و سلم نے اس آیت کی تلاوت فرمائی اور فرمایا اے ابو عبیدہ بنو اسرائیل نے تینتالیس نبیوں کو دن کے اول حصہ میں ایک ہی ساعت میں قتل کیا پھر ایک سو ستر بنو اسرائیل کے وہ ایماندار جو انہیں  روکنے کے لئے کھڑے ہوئے تھے انہیں  بھلائی کا حکم دے رہے تھے اور برائی سے روک رہے تھے ان سب کو بھی اسی دن کے آخری حصہ میں مار ڈالا اس آیت میں اللہ تعالیٰ انہی کا ذکر کر رہا ہے، ابن جریر میں ہے حضرت عبد اللہ بن مسعود رضی اللہ تعالیٰ عنہ فرماتے ہیں ۔ بنو اسرائیل نے تین سو نبیوں کو دن کے شروع میں قتل کیا اور شام کو سبزی پالک بیچنے بیٹھ گئے، پس ان لوگوں کی اس سرکشی تکبر اور خود پسندی نے ذلیل کر دیا اور آخرت میں بھی رسوا کن بدترین عذاب ان کے لئے تیار ہیں، اسی لئے فرمایا کہ انہیں  دردناک ذلت والے عذاب کی خبر پہنچا دو، ان کے اعمال دنیا میں بھی غارت اور آخرت میں بھی برباد اور ان کا کوئی مددگار اور سفارشی بھی نہ ہو گا۔

۲۳

جھوٹے دعوے

 یہاں اللہ تعالیٰ فرماتا ہے کہ یہ یہود و نصاریٰ اپنے اس دعوے میں بھی جھوٹے ہیں  کہ ان کا توراۃ و انجیل پر ایمان ہے کیونکہ ان کتابوں کی ہدایت کے مطابق جب انہیں  اس نبی آخرالزمان کی اطاعت کی طرف بلایا جاتا ہے تو یہ منہ پھیر کے بھاگتے دکھائی دیتے ہیں، اس سے ان کی اعلیٰ درجہ کی سرکشی تکبر اور عناد و مخالفت ظاہر ہو رہی ہے، اس مخالفت حق اور بے جا سرکشی پر انہیں  اس چیز نے دلیر کر دیا ہے کہ انہوں نے اللہ کی کتاب میں نہ ہونے کے باوجود اپنی طرف سے جھوٹ بنا کر کے یہ بات بنا لی ہے کہ ہم تو صرف چند روز ہی آگ میں رہیں  گے یعنی فقط سات روز، دنیا کے حساب کے ہر ہزار سال کے پیچھے ایک دن، اس کی پوری تفسیر سورہ بقرہ میں گزر چکی ہے، اسی واہی اور بے سروپا خیال نے انہیں  باطل دین پر انہیں  جما دیا ہے بلکہ یہ خود اللہ نے ایسی بات نہیں  کہی ان کا خیال ہے نہ اس کی کوئی کتابی دلیل ان کے پاس ہے، پھر اللہ تبارک و تعالیٰ انہیں  ڈانٹتا اور دھمکاتا ہے اور فرماتا ہے ان کا قیامت والے دن بدتر حال ہو گا؟ کہ انہوں نے اللہ پر جھوٹ باندھا رسولوں کو جھٹلایا انبیاء کو اور علماء حق کو قتل کیا، ایک ایک بات کا اللہ کو جواب دینا پڑے گا اور ایک ایک گناہ کی سزا بھگتنی پڑے گی، اس دن کے آنے میں کوئی شک و شبہ نہیں  اس دن ہر شخص پورا پورا بدلہ دیا جائے گا اور کسی پر بھی کسی طرح کا ظلم روانہ رکھا جائے گا۔

۲۶

 مالک الملک کی حمد و ثناء اللہ تبارک و تعالیٰ فرماتا ہے کہ اے محمد صلی اللہ علیہ و سلم اپنے رب کی تعظیم کرنے اور اس کا شکریہ بجا لانے اور اسے اپنے تمام کام سونپنے اور اس کی ذات پاک پر پورے بھروسہ کا اظہار کرنے کے لئے ان الفاظ میں اس کی اعلیٰ صفات بیان کیجئے جو اوپر بیان ہوئی ہیں ۔ یعنی اے اللہ تو مالک الملک ہے، تیری ملکیت میں تمام ملک ہے، جسے تو چاہے حکومت دے اور جس سے چاہے اپنا دیا ہوا واپس لے لے، تو ہی دینے اور لینے والا ہے تو جو چاہتا ہے ہو جاتا ہے اور جو نہ چاہے ہو ہی نہیں  سکتا، اس آیت میں اس بات کی بھی تنبیہ اور اس نعمت کے شکر کا بھی حکم ہے جو آنحضرت صلی اللہ علیہ و سلم اور آپ کی امت کو مرحمت فرمائی گئی کہ بنی اسرائیل سے ہٹا کر نبوت نبی عربی قریشی امی مکی حضرت محمد مصطفی صلی اللہ علیہ و سلم کو دے دی گئی اور آپ کو مطلقاً نبیوں کے ختم کرنے والے اور تمام انس و جن کی طرف رسول بن کر آنے والے بنا کر بھیجا، تمام سابقہ انبیاء کی خوبیاں آپ میں جمع کر دیں بلکہ ایسی فضیلتیں آپ کو دی گئیں جن سے اور تمام انبیاء بھی محروم رہے خواہ وہ اللہ کے علم کی بابت ہوں یا اس رب کی شریعت کے معاملہ میں ہوں یا گذشتہ اور آنے والی خبروں کے متعلق ہوں، آپ پر اللہ تعالیٰ نے آخرت کے کل حقائق کھول دئیے، آپ کی امت کو مشرق مغرب تک پھیلا دیا آپ نے دن اور آپ کی شریعت کو تمام دینوں اور کل مذہبوں پر غالب کر دیا، اللہ تعالیٰ کا درود و سلام آپ پر نازل ہو اب سے لے کر قیامت تک جب تک رات دن کی گردش بھی رہے اللہ آپ پر اپنی رحمتیں دوام کے ساتھ نازل فرماتا رہے ۔ آمین، پس فرمایا کہو اے اللہ تو ہی اپنی خلق میں ہیر پھیر کرتا رہتا ہے جو چاہے کر گزرتا ہے، جو لوگ کہتے تھے کہ ان دو بستیوں میں سے کسی بہت بڑے شخص پر اللہ نے اپنا کلام کیوں نازل نہ کیا اس کی تردید کرتے ہوئے اللہ تعالیٰ نے فرمایا (آیت اھم یقسمون رحمۃ ربک الخ،) کیا تیرے رب کی رحمت کو بانٹنے والے یہ لوگ ہیں، جب ان کے رزق تک کے مالک ہم ہیں  جسے چاہیں  کم دیں جسے چاہیں  زیادہ دیں تو پھر ہم پر حکومت کرنے والے یہ کون؟ کہ فلاں کو نبی کیوں نہ بنایا؟ نبوت بھی ہماری ملکیت کی چیز ہے ہم ہی جانتے ہیں  کہ اس کے دئیے جانے کے قابل کون ہے ؟ جیسے اور جگہ ہے (آیت اللہ اعلم حیث یجعل رسالتہ) جہاں کہیں  اللہ تعالیٰ اپنی رسالت نازل فرماتا ہے اسے وہی سب سے بہتر جانتا ہے، اور جگہ فرمایا (آیت انظر کیف فضلنا بعضھم علی بعض) دیکھ لے کہ ہم نے کسی طرح ان میں آپس میں ایک کو دوسرے پر برتری دے رکھی ہے، پھر فرماتا ہے کہ تو ہی رات کی زیادتی کو دن کے نقصان میں بڑھا کر دن رات کو برابر کر دیتا ہے، زمین و آسمان پر سورج چاند پر پورا پورا قبضہ اور تمام تر تصرف تیرا ہی ہے، اسی طرح جاڑے کی گرمی اور گرمی کو جاڑے سے بدلنا بھی تیری قدرت میں ہے، بہارو خزاں پر قادر تو ہی ہے ۔ تو ہی ہے کہ زندہ سے مردہ کو اور مردہ سے زندہ کو نکالے کھیتی سے دانے اگاتا ہے اور دانہ سے کھیتوں کو لہلہاتا ہے، کھجور گٹھلی سے اور گٹھلی کھجور سے تو ہی پیدا کرتا ہے مومن کو کافر کے ہاں اور کافر کو مومن کے ہاں تو ہی پیدا کرتا ہے، مرغی انڈے سے اور انڈا مرغی سے اور اسی طرح کی تمام تر چیزیں تیرے ہی قبضہ میں ہیں، تو جسے چاہے اتنا مال دے دے جو نہ گنا جائے نہ احاطہ کیا جائے اور جسے چاہے بھوک کے برابر روٹی بھی نہ دے، ہم مانتے ہیں  کہ یہ کام حکمت سے پر ہیں  اور تیرے ارادے اور تیری چاہت سے ہی ہوتے ہیں، طبرانی کی حدیث میں ہے اللہ کا اسم اعظم اس (آیت قل اللھم الخ،) میں ہے کہ جب اس نام سے اس سے دعا کی جائے تو وہ قبول فرما لیتا ہے ۔

۲۸

 ترک موالات کی وضاحت

 یہاں اللہ تعالیٰ ترک موالات کا حکم دیتے ہوئے فرماتا ہے مسلمانوں کو کفار سے دوستی اور محض محبت کرنا مناسب نہیں  بلکہ انہیں  آپس میں ایمان داروں سے میل ملاپ اور محبت رکھنی چاہیے، پھر انہیں  حکم سناتا ہے کہ جو ایسا کرے گا اس سے اللہ بالکل بیزار ہو جائے گا، جیسے اور جگہ ہے (آیت یاایھا الذین امنوا لا تتخذوا عدوی وعدوکم اولیاء الخ،)  یعنی مسلمانو میرے اور اپنے دشمنوں سے دوستی نہ کیا کرو اور جگہ فرمایا مومنو یہ یہود و نصاریٰ آپس میں ایک دوسرے کے دوست ہیں  تم میں سے جو بھی ان سے دوستی کرے گا وہ انہی سے ہے، دوسری جگہ پروردگار عالم نے مہاجر انصار اور دوسرے مومنوں کے بھائی چارے کا ذکر کر کے فرمایا کہ کافر آپس میں ایک دوسرے کے خیرخواہ اور دوست ہیں  تم بھی آپس میں اگر ایسا نہ کرو گے تو زمین میں فتنہ پھیل جائے گا اور زبردست فساد برپا ہو گا۔ البتہ ان لوگوں کو رخصت دے دی گئی جو کسی شہر میں کسی وقت ان کی بدی اور برائی سے ڈر کر دفع الوقتی کے لئے بظاہر کچھ میل ملاپ ظاہر کریں لیکن دل میں ان کی طرف رغبت اور ان سے حقیقی محبت نہ ہو، جیسے صحیح بخاری شریف میں حضرت ابو درداء رضی اللہ تعالیٰ عنہ سے مروی ہے کہ ہم بعض قوموں سے کشادہ پیشانی سے ملتے ہیں  لیکن ہمارے دل ان پر لعنت بھیجتے رہتے ہیں، حضرت ابن عباس فرماتے ہیں  کہ صرف زبان سے اظہار کرے لیکن عمل میں ان کا ساتھ ایسے وقت میں بھی ہرگز نہ دے، یہی بات اور مفسرین سے بھی مروی ہے اور اسی کی تائید اللہ تعالیٰ کا یہ فرمان بھی کرتا ہے ۔ (آیت من کفر باللہ من بعد ایمانہ الا من ا کرہ وقلبہ مطمئن بالایمان) جو شخص اپنے ایمان کے بعد اللہ سے کفر کرے سوائے ان مسلمانوں کے جن پر زبردستی کی جائے مگر ان کا دل ایمان کے ساتھ مطمئن ہو، بخاری میں ہے حضرت حسن فرماتے ہیں  یہ حکم قیامت تک کے لئے ہے ۔ پھر فرمایا اللہ تمہیں  اپنے آپ سے ڈراتا ہے ۔ یعنی اپنے دبدبے اور اپنے عذاب سے اس شخص کو خبردار کئے دیتا ہے جو اس کے فرمان کی مخالفت کر کے اس کے دشمنوں سے دوستی رکھے اور اس کے دوستوں سے دشمنی کرے ۔ پھر فرمایا اللہ کی طرف لوٹنا ہے ہر عمل کرنے والے کو اس کے عمل کا بدلہ وہیں  ملے گا۔ حضرت معاذ رضی اللہ تعالیٰ عنہ نے کھڑے ہو کر فرمایا اے بنی اود میں اللہ کے رسول صلی اللہ علیہ و سلم کا قاصد ہو کر تمہاری طرف آیا ہوں جان لو کہ اللہ کی طرف پھر کر سب کو جانا ہے پھر یا تو جنت ٹھکانا ہو گا یا جہنم۔

۲۹

اللہ تعالیٰ سے ڈر ہمارے لئے بہتر ہے

 اللہ تعالیٰ فرماتا ہے وہ پوشیدہ کو اور چھپی ہوئی باتوں کو اور ظاہر باتوں کو بخوبی جانتا ہے کوئی چھوٹی سے چھوٹی بات بھی اس پر پوشیدہ نہیں  اس کا علم سب چیزوں کو ہر وقت اور ہر لحظہ گھیرے ہوئے ہے ۔ زمین کے گوشوں میں پہاڑوں کے سمندروں میں آسمانوں میں ہواؤں میں سوراخوں میں غرض جو کچھ جہاں کہیں  ہے سب اس کے علم میں ہے پھر ان سب پر اس کی قدرت ہے جس طرح چاہے رکھے جو چاہے جزا سزا دے، پس اتنے بڑے وسیع علم والے اتنی بڑی زبردست قدرت والے سے ہر شخص کو ڈرتے ہوئے رہنا چاہیے ۔ اس کی فرمانبرداری میں مشغول رہنا چاہیے اور اس کی نافرمانیوں سے علیحدہ رہنا چاہیے، وہ عالم بھی ہے اور قادر بھی ہے ممکن ہے کسی کو ڈھیل دے دے لیکن جب پکڑے گا تب دبوچ لے گا پھر نہ مہلت ملے گی نہ رخصت، ایک دن آنے والا ہے جس دن تمام عمر کے برے بھلے سب کام سامنے رکھ دئیے جائیں گے، نیکیوں کو دیکھ کر خوشی ہو گی اور برائیوں پر نظریں ڈال کر دانت پیسے گا اور حسرت و افسوس کرے گا اور چاہے گا کہ میں ان سے کوسوں دور رہتا اور پرے ہی پرے رہتا قرآن نے اور جگہ فرمایا (آیت ینبوا الانسان یومئذ بما قدم واخر) سب گزری ہوئی باتیں اس دن پیش کر دی جائیں گی، شیطان جو اس کے ساتھ دنیا میں رہتا تھا اور اسے برائیوں پر اکساتا تھا اس سے بھی اس دن بیزاری کرے گا اور کہے گا (آیت یالیت بیینی وبینک بعد المشرقین فبئس القرین) کیا اچھا ہوتا کہ اے شیطان میرے اور تیرے درمیان مشرق و مغرب کا فاصلہ ہوتا وہ تو بڑا برا ساتھ ہے پھر فرمایا اللہ تمہیں  اپنے یعنی اپنے عذاب سے ڈرا دھمکا رہا ہے، پھر فرمایا اللہ تمہیں  اپنے یعنی اپنے عذاب سے ڈرا دھمکا رہا ہے، پھر اللہ تعالیٰ جل جلالہ اپنے نیک بندوں کو خوشخبری دیتا ہے کہ وہ اس کے لطف و کرم سے کبھی ناامید نہ ہوں وہ نہایت ہی مہربان بہت رحم اور پیار رکھنے والا ہے، امام حسن بصری رحمۃ اللہ علیہ فرماتے ہیں  یہ بھی اس کی سراسر مہربانی و لطف و محبت ہے کہ اس نے اپنے سے نہیں  بلکہ اپنے عذاب سے اپنے بندوں کو ڈرایا، یہ بھی مطلب ہے کہ اللہ اپنے بندوں پر رحیم بندوں کو بھی چاہے کہ صراط مستقیم سے قدم نہ ہٹائیں دین پاک کو نہ چھوڑیں رسول کریم کی فرمانبرداری سے منہ نہ موڑیں ۔

۳۱

جھوٹا دعویٰ

اس آیت نے فیصلہ کر دیا جو شخص اللہ کی محبت کا دعویٰ کرے اور اس کے اعمال افعال عقائد فرمان نبوی صلی اللہ علیہ و سلم کے مطابق نہ ہوں، طریقہ محمدیہ پر وہ کار بند نہ ہو تو وہ اپنے اس دعوے میں جھوٹا ہے صحیح حدیث میں ہے رسول اللہ صلی اللہ علیہ و سلم فرماتے ہیں  جو شخص کوئی ایسا عمل کرے جس پر ہمارا حکم نہ ہو وہ مردود ہے، اسی لئے یہاں بھی ارشاد ہوتا ہے کہ اگر تم اللہ سے محبت رکھنے کے دعوے میں سچے ہو تو میری سنتوں پر عمل کرو اس وقت تمہاری چاہت سے زیادہ اللہ تمہیں  دے گا یعنی وہ خود تمہارا چاہنے والا بن جائے گا۔ جیسے کہ بعض حکیم علماء نے کہا ہے کہ تیرا چاہنا کوئی چیز نہیں  لطف تو اس وقت ہے کہ اللہ تجھے چاہنے لگ جائے ۔ غرض اللہ کی محبت کی نشانی یہی ہے کہ ہر کام میں اتباع سنت مد نظر ہو۔ ابن ابی حاتم میں ہے کہ حضور صلی اللہ علیہ و سلم نے فرمایا دین صرف اللہ کے لئے محبت اور اسی کے لئے دشمنی کا نام ہے، پھر آپ نے اسی آیت کی تلاوت کی، لیکن یہ حدیث سنداً منکر ہے، پھر فرماتا ہے کہ حدیث پر چلنے کی وجہ سے اللہ تعالیٰ تمہارے تمام تر گناہوں کو بھی معاف فرما دے گا۔ پھر ہر عام خاص کو حکم ملتا ہے کہ سب اللہ و رسول کے فرماں بردار رہیں  جو نافرمان ہو جائیں یعنی اللہ رسول کی اطاعت سے ہٹ جائیں تو وہ کافر ہیں  اور اللہ ان سے محبت نہیں  رکھتا۔ اس سے واضح ہو گیا کہ رسول اللہ صلی اللہ علیہ و سلم کے طریقہ کی مخالفت کفر ہے، ایسے لوگ اللہ کے دوست نہیں  ہو سکتے گو ان کا دعویٰ ہو، لیکن جب تک اللہ کے سچے نبی امی خاتم الرسل رسول جن و بشر کی تابعداری پیروی اور اتباع سنت نہ کریں وہ اپنے اس دعوے میں جھوٹے ہیں، حضرت رسول اللہ صلی اللہ علیہ و سلم تو وہ ہیں  کہ اگر آج انبیاء اور رسول بلکہ بہترین اور اولوالعزم پیغمبر بھی زندہ ہوتے تو انہیں  بھی آپ کے مانے بغیر اور آپ کی شریعت پر کاربند ہوئے بغیر چارہ ہی نہ تھا، اس کا بیان تفصیل کے ساتھ (آیت واذا خذاللہ میثاق النبیین) کی تفسیر میں آئے گا۔ انشاء اللہ تعالیٰ۔

۳۳

سب سے پہلے نبی

یعنی اللہ تبارک و تعالیٰ نے ان بزرگ ہستیوں کو تمام جہان پر فضیلت عنایت فرمائی، حضرت آدم کو اپنے ہاتھ سے پیدا کیا ۔ اپنی روح ان میں پھونکی ہر چیز کے نام انہیں  بتلائے، جنت میں انہیں  بسایا پھر اپنی حکمت کے اظہار کے لئے زمین پر اتارا، جب زمین پر بت پرستی قائم ہو گئی تو حضرت نوح علیہ السلام کو سب سے پہلا رسول بنا کر بھیجا پھر جب ان کی قوم نے سرکشی کی پیغمبر کی ہدایت پر عمل نہ کیا، حضرت نوح نے دن رات پوشیدہ اور ظاہر اللہ کی طرف دعوت دی لیکن قوم نے ایک نہ سنی تو نوح علیہ السلام کے فرماں برداروں کے سوا باقی سب کو پانی کے عذاب یعنی مشہور طوفان نوح بھیج کر ڈبو دیا۔ خاندان خلیل اللہ علیہ صلوات اللہ کو اللہ تعالیٰ نے برگزیدگی عنایت فرمائی اسی خاندان میں سے سیدالبشر خاتم الانبیاء حضرت محمد صلی اللہ علیہ و سلم ہیں، عمران کے خاندان کو بھی اس نے منتخب کر لیا، عمران نام ہے حضرت مریم کے والد صاحب کا جو حضرت عیسیٰ علیہ السلام کی والدہ ہیں، ان کا نسب نامہ بقول محمد بن اسحاق یہ ہے، عمران بن ہاشم بن میثا بن خرقیا بن اسیث بن ایازبن رخیعم بن سلیمان بن داؤد علیہما السلام، پس عیسیٰ علیہ السلام بھی حضرت ابراہیم علیہ السلام کی نسل سے ہیں  اس کا مفصل بیان سورہ انعام کی تفسیر میں آئے گا۔ انشاء اللہ الرحمن

۳۵

مریم بنت عمران

حضرت عمران کی بیوی صاحبہ کا نام حسنہ بنت فاقوذ تھا حضرت مریم علیہما السلام کی والدہ تھیں حضرت محمد اسحاق فرماتے ہیں  انہیں  اولاد نہیں  ہوتی تھی ایک دن ایک چڑیا کو دیکھا کہ وہ اپنے بچوں کو چوغہ دے رہی ہے تو انہیں  ولولہ اٹھا اور اللہ تعالیٰ سے اسی وقت دعا کی اور خلوص کے ساتھ اللہ کو پکارا، اللہ تعالیٰ نے بھی ان کی دعا قبول فرما لی اور اسی رات انہیں  حمل ٹھہر گیا جب حمل کا یقین ہو گیا تو نذر مانی کہ اللہ تعالیٰ مجھے جو اولاد دے گا اسے بیت المقدس کی خدمت کے لئے اللہ کے نام پر آزاد کر دوں گی، پھر اللہ سے دعا کی کہ پروردگار تو میری اس مخلصانہ نذر کو قبول فرما تو میری دعا کو سن رہا ہے اور تو میری نیت کو بھی خوب جان رہا ہے، اب یہ معلوم نہ تھا لڑکا ہو گا یا لڑکی جب پیدا ہوا تو دیکھا کہ وہ لڑکی ہے اور لڑکی تو اس قابل نہیں  کہ وہ مسجد مقدس کی خدمت انجام دے سکے اس کے لئے تو لڑکا ہونا چاہئے تو عاجزی کے طور پر اپنی مجبوری جناب باری میں ظاہر کی کہ اے اللہ میں تو اسے تیرے نام پر وقف کر چکی تھی لیکن مجھے تو لڑکی ہوئی ہے، واللہ اعلم بما وضعت بھی پڑھا گیا یعنی یہ قول بھی حضرت حسنہ کا تھا کہ اللہ خوب جانتا ہے کہ میرے ہاں لڑکی ہوئی اور "تا” کے جزم کے ساتھ بھی آیا ہے، یعنی اللہ کا یہ فرمان ہے کہ اللہ تعالیٰ کو بخوبی معلوم ہے کہ کیا اولاد ہوئی ہے، اور فرماتی ہے کہ مرد عورت برابر نہیں، میں اس کا نام مریم رکھتی ہوں ۔ اس سے ثابت ہوتا ہے کہ جس دن بچہ ہوا اسی دن نام رکھنا بھی جائز ہے، کیونکہ ہم سے پہلے لوگوں کی شریعت ہماری شریعت ہے اور یہاں یہ بیان کیا گیا اور تردید نہیں  کی گئی بلکہ اسے ثابت اور مقرر رکھا گیا، اسی طرح حدیث شریف میں بھی ہے کہ رسول اللہ صلی اللہ علیہ و سلم نے فرمایا آج رات میرے ہاں لڑکا ہوا اور میں نے اس کا نام اپنے باپ حضرت ابراہیم کے نام پر ابراہیم رکھا ملاحظہ ہو بخاری مسلم، حضرت انس بن مالک رضی اللہ تعالیٰ عنہ اپنے بھائی کو جبکہ وہ تولد ہوئے لے کر حضور صلی اللہ علیہ و سلم کی خدمت میں حاضر ہوئے آپ نے انہیں  اپنے ہاتھ سے گھٹی دی اور ان کا نام عبد اللہ رکھا، یہ حدیث بھی بخاری و مسلم میں موجود ہے ایک اور حدیث میں ہے کہ ایک شخص نے آ کر کہا یا رسول اللہ صلی اللہ علیہ و سلم میرے ہاں رات کو بچہ ہوا ہے کیا نام رکھوں ؟ فرمایا عبدالرحمن نام رکھو (بخاری) ایک اور صحیح حدیث میں ہے کہ حضرت ابو اسید رضی اللہ تعالیٰ عنہ کے ہاں بچہ ہوا جسے لے کر آپ حاضر خدمت نبوی ہوئے تاکہ آپ اپنے دست مبارک سے اس بچے کو گھٹی دیں آپ اور طرف متوجہ ہو گئے بچہ کا خیال نہ رہا۔ حضرت ابو اسید نے بچے کو واپس گھر بھیج دیا جب آپ فارغ ہوئے بچے کی طرف نظر ڈالی تو اسے نہ پایا گھبرا کر پوچھا اور معلوم کر کے کہا اس کا نام منذر رکھو (یعنی ڈرا دینے والا) مسند احمد اور سنن میں ایک اور حدیث مروی ہے جسے امام ترمذی صحیح کہتے ہیں  کہ رسول اللہ صلی اللہ علیہ و سلم نے فرمایا ہر بچہ اپنے عقیقہ میں گروی ہے ساتویں دن عقیقہ کرے یعنی جانور ذبح کرے اور نام رکھے، اور بچہ کا سر منڈوائے، ایک روایت میں ہے اور خون بہایا جائے اور یہ زیادہ ثبوت والی اور زیادہ حفظ والی روایت ہے واللہ اعلم، لیکن زبیر بن بکار کی روایت جس میں ہے کہ رسول اللہ صلی اللہ علیہ و سلم نے اپنے صاحبزادے حضرت ابراہیم کا عقیقہ کیا اور نام ابراہیم رکھا یہ حدیث سنداً ثابت نہیں  اور صحیح حدیث اس کے خلاف موجود ہے اور یہ تطبیق بھی ہو سکتی ہے کہ اس نام کی شہرت اس دن ہوئی واللہ اعلم۔ حضرت مریم علیہما السلام کی اس دعا کو قبول فرمایا، چنانچہ مسند عبدالرزاق میں ہے رسول اللہ صلی اللہ علیہ و سلم فرماتے ہیں  ہر بچے کو شیطان اس کی پیدائش کے وقت ٹہوکا دیتا ہے اسی سے وہ چیخ کر رونے لگتا ہے لیکن حضرت مریم اور حضرت عیسیٰ اس سے بچے رہے، اس حدیث کو بیان فرما کر حضرت ابوہریرہ فرماتے ہیں  اگر تم چاہو تو اس آیت کو پڑھ لو (آیت انی اعیدھا بک الخ،) یہ حدیث بخاری مسلم میں بھی موجود ہے، یہ حدیث اور بھی بہت سی کتابوں میں مختلف الفاظ سے مروی ہے کسی میں ہے ایک یا دو دھچکے مارتا ہے، ایک حدیث میں صرف عیسیٰ کا ہی ذکر ہے کہ شیطان نے انہیں  بھی دھچکا مارنا چاہا لیکن انہیں  دیا ہوا ٹہوکا پردے میں لگ کر رہ گیا۔

۳۷

زکریا علیہ السلام کا تعارف

 اللہ تعالیٰ خبر دیتا ہے کہ حضرت حفصہ کی نذر کو اللہ تعالیٰ نے بخوشی قبول فرما لیا اور اسے بہترین طور سے نشوونما بخشی، ظاہری خوبی بھی عطا فرمائی اور باطنی خوبی سے بھرپور کر دیا اور اپنے نیک بندوں میں ان کی پرورش کرائی تاکہ علم اور خیر اور دین سیکھ لیں، حضرت زکریا کو ان کا کفیل بنا دیا ابن اسحاق تو فرماتے ہیں  یہ اس لئے کہ حضرت مریم علیہما السلام یتیم ہو گئی تھیں، لیکن دوسرے بزرگ فرماتے ہیں  کہ قحط سالی کی وجہ سے ان کی کفالت کا بوجھ حضرت زکریا نے اپنے ذمہ لے لیا تھا، ہو سکتا ہے کہ دونوں وجوہات اتفاقاً آپس میں مل گئی ہوں واللہ اعلم، حضرت ابن اسحاق وغیرہ کی روایت سے معلوم ہوتا ہے کہ حضرت زکریا علیہ السلام ان کے خالو تھے، اور بعض لوگ کہتے ہیں  ان کے بہنوئی تھے، جیسے معراج والی صحیح حدیث میں ہے کہ آپ نے حضرت یحییٰ اور حضرت عیسیٰ علیہم السلام سے ملاقات کی جو دونوں خالہ زاد بھائی ہیں، ابن اسحاق کے قول پر یہ حدیث ٹھیک ہے کیونکہ اصلاح عرب میں ماں کی خالہ کے لڑکے کو بھی خالہ زاد بھائی کہہ دیتے ہیں  پس ثابت ہوا کہ حضرت مریم اپنی خالہ کی پرورش میں تھیں ۔ صحیح حدیث میں ہے کہ رسول اللہ صلی اللہ علیہ و سلم نے حضرت حمزہ رضی اللہ تعالیٰ عنہ کی یتیم صاحبزادی عمرہ کو ان کی خالہ حضرت جعفر بن ابو طالب رضی اللہ تعالیٰ عنہ کی بیوی صاحبہ کے سپرد کیا تھا اور فرمایا تھا کہ خالہ قائم مقام ماں کے ہے، اب اللہ تعالیٰ حضرت مریم کی بزرگی اور ان کی کرامت بیان فرماتا ہے کہ حضرت زکریا علیہ السلام جب کبھی ان کے پاس ان کے حجرے میں جاتے تو بے موسمی میوے ان کے پاس پاتے مثلاً جاڑوں میں گرمیوں کے میوے اور گرمیوں میں جاڑے کے میوے ۔ حضرت مجاہد، حضرت عکرمہ، حضرت سعید بن جبیر، حضرت ابوالشعشاء، حضرت ابراہیم نخعی، حضرت ضحاک، حضرت قتادہ، حضرت ربیع بن انس، حضرت عطیہ عوفی، حضرت سدی اس آیت کی تفسیر میں یہی فرماتے ہیں، حضرت مجاہد سے یہ بھی مروی ہے کہ یہاں رزق سے مراد علم اور وہ صحیفے ہیں  جن میں علمی باتیں ہوتی تھیں لیکن اول قول ہی زیادہ صحیح ہے، اس آیت میں اولیاء اللہ کی کرامات کی دلیل ہے اور اس کے ثبوت میں بہت سی حدیثیں بھی آتی ہیں ۔ حضرت زکریا علیہ السلام ایک دن پوچھ بیٹھے کہ مریم تمہارے پاس یہ رزق کہاں سے آتا ہے ؟ صدیقہ نے جواب دیا کہ اللہ کے پاس سے، وہ جسے چاہے بے حساب روزی دیتا ہے، مسند حافظ ابویعلیٰ میں حدیث ہے کہ حضور صلی اللہ علیہ و سلم پر کئی دن بغیر کچھ کھائے گزر گئے بھوک سے آپ کو تکلیف ہونے لگی اپنی سب بیویوں کے گھر ہو آئے لیکن کہیں  بھی کچھ نہ پایا۔ حضرت فاطمہ رضی اللہ تعالیٰ عنہما کے پاس آئے اور دریافت فرمایا کہ بچی تمہارے پاس کچھ ہے ؟ کہ میں کھا لوں مجھے بہت بھوک لگ رہی ہے، وہاں سے بھی یہی جواب ملا کہ حضور صلی اللہ علیہ و سلم پر میرے باپ صدقے ہوں کچھ بھی نہیں، اللہ کے نبی (اللھم صلی و سلم علیہ) وہاں سے نکلے ہی تھے کہ حضرت فاطمہ کی لونڈی نے دو روٹیاں اور ٹکڑا گوشت حضرت فاطمہ کے پاس بھیجا آپ نے اسے لے کر برتن میں رکھ لیا اور فرمانے لگیں گو مجھے، میرے خاوند اور بچوں کو بھوک ہے لیکن ہم سب فاقے ہی سے گزار دیں گے اور اللہ کی قسم آج تو یہ رسول اللہ صلی اللہ علیہ و سلم ہی کو دوں گی، پھر حضرت حسن یا حسین کو آپ کی خدمت میں بھیجا کہ آپ کو بلا لائیں، حضور صلی اللہ علیہ و سلم راستے ہی میں ملے اور ساتھ ہو لئے، آپ آئے تو کہنے لگیں میرے ماں باپ آپ پر فدا ہوں اللہ نے کچھ بھجوا دیا ہے جسے میں نے آپ کے لئے چھپا کر رکھ دیا ہے، آپ نے فرمایا میری پیاری بچی لے آؤ، اب جو طشت کھولا تو دیکھتی ہے کہ روٹی سالن سے ابل رہا ہے دیکھ کر حیران ہو گئیں لیکن فوراً سمجھ گئیں کہ اللہ کی طرف سے اس میں برکت نازل ہو گئی ہے، اللہ کا شکر کیا نبی صلی اللہ علیہ و سلم اللہ پر درود پڑھا اور آپ کے پاس لا کر پیش کر دیا آپ نے بھی اسے دیکھ کر اللہ کی تعریف کی اور دریافت فرمایا کہ بیٹی یہ کہاں سے آیا؟ جواب دیا کہ ابا جان اللہ کے پاس سے وہ جسے چاہے بے حساب روزی دے، آپ نے فرمایا اللہ کا شکر ہے کہ اے پیاری بچی تجھے بھی اللہ تعالیٰ نے بنی اسرائیل کی تمام عورتوں کی سردار جیسا کر دیا، انہیں  جب کبھی اللہ تعالیٰ کوئی چیز عطا فرماتا اور ان سے پوچھا جاتا تو یہی جواب دیا کرتی تھیں کہ اللہ کے پاس سے ہے اللہ جسے چاہے بے حساب رزق دیتا ہے، پھر حضور صلی اللہ علیہ و سلم نے حضرت علی رضی اللہ تعالیٰ عنہ کو بلایا اور آپ نے حضرت علی نے اور حضرت فاطمہ نے اور حضرت حسین نے اور آپ کی سب ازواج مطہرات اور اہل بیت نے خوب شکم سیر ہو کر کھایا پھر بھی اتنا ہی باقی رہا جتنا پہلے تھا جو آس پاس کے پڑوسیوں کے ہاں بھیجا گیا یہ خیر کثیر اور برکت اللہ تعالیٰ کی طرف سے تھی۔

۳۸

حاصل دعا یحییٰ علیہ السلام

 حضرت زکریا علیہ السلام نے دیکھا کہ اللہ تعالیٰ حضرت مریم علیہما السلام کو بے موسم میوہ دیتا ہے جاڑوں میں گرمیوں کے پھل اور گرمی میں جاڑوں کے میوے ان کے پاس رکھے رہتے ہیں  تو باوجود اپنے پورے بڑھاپے کے اور باوجود اپنی بیوی کے بانجھ ہونے کے علم کے آپ بھی بے موسم میوہ یعنی نیک اولاد طلب کرنے لگے، اور چونکہ یہ طلب بظاہر ایک ناممکن چیز کی طلب تھی اس لئے نہایت پوشیدگی سے یہ دعا مانگی جیسے اور جگہ ہے نداء خفیا یہ اپنے عبادت خانے میں ہی تھے جو فرشتوں نے انہیں  آواز دی اور انہیں  سنا کر کہا کہ آپ کے ہاں ایک لڑکا ہو گا جس کا نام یحییٰ رکھنا، ساتھ ہی یہ بھی فرما دیا کہ یہ بشارت ہماری طرف سے نہیں  بلکہ اللہ کی طرف سے ہے ۔ یحییٰ نام کی وجہ سے یہ ہے کہ ان کی حیاۃ ایمان کے ساتھ ہو گی، وہ اللہ کے کلمہ کے یعنی حضرت عیسیٰ بن مریم کی تصدیق کریں گے، حضرت ربیع بن انس فرماتے ہیں  سب سے پہلے حضرت عیسیٰ کی نبوت کو تسلیم کرنے والے بھی حضرت یحییٰ علیہ السلام ہیں، جو حضرت عیسیٰ کی روش اور آپ کے طریق پر تھے، حضرت ابن عباس فرماتے ہیں  کہ یہ دونوں خالہ زاد بھائی تھے ۔ حضرت یحییٰ کی والدہ حضرت مریم سے اکثر ذکر کیا کرتی تھیں کہ میں اپنے پیٹ کی چیز کو تیرے پیٹ کی چیز کو سجدہ کرتی ہوئی پاتی ہوں، یہ تھی حضرت یحییٰ کی تصدیق دنیا میں آنے سے پیشتر سب سے پہلے حضرت عیسیٰ کی سچائی کو انہوں نے ہی پہچانا یہ حضرت عیسیٰ سے عمر میں بڑے تھے، سید کے معنی حلیم، بردبار، علم و عبادت میں بڑھا ہوا، متقی، پرہیزگار، فقیہ، عالم، خلق و دین میں سب سے افضل جسے غصہ اور غضب مغلوب نہ کر سکے، شریف اور کریم کے ہیں، حضور کے معنی ہیں  جو عورتوں کے پاس نہ آسکے جس کے ہاں نہ اولاد ہو نہ جس میں شہوت کا پانی ہو، اس معنی کی ایک مرفوع حدیث بھی ابن ابی حاتم میں ہے، کہ آنحضرت صلی اللہ علیہ و سلم نے یہ لفظ تلاوت کر کے زمین سے کچھ اٹھا کر فرمایا اس کا عضو اس جیسا تھا، حضرت عبد اللہ بن عمرو بن عاص رضی اللہ تعالیٰ عنہ فرماتے ہیں  کہ ساری مخلوق میں صرف حضرت یحییٰ ہی اللہ سے بے گناہ ملیں گے پھر آپ نے یہ الفاظ پڑھے اور زمین سے کچھ اٹھایا اور فرمایا حضور اسے کہتے ہیں  جس کا عضو اس جیسا ہو، اور حضرت یحییٰ بن سعید قطان نے اپنی کلمہ کی انگلی سے اشارہ کیا، یہ روایت جو مرفوع بیان ہوئی ہے اس کی حوالے سے اس موقوف کی سند زیادہ صحیح ہے، اور مرفوع روایت میں ہے کہ حضور صلی اللہ علیہ و سلم نے اپنے کپڑے کے پھندے کی طرف اشارہ کر کے فرمایا ایسا تھا، اور روایت میں یہ بھی ہے کہ آپ نے زمین سے ایک مرجھایا ہوا تنکا اٹھا کر اس کی طرف اشارہ کر کے یہی فرمایا، اس کے بعد حضرت زکریا کو دوسری بشارت دی جاتی ہے کہ تمہارا لڑکا نبی ہو گا یہ بشارت پہلی خوشخبری سے بھی بڑھ گئی، جب بشارت آچکی تب حضرت زکریا کو خیال پیدا ہوا کہ بظاہر اسباب سے تو اس کا ہونا محال ہے تو کہنے لگے اللہ میری ہاں بچہ کیسے ہو سکتا ہے ؟ میں بوڑھا ہوں میری بیوی بالکل بانجھ، فرشتے نے اسی وقت جواب دیا کہ اللہ کا امر سب سے بڑا ہے اس کے پاس کوئی چیز ان ہونی نہیں، نہ اسے کوئی کام کرنا مشکل نہ وہ کسی کام سے عاجز، اس کا ارادہ ہو چکا وہ اسی طرح کرے گا، اب حضرت زکریا اللہ سے اس کی علامت طلب کرنے لگے تو ذات باری سبحانہ و تعالیٰ کی طرف سے اشارہ کیا گیا کہ نشان یہ ہے کہ تو تین دن تک لوگوں سے بات نہ کر سکے گا، رہے گا تندرست صحیح سالم لیکن زبان سے لوگوں سے بات چیت نہ کی جائے گی صرف اشاروں سے کام لینا پڑے گا، جیسے اور جگہ ہے (آیت ثلاث لیال سویا) یعنی تین راتیں تندرستی کی حالت پھر حکم دیا کہ اس حال میں تمہیں  چاہئے کہ ذکر اور تکبیر اور تسبیح میں زیادہ مشغول رہو، صبح شام اسی میں لگے رہو، اس کا دوسرا حصہ اور پورا بیان تفصیل کے ساتھ سورہ مریم کے شروع میں آئے گا، انشاء اللہ تعالیٰ۔

۴۲

افضل ترین عورتیں

یہاں بیان ہو رہا ہے کہ اللہ تعالیٰ کے حکم سے مریم علیہما السلام کو فرشتوں نے خبر پہنچائی کہ اللہ نے انہیں  ان کی کثرت عبادت ان کی دنیا کی بے رغبتی کی شرافت اور شیطانی وسواس سے دوری کی وجہ سے اپنے قرب خاص عنایت فرما دیا ہے، اور تمام جہان کی عورتوں پر انہیں  خاص فضیلت دے رکھی ہے، صحیح مسلم شریف وغیرہ میں حضرت ابوہریرہ رضی اللہ تعالیٰ عنہ سے روایت ہے فرماتے ہیں  کہ رسول اللہ صلی اللہ علیہ و سلم نے فرمایا جنتی عورتیں اونٹ پر سوار ہونے والیاں ہیں  ان میں سے بہتر عورتیں قریش کی ہیں  جو اپنے چھوٹے بچوں پر بہت ہی شفقت اور پیار کرنے والی اور اپنے خاوند کی چیزوں کی پوری حفاظت کرنے والی ہیں، حضرت مریم بنت عمران اونٹ پر کبھی سوار نہیں  ہوئی، بخاری و مسلم کی ایک حدیث میں ہے عورتوں میں سے بہتر عورت حضرت مریم بنت عمران ہیں  اور عورتوں میں سے بہتر عورت حضرت خدیجہ بنت خویلد ہیں  (رضی اللہ تعالیٰ عنہما) ترمذی کی صحیح حدیث میں ہے ساری دنیا کی عورتوں میں سے تجھے مریم بنت عمران، خدیجہ بنت خویلد، فاطمہ بنت محمد، آسیہ فرعون کی بیوی ہیں  (رضی اللہ تعالیٰ عنہما) اور حدیث میں ہے یہ چاروں عورتیں تمام عالم کی عورتوں سے افضل اور بہتر ہیں  اور حدیث میں ہے مردوں میں سے کامل مرد بہت سے ہیں  لیکن عورتوں میں کمال والی عورتیں صرف تین ہیں، مریم بنت عمران، آسیہ فرعون کی بیوی اور خدیجہ بنت خویلد اور عائشہ کی فضیلت عورتوں پر ایسی ہے جیسے ثرید یعنی گوشت کے شوربے میں بھگوئی ہوئی روٹی کی تمام کھانوں پر یہ حدیث ابو داؤد کے علاوہ اور سب کتابوں میں ہے، صحیح بخاری شریف کی اس حدیث میں حضرت خدیجہ کا ذکر نہیں، میں نے اس حدیث کی تمام سندیں اور ہر سند کے الفاظ اپنی کتاب البدایہ والنہایہ میں حضرت عیسیٰ کے ذکر میں جمع کر دئیے ہیں  وللہ الحمد والمنۃ پھر فرشتے فرماتے ہیں  کہ اے مریم تو خشوع و خضوع رکوع و سجود میں رہا کر اللہ تبارک و تعالیٰ تجھے اپنی قدرت کا ایک عظیم الشان نشان بنانے والا ہے اس لئے تجھے رب کی طرف پوری رغبت رکھنی چاہئے، قنوت کے معنی اطاعت کے ہیں  جو عاجزی اور دل کی حاضری کے ساتھ ہو، جیسے ارشاد (آیت ولہ من فی السموات والارض کل لہٗ قانتون) یعنی اس کی ماتحتی اور ملکیت میں زمین و آسمان کی ہر چیز ہے سب کے سب اس کے محکوم اور تابع فرمان ہیں، ابن ابی حاتم کی ایک مرفوع حدیث میں ہے کہ قرآن میں جہاں کہیں  قنوت کا لفظ ہے اس سے مراد اطاعت گذاری ہے، یہی حدیث ابن جریر میں بھی ہے لیکن سند میں نکارت ہے، حضرت مجاہد فرماتے ہیں  کہ حضرت مریم علیہما السلام نماز میں اتنا لمبا قیام کرتی تھیں کہ دونوں ٹخنوں پر ورم آجاتا تھا، قنوت سے مراد نماز میں لمبے لمبے رکوع کرنا ہے، حسن بصری رحمۃ اللہ علیہ کا قول ہے کہ اس سے یہ مراد ہے کہ اپنے رب کی عبادت میں مشغول رہ اور رکوع سجدہ کرنے والوں میں سے ہو جا، حضرت اوزاعی فرماتے ہیں  کہ مریم صدیقہ اپنے عبادت خانے میں اس قدر بکثرت باخشوع اور لمبی نمازیں پڑھا کرتی تھیں کہ دونوں پیروں میں زرد پانی اتر آیا، رضی اللہ عنہما و رضاہا۔ یہ اہم خبریں بیان کر کے اللہ تعالیٰ فرماتا ہے کہ اے نبی صلی اللہ علیہ و سلم ان باتوں کا علم تمہیں  صرف میری وحی سے ہوا ورنہ تمہیں  کیا خبر؟ تم کچھ اس وقت ان کے پاس تھوڑے ہی موجود تھے جو ان واقعات کی خبر لوگوں کو پہنچاتے ؟ لیکن اپنی وحی سے ہم نے ان واقعات کو اس طرح آپ پر کھول دیا گویا آپ اس وقت خود موجود تھے جبکہ حضرت مریم کی پرورش کے بارے میں ہر ایک دوسرے پر سبقت کرتا تھا سب کی چاہت تھی کہ اس دولت سے مالا مال ہو جاؤں اور یہ اجر مجھے مل جائے، جب آپ کی والدہ صاحبہ آپ کو لے کر بیت المقدس کی مسجد سلیمانی میں تشریف لائیں اور وہاں کے خادموں سے جو حضرت موسیٰ کے بھائی اور حضرت ہارون کی نسل میں سے تھے کہا کہ میں انہیں  اپنی نذر کے مطابق نام اللہ پر آزاد کر چکی ہوں تم اسے سنبھالو، یہ ظاہر ہے کہ لڑکی ہے اور یہ بھی معلوم ہے کہ حیض کی حالت میں عورتیں مسجد میں نہیں  آسکتیں اب تم جانو تمہارا کام، میں تو اسے گھر واپس نہیں  لے جا سکتی کیونکہ نام اللہ اسے نذر کر چکی ہوں، حضرت عمران یہاں کے امام نماز تھے اور قربانیوں کے مہتمم تھے اور یہ ان کی صاحبزادی تھیں تو ہر ایک نے بڑی چاہت سے ان کے لئے ہاتھ پھیلا دئیے ادھر سے حضرت زکریا نے اپنا ایک حق اور جتایا کہ میں رشتہ میں بھی ان کا خالو ہوتا ہوں تو یہ لڑکی مجھ ہی کو ملنی چاہیے اور لوگ راضی نہ ہوئے آخر قرعہ ڈالا گیا اور قرعہ میں ان سب نے اپنی وہ قلمیں ڈالیں جن سے توراۃ لکھتے تھے، تو قرعہ حضرت زکریا کے نام نکلا اور یہی اس سعادت سے مشرف ہوئے دوسری مفصل روایتوں میں یہ بھی ہے کہ نہر اردن پر جا کر یہ قلمیں ڈالی گئیں کہ پانی کے بہاؤ کے ساتھ جو قلم نکل جائے وہ نہیں  اور جس کا قلم ٹھہر جائے وہ حضرت مریم کا کفیل بنے، چنانچہ سب کی قلمیں تو پانی بہا کر لے گیا صرف حضرت زکریا کا قلم ٹھہر گیا بلکہ الٹا اوپر کو چڑھنے لگا تو ایک تو قرعے میں ان کا نام نکلا دوسرے قریب کے رشتہ داری تھے پھر یہ خود ان تمام کے سردار امام مالک نبی تھے صلوات اللہ و سلامہ علیہ پس انہی کو حضرت مریم سونپ دی گئیں ۔

۴۵

سیح ابن مریم علیہ السلام

یہ خوشخبری حضرت مریم کو فرشتے سنا رہے ہیں  کہ ان سے ایک لڑکا ہو گا جو بڑی شان والا اور صرف اللہ کے کلمہ "کن” کے کہنے سے ہو گا یہی تفسیر اللہ تعالیٰ کے فرمان (آیت مصدقا بکلمۃ من اللہ) کی بھی ہے، جیسے کہ جمہور نے ذکر کیا اور جس کا بیان اس سے پہلے گزر چکا، اس کا نام مسیح ہو گا، عیسیٰ بیٹا مریم علیہ السلام کا، ہر مومن اسے اسی نام سے پہچانے گا، مسیح نام ہونے کی وجہ یہ ہے کہ زمین میں وہ بکثرت سیاحت کریں گے، ماں کی طرف منسوب کرنے کی وجہ یہ ہے کہ ان کا باپ کوئی نہ تھا۔ اللہ تعالیٰ کے نزدیک وہ دونوں جہان میں برگزیدہ ہیں  اور مقربان خاص میں سے ہیں، ان پر اللہ عزوجل کی شریعت اور کتاب اترے گی اور بڑی بڑی مہربانیاں ٠ ان پر دنیا میں نازل ہوں گی اور آخرت میں بھی اور اولوالعزم پیغمبروں کی طرح اللہ کے حکم سے جس کے لئے اللہ چاہے گا وہ شفاعت کریں گے جو قبول ہو جائیں گی صلوات اللہ وسلامہ علیہ وعلیھم اجمعین وہ اپنے جھولے میں اور ادھیڑ عمر میں باتیں کریں گے یعنی اللہ وحدہٗ لا شریک لہٗ کی عبادت کی لوگوں کو بچنے ہی میں دعوت دیں گے جو ان کا معجزہ ہو گا اور بڑی عمر میں بھی جب اللہ ان کی طرف وحی کرے گا، وہ اپنے قول و فعل میں علم صحیح رکھنے والے اور عمل صالح کرنے والے ہوں گے، ایک حدیث میں ہے کہ بچپن میں کلام صرف حضرت عیسیٰ اور جریج کے ساتھی نے کیا اور ان کے علاوہ حدیث میں ایک اور بچے کا کلام کرنا بھی مروی ہے تو یہ تین ہوئے حضرت مریم اس بشارت کو سن کر اپنی مناجات میں کہنے لگیں اللہ مجھے بچہ کیسے ہو گا؟ میں نے تو نکاح نہیں  کیا اور نہ میرا ارادہ نکاح کرنے کا ہے اور نہ میں ایسی بدکار عورت ہوں ماشاء اللہ، اللہ عزوجل کی طرف سے فرشتے نے جواب میں کہا کہ اللہ کا امر بہت بڑا ہے اسے کوئی چیز عاجز نہیں  کر سکتی وہ جو چاہے پیدا کر دے، اس نکتے کو خیال میں رکھنا چاہئے کہ حضرت زکریا کے اس سوال کے جواب میں اس جگہ لفظ یفعل تھا یہاں لفظ یخلق ہے یعنی پیدا کرتا ہے ۔ اس لئے کہ کسی باطل پرست کو کسی شبہ کا موقع باقی نہ رہے اور صاف لفظوں میں حضرت عیسیٰ کا اللہ جل شانہ کی مخلوق ہونا معلوم ہو جائے ۔ پھر اس کی مزید تاکید کی اور فرمایا وہ جس کسی کام کو جب کبھی کرنا چاہتا ہے تو صرف اتنا فرما دیتا ہے کہ ہو جا، بس وہ وہیں  ہو جاتا ہے اس کے حکم کے بعد ڈھیل اور دیر نہیں  لگتی، جیسے اور جگہ ہے (آیت وما امرنا الا واحدۃ کلمح بالبصر) یعنی ہمارے صرف ایک مرتبہ کے حکم سے ہی بلاتاخیر فی الفور آنکھ جھپکتے ہی وہ کام ہو جاتا ہے ہمیں دوبارہ اسے کہنا نہیں  پڑتا۔

۴۸

فرشتوں کا مریم سے خطاب

 فرشتے حضرت مریم سے کہتے ہیں  کہ تیرے اس لڑکے یعنی حضرت عیسیٰ علیہ السلام کو پروردگار عالم لکھنا سکھائے گا حکمت سکھائے گا لفظ حکمت کی تفسیر سورہ بقرہ میں گزر چکی ہے، اور اسے توراۃ سکھائے گا جو حضرت موسیٰ بن عمران پر اتری تھی اور انجیل سکھائے گا جو حضرت عیسیٰ ہی پر اتری، چنانچہ آپ کو یہ دونوں کتابیں حفظ تھیں، انہیں  بنی اسرائیل کی طرف اپنا رسول بنا کر بھیجے گا، اور اس بات کو کہنے کے لئے کہ میرا یہ معجزہ دیکھو کہ مٹی لی اس کا پرندہ بنایا پھر پھونک مارتے ہی وہ سچ مچ کا جیتا جاگتا پرند بن کر سب کے سامنے اڑنے لگا، یہ اللہ کے حکم اور اس کی زبان سے نکلے ہوئے الفاظ کے سبب تھا، حضرت عیسیٰ کی اپنی قدرت سے نہیں  یہ ایک معجزہ تھا جو آپ کی نبوت کا نشان تھا، اکمہ اس اندھے کو کہتے ہیں  جسے دن کے وقت دکھائی نہ دے اور رات کو دکھائی دے، بعض نے کہا اکمہ اس نابینا کو کہتے ہیں  جسے دن کو دکھائی دے اور رات کو دکھائی نہ دے، بعض کہتے ہیں  بھینگا اور ترچھا اور کانا مراد ہے، بعض کا قول یہ بھی ہے کہ جو ماں کے پیٹ سے بالکل اندھا پیدا ہوا ہو، یہاں یہی ترجمہ زیادہ مناسب ہے کیونکہ اس میں معجزے کا کمال یہی ہے اور مخالفین کو عاجز کرنے کے لئے اس کی یہ صورت اور صورتوں سے اعلیٰ ہے، ابرص سفید دانے والے کوڑھی کو کہتے ہیں  ایسی بیمار بھی اللہ جل شانہ کے حکم سے حضرت عیسیٰ اچھے کر دیتے تھے اور مردوں کو بھی اللہ عزوجل کے حکم سے آپ زندہ کر دیا کرتے تھے، اکثر علماء کا قول ہے کہ ہر ہر زمانے کے نبی کو اس زمانے والوں کی مناسبت سے خاص خاص معجزات حضرت باری غراسمہ نے عطا فرمائے ہیں، حضرت موسیٰ علیہ السلام کے زمانے میں جادو کا بڑا چرچا تھا اور جادو گروں کی بڑی قدرو تعظیم تھی تو اللہ تعالیٰ نے آپ کو وہ معجزہ دیا جس سے تمام جادوگروں کی آنکھیں کھل گئیں اور ان پر حیرت طاری ہو گئی اور انہیں  کامل یقین ہو گیا کہ یہ تو الہ واحد و قہار کی طرف سے عطیہ ہے جادو ہرگز نہیں  چنانچہ ان کی گردنیں جھک گئیں اور یک لخت وہ حلقہ بگوش اسلام ہو گئے اور بالاخر اللہ کے مقرب بندے بن گئے، حضرت عیسیٰ علیہ السلام کے زمانہ میں طبیبوں اور حکیموں کا دور دورہ تھا۔ کامل اطباء اور ماہر حکیم علم طب کے پورے عالم اور لاجواب کامل الفن استاد موجود تھے پس آپ کو وہ معجزے دے گئے جس سے وہ سب عاجز تھے بھلا مادر زاد اندھوں کو بالکل بینا کر دینا اور کوڑھیوں کو اس مہلک بیماری سے اچھا کر دینا اتنا ہی نہیں  بلکہ جمادات جو محض بے جان چیز ہے اس میں روح ڈال دینا اور قبروں میں سے مردوں کو زندہ کر دینا یہ کسی کے بس کی بات نہیں ؟ صرف اللہ سبحانہ کے حکم سے بطور معجزہ یہ باتیں آپ سے ظاہر ہوئیں، ٹھیک اسی طرح جب ہمارے نبی ا کرم حضرت محمد مصطفی صلی اللہ علیہ و سلم تشریف لائے اس وقت فصاحت بلاغت نکتہ رسی اور بلند خیالی بول چال میں نزاکت و لطافت کا زمانہ تھا اس فن میں بلند پایہ شاعروں نے وہ کمال حاصل کر لیا تھا کہ دنیا ان کے قدموں پر جھکتی تھی پس حضور صلی اللہ علیہ و سلم کو کتاب اللہ ایسی عطا فرمائی گئی کہ ان سب کو کوندتی ہوئی بجلیاں ماند پڑ گئیں اور کلام اللہ کے نور نے انہیں  نیچا دکھایا اور یقین کامل ہو گیا کہ یہ انسانی کلام نہیں، تمام دنیا سے کہہ دیا گیا اور جتا جتا کر بتا بتا کر سنا سنا کر منادی کر کے بار بار اعلان کیا گیا کہ ہے کوئی؟ جو اس جیسا کلام کہہ سکے ؟ اکیلے اکیلے نہیں  سب مل جاؤ اور انسان ہی نہیں  جنات کو بھی اپنے ساتھ شامل کر لو پھر سارے قرآن کے برابر بھی نہیں  صرف دس سورتوں کے برابر سہی، اور اچھا یہ بھی نہ سہی ایک ہی سورت اس کی مانند تو بنا کر لاؤ لیکن سب کمریں ٹوٹ گئیں ہمتیں پست ہو گئیں گلے خشک ہو گئے زبان گنگ ہو گئی اور آج تک ساری دنیا سے نہ بن پڑا اور نہ کبھی ہو سکے گا بھلا کہاں اللہ جل شانہ کا کلام اور کہاں مخلوق؟ پس اس زمانہ کے اعتبار سے اس معجزے نے اپنا اثر کیا اور مخالفین کو ہتھیار ڈالتے ہی بن پڑی اور جوق در جوق اسلامی حلقے بڑھتے گئے ۔ پھر حضرت مسیح کا اور معجزہ بیان ہو رہا ہے کہ آپ نے فرمایا بھی اور کر کے بھی دکھایا بھی، کہ جو کوئی تم میں سے آج اپنے گھر سے جو کچھ کھا کر آیا ہو میں اسے بھی اللہ تعالیٰ کی دی ہوئی اطلاع بتا دوں گا یہی نہیں  بلکہ کل کے لئے بھی اس نے جو تیاری کی ہو گی مجھے اللہ تعالیٰ کے معلوم کرانے پر معلوم ہو جاتا ہے، یہ سب میری سچائی کی دلیل ہے کہ میں جو تعلیم تمہیں  دے رہا ہوں وہ برحق ہے ہاں اگر تم میں ایمان ہی نہیں  تو پھر کیا؟ میں اپنے سے پہلی کتاب توراۃ کو بھی ماننے والا اس کی سچائی کا دنیا میں اعلان کرنے والا ہوں، میں تم پر بعض وہ چیزیں حلال کرنے آیا ہوں جو مجھ سے پہلے تم پر حرام کی گئی ہیں، اس سے ثابت ہوا کہ حضرت عیسیٰ علیہ السلام نے توراۃ کے بعض احکام منسوخ کئے ہیں، گو اس کے خلاف بھی مفسرین کا خیال ہے، لیکن درست بات یہی ہے کہ بعض حضرات فرماتے ہیں  کہ تورات کا کوئی حکم آپ نے منسوخ نہیں  کیا البتہ بعض حلال چیزوں میں جو اختلاف تھا اور بڑھتے بڑھتے گویا ان کی حرمت پر اجماع ہو چکا تھا۔ حضرت عیسیٰ علیہ السلام نے ان کی حقیقت بیان فرما دی اور ان کے حلال ہونے پر مہر کر دی، جیسے قرآن حکیم نے اور جگہ فرمایا ولا بین لکم بعض الذی تختلفون فیہ میں تمہارے بعض آپس کے اختلاف میں صاف فیصلہ کر دونگا واللہ اعلم، پھر فرمایا کہ میرے پاس اپنی سچائی کی اللہ جل شانہ کی دلیلیں موجود ہیں  تم اللہ سے ڈرو اور میرا کہا مانو، جس کا خلاصہ صرف اسی قدر ہے کہ اسے پوجو جو میرا اور تمہارا پالنہار ہے سیدھی اور سچی راہ تو صرف یہی ہے ۔

۵۲

پھانسی کون چڑھا؟

 جب حضرت عیسیٰ علیہ السلام نے ان کی ضد اور ہٹ دھرمی کو دیکھ لیا کہ اپنی گمراہی کج روی اور کفر و انکار سے یہ لوگ ہٹتے ہی نہیں، تو فرمانے لگے کہ کوئی ایسا بھی ہے ؟ جو اللہ تعالیٰ کی طرف پہنچنے کے لئے میری تابعداری کرے اس کا یہ مطلب بھی لیا گیا ہے کہ کوئی ہے جو اللہ جل شانہ کے ساتھ میرا مددگار بنے ؟ لیکن پہلا قول زیادہ قریب ہے،  بظاہر یہ معلوم ہوتا ہے کہ آپ نے فرمایا اللہ جل شانہ کی طرف پکارنے میں میرا ہاتھ بٹانے والا کون ہے ؟ جیسے کہ نبی اللہ حضرت محمد رسول اللہ صلی اللہ علیہ و سلم مکہ شریف سے ہجرت کرنے کے پہلے موسم حج کے موقع پر فرمایا کرتے تھے کہ کوئی ہے جو مجھے اللہ جل شانہ کا کلام پہنچانے کے لئے جگہ دے ؟ قریش تو کلام الٰہی کی تبلیغ سے مجھے روک رہے ہیں  یہاں تک کہ مدینہ شریف کے باشندے انصار کرام اس خدمت کے لئے کمربستہ ہوئے آپ کو جگہ بھی دی آپ کی مدد بھی کی اور جب آپ ان کے ہاں تشریف لے گئے تو پوری خیرخواہی اور بے مثال ہمدردی کا مظاہرہ کیا، ساری دنیا کے مقابلہ میں اپنا سینہ سپر کر دیا اور حضور صلی اللہ علیہ و سلم کی حفاظت خیرخواہی اور آپ کے مقاصد کی کامیابی میں ہمہ تن مصروف ہو گئے رضی اللہ عنھم وارضاھم اسی طرح حضرت عیسیٰ علیہ الصلوٰۃ والسلام کی اس آواز پر بھی چند بنی اسرائیلیوں نے لبیک کہی آپ پر ایمان لائے آپ کی تائید کی تصدیق کی اور پوری مدد پہنچائی اور اس نور کی اطاعت میں لگ گئے جو اللہ ذوالجلال نے ان پر اتارا تھا یعنی انجیل یہ لوگ دھوبی تھے اور حواری انہیں  ان کے کپڑوں کی سفیدی کی وجہ سے کہا گیا ہے، بعض کہتے ہیں  یہ شکاری تھے، صحیح یہ ہے کہ حواری کہتے ہیں  مددگار کو، جیسے کہ بخاری و مسلم کی حدیث میں ہے کہ جنگ خندق کے موقع پر رسول اللہ صلی اللہ علیہ و سلم نے فرمایا ہے کوئی جو سینہ سپر ہو جائے ؟ اس آواز کو سنتے ہی حضرت زبیر تیار ہو گئے آپ نے دوبارہ یہی فرمایا پھر بھی حضرت زبیر نے ہی قدم اٹھایا پس حضور علیہ السلام نے فرمایا ہر نبی کے حواری ہوتے ہیں  اور میرا حواری زبیر ہے رضی اللہ عنہ۔ پھر یہ لوگ اپنی دعا میں کہتے ہیں  ہمیں شاہدوں میں لکھ لے، اس سے مراد حضرت ابن عباس کے نزدیک امت محمد صلی اللہ علیہ و سلم میں لکھ لینا ہے، اس تفسیر کی روایت سنداً بہت عمدہ ہے، پھر بنی اسرائیل کے اس ناپاک گروہ کا ذکر ہو رہا ہے جو حضرت عیسیٰ کی طرف سے بھرے تھے کہ یہ شخص لوگوں کو بہکاتا پھرتا ہے ملک میں بغاوت پھیلا رہا ہے اور رعایا کو بگاڑ رہا ہے، باپ بیٹوں میں فساد برپا کر رہا ہے، بلکہ اپنی خباثت خیانت کذب و جھوٹ (دروغ) میں یہاں تک بڑھ گئے کہ آپ کو زانیہ کا بیٹا کہا اور آپ پر بڑے بڑے بہتان باندھے، یہاں تک کہ بادشاہ بھی دشمن جان بن گیا اور اپنی فوج کو بھیجا تاکہ اسے گرفتار کر کے سخت سزا کے ساتھ پھانسی دے دو، چنانچہ یہاں سے فوج جاتی ہے اور جس گھر میں آپ تھے اسے چاروں طرف سے گھیر لیتی ہے ناکہ بندی کر کے گھر میں گھستی ہے، لیکن اللہ تعالیٰ آپ کو ان مکاروں کے ہاتھ سے صاف بچا لیتا ہے اس گھر کے روزن (روشن دان) سے آپ کو آسمان کی طرف اٹھا لیتا ہے اور آپ کی شباہت ایک اور شخص پر ڈال دی جاتی ہے جو اسی گھر میں تھا، یہ لوگ رات کے اندھیرے میں اس کو عیسیٰ سمجھ لیتے ہیں  گرفتار کر کے لے جاتے ہیں ٠ سخت توہین کرتے ہیں  اور سر پر کانٹوں کو تاج رکھ کر اسے صلیب پر چڑھا دیتے ہیں، یہی ان کے ساتھ اللہ کا مکر تھا کہ وہ تو اپنے نزدیک یہ سمجھتے رہے کہ ہم نے اللہ کے نبی کو پھانسی پر لٹکا دیا حالانکہ اللہ تعالیٰ نے اپنے نبی کو تو نجات دے دی تھی، اس بدبختی اور بدنیتی کا ثمرہ انہیں  یہ ملا کہ ان کے دل ہمیشہ کے لئے سخت ہو گئے باطل پر اڑ گئے اور دنیا میں ذلیل و خوار ہو گئے اور آخر دنیا تک اس ذلت میں ہی ڈوبے رہے ۔ اس کا بیان اس آیت میں ہے کہ اگر انہیں  خفیہ تدبیریں کرنی آتی ہیں  تو کیا ہم خفیہ تدبیر کرنا نہیں  جانتے بلکہ ہم تو ان سے بہتر خفیہ تدبیریں کرنے والے ہیں ۔

۵۵

اظہار خود مختاری

قتادہ وغیرہ بعض مفسرین تو فرماتے ہیں  مطلب یہ ہے کہ میں تجھے اپنی طرف اٹھا لوں گا پھر اس کے بعد تجھے فوت کروں گا، ابن عباس فرماتے ہیں  یعنی میں تجھے مارنے والا ہوں، وہب بن منبہ فرماتے ہیں  اللہ تعالیٰ نے آپ کو اٹھاتے وقت دن کے شروع میں تین ساعت تک فوت کر دیا تھا، ابن اسحاق کہتے ہیں  نصاریٰ کا خیال ہے کہ اللہ تعالیٰ نے آپ کو سات ساعت تک فوت رکھا پھر زندہ کر دیا، وہب فرماتے ہیں  تین دن تک موت کے بعد پھر زندہ کر کے اٹھا لیا، مطر وراق فرماتے ہیں  یعنی میں تجھے دنیا میں پورا پورا کر دینے والا ہوں یہاں وفات موت مراد نہیں، اسی طرح ابن جریر فرماتے ہیں  تو فی سے یہاں مراد ان کا رفع ہے اور اکثر مفسرین کا قول ہے کہ وفات سے مراد یہاں نیند ہے، جیسے اور جگہ قرآن حکیم میں ہے (آیت ھوالذی یتوفا کم بالیل الخ،) وہ اللہ ذوالمنن جو تمہیں  رات کو فوت کر دیتا ہے یعنی سلا دیتا ہے اور جگہ ہے (آیت اللہ یتوفی الانفس حین موتھا والتی لم تمت فی منامھا) یعنی اللہ تعالیٰ ان کی موت کے وقت جانوں کو فوت کرتا ہے اور جو نہیں  مرتیں انہیں  ان کی نیند کے وقت، رسول اللہ صلی اللہ علیہ و آلہ و سلم جب نیند سے بیدار ہوتے تو فرماتے (حدیث الحمد للہ الذی احیانا بعدما اماتنا) یعنی اللہ عزوجل کا شکر ہے جس نے ہمیں مار ڈالنے کے بعد پھر زندہ کر دیا، اور جگہ فرمان باری تعالیٰ وبکفرھم سے شیھدا تک پڑھو جہاں فرمایا گیا ہے ان کے کفر کی وجہ سے اور حضرت مریم پر بہتان عظیم باندھ لینے کی بنا پر اور اس باعث کہ وہ کہتے ہیں  ہم نے مسیح عیسیٰ بن مریم رسول اللہ صلی اللہ علیہ و سلم کو قتل کر دیا حالانکہ نہ قتل کیا ہے اور نہ صلیب دی لیکن ان کو شبہ میں ڈال دیا گیا موتہ کی ضمیر کا مرجع حضرت عیسیٰ علیہ السلام ہیں  یعنی تمام اہل کتاب حضرت عیسیٰ پر ایمان لائیں گے جبکہ وہ قیامت سے پہلے زمین پر اتریں گے اس کا تفصیلی بیان عنقریب آرہا ہے ۔ انشاء اللہ، پس اس وقت تمام اہل کتاب ان پر ایمان لائیں گے کیونکہ نہ وہ جزیہ لیں گے نہ سوائے اسلام کے اور کوئی بات قبول کریں گے، ابن ابی حاتم میں حضرت حسن سے (آیت انی متوفیک) کی تفسیر یہ مروی ہے کہ ان پر نیند ڈالی گئی اور نیند کی حالت میں ہی اللہ تعالیٰ نے انہیں  اٹھا لیا، حضرت حسن فرماتے ہیں  رسول اللہ صلی اللہ علیہ و سلم نے یہودیوں سے فرمایا کہ حضرت عیسیٰ مرے نہیں  وہ تمہاری طرف قیامت سے پہلے لوٹنے والے ہیں ۔ پھر فرماتا ہے میں تجھے اپنی طرف اٹھا کر کافروں کی گرفت سے آزاد کرنے والا ہوں، اور تیرے تابعداروں کو کافروں پر غالب رکھنے والا ہوں قیامت تک، چنانچہ ایسا ہی ہوا، جب اللہ تعالیٰ نے حضرت عیسیٰ کو آسمان پر چڑھا لیا تو ان کے بعد ان کے ساتھیوں کے کئی فریق ہو گئے ایک فرقہ تو آپ کی بعثت پر ایمان رکھنے والا تھا کہ آپ اللہ کے بندے اور اس کے رسول ہیں  اور اس کی ایک بندی کے لڑکے ہیں  بعض وہ تھے جنہوں نے غلو سے کام لیا اور بڑھ گئے اور آپ کو اللہ تعالیٰ کا بیٹا کہنے لگے، اوروں نے آپ کو اللہ کہا، دوسروں نے تین میں کا ایک آپ کو بتایا، اللہ تعالیٰ ان کے ان عقائد کا ذکر قرآن مجید میں فرماتا ہے پھر ان کی تردید بھی کر دی ہے تین سو سال تک تو یہ اسی طرح رہے، پھر یونان کے بادشاہوں میں سے ایک بادشاہ جو بڑا فیلسوف تھا جس کا نام اسطفلین تھا کہا جاتا ہے کہ صرف اس دین کو بگڑانے کے لئے منافقانہ انداز سے اس دین میں داخل ہوا یا جہالت سے داخل ہوا ہو، بہر صورت اس نے دین مسیح کو بالکل بدل ڈالا اور بڑی تحریف اور تفسیر کی اس دین میں اور کمی زیادہ بھی کر ڈالی، بہت سے قانون ایجاد کئے اور امانت کبریٰ بھی اسی کی ایجاد ہے جو دراصل کمینہ پن کی خیانت ہے، اسی نے اپنے زمانہ میں سور کو حلال کیا اسی کے حکم سے عیسائی مشرق کی طرف نمازیں پڑھنے لگے اسی نے گر جاؤں اور کلیساؤں میں عبادت خانوں اور خانقاہوں میں تصویریں بنوائیں ٠ اور اپنے ایک گناہ کے باعث دس روزے روزوں میں بڑھوا دئیے، غرض اس کے زمانہ سے دین مسیح مسیحی دین نہ رہا بلکہ دین اسطفلین ہو گیا، اس نے ظاہری رونق تو خوب دی بارہ ہزار سے زاید تو عبادت گاہیں  بنوا دیں اور ایک شہر اپنے نام سے بسایا، ملکیہ گروہ نے اس کی تمام باتیں مان لیں لیکن باوجود ان سب سیاہ کاریوں کے یہودی ان کے ہاتھ تلے رہے اور دراصل نسبتاً حق سے زیادہ قریب یہی تھے گو فی الواقع سارے کے سارے کفار تھے اللہ خالق کل کی ان پر پھٹکار ہو، اب جبکہ ہمارے نبی حضرت محمد مصطفی صلی اللہ علیہ و سلم کو اللہ تعالیٰ نے اپنا برگزیدہ بنا کر دنیا میں بھیجا تو آپ پر جو لوگ ایمان لائے ان کا ایمان اللہ تعالیٰ کی ذات پر بھی تھا اس کے فرشتوں پر بھی تھا اس کی کتابوں پر بھی تھا اور اس کے تمام رسولوں پر بھی تھا پس حقیقت میں نبیوں کے سچے تابع فرمان یہی لوگ تھے یعنی امت محمد صلی اللہ علیہ و سلم، اس لئے کہ یہ نبی امی عربی خاتم الرسول سید اولاد آدم کے ماننے والے تھے اور حضور صلی اللہ علیہ و سلم کی تعلیم برحق تعلیم کو سچا ماننے کی تھی، لہٰذا دراصل ہر نبی کے سچے تابعدار اور صحیح معنی میں امتی کہلانے کے مستحق یہی لوگ تھے کیونکہ ان لوگوں نے جو اپنے تئیں عیسیٰ کی امت کہتے تھے تو دین عیسوی کو بالکل مسخ اور فسخ کر دیا تھا، علاوہ ازیں پیغمبر آخرالزمان کا دین بھی اور تمام اگلی شریعتوں کا ناسخ تھا پھر محفوظ رہنے والا تھا جس کا ایک شوشہ بھی قیامت تک بدلنے والا نہیں  اس لئے اس آیت کے وعدے کے مطابق اللہ تعالیٰ نے کافروں پر اس امت کو غالب کر اور یہ مشرق سے لے کر مغرب تک چھا گئے ملک کو اپنے پاؤں تلے روند دیا اور بڑے بڑے جابر اور کٹر کافروں کی گردنیں مروڑ دیں دولتیں ان کے پیروں میں آ گئیں فتح و غنیمت ان کی رکابیں ٠ چومنے لگی مدتوں کی پرانی سلطنتوں کے تحت انہوں نے الٹ دئیے، کسریٰ کی عظیم الشان پر شان سلطنت اور ان کے بھڑکتے ہوئے آتش کدے ان کے ہاتھوں ویران اور سرد ہو گئے، قیصر کا تاج و تخت ان اللہ والوں نے تاخت و تاراج کیا اور انہیں  مسیح پرستی کا خوب مزا چکھایا اور ان کے خزانوں کو اللہ واحد کی رضامندی میں اور اس کے سچے نبی کے دین کی اشاعت میں دل کھول کر خرچ کئے اور اللہ کے لکھے اور نبی کے وعدے چڑھے ہوئے سورج اور چودھویں کے روشن چاند کی طرح سچے ہوئے لوگوں نے دیکھ لئے، مسیح علیہ السلام کے نام کو بدنام کرنے والے مسیح کے نام شیطانوں کو پوجنے والے ان پاکباز اللہ پرستوں کے ہاتھوں مجبور ہو کر شام کے لہلہاتے ہوئے باغات اور آباد شہروں کو ان کے حوالے کر کے بدحواس بھاگتے ہوئے روم میں جا بسے پھر وہاں سے بھی یہ بے عزت کر کے نکالے گئے اور اپنے بادشاہ کے خاص شہر قسطنطنیہ میں پہنچے لیکن پھر وہاں سے بھی ذلیل خوار کر کے نکال دئیے گئے اور انشاء اللہ العزیز اسلام اور اہل اسلام قیامت تک ان پر غالب ہی رہیں  گے ۔ سب سچوں کے سردار جن کی سچائی پر مہر الٰہی لگ چکی ہے یعنی آنحضرت صلی اللہ علیہ و سلم خبر دے چکے ہیں  جو اٹل ہے نہ کاٹے کٹے نہ توڑے ٹوٹے، نہ ٹالے ٹلے، فرماتے ہیں  کہ آپ کی امت کا آخری گروہ قسطنطنیہ کو فتح کرے  گا اور وہاں کے  تمام خزانے  اپنے  قبضے  میں لے  گا اور رومیوں سے  ان کی گھمسان کی لڑائی ہو گی کہ اس کی نظیر سے  دنیا خالی ہو (ہماری دعا ہے  کہ ہر زمانے  میں اللہ قادر کل اس امت کا حامی و ناصر رہے  اور روئے  زمین کے  کفار پر انہیں  غالب رکھے  اور انہیں  سمجھ دے  تاکہ یہ اللہ تعالیٰ کے  سوا کسی کی عبادت کریں نہ محمد صلی اللہ علیہ و سلم کے  سوا کسی اور کی اطاعت کریں، یہی اسلام کی اصل ہے  اور یہی عروج دینوی کا گر ہے  میں نے  سب کو علیحدہ کتاب میں جمع کر دیا ہے، آگے  اللہ تعالیٰ کے  قول پر نظر ڈالیے  کہ مسیح علیہ السلام کے  ساتھ کفر کرنے  والے  یہود اور آپ کی شان میں بڑھ چڑھ کر باتیں بنا کر بہکنے  والے  نصرانیوں کو قتل و قید کی مار اور سلطنت کے  تباہ ہو جانے  کی یہاں بھی سزا دی اور آخرت کا عذاب وہاں دیکھ لیں گے  جہاں نہ کوئی بچا سکے  نہ مدد کر سکے  گا لیکن برخلاف ان کے  ایمانداروں کو پورا اجر اللہ تعالیٰ عطا فرمائے  گا دنیا میں بھی فتح اور نصرت عزت و حرمت عطا ہو گی اور آخرت میں بھی خاص رحمتیں اور نعمتیں ملیں گی، اللہ تعالیٰ ظالموں کو ناپسند رکھتا ہے ۔ پھر فرمایا اے  نبی صلی اللہ علیہ و سلم یہ تھی حقیقت حضرت عیسیٰ کی ابتداء پیدائش کی اور ان کے  امر کی جو اللہ تعالیٰ نے  لوح محفوظ سے  آپ کی طرف بذریعہ اپنی خاص وحی کے  اتار دی جس میں کوئی شک و شبہ نہیں  جیسے  سورہ مریم میں فرمایا، عیسیٰ بن مریم یہی ہیں  یہی سچی حقیقت ہے  جس میں تم شک و شبہ میں پڑے  ہو، اللہ تعالیٰ کو تو لائق ہی نہیں  کہ اس کی اولاد ہو وہ اس سے  بالکل پاک ہے  وہ جو کرنا چاہے  کہہ دیتا ہے  ہو جا، بس وہ ہو جاتا ہے، اب یہاں بھی اس کے  بعد بیان ہو رہا ہے ۔

۵۹

اختیارات کی وضاحت اور نجرانی وفد کی روداد

حضرت باری جل اسمہ وعلا قدرہ اپنی قدرت کاملہ کا بیان فرما رہا ہے  کہ حضرت عیسیٰ کا تو صرف باپ نہ تھا اور میں نے  انہیں  پیدا کر دیا تو کیا کون سی حیرانی بات ہے ؟ میں نے  حضرت آدم کو تو ان سے  پہلے  پیدا کیا تھا ان کا بھی باپ نہ تھا بلکہ ماں بھی نہ تھی، مٹی سے  پتلا بنایا اور کہہ دیا آدم ہو جا اسی وقت ہو گیا، پھر میرے  لئے  صرف ماں سے  پیدا کرنا کون سا مشکل ہو سکتا جبکہ بغیر ماں اور باپ کے  بھی میں نے  پیدا کر دیا، پس اگر صرف باپ نہ ہونے  کی وجہ سے  حضرت عیسیٰ کو تو سب سے  پہلے  اس مرتبہ سے  ہٹا دینا چاہئے، کیونکہ ان کے  دعوے  کا جھوٹا ہونا اور خرابی اس سے  بھی زیادہ یہاں ظاہر ہے  یہاں ماں تو ہے  وہاں تو نہ ماں تھی نہ باپ، یہ سب کچھ اللہ تعالیٰ جل جلالہ کی قدرت کاملہ کا ظہور ہے  کہ آدم کو بغیر مرد و عورت کے  پیدا کیا اور حوا کو صرف مرد سے  بغیر عورت کے  پیدا کیا، اور عیسیٰ کو صرف عورت سے  بغیر مرد کے  پیدا کر دیا اور باقی مخلوق کو مرد و عورت سے  پیدا کیا اسی لئے  سورہ مریم میں فرمایا (ولنجعلہ ایۃ للناس) ہم نے  عیسیٰ کو لوگوں کے  لئے  اپنی قدرت کا نشان بنایا اور یہاں فرمایا ہے ۔ عیسیٰ کے  بارے  میں اللہ کا سچا فیصلہ یہی ہے  اس کے  سوا اور کچھ کسی کمی یا زیادتی کی گنجائش ہی نہیں  ہے  کیونکہ حق کے  بعد گمراہی ہی ہوتی ہے  پس تجھے  اے  نبی ہرگز ان شکی لوگوں میں نہ ہونا چاہئے، اللہ رب العالمین اس کے  بعد اپنے  نبی کو حکم دیتا ہے  کہ اگر اس قدر واضح اور کامل بیان کے  بعد بھی کوئی شخص تجھ سے  امر عیسیٰ کے  بارے  میں جھگڑے  تو تو انہیں  مباہلہ کی دعوت دے  کہ ہم فریقین مع اپنے  بیٹوں اور بیویوں کے  مباہلہ کے  لئے  نکلیں اور اللہ جل شانہ سے  عاجزی کے  ساتھ کہیں  کہ اے  اللہ ہم دونوں میں جو بھی جھوٹا ہو اس پر تو اپنی لعنت نازل فرما، اس مباہلہ کے  نازل ہونے  اور سورت کی ابتداء سے  یہاں تک کی ان تمام آیتوں کے  نازل ہونے  کا سبب نجران کے  نصاریٰ کا وفد تھا یہ لوگ یہاں آ کر حضور صلی اللہ علیہ و سلم سے  حضرت عیسیٰ کے  بارے  میں گفتگو کر رہے  تھے، ان کا عقیدہ تھا کہ حضرت عیسیٰ حکمرانی کے  حصہ دار اور اللہ جل شانہ کے  بیٹے  ہیں  پس ان کی تردید اور ان کے  جواب میں یہ سب آیتیں نازل ہوئیں، ابن اسحاق اپنی مشہور عام سیرت میں لکھتے  ہیں  ان کے  علاوہ دوسرے  مؤرخین نے  بھی اپنی کتابوں میں لکھا ہے  کہ نجران کے  نصرانیوں نے  بطور وفد حضور صلی اللہ علیہ و سلم کی خدمت میں اپنے  ساٹھ آدمی بھیجے  تھے  جن میں چودہ شخص ان کے  سردار تھے  جن کے  نام یہ ہیں، عاقب جس کا نام عبدالمسیح تھا، سید جس کا نام ایہم تھا، ابو حارثہ بن علقمہ جو بکر بن وائل کا بھائی تھا، اور اوث بن حارث، زید، قیس، یزید اور اس کے  دونوں لڑکے، اور خویلد اور عمرو، خالد، عبد اللہ اور محسن یہ سب چودہ سردار تھے  لیکن پھر ان میں بڑے  سردار تین شخص تھے  عاقب جو امیر قوم تھا اور عقلمند سمجھا جاتا تھا اور صاحب مشورہ تھا اور اسی کی رائے  پر یہ لوگ مطمئن ہو جاتے  تھے  اور سید جو ان کا لاٹ پادری تھا اور مدرس اعلیٰ تھا یہ بنوبکر بن وائل کے  عرب قبیلے  میں سے  تھا لیکن نصرانی بن گیا تھا اور رومیوں کے  ہاں اس کی بڑی آؤ بھگت تھی اس کے  لئے  انہوں نے  بڑے  بڑے  گرجے  بنا دئیے  تھے  اور اس کے  دین کی مضبوطی دیکھ کر اس کی بہت کچھ خاطر و مدارات اور خدمت و عزت کرتے  رہتے  تھے  یہ شخص حضور صلی اللہ علیہ و سلم کی صفت و شان سے  واقف تھا اور اگلی کتابوں میں آپ کی صفتیں پڑھ چکا تھا دل سے  آپ کی نبوت کا قائل تھا لیکن نصرانیوں میں جو اس کی تکریم و تعظیم تھی اور وہاں جو جاہ و منصب اسے  حاصل تھا اس کے  چھن جانے  کے  خوف سے  راہ حق کی طرف نہیں  آتا تھا، غرض یہ وفد مدینہ میں رسول اللہ صلی اللہ علیہ و سلم کی خدمت میں مسجد نبوی میں حاضر ہوا آپ اس وقت عصر کی نماز سے  فارغ ہو کر بیٹھے  ہی تھے  یہ لوگ نفیس پوشاکیں پہنے  ہوئے  اور خوبصورت نرم چادریں اوڑھے  ہوئے  تھے  ایسا معلوم ہوتا تھا جیسے  بنو حارث بن کعب کے  خاندان کے  لوگ ہوں صحابہ کہتے  ہیں  ان کے  بعد ان جیسا با شوکت وفد کوئی نہیں  آیا، ان کی نماز کا وقت آگیا تو آپ کی اجازت سے  انہوں نے  مشرق کی طرف منہ کر کے  مسجد نبوی میں ہی اپنے  طریق پر نماز ادا کر لی۔ بعد نماز کے  حضور صلی اللہ علیہ و سلم سے  ان کی گفتگو ہوئی ادھر سے  بولنے  والے  یہ تین شخص تھے  حارثہ بن علقمہ عاقب یعنی عبدالمسیح اور سید یعنی ایہم یہ گو شاہی مذہب پر تھے  لیکن کچھ امور میں اختلاف رکھتے  تھے ۔ حضرت مسیح کی نسبت ان کے  تینوں خیال تھے  یعنی وہ خود اللہ جل شانہ ہے  اور اللہ کا لڑکا ہے  اور تین میں کا تیسرا ہے  اللہ ان کے  اس ناپاک قول سے  مبرا ہے  اور بہت ہی بلند و بالا، تقریباً تمام نصاریٰ کا یہی عقیدہ ہے، مسیح کے  اللہ ہونے  کی دلیل تو ان کے  پاس یہ تھی کہ وہ مردوں کو زندہ کر دیتا تھا اور اندھوں اور کوڑھیوں اور بیماروں کو شفا دیتا تھا، غیب کی خبریں دیتا تھا اور مٹی کی چڑیا بنا کر پھونک مار کر اڑا دیا کرتا تھا اور جواب اس کا یہ ہے  کہ یہ ساری باتیں اس سے  اللہ کے  حکم سے  سرزد ہوتی تھیں اس لئے  کہ اللہ کی نشانیاں اللہ کی باتوں کے  سچ ہونے  پر اور حضرت عیسیٰ کی نبوت پر مثبت دلیل ہو جائیں، اللہ کا لڑکا ماننے  والوں کی حجت یہ تھی کہ ان کا بہ ظاہر کوئی باپ نہ تھا اور گہوارے  میں ہی بولنے  لگے  تھے، یہ باتیں بھی ایسی ہیں  کہ ان سے  پہلے  دیکھنے  میں ہی نہیں  آئی تھیں (اس کا جواب یہ ہے  کہ یہ بھی اللہ کی قدرت کی نشانیاں تھیں تاکہ لوگ اللہ کو اسباب کا محکوم اور عادت کا محتاج نہ سمجھیں وغیرہ۔ مترجم) اور تین میں تیسرا اس لئے  کہتے  تھے  کہ اس نے  اپنے  کلام میں فرمایا ہے  ہم نے  کیا ہمارا امر ہماری مخلوق ہم نے  فیصلہ کیا وغیرہ پس اگر اللہ اکیلا ایک ہی ہوتا تو یوں نہ فرماتا بلکہ فرماتا میں نے  کیا میرا امر میری مخلوق میں نے  فیصلہ کیا وغیرہ پس ثابت ہوا کہ اللہ تین ہیں  خود اللہ رب کعبہ اور عیسیٰ اور مریم (جس کا جواب یہ ہے  کہ ہم کا لفظ صرف بڑائی کے  لئے  اور عظمت کے  لئے  ہے ۔ مترجم) اللہ تعالیٰ ان ظالموں منکروں کے  قول سے  پاک و بلند ہے، ان کے  تمام عقائد کی تردید قرآن کریم میں نازل ہوئی، جب یہ دونوں پادری حضور صلی اللہ علیہ و سلم سے  بات چیت کر چکے  تو آپ نے  فرمایا تم مسلمان ہو جاؤ انہوں نے  کہا ہم تو ماننے  والے  ہیں  ہی، آپ نے  فرمایا نہیں  نہیں  تمہیں  چاہئے  کہ اسلام قبول کر لو وہ کہنے  لگے  ہم تو آپ سے  پہلے  کے  مسلمان ہیں  فرمایا نہیں  تمہارا یہ اسلام قبول نہیں  اس لئے  کہ تم اللہ کی اولاد مانتے  ہو صلیب کی پوجا کرتے  ہو خنزیر کھاتے  ہو۔ انہوں نے  کہا اچھا پھر یہ تو فرمائے  کہ حضرت عیسیٰ کا باپ کون تھا؟ حضور صلی اللہ علیہ و سلم تو اس پر خاموش رہے  اور سورہ آل عمران کی شروع سے  لے  کر اوپر تک کی آیتیں ان کے  جواب میں نازل ہوئیں، ابن اسحاق ان سب کی مختصر سی تفسیر بیان کر کے  پھر لکھتے  ہیں  آپ نے  یہ سب تلاوت کر کے  انہیں  سمجھا دیں ۔ اس مباہلہ کی آیت کو پڑھ کر آپ نے  فرمایا اگر نہیں  مانتے  تو آؤ مباہلہ کا نکلو یہ سن کر وہ کہنے  لگے  اے  ابوالقاسم ہمیں مہلت دیجئے  کہ ہم آپس میں مشورہ کر لیں پھر تمہیں  اس کا جواب دیں گے  اب تنہائی میں بیٹھ کر انہوں نے  عاقب سے  مشورہ لیا جو بڑا دانا اور عقلمند سمجھا جاتا تھا اس نے  اپنا حتمی فیصلہ ان الفاظ میں سنایا کہ اے  جماعت نصاریٰ تم نے  یقین کے  ساتھ اتنا تو معلوم کر لیا ہے  کہ حضرت محمد (صلی اللہ علیہ و سلم) اللہ کے  سچے  رسول ہیں  اور یہ بھی تم جانتے  ہو کہ حضرت عیسیٰ کی حقیقت وہی ہے  جو محمد (صلی اللہ علیہ و سلم) کی زبانی تم سن چکے  ہو اور تمہیں  بخوبی علم ہے  کہ جو قوم نبی کے  ساتھ ملاعنہ کرتی ہے  نہ ان کے  بڑے  باقی رہتے  ہیں  نہ چھوٹے  بڑے  ہوتے  ہیں  بلکہ سب کے  سب جڑ بنیاد سے  اکھیڑ کر پھینک دئیے  جاتے  ہیں  یاد رکھو کہ اگر تم نے  مباہلہ کے  لئے  قدم بڑھایا تو تمہارا ستیاناس ہو جائے  گا، پس یا تو تم اسی دین کو قبول کر لو اور اگر کسی طرح نہیں  ماننا چاہتے  ہو اور اپنے  دین پر اور حضرت عیسیٰ کے  متعلق اپنے  ہی خیالات پر قائم رہنا چاہتے  ہو تو آپ سے  صلح کر لو اور اپنے  وطن کو لوٹ جاؤ، چنانچہ یہ لوگ صلاح مشورہ کر کے  پھر دربار نبوی میں حاضر ہوئے  اور کہنے  لگے  اے  ابوالقاسم (صلی اللہ علیہ و سلم) ہم آپ سے  ملاعنہ کرنے  کے  لئے  تیار نہیں  آپ اپنے  دین پر رہئے  اور ہم اپنے  خیالات پر ہیں  لیکن آپ ہمارے  ساتھ اپنے  صحابیوں میں سے  کیسی ایسے  شخص کو بھیج دیجئے  جن سے  آپ خوش ہوں کہ وہ ہمارے  مالی جھگڑوں کا ہم میں فیصلہ کر دیں آپ لوگ ہماری نظروں میں بہت ہی پسندیدہ ہیں ۔ آنحضرت صلی اللہ علیہ و سلم نے  فرمایا اچھا تم دوپہر کو پھر آنا میں تمہارے  ساتھ کسی مضبوط امانت دار کو کر دوں گا، حضرت عمر بن خطاب رضی اللہ تعالیٰ عنہ فرماتے  ہیں  میں نے  کسی دن بھی سردار بننے  کی خواہش نہیں  کی لیکن اس دن صرف اس خیال ہے  سے  کہ حضور صلی اللہ علیہ و سلم نے  جو تعریف کی ہے  اس کا تصدیق کرنے  والا اللہ کے  نزدیک میں بن جاؤں، اسی لئے  میں اس روز سویرے  سویرے  ظہر کی نماز کے  لئے  چل پڑا، حضور صلی اللہ علیہ و سلم تشریف لائے  نماز ظہر پڑھائی پھر دائیں بائیں نظریں دوڑانے  لگے  میں بار بار اپنی جگہ اونچا ہوتا تھا تاکہ آپ کی نگاہیں  مجھ پر پڑھیں، آپ برابر بغور دیکھتے  ہی رہے  یہاں تک کہ نگاہیں  حضرت ابو عبید بن جراح رضی اللہ تعالیٰ عنہ پر پڑیں انہیں  طلب فرمایا اور کہا کہ ان کے  ساتھ جاؤ اور ان کے  اختلافات کا فیصلہ حق سے  کر دو چنانچہ حضرت ابوعبیدہ رضی اللہ تعالیٰ عنہ ان کے  ساتھ تشریف لے  گئے  ابن مردویہ میں بھی یہ واقعہ اسی طرح منقول ہے  لیکن وہاں سرداروں کی گنتی بارہ کی ہے  اور اس واقعہ میں بھی قدرے  طوالت ہے  اور کچھ زائد باتیں بھی ہیں، صحیح بخاری شریف میں بروایت حضرت حذیفہ رضی اللہ تعالیٰ عنہ مروی ہے  نجرانی سردار عاقب اور سید مباحلہ کے  ارادے  سے  حضور صلی اللہ علیہ و سلم کے  پاس آئے  لیکن ایک نے  دوسرے  سے  کہا یہ نہ کر اللہ کی قسم اگر یہ نبی ہیں  اور ہم نے  ان سے  مباہلہ کیا تو ہم اپنی اولادوں سمیت تباہ ہو جائیں گے  چنانچہ پھر دونوں نے  متفق ہو کر کہا حضرت آپ ہم سے  جو طلب فرماتے  ہیں  ہم وہ سب ادا کر دیں گے  (یعنی جزیہ دینا قبول کر لیا) آپ کسی امین شخص کو ہمارے  ساتھ کر دیجئے  اور امین کو ہی بھیجنا، آپ نے  فرمایا بہتر میں تمہارے  ساتھ کامل امین کو ہی کروں گا اصحاب رسول صلی اللہ علیہ و سلم ایک دوسرے  کو تکنے  لگے  یہ دیکھیں حضور صلی اللہ علیہ و سلم کس کا انتخاب کرتے  ہیں  آپ نے  فرمایا اے  ابو عبیدہ بن جراح تم کھڑے  ہو جاؤ جب یہ کھڑے  ہوئے  تو آپ نے  فرمایا یہ ہیں  اس امت کے  امین، صحیح بخاری شریف کی اور حدیث میں ہے  ہر امت کا امین ہوتا ہے  اور اس امت کا امین ابوعبیدہ بن جراح ہے  (رضی اللہ تعالیٰ عنہ) مسند احمد میں حضرت ابن عباس سے  مروی ہے  کہ ابوجہل ملعون نے  کہا۔ اگر میں محمد (صلی اللہ علیہ و سلم) کو کعبہ میں نماز پڑھتے  دیکھ لوں گا تو اس کی گردن کچل دوں گا فرماتے  ہیں  کہ آپ نے  فرمایا اگر وہ ایسا کرتا تو سب کے  سب دیکھتے  کہ فرشتے  اسے  دبوچ لیتے، اور یہودیوں سے  جب قرآن نے  کہا تھا کہ آؤ جھوٹوں کے  لئے  موت مانگو اگر وہ مانگتے  تو یقیناً سب کے  سب مر جاتے  اور اپنی جگہیں  جہنم کی آگ میں دیکھ لیتے  اور جن نصرانیوں کو مباہلہ کی دعوت دی گئی تھی اگر وہ حضور صلی اللہ علیہ و سلم کے  مقابلہ میں مباہلے  کے  لئے  نکلتے  تو لوٹ کر اپنے  مالوں کو اور اپنے  بال بچوں کو نہ پاتے، صحیح بخاری ترمذی اور نسائی میں بھی یہ حدیث ہے، امام ترمذی اسے  حسن کہتے  ہیں، امام بیہقی نے  اپنی کتاب دلائل النبوۃ میں بھی وفد بحران کے  قصے  کو طویل تر بیان کیا ہے، ہم اسے  یہاں نقل کرتے  ہیں  کیونکہ اس میں بہت سے  فوائد ہیں  گو اس میں غرابت بھی ہے  اور اس مقام سے  وہ نہایت مناسبت رکھتا ہے، سلمہ بن عبدیسوع اپنے  دادا سے  روایت کرتے  ہیں  جو پہلے  نصرانی تھے  پھر مسلمان ہو گئے  کہ رسول اللہ صلی اللہ علیہ و سلم نے  سورہ طس قرآن میں نازل ہونے  سے  پیشتر اہل نجران کو نامہ مبارک لکھا جس کی عبارت یہ تھی بسم الہ ابراھیم و اسحاق و یعقوب من محمد النبی رسول اللہ الی اسقف نجران واھل نجران اسلم انتم فانی احمد الیکم الہ ابراھیم و اسحاق و یعقوب۔ امام بعد فانی ادعوکم الی عبادۃ اللہ من عبادۃ العباد وادعوکم الی ولایۃ اللہ من ولایۃ العباد فان اییتم فالجزیۃ فان ابیتم فقد اذنتکم بحرب والسلام یعنی اس خط کو میں شروع کرتا ہوں حضرت ابراہیم حضرت اسحاق اور حضرت یعقوب کے  اللہ تعالیٰ کے  نام سے، یہ خط ہے  محمد (صلی اللہ علیہ و سلم) کی طرف سے  جو اللہ رب العزت کے  نبی اور رسول نجران کے  سردار کی طرف ہیں  اللہ تعالیٰ کی تمہارے  سامنے  حمدو ثناء بیان کرتا ہوں جو حضرت ابراہیم، حضرت اسحاق اور حضرت یعقوب کا معبود ہے، پھر میں تمہیں  دعوت دیتا ہوں کہ بندوں کی عبادت کو چھوڑ کر اللہ کی عبادت کی طرف آؤ اور بندوں کے  والی اپنے  کو چھوڑ کر اللہ کی ولایت کی طرف آ جاؤ، اگر تم اسے  نہ مانو تو جزیہ دو اور ماتحتی اختیار کرو اگر اس سے  بھی انکار ہو تو تمہیں  لڑائی کا اعلان ہے  والسلام، جب یہ خط اسقف کو پہنچا اور اس نے  اسے  پڑھایا تو بڑا سٹ پٹایا گھبرا گیا اور تھرانے  لگا، جھٹ سے  شرحیل بن وداعہ کو بلوایا جو ہمدان قبیلہ کا تھا سب سے  بڑا مشیر سلطنت یہی تھا جب کبھی کوئی اہم کام آ پڑتا تو سب سے  پہلے  یعنی ایہم اور سید اور عاقب سے  بھی پیشتر اس سے  مشورہ ہوتا جب یہ آگیا تو اسقف نے  حضور صلی اللہ علیہ و سلم کا خط اسے  دیا جب اس نے  پڑھ لیا تو اسقف نے  پوچھا بتاؤ کیا خیال ہے ؟ شرحیل نے  کہا بادشاہ کو خوب علم ہے  کہ حضرت اسماعیل کو اولاد میں سے  اللہ کے  ایک نبی کے  آنے  کا وعدہ اللہ کی کتاب میں ہے  کیا عجب کہ وہ نبی یہی ہو، امر نبوت میں کیا رائے  دے  سکتا ہوں ہاں اگر امور سلطنت کی کوئی بات ہوتی تو بیشک میں اپنے  دماغ پر زور ڈال کر کوئی بات نکال لیتا، اسقف نے  انہیں  تو الگ بٹھا دیا اور عبد اللہ بن شرحیل کو بلایا یہ بھی مشیر سلطنت تھا اور حمیر کے  قبیلے  میں سے  تھا اسے  خط دیا پڑھایا رائے  پوچھی تو اس نے  بھی ٹھیک وہی بات کہی جو پہلا مشیر کہہ چکا تھا اسے  بھی بادشاہ نے  دور بٹھا دیا پھر جبار بن فیض کو بلایا جو بنو حارث میں سے  تھا اس نے  بھی یہی کہا جو ان دونوں نے  کہا تھا، بادشاہ نے  جب دیکھا کہ ان تینوں کی رائے  متفق ہے  تو حکم دیا گیا کہ ناقوس بجائے  جائیں آگ جلا دی جائے  اور گرجوں میں جھنڈے  بلند کر دئیے  جائیں وہاں کا یہ دستور تھا کہ جب سلطنت کا کوئی اہم کام ہوتا تو رات کو جمع کرنا مقصود ہوتا تو یہی کرتے  اور اگر دن کا وقت ہوتا تو گرجوں میں آگ جلا دی جاتی اور ناقوس زور زور سے  بجائے  جاتے، اس حکم کے  ہوتے  ہی چاروں طرف آگ جلا دی گئی اور ناقوس کی آواز نے  ہر ایک کو ہوشیار کر دیا اور جھنڈے  اونچے  دیکھ دیکھ کر آس پاس کے  وادی کے  تمام لوگ جمع ہو گئے  اس وادی کا طول اتنا تھا کہ تیز سوار صبح سے  شام تک دوسرے  کنارے  پہنچتا تھا اس میں تہتر گاؤں آباد تھے  اور ایک لاکھ بیس ہزار تلوار چلانے  والے  یہاں آباد تھے  جب یہ سب لوگ آ گئے  تو اسقف نے  انہیں  رسول اللہ صلی اللہ علیہ و سلم کا نامہ مبارک پڑھ کر سنایا اور پوچھا بتاؤ تمہاری کیا رائے  ہے ؟ تو تمام عقلمندوں نے  کہا کہ شرحیل بن وداعہ ہمدانی عبد اللہ بن شرحیل اصبحی اور جبار بن فیض حارثی کو بطور وفد کے  بھیجا جائے، یہ وہاں سے  پختہ خبر لائیں، اب یہاں سے  یہ وفد ان تینوں کی سرداری کے  ماتحت روانہ ہوا مدینہ پہنچ کر انہوں نے  سفری لباس اتار ڈالا اور نقش بنے  ہوئے  ریشمی لمبے  لمبے  حلے  پہن لئے  اور سونے  کی انگوٹھیاں انگلیوں میں ڈال لیں اور اپنی چادروں کے  پلے  تھامے  ہوئے  رسول اللہ صلی اللہ علیہ و سلم کی خدمت میں حاضر ہوئے، سلام کیا لیکن آپ نے  جواب نہ دیا بہت دیر تک انتظار کیا حضور صلی اللہ علیہ و سلم کچھ بات کریں لیکن ان ریشمی حلوں اور سونے  کی انگوٹھیوں کی وجہ سے  آپ نے  ان سے  کلام بھی نہ کیا اب یہ لوگ حضرت عثمان بن عفان رضی اللہ تعالیٰ عنہ اور حضرت عبدالرحمن بن عوف رضی اللہ تعالیٰ عنہ کی تلاش میں نکلے  اور ان دونوں بزرگوں سے  ان کی پہلی ملاقات تھی مہاجرین اور انصار کے  ایک مجمع میں ان دونوں حضرات کو پا لیا ان سے  واقعہ بیان کیا تمہارے  نبی (صلی اللہ علیہ و سلم) نے  ہمیں خط لکھا ہم اس کا جواب دینے  کے  لئے  خود حاضر ہوئے  آپ کے  پاس گئے  سلام کیا لیکن جواب نہ دیا پھر بہت دیر تک انتظار میں بیٹھے  رہے  کہ آپ سے  کچھ باتیں ہو جاتیں لیکن آپ نے  ہم سے  کوئی بات نہ کی آخر ہم لوگ تھک کر چلے  آئے  اب آپ حضرات فرمائے  کہ کیا ہم یونہی واپس چلے  جائیں، ان دونوں نے  حضرت علی بن ابو طالب سے  کہا کہ آپ ہی انہیں  جواب دیجئے  حضرت علی نے  فرمایا میرا خیال ہے  کہ یہ لوگ اپنے  حلے  اور اپنی انگوٹھیاں اتار دیں اور وہی سفری معمولی لباس پہن کر حضور صلی اللہ علیہ و سلم کی خدمت میں دوبارہ جائیں چنانچہ انہوں نے  یہی کیا اور اسی معمولی لباس میں گئے  سلام کیا آپ نے  جواب دیا پھر فرمایا اس اللہ کی قسم جس نے  مجھے  حق کے  ساتھ بھیجا ہے  یہ جب میرے  پاس پہلی مرتبہ آئے  تھے  تو ان کے  ساتھ ابلیس تھا، اب سوال جواب بات چیت شروع ہوئی حضور صلی اللہ علیہ و سلم بھی پوچھتے  تھے  اور وہ جواب دیتے  تھے  اسی طرح وہ بھی سوال کرتے  اور جواب پاتے، آخر میں انہوں نے  پوچھا آپ حضرت عیسیٰ کی بابت کیا فرماتے  ہیں ؟ تاکہ ہم اپنی قوم کے  پاس جا کر وہ کہیں  ہمیں اس کی خوشی ہے  کہ اگر آپ نبی ہیں  تو آپ کی زبانیں سنیں کہ آپ کا ان کی بابت کیا خیال ہے ؟ تو آپ نے  فرمایا میرے  پاس اس کا جواب آج تو نہیں  تم ٹھہرو تو میرا رب مجھ سے  اس کی بابت جو فرمائے  گا وہ میں تمہیں  سنا دوں گا، دوسرے  دن وہ پھر آئے  تو آپ نے  اسی وقت کی اتری ہوئی اس آیت ان مثل عیسیٰ کی کاذبینO تک تلاوت کر سنائی انہوں نے  اس بات کا اقرار کرنے  سے  انکار کر دیا، دوسرے  دن صبح ہی صبح رسول اللہ صلی اللہ علیہ و سلم ملاعنہ کے  لئے  حضرت حسن کو اور حضرت حسین کو اپنی چادر میں لئے  ہوئے  تشریف لائے  پیچھے  پیچھے  حضرت فاطمہ آ رہی تھیں اس وقت آپ کی کئی ایک بیویاں تھیں، شرحیل یہ دیکھتے  ہی اپنے  دونوں ساتھیوں سے  کہنے  لگا تم جانتے  ہو کہ نجران کی ساری وادی میری بات کو مانتی ہے  اور میری رائے  پر کاربند ہوتی ہے، سنو اللہ کی قسم یہ معاملہ بڑا بھاری ہے  اگر یہ شخص (صلی اللہ علیہ و سلم) مبعوث کیا گیا ہے  تو سب سے  پہلے  اس کی نگاہوں میں ہم ہی مطعون ہوں گے  اور سب سے  پہلے  اس کی تردید کرنے  والے  ہم ہی ٹھہریں گے  یہ بات اس کے  اور اس کے  ساتھیوں کے  دلوں میں نہیں  جائے  گی اور ہم پر کوئی نہ کوئی مصیبت و آفت آئے  گی عرب بھر میں سب سے  زیادہ قریب ان سے  میں ہی ہوں اور سنو اگر یہ شخص بنی مرسل ہے  تو مباہلہ کرتے  ہی روئے  زمین پر ایک بال یا ایک ناخن بھی ہمارا نہ رہے  گا، اس کے  دونوں ساتھیوں نے  کہا پھر اے  ابو ویہم آپ کی کیا رائے  ہے ؟ اس نے  کہا میری رائے  یہ ہے  کہ اسی کو ہم حاکم بنا دیں جو کچھ یہ حکم دے  ہم اسے  منظور کر لیں یہ کبھی بھی خلاف عدل حکم نہ دے  گا، ان دونوں نے  اس بات کو تسلیم کر لیا، اب شرجیل نے  حضور صلی اللہ علیہ و سلم سے  کہا کہ میں اس ملاعنہ سے  بہتر چیز جناب کے  سامنے  پیش کرتا ہوں آپ نے  دریافت فرمایا وہ کیا؟ کہا آج کا دن آنے  والی رات اور کل کی صبح تک آپ ہمارے  بارے  میں جو حکم کریں ہمیں منظور ہے، رسول اللہ صلی اللہ علیہ و سلم نے  فرمایا شاید اور لوگ تمہارے  اس فیصلے  کو نہ مانیں، شرحیل نے  کہا اس کی بابت میرے  ان دونوں ساتھیوں سے  دریافت فرما لیجئے  آپ نے  ان دونوں سے  پوچھا انہوں نے  جواب دیا کہ سارے  وادی کے  لوگ انہی کی رائے  پر چلتے  ہیں  وہاں ایک بھی ایسا نہیں  جو ان کے  فیصلے  کو ٹال سکے، پس حضور صلی اللہ علیہ و سلم نے  یہ درخواست قبول فرمائی۔ مباہلہ نہ کیا اور واپس لوٹ گئے  دوسرے  دن صبح ہی وہ حاضر خدمت ہوئے  تو آپ نے  ایک تحریر انہیں  لکھ دی کہ جس میں بسم اللہ کے  بعد یہ مضمون تھا کہ "تحریر اللہ کے  نبی محمد رسول اللہ صلی اللہ علیہ و سلم کی طرف سے  نجرانیوں کے  لئے  ہے  ان پر اللہ کے  رسول صلی اللہ علیہ و سلم کا حکم جاری تھا ہر پھل، ہر سیاہ و سفید اور ہر غلام پر لیکن اللہ کے  رسول صلی اللہ علیہ و سلم یہ سب انہی کو دیتے  ہیں  یہ ہر سال صرف دو ہزار حلے  دے  دیا کریں ایک ہزار رجب میں اور ایک ہزار صفر میں وغیرہ وغیرہ، پورا عہد نامہ انہیں  عطا فرمایا، اس سے  معلوم ہوتا ہے  کہ ان کا یہ وفد سن٩ ہجری میں آیا تھا اس لئے  کہ حضرت زہری فرماتے  ہیں  سب سے  پہلے  جزیہ انہی اہل نجران نے  حضور صلی اللہ علیہ و سلم کو ادا کیا، اور جزیہ کی آیت فتح مکہ کے  بعد اتری ہے  جو یہ ہے  قاتلوا الذین لایومنون باللہ ولا بالیوم الاخر ولا یحرمون الخ، اس آیت میں اہل کتاب سے  جزیہ لینے  کا حکم ہوا ہے، ابن مردویہ میں ہے  کہ عاقب اور طیب آنحضرت صلی اللہ علیہ و سلم کے  پاس آئے  آپ نے  انہیں  ملاعنہ کے  لئے  کہا اور صبح کو حضرت علی اور حضرت فاطمہ اور حضرت حسن اور حضرت حسین کو لئے  ہوئے  آپ تشریف لائے  اور انہیں  کہلا بھیجا انہوں نے  قبول نہ کیا اور خراج دینا منظور کر لیا، آپ نے  فرمایا اس کی قسم جس نے  مجھے  حق کے  ساتھ بھیجا ہے  اگر یہ دونوں "نہیں ” کہتے  تو ان پر یہی وادی آگ برساتی، حضرت جابر فرماتے  ہیں  ندع ابنائنا الخ، والی آیت انہی کے  بارے  میں نازل ہوئی ہے  انفسنا سے  مراد خود رسول کریم صلی اللہ علیہ و سلم اور حضرت علی ابنائنا سے  مراد حسن اور حسین نسائنا سے  مراد حضرت فاطمۃ الزہرا رضی اللہ تعالیٰ عنہ مستدرک حاکم وغیرہ میں بھی اس معنی کی حدیث مروی ہے ۔ پھر جناب باری کا ارشاد ہے  یہ جو ہم نے  عیسیٰ کی شان فرمائی ہے  حق اور سچ ہے  اس میں بال برابر کمی بیشی نہیں، اللہ قابل عبادت ہے  کوئی اور نہیں  اور وہی غلبہ والا اور حکمت والا ہے، اب بھی اگر یہ منہ پھیر لیں اور دوسری باتوں میں پڑیں تو اللہ بھی ایسے  باطل پسندوں کو اور مفسدوں کو بخوبی جانتا ہے  انہیں  بدترین سزا دے  گا اس میں پوری قدرت ہے  کوئی اس سے  نہ بھاگ سکے  نہ اس کا مقابلہ کر سکے، وہ پاک ہے  اور تعریفوں والا ہے  ہم اس کے  عذاب سے  اسی کی پناہ چاہتے  ہیں ۔

۶۴

یہودیوں اور نصرانیوں سے  خطاب

 یہودیوں نصرانیوں اور انہی جیسے  لوگوں سے  یہاں خطاب ہو رہا ہے، کلمہ کا اطلاق مفید جملے  پر ہوتا ہے، جیسے  یہاں کلمہ کہہ کر پھر سوآء الخ کے  ساتھ اس کی تعریف یوں کی گئی ہے ۔ سواء کے  معنی عدل و انصاف جیسے  ہم کہیں  ہم تم برابر ہیں، پھر اس کی تفسیر کی خاص بات یہ ہے  کہ ہم ایک اللہ تعالیٰ ہی کی عبادت کریں اس کے  ساتھ کسی بت کو نہ پوجیں صلیب، تصویر، اللہ تعالیٰ کے  سوا کسی اور نہ آگ کو نہ اور کسی چیز کو بلکہ تنہا اللہ وحدہٗ لاشریک کی عبادت کریں، یہی عبادت تمام انبیاء کرام کی تھی، جیسے  فرمان ہے (آیت وما ارسلنا من قبلک من رسول الا نوحی الیہ انہ لا الہ الا انا فاعبدون) یعنی تجھ سے  پہلے  جس جس رسول کو ہم نے  بھیجا سب کی طرف یہی وحی کہ میرے  سوا کوئی عبادت کے  لائق نہیں  پس تم سب میری ہی عبادت کیا کرو اور جگہ ارشاد ہے (آیت ولقد بعثنا فی کل امۃ رسولا ان اعبدوا اللہ واجتنبوا الطاغوت) یعنی ہر امت میں رسول بھیج کر ہم نے  یہ اعلان کروایا کہ صرف اللہ کی عبادت کرو اور اس کے  سوا سب سے  بچو۔ پھر فرماتا ہے  کہ آپس میں بھی ہم اللہ جل جلالہ کو چھوڑ کر ایک دوسرے  کو رب بنائیں، ابن جریج فرماتے  ہیں  یعنی اللہ تعالیٰ کی نافرمانی میں ایک دوسرے  کی اطاعت نہ کریں ۔ عکرمہ فرماتے  ہیں  کسی کو سوائے  اللہ تعالیٰ کے  سجدہ نہ کریں، پھر اگر یہ لوگ اس حق اور عدل دعوت کو بھی قبول نہ کریں تو انہیں  تم اپنے  مسلمان ہونے  کا گواہ بنا لو، ہم نے  بخاری کی شرح میں اس واقعہ کا مفصل ذکر کر دیا ہے  جس میں ہے  کہ ابو سفیان جبکہ دربار قیصر میں بلوائے  گئے  اور شاہ قیصر روم نے  حضور صلی اللہ علیہ و سلم کے  نسب کا حال پوچھا تو انہیں  کافر اور دشمن رسول صلی اللہ علیہ و سلم ہونے  کے  باوجود آپ کی خاندانی شرافت کا اقرار کرنا پڑا اور اسی طرح ہر سوال کا صاف اور سچا جواب دینا پڑا یہ واقعہ صلح حدیبیہ کے  بعد کا اور فتح مکہ سے  پہلے  کا ہے  اسی باعث قیصر کے  اس سوال کے  جواب میں کہ کیا وہ (یعنی رسول اللہ صلی اللہ علیہ و سلم) بدعہدی کرتے  ہیں ؟ ابوسفیان نے  کہا نہیں  کرتے  لیکن اب ایک معاہدہ ہمارا ان سے  ہوا ہے  نہیں  معلوم اس میں وہ کیا کریں ؟ یہاں صرف یہ مقصد ہے  کہ ان تمام باتوں کے  بعد حضور صلی اللہ علیہ و سلم کا نامہ مبارک پیش کیا جاتا ہے  جس میں بسم اللہ کے  بعد یہ لکھا ہوتا ہے  کہ یہ خط محمد صلی اللہ علیہ و سلم کی طرف سے  ہے  جو اللہ کے  رسول ہیں  (صلی اللہ علیہ و سلم) ہرقل کی طرف جو روم کا شاہ ہے  اللہ تعالیٰ کی طرف سے  سلام ہو اسے  جو ہدایت کا تابعدار ہو اس کے  بعد اسلام قبول کر سلامت رہے  گا، اسلام قبول کر اللہ تعالیٰ تجھے  دوہرا اجر دے  گا اور اگر تو نے  منہ موڑا تو تمام رئیسوں کے  گناہوں کا بوجھ تجھ پر پڑے  گا پھر یہی آیت لکھی تھی، امام محمد بن اسحاق وغیرہ نے  لکھا ہے  کہ اس سورت یعنی سورہ آل عمران کو شروع سے  لے  کر "اننی” سے  کچھ اوپر تک آیتیں وفد نجران کے  بارے  میں نازل ہوئی ہیں، امام زہری فرماتے  ہیں  سب سے  پہلے  جزیہ انہی لوگوں نے  ادا کیا ہے  اور اس بات میں بھی مطلقاً اختلاف نہیں  ہے  کہ آیت جزیہ فتح مکہ کے  بعد اتری ہے  پس یہ اعتراض ہوتا ہے  کہ جب یہ آیت فتح مکہ کے  بعد نازل ہوئی ہے  تو پھر فتح سے  پہلے  حضور صلی اللہ علیہ و سلم نے  اپنے  خط میں ہرقل کو یہ آیت کیسے  لکھی؟ اس کے  جواب کئی ہو سکتے  ہیں  ایک تو یہ کہ ممکن ہے  یہ آیت دو مرتبہ اتری ہو اول حدیبیہ سے  پہلے  اور فتح مکہ کے  بعد، دوسرا جواب یہ ہے  کہ ممکن ہے  شروع سورت سے  لے  کر اس آیت تک وفد نجران کے  بارے  میں اتری ہو یا یہ آیت اس سے  پہلے  اتر چکی ہو اس صورت میں ابن اسحاق کا یہ فرمانا کہ اسی کے  اوپر کی کچھ آیتیں اسی وفد کے  بارے  میں اتری ہیں  یہ محفوظ نہ ہو کیونکہ ابو سفیان والا واقعہ سراسر اس کے  خلاف ہے، تیسرا جواب یہ ہے  کہ ممکن ہے  وفد نجران حدیبیہ سے  پہلے  آیا ہو اور انہوں نے  جو کچھ دینا منظور کیا ہو یہ صرف مباہلہ سے  بچنے  کے  لئے  بطور مصالحت کے  ہو نہ کہ جزیہ دیا ہو اور یہ اتفاق کی بات ہو کہ آیت جزیہ اس واقعہ کے  بعد اتری جس سے  اس کا اتفاقاً الحاق ہو گیا۔ جیسے  کہ حضرت عبد اللہ بن حجش رضی اللہ تعالیٰ عنہ نے  بدر سے  پہلے  غزوے  کے  مال غنیمت کو پانچ حصوں میں تقسیم کیا اور پانچواں حصہ باقی رکھ کر دوسرے  حصے  لشکر میں تقسیم کر دیئے، پھر اس کے  بعد مال غنیمت کی تقسیم کی آیتیں بھی اسی کے  مطابق اتریں اور یہی حکم ہوا۔ چوتھا جواب یہ ہے  کہ احتمال ہے  کہ رسول اللہ صلی اللہ علیہ و سلم نے  اپنے  خط میں جو ہرقل کو بھیجا اس میں یہ بات اسی طرح بطور خود لکھی ہو پھر آنحضرت کے  الفاظ ہی میں وحی نازل ہوئی ہو جیسے  کہ حضرت عمر بن خطاب رضی اللہ تعالیٰ عنہ کے  پردے  کے  حکم کے  بارے  میں اسی طرح آیت اتری، اور بدوی قیدیوں کے  بارے  میں انہی کے  ہم خیال فرمان باری نازل ہوا اسی طرح منافقوں کا جنازہ پڑھنے  کی بابت بھی انہی کی بات قائم رکھی گئی، چنانچہ مقام ابراہیم کے  مصلے  بنانے  سے  متعلق بھی اسی طرح وحی نازل ہوئی اور (آیت عسی ربہ ان طلقکن) بھی انہی کے  خیال سے  متعلق آیت اتری، پس یہ آیت بھی اسی طرح رسول اللہ صلی اللہ علیہ و سلم کے  فرمان کے  مطابق ہی اتری ہو، یہ بہت ممکن ہے ۔

۶۵

حضرت ابراہیم علیہ السلام سے  متعلق یہودی اور نصرانی دعوے  کی تردید

یہودی حضرت ابراہیم کو اپنے  میں سے  اور نصرانی بھی حضرت ابراہیم کو اپنے  میں سے  کہتے  تھے  اور آپس میں اس پر بحث مباحثے  کرتے  رہتے  تھے  اللہ تعالیٰ ان آیتوں میں دونوں کے  دعوے  کی تردید کرتا ہے، حضرت ابن عباس رضی اللہ تعالیٰ عنہ فرماتے  ہیں  کہ نجران کے  نصرانیوں کے  پاس یہودیوں کے  علماء آئے  اور حضور صلی اللہ علیہ و سلم کے  سامنے  ان کا جھگڑا شروع ہو گیا، ہر فریق اس بات کا مدعی تھا کہ حضرت خلیل اللہ ہم میں سے  تھے  اس پر یہ آیت اتری کہ اے  یہودیو تم خلیل اللہ کو اپنے  میں سے  کیسے  بتاتے  ہو؟ حالانکہ ان کے  زمانے  میں نہ موسیٰ تھے  نہ توراۃ، حضرت موسیٰ علیہ السلام اور کتاب تورات شریف تو خلیل اللہ علیہ السلام کے  بعد آئے، اسی طرح اے  نصرانیو حضرت ابراہیم علیہ السلام کو نصرانی کیسے  کہہ سکتے  ہو؟ حالانکہ نصرانیت تو ان کے  صدیوں بعد ظہور میں آئی کیا تم اتنی موٹی بات کے  سمجھنے  کی عقل بھی نہیں  رکھتے ؟ پھر ان دونوں فرقوں کی اس بے  علمی کے  جھگڑے  پر رب دو عالم انہیں  ملامت کرتا ہے  اگر تم بحث و مباحثہ دینی امور میں جو تمہارے  پاس ہیں  کرتے  تو بھی خیر ایک بات تھی تم تو اس بارے  میں گفتگو کرتے  ہو جس کا دونوں کو مطلق علم ہی نہیں، تمہیں  چاہئے  کہ جس چیز کا علم نہ ہو اسے  اس علیم اللہ کے  حوالے  کرو جو ہر چیز کی حقیقت کو جانتا ہے  اور چھپی کھلی تمام چیزوں کا علم رکھتا ہے، اسی لئے  فرمایا اللہ جانتا ہے  اور تم محض بے  خبر ہو۔ دراصل اللہ کے  خلیل اللہ حضرت ابراہیم علیہ السلام نہ تو یہودی تھے  نہ نصرانی تھے  وہ شرک سے  بیزار مشرکوں سے  الگ صحیح اور کامل ایمان کے  مالک تھے  اور ہرگز مشرک نہ تھے، یہ آیت اس آیت کی مثل ہے  جو سورہ بقرہ میں گزر چکی (آیت وقالواکونوا ھودا اونصاریٰ تھتدوا) یعنی یہ لوگ کہتے  ہیں  یہودی یا نصرانی بننے  میں ہدایت ہے ۔ پھر فرمایا کہ سب سے  زیادہ حضرت ابراہیم علیہ السلام کی تابعداری کے  حقدار ان کے  دین پر ان کے  زمانے  میں چلنے  والے  تھے  اور اب یہ نبی محمد مصطفی صلی اللہ علیہ و سلم ہیں  اور آپ کے  ساتھ کے  ایمانداروں کی جماعت جو مہاجرین و انصار ہیں  اور پھر جو بھی ان کی پیروی کرتے  رہیں  قیامت تک، رسول اللہ صلی اللہ علیہ و سلم فرماتے  ہیں  ہر نبی کے  ولی دوست نبیوں میں سے  ہوتے  ہیں  میرے  ولی دوست انبیاء میں سے  میرے  باپ اور اللہ کے  خلیل حضرت ابراہیم علیہ السلام الصلوٰۃ والسلام ہیں، پھر آپ نے  اسی آیت کی تلاوت فرمائی (ترمذی وغیرہ) پھر فرمایا جو بھی اللہ کے  رسول پر ایمان رکھے  وہی ان کا ولی اللہ ہے ۔

۶۹

یہودیوں کا حسد

یہاں بیان ہو رہا ہے  کہ ان یہودیوں کے  حسد کو دیکھو کہ مسلمانوں کیسے  جل بھن رہے  ہیں ۔ انہیں  بہکانے  کی کیا کیا پوشیدہ ترکیبیں کر رہے  ہیں  کیسے  کیسے  مکر و فریب کے  جال بچھاتے  ہیں، حالانکہ دراصل ان تمام چیزوں کا وبال خود ان کی جانوں پر ہے  لیکن انہیں  اس کا بھی شعور نہیں ۔ پھر انہیں  ان کی یہ ذلیل حرکت یاد دلائی جا رہی ہے  کہ تم سچائی جانتے  ہوئے  بھی حق کو پہچانتے  ہوئے  اللہ تعالیٰ کی آیات سے  یہ منکر ہو رہے  ہو۔ علم کے  باوجود یہ بدخصلت بھی ان میں ہے ۔ کہ حق و باطل کو ملا دیتے  ہیں، اور ان کی کتابوں میں جو صفیں رسول اللہ صلی اللہ علیہ و سلم کی ہیں  ان کو چھپا لیتے  ہیں ۔ بہکانے  کی جو صورتیں بناتے  ہیں  ان میں سے  ایک یہ بھی ہے  کہ آپس میں مشورے  کرتے  ہیں  کہ صبح جا کر ایمان لے  آؤ مسلمانوں کے  ساتھ نمازیں پڑھو اور شام کو پھر مرتد بن جاؤ تاکہ جاہل لوگوں کے  دل میں بھی خیال گزرے  کہ آخر یہ لوگ جو پلٹ گئے  تو ظاہر ہے  کہ انہوں نے  اس دین میں کوئی خرابی یا برائی ہی دیکھی ہو گی تو کیا عجب کہ ان میں سے  کوئی ہماری طرف ٹوٹ آئے، غرض یہ ایک حیلہ جوئی تھی کہ شاید اس سے  کوئی کمزور ایمان والا لوٹ جائے  اور کچھ سمجھ لے  کہ یہ جاننے  بوجھنے  والے  لوگ جب اس دین میں آئے  نمازیں پڑھیں اس کے  بعد اسے  چھوڑ دیا تو ضرور یہاں کوئی خرابی اور نقصان دیکھا ہو گا۔ یہ لوگ کہتے  ہیں  کہ بھروسہ اپنے  والوں پر کرو مسلمانوں پر نہ کرو نہ اپنے  بھید ان پر ظاہر ہونے  دو نہ اپنی کتابیں انہیں  بتاؤ جس سے  یہ ان پر ایمان لائیں اور اللہ تعالیٰ کے  ہاں بھی ان کے  لئے  ہم پر حجت بن جائیں ۔ تو اللہ تعالیٰ فرماتا ہے  کہ تو اے  نبی کہہ دے  کہ ہدایت تو اللہ ہی کے  ہاتھ ہے  وہ مومنوں کے  دلوں کو ہر اس چیز پر ایمان لانے  کے  لئے  آمادہ کر دیتا ہے  جسے  اللہ تعالیٰ نے  نازل فرمایا ہو انہیں  ان دلائل پر کامل ایمان نصیب ہوتا ہے  چاہے  تم نبی امی صلی اللہ علیہ و سلم کی صفتیں چھپاتے  پھرو لیکن پھر بھی خوش قسمت لوگ تو آپ کی نبوت کے  ظاہری نشان کو بہ یک نگاہ پہچان لیں گے ۔ اسی طرح کہتے  تھے  کہ تمہارے  پاس جو علم ہے  اسے  مسلمانوں پر ظاہر نہ کرو کہ وہ اسے  سیکھ کر تم جیسے  ہو جائیں بلکہ اپنی ایمانی قوت کی وجہ سے  تم سے  بھی بڑھ جائیں، یا اللہ کے  سامنے  ان کی حجت و دلیل قائم ہو جائے  یعنی خود تمہاری کتابوں سے  وہ تمہیں  الزام دیں، اللہ تعالیٰ فرماتا ہے  کہ تم کہہ دو  فضل تو اللہ عزوجل کے  ہاتھ ہے  جسے  چاہے  دے، سب کام اسی کے  قبضے  میں ہیں  وہی دینے  والا ہے  جسے  چاہے  ایمان عمل اور علم و فضل کی دولت سے  مالامال کر دے  اور جسے  چاہے  راہ حق سے  اندھا اور کلمہ اسلام سے  بہرا اور صحیح سمجھ سے  محروم کر دے  اس کے  سب کام حکمت سے  ہی ہوتے  ہیں  وہ وسیع علم والا ہے ۔ جسے  چاہے  اپنی رحمت کے  ساتھ خاص کر دے  وہ بڑے  فضل والا ہے، اے  مسلمانو! اس نے  تم پر بے  پایاں احسانات کئے  ہیں  تمہارے  نبی کو تم انبیاء پر فضیلت دی اور بہت ہی کامل اور ہر حیثیت سے  پوری شریعت اس نے  تمہیں  دی

۷۵

بد دیانت یہودی

 اللہ تعالیٰ مومنوں کو یہودیوں کی خیانت پر تنبیہ کرتا ہے  کہ ان کے  دھوکے  میں نہ آجائیں ان میں بعض تو امانتدار ہیں  اور بعض بڑے  خائن ہیں  بعض تو ایسے  ہیں  کہ خزانے  کا خزانہ ان کی امانت میں ہو تو جوں کا توں حوالے  کر دیں گے  پھر چھوٹی موٹی چیز میں وہ بددیانتی کیسے  کریں گے ؟ اور بعض ایسے  بد دیانت ہیں  کہ ایک دینار بھی واپس نہ دیں گے  ہاں اگر ان کے  سر ہو جاؤ تقاضا برابر جاری رکھو اور حق طلب کرتے  رہو تو شاید امانت نکل بھی آئے  ورنہ ہضم بھی کر جائیں جب ایک دینار تو مشہور ہی ہے، ابن ابی حاتم میں حضرت مالک بن دینار کا قول مروی ہے  کہ دینار کو اس لئے  دینار کہتے  ہیں  کہ وہ دین یعنی ایمان بھی ہے  اور نار یعنی آگ بھی ہے، مطلب یہ ہے  کہ حق کے  ساتھ لو تو دین ناحق لو تو نار یعنی آتش دوزخ، اس موقع پر اس حدیث کا بیان کرنا بھی مناسب معلوم ہوتا ہے  جو صحیح بخاری شریف میں کئی جگہ ہے  اور کتاب الکفالہ میں بہت پوری ہے ۔ رسول اللہ صلی اللہ علیہ و سلم نے  فرمایا بنی اسرائیل میں ایک شخص تھا جس نے  کسی اور شخص سے  ایک ہزار دینار قرض مانگے  اس نے  کہا گواہ لاؤ کہا اللہ کی گواہی کافی ہے  اس نے  کہا ضامن لاؤ اس نے  کہا ضمانت بھی اللہ ہی دیتا ہوں وہ اس پر راضی ہو گیا اور وقت ادائیگی مقرر کر کے  رقم دے  دی وہ اپنے  دریائی سفر میں نکل گیا جب کام کاج سے  نپٹ گیا تو دریا کنارے  کسی جہاز کا انتظار کرنے  لگا تاکہ جا کر اس کا قرض ادا کر دے  لیکن سواری نہ ملی تو اس نے  ایک لکڑی لی اور اسے  بیچ میں سے  کھوکھلا کر کے  اس میں ایک ہزار دینار رکھ دئیے  اور ایک خط بھی اس کے  نام رکھ دیا پھر منہ بند کر کے  اسے  دریا میں ڈال دیا اور کہا اے  اللہ تو بخوبی جانتا ہے  کہ میں نے  فلاں شخص سے  ایک ہزار دینار قرض لئے  تیری شہادت پر اور تیری ضمانت پر اور اس نے  بھی اس پر خوش ہو کر مجھے  دے  دئیے  اب میں نے  ہر چند کشتی ڈھونڈی کہ جا کر اس کا حق مدت کے  اندر ہی اندر دے  دوں لیکن نہ ملی پس اب عاجز آ کر تجھ پر بھروسہ کر کے  میں اسے  دریا میں ڈال دیتا ہوں تو اسے  اس تک پہنچا دے  یہ دعا کر کے  لکڑی کو سمندر میں ڈال کر چلا آیا لکڑی پانی میں ڈوب گئی، یہ پھر بھی تلاش میں رہا کہ کوئی سواری ملے  تو جائے  اور اس کا حق ادا کر آئے  ادھر قرض خواہ شخص دریا کے  کنارے  یا کہ شاید مقروض کسی کشتی میں اس کی رقم لے  کر آ رہا ہو جب دیکھا کہ کوئی کشتی نہیں  آئی اور جانے  لگا تو ایک لکڑی کو جو کنارے  پر پڑی ہوئی تھی یہ سمجھ کر اٹھا لیا کہ جلانے  کے  کام آئے  گی گھر جا کر اسے  چیرا تو مال اور خط نکلا کچھ دنوں بعد قرض دینے  والا شخص آیا اور کہا اللہ تعالیٰ جانتا ہے  میں نے  ہر چند کوشش کی کہ کوئی سواری ملے  تو آپ کے  پاس آؤں اور مدت گزرنے  سے  پہلے  ہی آپ کا قرض ادا کر دوں لیکن کوئی سواری نہ ملی اس لئے  دیر لگ گئی اس نے  کہا تو نے  جو رقم بھیج دی تھی وہ اللہ نے  مجھے  پہنچا دی ہے  تو اب اپنی یہ رقم واپس لے  جا اور راضی خوشی لوٹا جا، یہ حدیث بخاری شریف میں تعلیق کے  ساتھ بھی ہے  لیکن جزم کے  صیغے  کے  ساتھ اور بعض جگہ اسناد کے  حوالوں کے  ساتھ بھی ہے  ۔ علاوہ ازیں اور کتابوں میں بھی یہ روایت موجود ہے ۔ پھر فرماتا ہے  کہ امانت میں خیانت کرنے  حقدار کے  حق کو نہ ادا کرنے  پر آمادہ کرنے  والا سبب ان کا یہ غلط خیال ہے  کہ ان بد دینوں ان پڑھوں کا مال کھا جانے  میں ہمیں کوئی حرج نہیں  ہم پر یہ مال حلال ہے، جس پر اللہ فرماتا ہے  کہ یہ اللہ پر الزام ہے  اور اس کا علم خود انہیں  بھی ہے  کیونکہ ان کی کتابوں میں بھی ناحق مال کو اللہ نے  حرام قرار دیا ہے ۔ لیکن یہ بیوقوف خود اپنی من مانی اور دل پسند باتیں گھڑ کر شریعت کے  رنگ میں انہیں  رنگ لیتے  ہیں، حضرت ابن عباس رضی اللہ تعالیٰ عنہ سے  لوگ مسئلہ پوچھتے  ہیں  کہ ذمی یا کفار کی مرغی بکری وغیرہ کبھی غزوے  کی حالت میں ہمیں مل جاتی ہے  تو ہم تو سمجھتے  ہیں  کہ اسے  لینے  میں کوئی حرج نہیں  تو آپ نے  فرمایا ٹھیک یہی اہل کتاب بھی کہتے  تھے  کہ امتیوں کا مال لینے  میں کوئی حرج نہیں، سنو جب وہ جزیہ ادا کر رہے  ہیں  تو ان کا کوئی مال تم پر حلال نہیں  ہاں وہ اپنی خوشی سے  دے  دیں تو اور بات ہے  (عبدالرزاق) سعید بن جبیر فرماتے  ہیں  جب اہل کتاب سے  حضور علیہ السلام نے  یہ بات سنی تو فرمایا دشمنان الہ جھوٹے  ہیں  جاہلیت کی تمام رسمیں میرے  قدموں تلے  مٹ گئیں اور امانت تو ہر فاسق و فاجر کی بھی ادا کرنی پڑے  گی۔ پھر ارشاد ہوتا ہے  کہ لیکن جو شخص اپنے  عہد کو پورا کرے  اور اہل کتاب ہو کر ڈرتا رہے  پھر اپنی کتاب کی ہدایت کے  مطابق آنحضرت صلی اللہ علیہ و سلم پر ایمان لائے  اس عہد کے  مطابق جو تمام انبیاء سے  بھی ہو چکا ہے  اور جس عہد کی پابندی ان کی امتوں پر بھی لازم ہے  اللہ کی حرام کردہ چیزوں سے  اجتناب کرے  اس کی شریعت کی اطاعت کرے  رسولوں کے  خاتم اور انبیاء کے  سردار حضرت محمد صلی اللہ علیہ و سلم کی پوری تابعداری کرے  وہ متقی ہے  اور متقی اللہ تعالیٰ کے  دوست ہیں ۔

۷۷

جھوٹی قسم کھانے  والے

یعنی جو اہل کتاب اللہ کے  عہد کا پاس نہیں  کرتے  نہ حضور صلی اللہ علیہ و سلم کی اتباع کرتے  ہیں  نہ آپ کی صفتوں کا ذکر لوگوں سے  کرتے  ہیں  نہ آپ کے  متعلق بیان کرتے  ہیں  اور اسی طرح جھوٹی قسمیں کھاتے  ہیں  اور ان بدکاریوں سے  وہ اس ذلیل اور فانی دنیا کا فائدہ حاصل کرتے  ہیں  ان کے  لئے  آخرت میں کوئی حصہ نہیں  نہ ان سے  اللہ تعالیٰ کوئی پیار محبت کی بات کرے  گا نہ ان پر رحمت کی نظر ڈالے  گا نہ انہیں  ان کے  گناہوں سے  پاک صاف کرے  گا بلکہ انہیں  جہنم میں داخل کرنے  کا حکم دے  گا اور وہاں وہ دردناک سزائیں بھگتتے  رہیں  گے، اس آیت کے  متعلق بہت سی حدیثیں بھی ہیں  جن میں سے  کچھ یہاں بھی ہم بیان کرتے  ہیں  (۱) مسند احمد میں ہے  رسول اللہ صلی اللہ علیہ و سلم فرماتے  ہیں  تین قسم کے  لوگ ہیں  جن سے  تو نہ اللہ جل شانہ کلام کرے  گا اور نہ ان کی طرف قیامت کے  دن نظر رحمت سے  دیکھے  گا، اور نہ انہیں  پاک کرے  گا، حضرت ابوذر نے  یہ سن کر کہا یہ کون لوگ ہیں  یا رسول اللہ یہ تو بڑے  گھاٹے  اور نقصان میں پڑے  حضور صلی اللہ علیہ و سلم نے  تین مرتبہ یہی فرمایا پھر جواب دیا کہ ٹخنوں سے  نیچے  کپڑا لٹکانے  والا، جھوٹی قسم سے  اپنا سودا بیچنے  والا، دے  کر احسان جتانے  والا، مسلم وغیرہ میں بھی یہ حدیث ہے  (۲) مسند احمد میں ہے  ابو احمس فرماتے  ہیں  میں حضرت ابوذر سے  ملا اور ان سے  کہا کہ میں نے  سنا ہے  کہ آپ رسول اللہ صلی اللہ علیہ و سلم سے  ایک حدیث بیان فرماتے  ہیں  تو فرمایا سنو میں رسول اللہ صلی اللہ علیہ و سلم پر جھوٹ تو بول نہیں  سکتا جبکہ میں نے  حضور صلی اللہ علیہ و سلم سے  سن لیا ہو تو کہئے  وہ حدیث کیا ہے ؟ جواب دیا یہ کہ تین قسم کے  لوگوں کو اللہ ذوالکرم دوست رکھتا ہے  اور تین قسم کے  لوگوں کو دشمن تو فرمانے  لگے  ہاں یہ حدیث میں نے  بیان کی ہے  اور میں نے  حضور صلی اللہ علیہ و سلم سے  سنی بھی ہے  میں نے  پوچھا کس کس کو دوست رکھتا ہے  فرمایا ایک تو وہ جو مردانگی سے  دشمنان اللہ سبحانہ کے  مقابلے  میں میدان جہاد میں کھڑا ہو جائے  یا تو اپنا سینہ چھلنی کروا لے  یا فتح کر کے  لوٹے، دوسرا وہ شخص جو کسی قافلے  کے  ساتھ سفر میں ہے  بہت رات گئے  تک قافلہ چلتا رہا جب تھک کر چور ہو گئے  پڑاؤ ڈالا تو سب سو گئے  اور یہ جاگتا رہا اور نماز میں مشغول رہا یہاں تک کہ کوچ کے  وقت سب کو جگا دیا۔ تیسرا وہ شخص جس کا پڑوسی اسے  ایذا پہنچاتا ہو اور وہ اس پر صبر و ضبط کرے  یہاں تک کہ موت یا سفر ان دونوں میں جدائی کرے، میں نے  کہا اور وہ تین کون ہیں  جن سے  اللہ تعالیٰ ناخوش ہے  فرمایا بہت قسمیں کھانے  والا تاجر، اور تکبر کرنے  والا فقیر اور وہ بخیل جس سے  کبھی احسان ہو گیا ہو تو جتانے  بیٹھے، یہ حدیث اس سند سے  غریب ہے  (٣) مسند احمد میں ہے  کندہ قبیلے  کے  ایک شخص امروالقیس بن عامر کا جھگڑا ایک حضرمی شخص سے  زمین کے  بارے  میں تھا جو حضور صلی اللہ علیہ و سلم کے  سامنے  پیش ہوا تو آپ نے  فرمایا کہ حضرمی اپنا ثبوت پیش کرے  اس کے  پاس کوئی ثبوت نہ تھا تو آپ نے  فرمایا اب کندی قسم کھا لے  تو حضرمی کہنے  لگا یا رسول اللہ صلی اللہ علیہ و سلم جب اس کی قسم پر ہی فیصلہ ٹھہرا تو رب کعبہ کی قسم یہ میری زمین لے  جائے  گا آپ نے  فرمایا جو شخص جھوٹی قسم سے  کسی کا مال اپنا کرلے  گا تو جب وہ اللہ تعالیٰ سے  ملے  گا اللہ اس سے  ناخوش ہو گا پھر آنحضرت صلی اللہ علیہ و سلم نے  اس آیت کی تلاوت فرمائی تو امروالقیس نے  کہا یا رسول اللہ اگر تو کوئی چھوڑ دے  تو اسے  اجر کیا ملے  گا؟ آپ نے  فرمایا جنت تو کہنے  لگے  یا رسول اللہ صلی اللہ علیہ و سلم گواہ رہئے  کہ میں نے  وہ ساری زمین اس کے  نام چھوڑی، یہ حدیث نسائی میں بھی ہے  (٤) مسند احمد میں ہے  رسول اللہ صلی اللہ علیہ و سلم فرماتے  ہیں  جو شخص جھوٹی قسم کھائے  تاکہ اس سے  کسی مسلمان کا مال چھین لے  تو اللہ جل جلالہ سے  جب ملے  گا تو اللہ عزوجل اس پر سخت غضبناک ہو گا، حضرت اشعث فرماتے  ہیں  اللہ کی قسم میرے  ہی بارے  میں یہ ہے  ایک یہودی اور میری شرکت میں ایک زمین تھی اس نے  میرے  حصہ کی زمین کا انکار کر دیا میں اسے  خدمت نبوی میں لایا حضور صلی اللہ علیہ و سلم نے  مجھ سے  فرمایا تیرے  پاس کچھ ثبوت ہے  میں نے  کہا نہیں  آپ نے  یہودی سے  فرمایا تو قسم کھالے  میں نے  کہا حضور صلی اللہ علیہ و سلم یہ تو قسم کھا لے  گا اور میرا مال لے  جائے  گا پس اللہ عزوجل نے  یہ آیت نازل فرمائی، یہ حدیث بخاری مسلم میں بھی ہے ۔ (٥) مسند احمد میں ہے  حضرت ابن مسعود رضی اللہ تعالیٰ عنہ فرماتے  ہیں  رسول اللہ صلی اللہ علیہ و سلم نے  فرمایا ہے  جو شخص کسی مرد مسلم کا مال بغیر حق کے  لے  لے  وہ اللہ ذوالجلال سے  اس حال میں ملے  گا کہ اللہ تعالیٰ اس سے  ناراض ہو گا، وہیں  حضرت اشعث بن قیس رضی اللہ تعالیٰ عنہ آگے  آئے  اور فرمانے  لگے  ابو عبدالرحمن آپ کوئی سی حدیث بیان کرتے  ہیں ؟ ہم نے  دوہرا دی تو فرمایا یہ حدیث میرے  ہی بارے  میں حضور صلی اللہ علیہ و سلم نے  ارشاد فرمائی ہے، میرا اپنے  چچا کے  لڑکے  سے  ایک کنوئیں کے  بارے  میں جھگڑا تھا جو اس کے  قبضے  میں تھا حضور صلی اللہ علیہ و سلم کے  پاس جب ہم اپنا مقدمہ لے  گئے  تو آپ نے  فرمایا تو اپنی دلیل اور ثبوت لا کہ یہ کنواں تیرا ہے  ورنہ اس کی قسم پر فیصلہ ہو گا میں نے  کہا یا حضرت میرے  پاس تو کوئی دلیل نہیں  اور اگر اس قسم پر معاملہ رہا تو یہ تو میرا کنواں لے  جائے  گا میرا مقابل تو فاجر شخص ہے  اس وقت حضور صلی اللہ علیہ و سلم نے  یہ حدیث بھی بیان فرمائی اور اس آیت کی بھی تلاوت کی (۶) مسند احمد میں ہے  رسول اللہ صلی اللہ علیہ و سلم فرماتے  ہیں  اللہ تعالیٰ کے  کچھ بندے  ایسے  بھی ہیں  جن سے  اللہ تعالیٰ قیامت کے  دن بات نہ کرے  گا نہ ان کی طرف دیکھے  گا، پوچھا گیا کہ یا رسول اللہ صلی اللہ علیہ و سلم وہ کون ہیں ؟ فرمایا اپنے  ماں باپ سے  بیزار ہونے  والے  اور ان سے  بے  رغبتی کرنے  والی لڑکی اور اپنی اولاد سے  بیزار اور الگ ہونے  والا باپ اور وہ شخص کہ جس پر کسی قوم کا احسان ہے  وہ اس سے  انکار کر جائے  اور آنکھیں پھیر لے  اور ان سے  یکسوئی کرے  (۷) ابن ابی حاتم میں ہے  حضرت عبد اللہ بن ابی اوفی رضی اللہ تعالیٰ عنہ فرماتے  ہیں  کہ ایک شخص نے  اپنا سودا بازار میں رکھا اور قسم کھائی کہ وہ اتنا بھاؤ دیا جاتا تھا تاکہ کوئی مسلمان اس میں پھنس جائے، پس یہ آیت نازل ہوئی، صحیح بخاری میں بھی یہ روایت مروی ہے ۔ (۸) مسند احمد میں ہے  رسول اللہ صلی اللہ علیہ و سلم فرماتے  ہیں  تین شخصوں سے  جناب باری تقدس و تعالیٰ قیامت والے  دن بات نہ کرے  گا نہ ان کی طرف دیکھے  گا نہ انہیں  پاک کرے  گا اور ان کے  لئے  دکھ درد کے  عذاب ہیں  ایک وہ جس کے  پاس بچا ہوا پانی ہے  پھر وہ کسی مسافر کو نہیں  دیتا دوسرا وہ جو عصر کے  بعد جھوٹی قسم کھا کر اپنا مال فروخت کرتا ہے  تیسرا وہ بادشاہ مسلمان سے  بیعت کرتا ہے  اس کے  بعد اگر وہ اسے  مال دے  تو پوری کرتا ہے  اگر نہیں  دیتا تو نہیں  کرتا ہے  یہ حدیث ابوداؤد اور ترمذی میں بھی ہے  اور امام ترمذی اسے  حسن صحیح کہتے  ہیں ۔

۷۸

غلط تاویل اور تحریف کرنے  والے  لوگ

 یہاں بھی انہی ملعون یہودیوں کا ذکر ہو رہا ہے  کہ ان کا ایک گروہ یہ بھی کرتا ہے  کہ عبارت کو اس کی اصل جگہ سے  ہٹا دیتا ہے، یعنی اللہ کی کتاب بدل دیتا ہے، اصل مطلب اور صحیح معنی خبط کر دیتا ہے  اور جاہلوں کو اس چکر میں ڈال دیتا ہے  کہ کتاب اللہ یہی ہے  پھر یہ خود اپنی زبان سے  بھی اسے  کتاب اللہ کہہ کر جاہلوں کے  اس خیال کو اور مضبوط کر دیتا ہے  اور جان بوجھ کر اللہ تعالیٰ پر افترا کرتا ہے  اور جھوٹ بکتا ہے، زبان موڑنے  سے  مطلب یہاں تحریف کرنا ہے ۔ حضرت ابن عباس سے  صحیح بخاری شریف میں مروی ہے  کہ یہ لوگ تحریف اور ازالہ کر دیتے  تھے  مخلوق میں ایسا تو کوئی نہیں  جو کسی اللہ کی کتاب کا لفظ بدل دے  مگر یہ لوگ تحریف اور بے  جا تاویل کرتے  تھے، وہب بن منبہ فرماتے  ہیں  کہ توراۃ و انجیل اسی طرح ہیں  جس طرح اللہ تعالیٰ نے  اتاریں ایک حرف بھی ان میں سے  اللہ نے  نہیں  بدلا لیکن یہ لوگ تحریف اور تاویل سے  لوگوں کو گمراہ کرتے  ہیں  اور جو کتابیں انہوں نے  اپنی طرف سے  لکھ لی ہیں  اور جسے  وہ اللہ تعالیٰ کی طرف سے  مشہور کر رہے  ہیں  اور لوگوں کو بہکاتے  ہیں  حالانکہ دراصل وہ اللہ کی طرف سے  نہیں  اللہ کی اصلی کتابیں تو محفوظ ہیں  جو بدلتی نہیں  (ابن ابی حاتم) حضرت وہب کے  اس فرمان کا اگر یہ مطلب ہو کہ ان کے  پاس اب جو کتاب ہے  تو ہم بالیقین کہتے  ہیں  کہ وہ بدلی ہوئی ہے  اور محرف ہے  اور زیادتی اور نقصان سے  ہرگز پاک نہیں  اور پھر جو عربی زبان میں ہمارے  ہاتھوں میں ہے  اس میں تو بڑی غلطیاں ہیں  کہیں  مضمون کو کم کر دیا گیا ہے  کہیں  بڑھا دیا گیا ہے  اور صاف صاف غلطیاں موجود ہیں  بلکہ دراصل اسے  ترجمہ کہنا زیبا ہی نہیں  وہ تو تفسیر اور وہ بھی بے  اعتبار تفسیر ہے  اور پھر ان سمجھداروں کی لکھی ہوئی تفسیر ہے  جن میں اکثر بلکہ کل کے  کل دراصل محض الٹی سمجھ والے  ہیں  اور اگر حضرت وہب کے  فرمان کا یہ مطلب ہو کہ اللہ تعالیٰ کی کتاب جو درحقیقت اللہ کی کتاب ہے  پس وہ بے  شک محفوظ و سالم ہے  اس میں کمی زیادتی ناممکن ہے ۔

۷۹

مقصد نبوت

رسول اللہ صلی اللہ علیہ و سلم کے  پاس جب یہودیوں اور نجرانی نصرانیوں کے  علماء جمع ہوئے  اور آپ نے  انہیں  اسلام قبول کرنے  کی دعوت دی تھی تو ابو راقم قرظی کہنے  لگا کہ کیا آپ یہ چاہتے  ہیں  کہ جس طرح نصرانیوں نے  حضرت عیسیٰ بن مریم کی عبادت کی ہم بھی آپ کی عبادت کریں ؟ تو نجران کے  ایک نصرانی نے  بھی جسے  "آئیس” کہا جاتا تھا یہی کہا کہ کیا آپ کی یہی خواہش ہے ؟ اور یہی دعوت ہے ؟ تو حضور علیہ السلام نے  فرمایا معاذ اللہ نہ ہم خود اللہ وحدہٗ لاشریک کے  سوا دوسرے  کی پوجا نہ کریں کسی اور کو اللہ کے  سوا دوسرے  کی عبادت کی تعلیم دیں نہ میری پیغمبری کا یہ مقصد نہ مجھے  اللہ حاکم اعلیٰ کا یہ حکم، اس پر یہ آیتیں نازل ہوئیں، کہ کسی انسان کو کتاب و حکمت اور نبوت و رسالت پا لینے  کے  بعد یہ لائق ہی نہیں  کہ اپنی پرستش کی طرف لوگوں کو بلائے، جب انبیائے  کرام کا جو اتنی بڑی بزرگی فضیلت اور مرتبے  والے  ہیں  یہ منصب نہیں  تو کسی اور کو کب لائق ہے  کہ اپنی پوجا پاٹ کرائے، اور اپنی بندگی کی تلقین لوگوں کو کرے، امام حسن بصری فرماتے  ہیں  ادنی مومن سے  بھی یہ نہیں  ہو سکتا کہ وہ لوگوں کو اپنی بندگی کی دعوت دے، یہاں یہ اس لئے  فرمایا یہ یہود و نصاریٰ آپس میں ہی ایک دوسرے  کو پوجتے  تھے  قرآن شاہد ہے  جو فرماتا ہے (آیت اتخذوا احبارھم ورھبانھم اربابا من دون اللہ الخ،) یعنی ان لوگوں نے  اللہ تعالیٰ کو چھوڑ اپنے  عالموں اور درویشوں کو اپنا رب بنا لیا ہے ۔ مسند ترمذی کی وہ حدیث بھی آرہی ہے  کہ حضرت عدی بن حاتم نے  رسول مقبول صلی اللہ علیہ و سلم کی خدمت میں عرض کیا کہ وہ تو ان کی عبادت نہیں  کرتے  تھے  تو آپ نے  فرمایا کیوں نہیں ؟ وہ ان پر حرام کو حلال اور حلال کو حرام کر دیتے  تھے  اور یہ ان کی مانتے  چلے  جاتے  تھے  یہی ان کی عبادت تھی، پس جاہل درویش اور بے  سمجھ علماء اور مشائخ اس مذمت اور ڈانٹ ڈپٹ میں داخل ہیں  رسول صلی اللہ علیہ و سلم اور ان کی اتباع کرنے  والے  علماء کرام اس سے  یکسو ہیں  اس لئے  کہ وہ تو صرف اللہ تعالیٰ کے  فرمان اور کلام رسول صلی اللہ علیہ و سلم کی تبلیغ کرتے  ہیں  اور ان کاموں سے  روکتے  ہیں  جن سے  انبیاء کرام روک گئے  ہیں، اللہ تعالیٰ کے  بھیجے  ہوئے  حضرت انبیاء تو خالق و مخلوق کے  درمیان سفیر ہیں  حق رسالت ادا کرتے  ہیں  اور اللہ کی امانت احتیاط کے  ساتھ بندگان رب عالم کو پہنچا دیتے  ہیں  نہایت بیداری، مکمل ہوشیاری، کمال نگرانی اور پوری حفاظت کے  ساتھ وہ ساری مخلوق کے  خیر خواہ ہوتے  ہیں  وہ احکام رب رحمن کے  پہچاننے  والے  ہوتے  ہیں ۔ رسولوں کی ہدایت تو لوگوں کو ربانی بننے  کی ہوتی ہے  کہ وہ حکمتوں والے  علم والے  اور حلم والے  بن جائیں سمجھدار، عابد و زاہد، متقی اور پارسا ہیں ۔ حضرت ضحاک فرماتے  ہیں  کہ قرآن سیکھنے  والوں پر حق ہے  کہ وہ با سمجھ ہوں تعملون اور تعلمون دونوں قرات ہیں  پہلے  کے  معنی ہیں  معنی سمجھنے  کے  دوسرے  کے  معنی ہیں  تعلیم حاصل کرنے  کے، تدرسون کے  معنی ہیں  الفاظ یاد کرنے  کے ۔ پھر ارشاد ہے  کہ وہ یہ حکم نہیں  کرتے  کہ اللہ کے  سوا کسی اور کی عبادت کرو خواہ وہ نبی ہو بھیجا ہوا خواہ فرشتہ ہو قرب الہ والا، یہ تو وہی کر سکتا ہے  جو اللہ کے  سوا دوسرے  کی عبادت کی دعوت دے  اور جو ایسا کرے  وہ کافر ہو اور کفر نبیوں کا کام نہیں  ان کا کام تو ایمان لانا ہے  اور ایمان نام ہے  اللہ واحد کی عبادت اور پرستش کا، اور یہی نبیوں کی دعوت ہے، جیسے  خود قرآن فرماتا ہے (آیت وما ارسلنا من قبلک من رسول الا نوحی الیہ انہ لا الہ الا انا فاعبدون) یعنی تجھ سے  پہلے  بھی ہم نے  جتنے  رسول بھیجے  سب پر یہی وحی نازل کی کہ میرے  سوا کوئی معبود ہے  ہی نہیں  تم سب میری عبادت کرتے  رہو اور فرمایا (آیت ولقد بعثنا فی کل امۃ رسولا ان اعبدوا اللہ واجتنبوا الطاغوت) یعنی ہم نے  ہر امت میں رسول بھیجا کہ تم اللہ کی عبادت کرو اور اللہ کے  سوا ہر کسی کی عبادت سے  بچو، ارشاد ہے  تجھ سے  پہلے  تمام رسولوں سے  پوچھ لو کیا ہم نے  اپنی ذات رحمان کے  سوا ان کی عبادت کے  لئے  کسی اور کو مقرر کیا تھا؟ فرشتوں کی طرف سے  خبر دیتا ہے  کہ (آیت من یقل منھم الخ) ان میں سے  اگر کوئی کہہ دے  کہ میں معبود ہوں بجز اللہ تو اسے  بھی جہنم کی سزا دیں اور اسی طرح ہم ظالموں کو بدلہ دیتے  ہیں ۔

۸۱

انبیاء سے  عہد و میثاق

 یہاں بیان ہو رہا ہے  کہ حضرت آدم سے  لے  کر حضرت عیسیٰ تک کے  تمام انبیاء کرام سے  اللہ تعالیٰ نے  وعدہ لیا کہ جب کبھی ان میں سے  کسی کو بھی اللہ تبارک و تعالیٰ کتاب و حکمت دے  اور وہ بڑے  مرتبے  تک پہنچ جائے  پھر اس کے  بعد اسی کے  زمانے  میں رسول صلی اللہ علیہ و سلم آجائے  تو اس پر ایمان لانا اور اس کی نصرت و امداد کرنا اس کا فرض ہو گا یہ نہ ہو کہ اپنے  علم و نبوت کی وجہ سے  اپنے  بعد والے  نبی کی اتباع اور امداد سے  رک جائے، پھر ان سے  پوچھا کہ کیا تم اقرار کرتے  ہو؟ اور اسی عہد و میثاق پر مجھے  ضامن ٹھہراتے  ہو۔ سب نے  کہا ہاں ہمارا اقرار ہے  تو فرمایا گواہ رہو اور میں خود بھی گواہ ہوں ۔ اب اس عہد و میثاق سے  جو پھر جائے  وہ قطعی فاسق، بے  حکم اور بدکار ہے، حضرت علی بن ابوطالب رضی اللہ تعالیٰ فرماتے  ہیں ٠ کہ اللہ تعالیٰ نے  ہر نبی سے  عہد لیا کہ اس کی زندگی میں اگر اللہ تعالیٰ اپنے  نبی حضرت محمد مصطفی صلی اللہ علیہ و سلم کو بھیجے  تو اس پر فرض ہے  کہ وہ آپ پر ایمان لائے  اور آپ کی امداد کرے  اور اپنی امت کو بھی وہ یہی تلقین کرے  کہ وہ بھی حضور صلی اللہ علیہ و سلم پر ایمان لائے  اور آپ کی تابعداری میں لگ جائے، طاؤس حسن بصری اور قتادہ فرماتے  ہیں  نبیوں سے  اللہ نے  عہد لیا کہ ایک دوسرے  کی تصدیق کریں، کوئی یہ نہ سمجھے  کہ یہ تفسیر اوپر کی تفسیر کے  خلاف ہے  بلکہ یہ اس کی تائید ہے  اسی لئے  حضرت طاؤس رحمۃ اللہ علیہ سے  ان کے  لڑکے  کی روایت مثل روایت حضرت علی اور ابن عباس کے  بھی مروی ہے ۔ مسند احمد کی روایت میں ہے  کہ حضرت عمر بن خطاب رضی اللہ تعالیٰ عنہ نے  رسول اللہ صلی اللہ علیہ و سلم سے  کہا یا رسول اللہ میں نے  ایک دوست قریظی یہودی سے  کہا تھا کہ وہ تورات کی جامع باتیں مجھے  لکھ دے  اگر آپ فرمائیں تو میں انہیں  پیش کروں حضور صلی اللہ علیہ و سلم کا چہرہ متغیر ہو گیا۔ حضرت عبد اللہ ثابت نے  کہا کہ تم نہیں  دیکھتے  کہ آپ کے  چہرہ کا کیا حال ہے ؟ تو حضرت عمر کہنے  لگے  میں اللہ کے  رب ہونے  پر اسلام کے  دین ہونے  پر محمد کے  رسول ہونے  پر خوش ہوں (صلی اللہ علیہ و سلم) اس وقت حضور صلی اللہ علیہ و سلم کا غصہ دور ہوا اور فرمایا قسم ہے  اس اللہ تعالیٰ کی جس کے  ہاتھ میں میری جان ہے  کہ اگر حضرت موسیٰ تم میں آجائیں اور تم ان کی تابعداری میں لگ جاؤ اور مجھے  چھوڑ دو تو تم سب گمراہ ہو جاؤ تمام امتوں میں سے  میرے  حصے  کی امت تم ہو اور تمام نبیوں میں سے  تمہارے  حصے  کا نبی میں ہوں، مسند ابو یعلی میں لکھا ہے  اہل کتاب سے  کچھ نہ پوچھو وہ خود گمراہ ہیں  تو تمہیں  راہ راست کیسے  دکھائیں گے  بلکہ ممکن ہے  تم کسی باطل کی تصدیق کر لو یا حق کی تکذیب کر بیٹھو اللہ کی قسم اگر موسیٰ بھی تم میں زندہ موجود ہوتے  تو انہیں  بھی بجز میری تابعداری کے  اور کچھ حلال نہ تھا، بعض احادیث میں ہے  اگر موسیٰ اور عیسیٰ زندہ ہوتے  تو انہیں  بھی میری اتباع کے  سوا چارہ نہ تھا، پس ثابت ہوا کہ ہمارے  رسول حضرت محمد صلی اللہ علیہ و سلم خاتم الانبیاء ہیں  اور امام اعظم ہیں  جس زمانے  میں بھی آپ کی نبوت ہوتی آپ واجب الاطاعت تھے  اور تمام انبیاء کی تابعداری پر جو اس وقت ہوں آپ کی فرمانبرداری مقدم رہتی، یہی وجہ تھی کہ معراج والی رات بیت المقدس میں تمام انبیاء کے  امام آپ ہی بنائے  گئے، اسی طرح میدان محشر میں بھی اللہ تعالیٰ کی فیصلوں کو انجام تک پہنچانے  میں آپ ہی شفیع ہوں گے  یہی وہ مقام محمود ہے  جو آپ کے  سوا اور کو حاصل نہیں  تمام انبیاء اور کل رسول اس دن اس کام سے  منہ پھیر لیں گے  بالاخر آپ ہی خصوصیت کے  ساتھ اس مقام میں کھڑے  ہوں گے، اللہ تعالیٰ اپنے  درود و سلام آپ پر ہمیشہ ہمیشہ بھیجتا رہے  قیامت کے  دن تک آمین۔

۸۳

اسلامی اصول اور روز جزا

 اللہ تعالیٰ کے  سچے  دین کے  سوا جو اس نے  اپنی کتابوں میں اپنے  رسولوں کی معرفت نازل فرمایا ہے  یعنی صرف اللہ وحدہٗ لا شریک ہی کی عبادت کرنا کوئی شخص کسی اور دین کی تلاش کرے  اور اسے  مانے  اس کی تردید یہاں بیان ہو رہی ہے  پھر فرمایا کہ آسمان و زمین کی تمام چیزیں اس کی مطیع ہیں  خواہ خوشی سے  ہوں یا نا خوشی سے  جیسے  کہ اللہ تعالیٰ فرماتا ہے (آیت وللہ یسجد من فی السموات والارض طوعا وکرھا الخ،) یعنی زمین و آسمان کی تمام تر مخلوق اللہ کے  سامنے  سجدے  کرتی ہے  اپنی خوشی سے  یا جبراً اور جگہ ہے  (آیت اولم یروا الی ما خلق اللہ من شئی الخ، کیا وہ نہیں  دیکھتے  کہ تمام مخلوق کے  سائے  دائیں بائیں جھک جھک کر اللہ تعالیٰ کو سجدہ کرتے  ہیں  اور اللہ ہی کے  لئے  سجدہ کرتی ہیں  آسمانوں کی سب چیزیں اور زمینوں کے  کل جاندار اور سب فرشتے  کوئی بھی تکبر نہیں  کرتا سب کے  سب اپنے  اوپر والے  رب سے  ڈرتے  رہتے  ہیں  اور جو حکم دے  جائیں بجا لاتے  ہیں، پس مومنوں کا تو ظاہر باطن قلب و جسم دونوں اللہ تعالیٰ کے  مطیع اور اس کے  فرمانبردار ہوتے  ہیں  اور کافر بھی اللہ کے  قبضے  میں ہے  اور جبراً اللہ کی جانب جھکا ہوا ہے  اس کے  تمام فرمان اس پر جاری رہیں  اور وہ ہر طرح قدرت و مشیت اللہ کے  ماتحت ہے  کوئی چیز بھی اس کے  غلبے  اور قدرت سے  باہر نہیں، اس آیت کی تفسیر میں ایک غریب حدیث یہ بھی وارد ہے  کہ رسول اللہ صلی اللہ علیہ و سلم نے  فرمایا آسمانوں والے  تو فرشتے  ہیں  جو بخوشی اللہ کے  فرمان گزار ہیں  اور زمین والے  وہ ہیں  جو اسلام پر پیدا ہوئے  ہیں  یہ بھی بہ شوق تمام اللہ کے  زیر فرمان ہیں، اور نا خوشی سے  فرماں بردار وہ ہیں  جو لوگ مسلمان مجاہدین کے  ہاتھوں میدان جنگ میں قید ہوتے  ہیں  اور طوق و زنجیر میں جکڑے  ہوئے  لائے  جاتے  ہیں  یہ لوگ جنت کی طرف گھسیٹے  جاتے  ہیں  اور وہ نہیں  چاہتے، ایک صحیح حدیث میں ہے  تیرے  رب کو ان لوگوں سے  تعجب ہوتا ہے  جو زنجیروں اور رسیوں سے  باندھ کر جنت کی طرف کھینچے  جاتے  ہیں ۔ اس حدیث کی اور سند بھی ہے، لیکن اس آیت کے  معنی تو وہی زیادہ قوی ہیں  جو پہلے  بیان ہوئے، حضرت مجاہد فرماتے  ہیں  یہ آیت اس آیت جیسی ہے  (آیت ولئن سالتھم من خلق السموات والارض لیقولن اللہ)  اگر تو ان سے  پوچھ کہ آسمانوں اور زمین کو کس نے  پیدا کیا؟ تو یقیناً وہ یہی جواب دیں گے  کہ اللہ تعالیٰ نے، ابن عباس رضی اللہ تعالیٰ عنہ فرماتے  ہیں  اس سے  مراد وہ وقت ہے  جب روز ازل ان سب سے  میثاق اور عہد لیا تھا اور آخر کار سب اسی کی طرف لوٹ جائیں گے  یعنی قیامت والے  دن اور ہر ایک کو وہ اس کے  عمل کا بدلہ دے  گا۔ پھر فرماتا ہے  تو کہہ ہم اللہ اور قرآن پر ایمان لائے  اور ابراہیم اسماعیل اسحاق اور یعقوب علیہم السلام پر جو صحیفے  اور وحی اتری ہم اس پر بھی ایمان لائے  اور ان کی اولاد پر جو اترا اس پر بھی ہمارا ایمان ہے، اسباط سے  مراد بنو اسرائیل کے  قبائل ہیں  جو حضرت یعقوب کی نسل میں سے  تھے  یہ حضرت یعقوب کے  بارہ بیٹوں کی اولاد تھے، حضرت موسیٰ کو توراۃ دی گئی تھی اور حضرت عیسیٰ کو انجیل اور بھی جتنے  انبیاء کرام اللہ کی طرف سے  جو کچھ لائے  ہمارا ان سب پر ایمان ہے  ہم ان میں کوئی تفریق اور جدائی نہیں  کرتے  یعنی کسی کو مانیں کسی کو نہ مانیں بلکہ ہمارا سب پر ایمان ہے  اور ہم اللہ کے  فرمان بردار ہیں  پس اس امت کے  مومن تمام انبیاء اور کل اللہ تعالیٰ کی کتابوں کو مانتے  ہیں  کسی کے  ساتھ کفر نہیں  کرتے، ہر کتاب اور ہر نبی کے  سچا ماننے  والے  ہیں ۔ پھر فرمایا کہ دین اللہ کے  سوا جو شخص کسی اور راہ چلے  وہ قبول نہیں  ہو گا اور آخرت میں وہ نقصان میں رہے  گا جیسے  صحیح حدیث رسول اللہ صلی اللہ علیہ و سلم فرماتے  ہیں  قیامت کے  دن اعمال حاضر ہوں گے  نماز آ کر کہے  گی کہ اے  اللہ میں نماز ہوں اللہ تعالیٰ فرمائے  گا تو اچھی چیز ہے  صدقہ آئے  گا اور کہے  گا پروردگار میں صدقہ ہوں جواب ملے  گا تو بھی خیر پر ہے، روزہ آ کر کہے  گا میں روزہ ہوں اللہ تعالیٰ فرمائے  گا تو بھی بہتری پر ہے  پھر اسی طرح اور اعمال بھی آتے  جائیں گے  اور سب کو یہی جواب ملتا رہے  گا پھر اسلام حاضر ہو گا اور کہے  گا اے  اللہ تو سلام ہے  اور میں اسلام ہوں اللہ فرمائے  گا تو خیر پر ہے  آج تیرے  ہی اصولوں پر سب کو جانچوں گا۔ پھر سزا یا انعام دوں گا اللہ تعالیٰ اپنی کتاب میں فرماتا ہے (آیت ومن یبتغ) یہ حدیث صرف مسند احمد میں ہے  اور اس کے  راوی حسن کا حضرت ابوہریرہ سے  سننا ثابت نہیں ۔

۸۶

توبہ اور قبولیت

حضرت عبد اللہ بن عباس رضی اللہ تعالیٰ عنہما فرماتے  ہیں  ایک انصار مرتد ہو کر مشرکین میں جا ملا پھر پچھتانے  لگا اور اپنی قوم سے  کہلوایا کہ رسول اللہ صلعم سے  دریافت کرو کہ کیا میری توبہ قبول ہو سکتی ہے ؟ ان کے  دریافت کرنے  پر یہ آیتیں اتریں اس کی قوم نے  اسے  کہلوا بھیجا وہ پھر توبہ کر کے  نئے  سرے  سے  مسلمان ہو کر حاضر ہو گیا (ابن جریر) نسائی حاکم اور ابن حبان میں بھی یہ روایت موجود ہے  امام حاکم اسے  صحیح الاسناد کہتے  ہیں، مسند عبدالرزاق میں ہے  کہ حارث بن سوید نے  اسلام قبول کیا پھر قوم میں مل گیا اور اسلام سے  پھر گیا اس کے  بارے  میں یہ آیتیں اتریں اس کی قوم کے  ایک شخص نے  یہ آیتیں اسے  پڑھ کر سنائیں تو اس نے  کہا جہاں تک میرا خیال ہے  اللہ کی قسم تو سچا ہے  اور اللہ کے  نبی تو تجھ سے  بہت ہی زیادہ سچے  ہیں  اور اللہ تعالیٰ سب سچوں سے  زیادہ سچا ہے  پھر وہ حضور صلی اللہ علیہ و سلم کی طرف لوٹ آئے  اسلام لائے  اور بہت اچھی طرح اسلام کو نبھایا بینات سے  مراد رسول صلی اللہ علیہ و سلم کی تصدیق پر حجتوں اور دلیلوں کا بالکل واضح ہو جانا ہے  پس جو لوگ ایمان لائے  رسول کی حقانیت مان چکے  دلیلیں دیکھ چکے  پھر شرک کے  اندھیروں میں جا چھپے  یہ لوگ مستحق ہدایت نہیں  کیونکہ آنکھوں کے  ہوتے  ہوئے  اندھے  پن کو انہوں نے  پسند کیا اللہ تعالیٰ ناانصاف لوگوں میں رہبری نہیں  کرتا، انہیں  اللہ لعنت کرتا ہے  اور اس کی مخلوق بھی ہمیشہ لعنت کرتی ہے  نہ تو کسی وقت ان کے  عذاب میں تخفیف ہو گی نہ موقوفی۔ پھر اپنا لطف و احسان رافت و رحمت کا بیان فرماتا ہے  کہ اس بدترین جرم کے  بعد بھی جو میری طرف جھکے  اور اپنے  بد اعمال کی اصلاح کر لے  میں بھی اس سے  درگزر کر لیتا ہوں ۔

۹۰

جب سانس ختم ہونے  کو ہوں تو توبہ قبول نہیں  ہو گی

ایمان کے  بعد پھر اسی کفر پر مرنے  والوں کو پروردگار عالم ڈرا رہا ہے  کہ موت کے  وقت تمہاری توبہ قبول نہیں  ہو گی جیسے  اور جگہ ہے (آیت ولیست التوبۃ للذین الخ،) آخر دم تک یعنی موت کے  وقت تک گناہوں میں مبتلا رہنے  والے  موت کو دیکھ کر جو توبہ کریں وہ اللہ کے  ہاں قبول نہیں  اور یہی یہاں ہے  کہ ان کی توبہ ہرگز مقبول نہ ہو گی اور یہی لوگ وہ ہیں  جو راہ حق سے  بھٹک کر باطل راہ پر لگ گئے، حضرت ابن عباس فرماتے  ہیں  کہ کچھ لوگ مسلمان ہوئے  پھر مرتد ہو گئے  پھر اسلام لائے  پھر مرتد ہو گئے  پھر اپنی قوم کے  پاس آدمی بھیج کر بچھوایا کہ کیا اب ہماری توبہ ہے ؟ انہوں نے  حضور صلی اللہ علیہ و سلم سے  سوال کیا اس پر یہ آیت اتری (بزار) اس کی اسناد بہت عمدہ ہے ۔ پھر فرماتا ہے  کہ کفر پر مرنے  والوں کی کوئی نیکی قبول نہیں  گو اس نے  زمین بھر کر سونا اللہ کی راہ میں خرچ کیا ہو، نبی صلی اللہ علیہ و سلم سے  پوچھا گیا کہ عبد اللہ بن جذعان جو بڑا مہمان نواز غلام آزاد کرنے  والا اور کھانا پینا دینے  والا شخص تھا کیا اسے  اس کی یہ نیکی کام آئے  گی؟ تو آپ نے  فرمایا نہیں  اس نے  ساری عمر میں ایک دفعہ بھی (آیت رب اغفرلی خطیئتی یوم الدین) نہیں  کیا یعنی اے  میرے  رب میری خطاؤں کو قیامت والے  دن بخش جس طرح اس کی خیرات نامقبول ہے  اسی طرح فدیہ اور معاوضہ بھی، جیسے  اور جگہ ہے  (آیت ولا یقبل منھا عدل ولا تنفعھا شفاعتہ) ان سے  نہ بدلہ مقبول نہ انہیں  سفارش کا نفع اور فرمایا (آیت لا بیع فیہ ولا خلال) اس دن نہ خرید فروخت نہ موت و محبت اور جگہ ارشاد ہے  (آیت ان الذین کفروا لوان لھم الخ، یعنی اگر کافروں کے  پاس زمین میں جو کچھ ہے  اور اتنا ہی اور بھی ہو پھر وہ اس سب کو قیامت کے  عذابوں کے  بدلے  فدیہ دیں تو بھی نامقبول ہے  ان تکلیف والے  الم ناک عذابوں کو سہنا پڑے  گا، یہی مضمون یہاں بھی بیان فرمایا گیا ہے  بعض نے  افتدی کی واؤ کو زائد کہا ہے  لیکن واؤ کو عطف کی ماننا اور وہ تفسیر کرنا جو ہم نے  کی بہت بہتر ہے  واللہ اعلم، پس ثابت ہوا کہ اللہ کے  عذاب سے  کفار کو کوئی چیز نہیں  چھڑا سکتی چاہے  وہ بڑے  نیک اور نہایت سخی ہوں گو زمین بھر بھر کر سونا راہ اللہ لٹائیں یا پہاڑوں اور ٹیلوں کی مٹی اور ریت نرم زمین اور سخت زمین کی خشکی اور تری کے  ہم وزن سونا عذاب کے  بدلے  دینا چاہیں  یا دیں، مسند احمد میں ہے  رسول اللہ صلی اللہ علیہ و سلم فرماتے  ہیں  جہنمی سے  قیامت کے  دن کہا جائے  گا کہ زمین پر جو کچھ ہے  اگر تیرا ہو جائے  تو کیا تو اس کو ان سزاؤں کے  بدلے  اپنے  فدیے  میں دے  ڈالے  گا۔ وہ کہے  گا ہاں تو جناب باری کا ارشاد ہو گا کہ میں نے  تجھ سے  بہ نسبت اس کے  بہت ہی کم چاہا تھا، میں نے  تجھ سے  اس وقت وعدہ لیا تھا جب تو اپنے  باپ آدم کی پیٹھ میں تھا کہ میرے  ساتھ کسی کو شرک نہ بنانا لیکن تو شرک کئے  بغیر نہ رہا۔ یہ حدیث بخاری مسلم میں بھی دوسری سند کے  ساتھ ہے، مسند احمد کی ایک اور حدیث میں ہے  حضرت انس بن مالک رضی اللہ تعالیٰ عنہ فرماتے  ہیں  رسول ا کرم صلی اللہ علیہ و سلم نے  فرمایا ایک ایسے  جنتی کو لایا جائے  گا جس سے  اللہ تعالیٰ فرمائے  گا کہو تم نے  کیسی جگہ پائی؟ وہ جواب دے  گا اللہ بہت ہی بہتر۔ اللہ تعالیٰ فرمائے  گا اچھا اور کچھ مانگنا ہو تو مانگو دل میں جو تمنا ہو کہو تو یہ کہے  گا باری تعالیٰ میری صرف یہی تمنا ہے  اور میرا یہی ایک سوال ہے  کہ مجھے  دنیا میں پھر بھیج دیا جائے  میں تیری راہ میں جہاد کروں اور پھر شہید کیا جاؤں پھر زندہ ہو جاؤں پھر شہید کیا جاؤں دس مرتبہ ایسا ہی ہو کیونکہ وہ شہادت کی فضیلت اور شہید کے  مرتبے  دیکھ چکا ہو گا اسی طرح ایک جہنمی کو بلایا جائے  گا اور اس سے  اللہ تعالیٰ فرمائے  گا۔ اے  ابن آدم تو نے  اپنی جگہ کیسی پائی؟ وہ کہے  گا اللہ بہت ہی بری۔ اللہ تعالیٰ فرمائے  گا کیا ساری زمین بھر کر سونا دے  کر ان عذابوں سے  چھوٹنا تجھے  پسند ہے ؟ وہ کہے  گا ہاں اے  باری تعالیٰ اس وقت جناب باری تعالیٰ فرمائے  گا تو جھوٹا ہے  میں نے  تو اس سے  بہت ہی کم اور بالکل آسان چیز تجھ سے  طلب کی تھی لیکن تو نے  اسے  بھی نہ کیا چنانچہ وہ جہنم میں بھیج دیا جائے  گا، پس یہاں فرمایا ان کے  لئے  تکلیف دہ عذاب ہیں  اور ایسا نہیں  جو ان عذابوں سے  اپنے  آپ کو چھڑا سکے  یا کوئی ان کی کس طرح مدد کر سکے  (اللہ تعالیٰ ہمیں اپنے  عذاب سے  نجات دے ۔ آمین)

۹۲

سب سے  زیادہ پیاری چیز اور صدقہ

 حضرت عمرو بن میمون فرماتے  ہیں  بر سے  مراد جنت ہے، یعنی اگر تم اپنی پسند کی چیزیں اللہ تعالیٰ کی راہ میں صدقہ کرتے  رہو گے  تو تمہیں  جنت ملے  گی، مسند احمد میں ہے  کہ حضرت ابو طلحہ مالدار صحابی تھے  مسجد کے  سامنے  ہی بیئرحا نامی آپ کا ایک باغ تھا جس میں کبھی کبھی آنحضرت صلی اللہ علیہ و سلم بھی تشریف لے  جایا کرتے  تھے  اور یہاں کا خوش ذائقہ پانی پیا کرتے  تھے  جب یہ آیت اتری تو حضرت ابو طلحہ رضی اللہ تعالیٰ عنہ بارگاہ نبوی میں حاضر ہو کر عرض کرنے  لگے  کہ یا رسول اللہ میرا تو سب سے  زیادہ پیارا مال یہی باغ ہے  میں آپ کو گواہ کرتا ہوں کہ میں نے  اسے  اللہ کی راہ میں صدقہ کیا اللہ تعالیٰ مجھے  بھلائی عطا فرمائے  اور اپنے  پاس اسے  میرے  لئے  ذخیرہ کرے  آپ کو اختیار ہے  جس طرح چاہیں  اسے  تقسیم کر دیں آپ بہت ہی خوش ہوئے  اور فرمانے  لگے  مسلمانوں کو اس سے  بہت فائدہ پہنچے  گا تم اسے  اپنے  قرابت داروں میں تقسیم کر دو چنانچہ حضرت ابو طلحہ نے  اسے  اپنے  رشتہ داروں اور چچا زاد بھائیوں میں بانٹ دیا، بخاری و مسلم میں ہے  کہ حضرت عمر فاروق رضی اللہ تعالیٰ عنہ بھی خدمت رسول صلی اللہ علیہ و سلم میں حاضر ہوئے  اور کہا کہ حضور صلی اللہ علیہ و سلم مجھے  اپنے  تمام مال میں سب سے  زیاد مرغوب مال خیبر کی زمین کا حصہ ہے  میں اسے  راہ اللہ دینا چاہتا ہوں فرمائیے  کیا کروں ؟ آپ نے  فرمایا اسے  وقف کر دو اصل روک لو اور پھل وغیرہ راہ اللہ کر دو۔ مسند بزاز میں ہے  کہ حضرت عبد اللہ بن عمر رضی اللہ تعالیٰ عنہ فرماتے  ہیں  میں نے  اس آیت کی تلاوت کر کے  سوچا تو مجھے  کوئی چیز ایک کنیز سے  زیادہ پیاری نہ تھی۔ میں نے  اس لونڈی کو راہ للہ آزاد کر دیا، اب تک بھی میرے  دل میں اس کی ایسی محبت ہے  کہ اگر کسی چیز کو اللہ تعالیٰ کے  نام پر دے  کر پھر لوٹا لینا جائز ہو تو میں کم از کم اس سے  نکاح کر لیتا۔

۹۳

بارگاہ رسالت صلی اللہ علیہ و سلم میں یہودی وفد

 مسند احمد میں ہے  کہ یہودیوں کی ایک جماعت حضور صلی اللہ علیہ و سلم کے  پاس آئی اور کہنے  لگی کہ ہم آپ سے  چند سوال کرنا چاہتے  ہیں  جن کے  جواب نبیوں کے  سوا اور کوئی نہیں  آپ نے  فرمایا پوچھو لیکن پہلے  تم لوگ وعدہ کرو اگر میں صحیح صحیح جواب دے  دوں تو تمہیں  میری نبوت کے  تسلیم کر لینے  میں کوئی عذر نہ ہو گا انہوں نے  اس شرط کو منظور کر لیا کہ اگر آپ نے  سچے  جواب دے  تو ہم اسلام قبول کر لیں گے  ساتھ ہی انہوں نے  بڑی بڑی قسمیں بھی کھائیں پھر پوچھا کہ بتائیے ۔ حضرت اسرائیل نے  کیا چیز اپنے  اوپر حرام کی تھی؟ عورت مرد کے  پانی کی کیا کیفیت ہے ؟ اور کیوں کبھی لڑکا ہوتا ہے  اور کبھی لڑکی؟ اور نبی امی کی نیند کیسی ہے ؟ اور فرشتوں میں سے  کونسا فرشتہ اس کے  پاس وحی لے  کر آتا ہے ؟ آپ نے  فرمایا جب حضرت اسرائیل سخت بیمار ہوئے  تو نذر مانی کہ اگر اللہ تعالیٰ مجھے  شفا دے  گا تو میں سب سے  زیادہ پیاری چیز کھانے  پینے  کی چھوڑ دوں گا جب شفا یاب ہو گئے  تو اونٹ کا گوشت اور دودھ چھوڑ دیا، مرد کا پانی سفید رنگ اور گاڑھا ہوتا ہے  اور عورت کا پانی زردی مائل پتلا ہوتا ہے  دونوں سے  جو اوپر آ جائے  اس پر اولاد نر مادہ ہوتی ہے، اور شکل و شباہت میں بھی اسی پر جاتی ہے ۔ اس نبی امی صلی اللہ علیہ و سلم کی نیند میں اس کی آنکھیں سوتی ہیں  لیکن دل جاگتا رہتا ہے ۔ میرے  پاس وحی لے  کر وہی فرشتہ آتا ہے  جو تمام انبیاء کے  پاس بھی آتا رہا یعنی جبرائیل علیہ السلام، بس اس پر وہ چیخ اٹھے  اور کہنے  لگے  کوئی اور فرشتہ آپ کا ولی ہوتا تو ہمیں آپ کی نبوت تسلیم کرنے  میں کوئی عذر نہ رہتا۔ ہر سوال کے  جواب کے  وقت آپ انہیں  قسم دیتے  اور ان سے  دریافت فرماتے  اور وہ اقرار کرتے  کہ ہاں جواب صحیح ہے  انہیں  کے  بارے  میں آیت (من کان عدوا الجبریل) الخ، نازل ہوئی اور روایت میں ہے  کہ حضرت اسرائیل کو عرق النساء کی بیماری تھی اور اس میں ان کا ایک پانچواں سوال یہ بھی ہے  کہ یہ رعد کیا چیز ہے ؟ آپ نے  فرمایا اللہ عزوجل کے  فرشتوں میں سے  ایک فرشتہ جو بادلوں پر مقرر ہے  اس کے  ہاتھ میں آگ کا کوڑا ہے  جس سے  بادلوں کا جہاں اللہ تعالیٰ کا حکم ہو لے  جاتا ہے  اور یہ گرج کی آواز اسی کی آواز ہے ۔ جبرئیل کا نام سن کر یہ کہنے  لگے  وہ تو عذاب اور جنگ و جدال کا فرشتہ ہے  اور ہمارا دشمن ہے، اگر پیداوار اور بارش کے  فرشتے  حضرت میکائیل آپ کے  رفیق ہوتے  تو ہم مان لیتے ۔ حضرت یعقوب کی روش پر ان کی اولاد بھی رہی اور وہ بھی اونٹ کے  گوشت سے  پرہیز کرتی رہی، اس آیت کو اگلی آیت سے  مناسبت ایک تو یہ ہے  کہ جس طرح حضرت اسرائیل نے  اپنی چہیتی چیز اللہ کی نذر کر دی اسی طرح تم بھی کیا کرو۔ لیکن یعقوب کی شریعت میں اس کا طریقہ یہ تھا کہ اپنی پسندیدہ اور مرغوب چیز کا نام اللہ پر ترک کر دیتے  تھے  اور ہماری شریعت میں یہ طریقہ نہیں  بلکہ ہمیں یہ فرمایا گیا ہے  کہ ہم اپنی چاہت کی چیزیں اللہ کے  نام پر خرچ کر دیا کریں، جیسے  فرمایا آیت (واتی المال علی حبہ) اور فرمایا آیت (یطمعون الطعام علی حبہ) باوجود محبت اور چاہت کے  وہ ہماری راہ میں مال خرچ کرتے  اور مسکینوں کو کھانا دیتے  ہیں، دوسری مناسبت یہ بھی ہے  کہ پہلی آیتوں میں نصرانیوں کی تردید تھی تو یہاں یہودیوں کا رد ہو رہا ہے  ان کے  رد میں حضرت عیسیٰ کی پیدائش کا صحیح واقعہ بتا کر ان کے  عقیدے  کا رد کیا تھا، یہاں نسک کا صاف بیان کر کے  ان کی اولاد بھی اسے  حرام جانتی رہی چنانچہ توراۃ میں بھی اس کی حرمت نازل ہوئی، اسی طرح اور بھی بعض چیزیں حرام کی گئیں یہ نسخ نہیں  تو اور کیا ہے ؟ حضرت آدم علیہ السلام کی صلبی اولاد کا آپس میں بہن بھائی کا نکاح ابتداء جائز ہوتا تھا لیکن بعد میں حرام کر دیا، عورتوں پر لونڈیوں سے  نکاح کرنا شریعت ابراہیمی میں مباح تھا خود حضرت ابراہیم حضرت سارہ پر حضرت ہاجرہ کو لائے، لیکن پھر توراۃ میں اس سے  روکا گیا، دو بہنوں سے  ایک ساتھ نکاح کرنا حضرت یعقوب کے  زمانہ میں جائز تھا بلکہ خود حضرت یعقوب کے  گھر میں بیک وقت دو سگی بہنیں تھیں لیکن پھر توراۃ میں یہ حرام ہو گیا اسی کو نسخ کہتے  ہیں  اسے  وہ دیکھ رہے  ہیں  اپنی کتاب میں پڑھ رہے  ہیں  لیکن پھر نسخ کا انکار کر کے  انجیل کو اور حضرت عیسیٰ کو نہیں  مانتے  اور ان کے  بعد ختم المرسلین صلی اللہ علیہ و سلم کے  ساتھ بھی یہی سلوک کرتے  ہیں، تو یہاں فرمایا کہ توراۃ کے  نازل ہونے  سے  پہلے  تمام کھانے  حلال تھے  سوائے  اس کے  جسے  اسرائیل علیہ السلام نے  اپنی جان پر حرام کر لیا تھا تم توراۃ لاؤ اور پڑھو اس میں موجود ہے، پھر اس کے  باوجود تمہاری یہ بہتان بازی اور افتراء پردازی کہ اللہ نے  ہمارے  لئے  ہفتہ ہی کے  دن کو ہمیشہ کے  لئے  عید کا دن مقرر کیا ہے  اور ہم سے  عہد لیا ہے  کہ ہم ہمیشہ توراۃ ہی کے  عامل رہیں  اور کسی اور نبی کو نہ مانیں یہ کس قدر ظلم و ستم ہے، تمہاری یہ باتیں اور تمہاری یہ روش یقیناً تمہیں  ظالم و جابر ٹھہراتی ہے ۔ اللہ نے  سچی خبر دے  دی ابراہیمی دین وہی ہے  جسے  قرآن بیان کر رہا ہے  تم اس کتاب اور اس نبی کی پیروی کرو ان سے  اعلیٰ کوئی نبی ہے  نہ اس سے  بہتر اور زیادہ واضح کوئی اور شریعت ہے، جیسے  اور جگہ ہے  آیت (قل اننی ھدنی ربی الی صراط مستقیم) اے  نبی تم کہہ دو  کہ مجھے  میرے  رب نے  موحد ابراہیم حنیف کے  مضبوط دین کی سیدھی راہ دکھا دی ہے ۔ اور جگہ ہے  ہم نے  تیری طرف وحی کی کہ موحد ابراہیم حنیف کے  دین کی تابعداری کر۔

۹۶

ذکر بیت اللہ اور احکامات حج

 یعنی لوگوں کی عبادت قربانی طواف نماز اعتکاف وغیرہ کے  لئے  اللہ تعالیٰ کا گھر ہے  جس کے  بانی حضرت ابراہیم خلیل ہیں، جن کی تابعداری کا دعویٰ یہود و نصاریٰ مشرکین اور مسلمان سب کو ہے  وہ اللہ کا گھر جو سب سے  پہلے  مکہ میں بنایا گیا ہے، اور بلاشبہ خلیل اللہ ہی حج کے  پہلے  منادی کرنے  والے  ہیں  تو پھر ان پر تعجب اور افسوس ہے  جو ملت حنیفی کا دعویٰ کریں اور اس گھر کا احترام نہ کریں حج کو یہاں نہ آئیں بلکہ اپنے  قبلہ اور کعبہ الگ الگ بناتے  پھریں ۔ اس بیت اللہ کی بنیادوں میں ہی برکت و ہدایت ہے  اور تمام جہان والوں کے  لئے  ہے، حضرت ابوذر رضی اللہ تعالیٰ عنہ نے  رسول اللہ صلی اللہ علیہ و سلم سے  پوچھا کہ سب سے  پہلے  کونسی مسجد بنائی گئی ہے ؟ آپ نے  فرمایا مسجد حرام، پوچھا پھر کونسی؟ فرمایا مسجد بیت المقدس پوچھا ان دونوں کے  درمیان کتنا وقت ہے ؟ فرمایا چالیس سال پوچھا پھر کونسی؟ آپ نے  فرمایا جہاں کہیں  نماز کا وقت آجائے  نماز پڑھ لیا کرو ساری زمین مسجد ہے  (مسند) احمد وبخاری مسلم) حضرت علی فرماتے  ہیں  گھر تو پہلے  بہت سے  تھے  لیکن خاص اللہ تعالیٰ کی عبادت کا گھر سب سے  پہلا یہی ہے، کسی شخص نے  آپ سے  پوچھا کہ زمین پر پہلا گھر یہی بنا ہے  تو آپ نے  فرمایا نہیں  ہاں برکتوں اور مقام ابراہیم اور امن والا گھر یہی پہلا ہے، بیت اللہ شریف کے  بنانے  کی پوری کیفیت سورہ بقرہ کی آیت (وعھدنا الی ابراھیم) الخ، کی تفسیر میں پہلے  گزر چکی ہے  وہیں  ملاحظہ فرما لیجئے  یہاں دوبارہ بیان کرنے  کی ضرورت نہیں، سدی کہتے  ہیں  سب سے  پہلے  روئے  زمین پر یہی گھر بنا، لیکن صحیح قول حضرت علی کا ہی ہے  اور وہ حدیث جو ییہقی میں ہے  جس میں ہے  کہ آدم و حوا نے  بحکم الہ بیت اللہ بنایا اور طواف کیا اور اللہ تعالیٰ نے  کہا کہ تو سب سے  پہلا انسان ہے  اور یہ سب سے  پہلا گھر ہے  یہ حدیث ابن لہیعہ کی روایت سے  ہے  اور وہ ضعیف راوی ہیں، ممکن ہے  یہ حضرت عبد اللہ بن عمر کا اپنا قول ہو اور یرموک والے  دن انہیں  جو دو پورے  اہل کتاب کی کتابوں کے  ملے  تھے  انہی میں یہ بھی لکھا ہوا ہو۔ "مکہ” مکہ شریف کا مشہور نام ہے  چونکہ بڑے  بڑے  جابر شخصوں کی گردنیں یہاں ٹوٹ جاتی تھیں ہر بڑائی والا یہاں پست ہو جاتا تھا، اس لئے  اسے  مکہ کہا گیا اور اس لئے  بھی کہ لوگوں کی بھیڑ بھاڑ یہاں ہوتی ہے  اور ہر وقت کھچا کھچ بھرا رہتا ہے  اور اس لئے  بھی کہ یہاں لوگ خلط ملط ہو جاتے  ہیں  یہاں تک کہ کبھی عورتیں آگے  نماز پڑھتی ہوتی ہیں  اور مرد ان کے  پیچھے  ہوتے  ہیں  جو اور کہیں  نہیں  ہوتا، حضرت ابن عباس فرماتے  ہیں  "فج” سے  "تنعیم” تک مکہ ہے  بیت اللہ سے  بطحا تک بکہ ہے  بیت اللہ اور مسجد کو بکہ کہا گیا ہے، بیت اللہ اور اس آس پاس کی جگہ کو بکہ اور باقی شہر کو مکہ بھی کہا گیا ہے، اس کے  اور بھی بہت سے  نام ہیں  مثلاً بیت العتیق، بیت الحرام، بلد الامین، بلد المامون، ام رحم، ام القری، صلاح، عرش، قادس، مقدس، ناسبہ، ناسسہ، حاطمہ، راس، کوثا البلدہ البینۃ العکبہ۔ اس میں ظاہر نشانیاں ہیں  جو اس کی عظمت و شرافت کی دلیل ہیں  اور جن سے  ظاہر ہے  کہ خلیل اللہ کی بنا یہی ہے  اس میں مقام ابراہیم بھی ہے  جس پر کھڑے  ہو کر حضرت اسماعیل سے  پتھر لے  کر حضرت ابراہیم کعبہ کی دیواریں اونچی کر رہے  تھے، یہ پہلے  تو بیت اللہ شریف کی دیوار سے  لگا ہوا تھا لیکن حضرت عمر رضی اللہ تعالیٰ عنہ نے  اپنی خلافت کے  زمانہ میں اسے  ذرا ہٹا کر مشرق رخ کر دیا تھا کہ پوری طرح طواف ہو سکے  اور جو لوگ طواف کے  بعد مقام ابراہیم کے  پیچھے  نماز پڑھتے  ہیں  ان کے  لئے  پریشانی اور بھیڑ بھاڑ نہ ہو، اسی کی طرف نماز پڑھنے  کا حکم ہوا ہے  اور اس کے  متعلق بھی پوری تفسیر آیت (واتخذوا من مقام ابراھیم) کی تفسیر میں پہلے  گزر چکی ہے  فالحمد للہ۔ حضرت ابن عباس فرماتے  ہیں  آیات بینات میں سے  ایک مقام ابراہیم بھی ہے  باقی اور بھی ہیں، حضرت مجاہد فرماتے  ہیں  کہ خلیل اللہ کے  قدموں کے  نشان جو مقام ابراہیم پر تھے  یہ بھی آیات بینات میں سے  ہیں، کل حرم کو اور حطیم کو اور سارے  ارکان حج کو بھی مکہ امن والا رہا باپ کے  قاتل کو بھی یہاں پاتے  تو نہ چھیڑتے  ابن عباس فرماتے  ہیں  بیت اللہ پناہ چاہنے  والے  کو پناہ دیتا ہے  لیکن جگہ اور کھانا پینا نہیں  دیتا اور جگہ ہے  آیت (اولم یروا انا جعلنا حرما امنا) الخ، کیا یہ نہیں  دیکھتے  کہ ہم نے  حرم کو امن کی جگہ بنایا اور جگہ ہے  آیت (وامنھم من خوف) الخ، ہم نے  انہیں  خوف سے  امن دیا نہ صرف انسان کے  لئے  امن ہے  بلکہ شکار کرنا بلکہ شکار کو بھگانا اسے  خوف زدہ کرنا اسے  اس کے  ٹھکانے  یا گھونسلے  سے  ہٹانا اور اڑانا بھی منع ہے  اس کے  درخت کاٹنا یہاں کی گھاس اکھیڑنا بھی ناجائز ہے  اس مضمون کی بہت سی حدیثیں پورے  بسط کے  ساتھ آیت وعھدنا الخ، کی تفسیر میں سورہ بقرہ میں گزر چکی ہیں، مسند احمد ترمذی اور نسائی میں حدیث ہے  جسے  امام ترمذی نے  حسن صحیح کہا ہے  کہ نبی صلی اللہ علیہ و سلم نے  مکہ کے  بازار حرورہ میں کھڑے  ہو کر فرمایا کہ اے  مکہ تو اللہ تعالیٰ کو ساری زمین سے  بہتر اور پیارا ہے  اگر میں زبردستی تجھ سے  نہ نکالا جاتا تو ہرگز تجھے  نہ چھوڑتا، اور اس آیت کے  ایک معنی یہ بھی ہیں  کہ جو اس گھر میں داخل ہوا وہ جہنم سے  بچ گیا، بیہقی کی ایک مرفوع حدیث میں ہے  جو بیت اللہ میں داخل ہوا وہ نیکی میں آیا اور برائیوں سے  دور ہوا، اور گناہ بخش دیا گیا لیکن اس کے  ایک راوی عبد اللہ بن تومل قوی نہیں  ہیں ۔ آیت کا یہ آخری حصہ حج کی فرضیت کی دلیل ہے  بعض کہتے  ہیں  آیت (واتموا الحج والعمرۃ للہ) الخ، والی آیت دلیل فرضیت ہے  لیکن پہلی بات زیادہ واضح ہے، کئی ایک احادیث میں وارد ہے  کہ حج ارکان اسلام میں سے  ایک رکن ہے، اس کی فرضیت پر مسلمانوں کا اجماع ہے، اور یہ بات بھی ثابت ہے  کہ عمر بھر میں ایک مرتبہ استطاعت والے  مسلمان پر حج فرض ہے، نبی صلی اللہ علیہ و سلم نے  اپنے  خطبہ میں فرمایا لوگو تم پر اللہ تعالیٰ نے  حج فرض کیا ہے  تم حج کرو ایک شخص نے  پوچھا حضور کیا ہر سال؟ آپ خاموش رہے  اس نے  تین مرتبہ یہی سوال کیا آپ نے  فرمایا اگر میں ہاں کہ دیتا تو فرض ہو جاتا پھر بجا نہ لا سکتے  میں جب خاموش رہوں تو تم کرید کر پوچھا نہ کرو تم سے  اگلے  لوگ اپنے  انبیاء سے  سوالوں کی بھر مار اور نبیوں پر اختلاف کرنے  کی وجہ سے  ہلاک ہو گئے  میرے  حکموں کو طاقت بھر بجا لاؤ۔ اور جس چیز میں منع کروں اس سے  رک جاؤ (مسند احمد) صحیح مسلم شریف کی اس حدیث شریف میں اتنی زیادتی ہے  کہ یہ پوچھنے  والے  اقرع بن حابس تھے  اور حضور صلی اللہ علیہ و سلم نے  جواب یہ بھی فرمایا کہ عمر میں ایک مرتبہ فرض ہے  اور پھر نفل۔ ایک روایت میں ہے  کہ اسی سوال کے  بارے  میں آیت (لا تسئلوا عن اشیاء) الخ، یعنی زیادتی سوال سے  بچو نازل ہوئی (مسند احمد) ایک اور روایت میں ہے  اگر میں ہاں کہتا تو ہر سال حج واجب ہوتا تم بجا نہ لا سکتے  تو عذاب نازل ہوتا (ابن ماجہ) ہاں حج میں تمتع کرنے  کا جواز حضور صلی اللہ علیہ و سلم نے  ایک سائل کے  سوال پر ہمیشہ کے  لئے  جائز فرمایا تھا، ایک اور حدیث میں ہے  کہ نبی صلی اللہ علیہ و سلم نے  حجۃ الوداع میں امہات المومنین یعنی اپنی بیویوں سے  فرمایا تھا حج ہو چکا اب گھر سے  نہ نکلنا، رہی استطاعت اور طاقت سو وہ کبھی تو خود انسان کو بغیر کسی ذریعہ کے  ہوتی ہے  کبھی کسی اور کے  واسطے  سے  جیسے  کہ کتب احکام میں اس کی تفصیل موجود ہے، ترمذی میں ہے  کہ ایک شخص نے  رسول اللہ صلی اللہ علیہ و سلم سے  دریافت کیا کہ یا رسول اللہ حاجی کون ہے ؟ آپ نے  فرمایا پراگندہ بالوں اور میلے  کچیلے  کپڑوں والا ایک اور نے  پوچھا یا رسول اللہ کونسا حج افضل ہے، آپ نے  فرمایا جس میں قربانیاں کثرت سے  کی جائیں اور لبیک زیادہ پکارا جائے  ایک اور شخص نے  سوال کیا حضور صلی اللہ علیہ و سلم سبیل سے  کیا مراد ہے ؟ آپ نے  فرمایا توشہ بھتہ کھانے  پینے  کے  لائق سامان خرچ اور سواری، اس حدیث کا ایک راوی گو ضعیف ہے  مگر حدیث کی متابعت اور سند بہت سے  صحابیوں سے  مختلف سندوں سے  مروی ہے  کہ حضور صلی اللہ علیہ و سلم نے  آیت (من استطاع الیہ سبیلا) کی تفسیر میں زادو راحلہ یعنی توشہ اور سواری بتائی ہے ۔ مسند کی ایک اور حدیث میں ہے  رسول اللہ صلی اللہ علیہ و سلم فرماتے  ہیں  فرض حج جلدی ادا کر لیا کرو نہ معلوم کل کیا پیش آئے، ابو داؤد وغیرہ میں ہے  حج کا ارادہ کرنے  والے  کو جلد اپنا ارادہ پورا کر لینا چاہئے ۔ ابن عباس فرماتے  ہیں  جس کے  پاس تین سو درہم ہوں وہ طاقت والا ہے، عکرمہ فرماتے  ہیں  مراد صحت جسمانی ہے  پھر فرمایا جو کفر کرے  یعنی فرضیت حج کا انکار کرے، حضرت عکرمہ فرماتے  ہیں  جب یہ آیت اتری کہ دین اسلام کے  سوا جو شخص کوئی اور دین پسند کرے  اس سے  قبول نہ کیا جائے  گا تو یہودی کہنے  لگے  ہم بھی مسلمان ہیں، نبی صلی اللہ علیہ و سلم نے  فرمایا پھر مسلمانوں پر تو حج فرض ہے  تم بھی حج کرو تو وہ صاف انکار بیٹھے  جس پر یہ آیت اتری کہ اس کا انکاری کافر ہے  اور اللہ تعالیٰ تمام جہان والوں سے  بے  پرواہ ہے، حضرت علی رضی اللہ تعالیٰ عنہ فرماتے  ہیں  کہ رسول اللہ صلی اللہ علیہ و سلم نے  فرمایا جو شخص کھانے  پینے  اور سواری پر قدرت رکھتا ہو اور اتنا مال بھی اس کے  پاس ہو پھر حج نہ کرے  تو اس کی موت یہودیت یا نصرانیت پر ہو گی اللہ تعالیٰ فرماتا ہے  اللہ کے  لئے  لوگوں پر حج بیت اللہ ہے  جو اس کے  راستہ کی طاقت رکھیں اور جو کفر کرے  تو اللہ تعالیٰ تمام جہان والوں سے  بے  پرواہ ہے، اس کے  راوی پر بھی کلام ہے، حضرت عمر فاروق فرماتے  ہیں  طاقت رکھ کر حج نہ کرنے  والا یہودی ہو کر مرے  گا یا نصرانی ہو کر، اس کی سند بالکل صحیح ہے  (حافظ ابوبکر اسماعیلی) مسند سعید بن منصور میں ہے  کہ فاروق اعظم رضی اللہ تعالیٰ عنہ نے  فرمایا میرا مقصد ہے  کہ میں لوگوں کو مختلف شہروں میں بھیجوں وہ دیکھیں جو لوگ باوجود مال رکھنے  کے  حج نہ کرتے  ہوں ان پر جزیہ لگا دیں وہ مسلمان نہیں  ہیں  وہ مسلمان نہیں  ہیں ۔

۹۸

کافروں کا انجام

 اہل کتاب کے  کافروں کو اللہ تعالیٰ دھمکاتا ہے  جو حق سے  دشمنی کرتے  اور اللہ تعالیٰ کی آیتوں سے  کفر کرتے  دوسرے  لوگوں کو بھی پورے  زور سے  اسلام سے  روکتے  تھے  باوجود یکہ رسول کی حقانیت کا انہیں  یقینی علم تھا اگلے  انبیاء اور رسولوں کی پیش گوئیاں اور ان کی بشارتیں  ان کے  پاس موجود تھیں نبی امی ہاشمی عربی مکی مدنی سید الولد آدم خاتم الانبیاء رسول رب ارض و سماء صلی اللہ علیہ و سلم کا ذکر ان کتابوں میں موجود تھا پھر بھی اپنی بے  ایمانی پر بضد تھے  اس لئے  ان سے  اللہ تعالیٰ فرماتا ہے  کہ میں خوب دیکھ رہا ہوں تم کس طرح میرے  نبیوں کی تکذیب کرتے  ہو اور کس طرح خاتم الانبیاء کو ستاتے  ہو اور کس طرح میرے  مخلص بندوں کی راہ میں روڑے  اٹکا رہے  ہو میں تمہارے  اعمال سے  غافل نہیں  ہوں تمام برائیوں کا بدلہ دوں گا اس دن پکڑوں گا جس دن تمہیں  کوئی سفارشی اور مددگار نہ ملے ۔

۱۰۰

کامیابی کا انحصار کس پر ہے

اللہ تبارک و تعالیٰ اپنے  مومن بندوں کو اہل کتاب کے  اس بد باطن فرقہ کی اتباع کرنے  سے  روک رہا ہے  کیونکہ یہ حاسد ایمان کے  دشمن ہیں  اور عرب کی رسالت انہیں  ایک آنکھ نہیں  بھاتی، جیسے  اور جگہ ہے  آیت (ودکثیر) الخ، یہ لوگ جل بھن رہے  ہیں ۔ اور تمہیں  ایمان سے  ہٹانا چاہتے  ہیں  تم ان کے  کھوکھلے  دباؤ میں نہ آ جانا، گو کفر تم سے  بہت دور ہے  لیکن پھر بھی میں تمہیں  آگاہ کئے  دیتا ہوں، اللہ تعالیٰ کی آیتیں دن رات تم میں پڑھی جا رہی ہیں  اور اللہ تعالیٰ کا سچا رسول صلی اللہ علیہ و سلم تم میں موجود ہے  جیسے  اور جگہ ہے  آیت (مالکم لا تومنون باللہ) تم ایمان کیسے  نہ لاؤ رسول صلی اللہ علیہ و سلم تمہیں  تمہارے  رب کی طرف بلا رہے  ہیں  اور تم سے  عہد بھی لیا جا چکا ہے، حدیث شریف میں ہے  کہ حضور صلی اللہ علیہ و سلم نے  ایک روز اپنے  اصحاب سے  پوچھا تمہارے  نزدیک سب سے  بڑا ایمان والا کون ہے ؟ انہوں نے  کہا فرشتے  آپ نے  فرمایا بھلا وہ ایمان کیوں نہ لاتے ؟ انہیں  تو اللہ تعالیٰ کی وحی سے  براہ راست تعلق ہے، صحابہ نے  کہا پھر ہم، فرمایا تم ایمان کیوں نہ لاتے  تم میں تو میں خود موجود ہوں صحابہ نے  کہا پھر حضور صلی اللہ علیہ و سلم خود ہی ارشاد فرمائیں فرمایا کہ تمام لوگوں سے  زیادہ عجیب ایمان والے  وہ ہوں گے  جو تمہارے  بعد آئیں گے  وہ کتابوں میں لکھا پائیں گے  اور اس پر ایمان لائیں گے  (امام ابن کثیر نے  اس حدیث کی سندوں کا اور اس کے  معنی کا پورا بیان شرح صحیح بخاری میں کر دیا ہے  فالحمد للہ) پھر فرمایا کہ باوجود اس کے  تمہارا مضبوطی سے  اللہ کے  دین کو تھام رکھنا اور اللہ تعالیٰ کی پاک ذات پر پورا توکل رکھنا ہی موجب ہدایت ہے  اسی سے  گمراہی دور ہوتی ہے  یہی شیوہ رضا کا باعث ہے  اسی سے  صحیح راستہ حاصل ہوتا ہے  اور کامیابی اور مراد ملتی ہے ۔

۱۰۲

اللہ تعالیٰ کی رسی قرآن حکیم ہے

 اللہ تعالیٰ سے  پورا پورا ڈرنا یہ ہے  کہ اس کی اطاعت کی جائے  نافرمانی نہ کی جائے  اس کا ذکر کیا جائے  اور اس کی یاد نہ بھلائی جائے  اس کا شکر کیا جائے  کفر نہ کیا جائے، بعض روایتوں میں یہ تفسیر مرفوع بھی مروی ہے  لیکن ٹھیک بات یہی ہے  کہ یہ موقوف ہے  یعنی حضرت عبد اللہ بن مسعود رضی اللہ تعالیٰ عنہ کا قول ہے  واللہ اعلم۔ حضرت انس کا فرمان ہے  کہ انسان اللہ عزوجل سے  ڈرنے  کا حق نہیں  بجا لا سکتا جب تک اپنی زبان کو محفوظ نہ رکھے، اکثر مفسرین نے  کہا ہے  کہ یہ آیت (فاتقوا اللہ ماستطعتم) کی آیت سے  منسوخ ہے  اس دوسری آیت میں فرما دیا ہے  کہ اپنی طاقت کے  مطابق اس سے  ڈرتے  رہا کرو، حضرت ابن عباس فرماتے  ہیں  منسوخ نہیں  بلکہ مطلب یہ ہے  کہ اللہ کی راہ میں جہاد کرتے  رہو اس کے  کاموں میں کسی ملامت کرنے  والے  کی ملامت کا خیال نہ کرو عدل پر جم جاؤ یہاں تک کہ خود اپنے  نفس پر عدل کے  احکام جاری کرو اپنے  ماں باپ اور اپنی اولاد کے  بارے  میں بھی عدل و انصاف برتا کرو۔ پھر فرمایا کہ اسلام پر ہی مرنا یعنی تمام زندگی اس پر قائم رہنا تاکہ موت بھی اسی پر آئے، اس رب کریم کا اصول یہی ہے  کہ انسان اپنی زندگی جیسی رکھے  ویسی ہی اسے  موت آتی ہے  اور جیسی موت مرے  اسی پر قیامت کے  دن اٹھایا جاتا ہے  واللہ تعالیٰ اللہ تعالیٰ کی ناپسند موت سے  ہمیں اپنی پناہ میں رکھے  آمین۔ مسند احمد میں ہے  کہ لوگ بیت اللہ شریف کا طواف کر رہے  تھے  اور حضرت ابن عباس بھی وہاں تھے  ان کے  ہاتھ میں لکڑی تھی بیان فرمانے  لگی کہ رسول اللہ صلی اللہ علیہ و سلم نے  اس آیت کی تلاوت کی پھر فرمایا کہ اگر زقوم کا ایک قطرہ بھی دنیا میں گرا دیا جائے  تو دنیا والوں کی ہر کھانے  والی چیز خراب ہو جائے  کوئی چیز کھا پی نہ سکیں پھر خیال کرو کہ ان جہنمیوں کا کیا حال ہو گا جن کا کھانا پینا ہی یہ زقوم ہو گا اور حدیث میں ہے  کہ رسول اللہ صلی اللہ علیہ و سلم فرماتے  ہیں  جو شخص جہنم سے  الگ ہوتا اور جنت میں جانا چاہتا ہو اسے  چاہئے  کہ مرتے  دم تک اللہ تعالیٰ پر اور آخرت کے  دن پر ایمان رکھے  اور لوگوں سے  وہ برتاؤ کرے  جسے  وہ خود اپنے  لئے  چاہتا ہو (مسند احمد) حضرت جابر رضی اللہ تعالیٰ عنہ فرماتے  ہیں  میں نے  نبی صلی اللہ علیہ و سلم کی زبانی آپ کے  انتقال کے  تین روز پہلے  سنا کہ دیکھو موت کے  وقت اللہ تعالیٰ سے  نیک گمان رکھنا (مسلم) رسول اللہ صلی اللہ علیہ و سلم فرماتے  ہیں  اللہ تعالیٰ کا فرمان ہے  کہ میرا بندہ میرے  ساتھ جیسا گمان رکھے  میں اس کے  گمان کے  پاس ہی ہوں اگر اس کا میرے  ساتھ حسن ظن ہے  تو میں اس کے  ساتھ اچھائی کروں گا اور اگر وہ میرے  ساتھ بدگمانی کرے  گا تو میں اس سے  اسی طرح پیش آؤں گا (مسند احمد) اس حدیث کا اگلا حصہ بخاری مسلم میں بھی ہے، مسند بزار میں ہے  کہ ایک بیمار انصاری کی بیمار پرسی کے  لئے  آنحضرت صلی اللہ علیہ و سلم تشریف لے  گئے  اور سلام کر کے  فرمانے  لگے  کہ کیسے  مزاج ہیں ؟ اس نے  کہا الحمد للہ اچھا ہوں رب کی رحمت کا امیدوار ہوں اور اس نے  عذابوں سے  ڈر رہا ہوں، آپ نے  فرمایا سنو ایسے  وقت جس دل میں خوف و طمع دونوں ہوں اللہ اس کی امید کی چیز اسے  دیتا ہے  اور ڈر خوف کی چیز سے  بچاتا ہے، مسند احمد کی ایک حدیث میں ہے  کہ حضرت حکیم بن حزام رضی اللہ تعالیٰ عنہ نے  رسول اللہ صلی اللہ علیہ و سلم سے  بیعت کی اور کہا کہ میں کھڑے  کھڑے  ہی کروں، اس کا مطلب امام نسائی نے  تو سنن نسائی میں باب باندھ کر یہ بیان کیا ہے  کہ سجدے  میں اس طرح جان چاہئے، اور یہ معنی بھی بیان کئے  گئے  ہیں  کہ میں مسلمان ہوئے  بغیر نہ مروں، اور یہ بھی مطلب بیان کیا گیا ہے  کہ جہاد پیٹھ دکھاتا ہوا نہ مارا جاؤں ۔ پھر فرمایا باہم اتفاق رکھو اختلاف سے  بچو۔ حبل اللہ سے  مراد عہد الہ ہے، جیسے  الا یحبل من اللہ الخ، میں "حبل” سے  مراد قرآن ہے، ایک مرفوع حدیث میں ہے  کہ قرآن اللہ کریم کی مضبوطی رسی ہے  اور اس کی سیدھی راہ ہے، اور روایت میں ہے  کہ کتاب اللہ اللہ تعالیٰ کی آسمان سے  زمین کی طرف لٹکائی ہوئی رسی ہے، اور حدیث میں ہے  کہ یہ قرآن اللہ سبحانہ کی مضبوط رسی ہے  یہ ظاہر نور ہے، یہ سراسر شفا دینے  والا اور نفع بخش ہے  اس پر عمل کرنے  والے  کے  لئے  یہ بچاؤ ہے  اس کی تابعداری کرنے  والے  کے  لئے  یہ نجات ہے ۔ حضرت عبد اللہ فرماتے  ہیں  ان راستوں میں تو شیاطین چل پھر رہے  ہیں  تم اللہ کے  راستے  پر آ جاؤ تم اللہ کی رسی کو مضبوط تھام لو وہ رسی قرآن کریم ہے ۔ اختلاف نہ کرو پھوٹ نہ ڈالو جدائی نہ کرو، علیحدگی سے  بچو، صحیح مسلم میں ہے  رسول اللہ صلی اللہ علیہ و سلم فرماتے  ہیں  تین باتوں سے  اللہ رحیم خوش ہوتا ہے  اور تین باتوں سے  ناخوش ہوتا ہے  ایک تو یہ کہ اسی کے  عبادت کرو اس کے  ساتھ کسی کو شریک نہ کرو دوسرے  اللہ کی رسی کو اتفاق سے  پکڑو، تفرقہ نہ ڈالو، تیسرے  مسلمان بادشاہوں کی خیر خواہی کرو، فضول بکواس، زیادتی سوال اور بربادی مال یہ تینوں چیزیں رب کی ناراضگی کا سبب ہیں، بہت سی روایتیں ایسی بھی ہیں  جن میں سے  کہ اتفاق کے  وقت وہ خطا سے  بچ جائیں گے  اور بہت سی احادیث میں نا اتفاقی سے  ڈرایا بھی ہے، ان ہدایات کے  باوجود امت میں اختلافات ہوئے  اور تہتر فرقے  ہو گئے  جن میں سے  ایک نجات پا کر جنتی ہو گا اور جہنم کے  عذابوں سے  بچ رہے  گا اور یہ وہ لوگ ہیں  جو اس پر قائم ہوں جس پر رسول اللہ صلی اللہ علیہ و سلم اور آپ کے  اصحاب تھے ۔ پھر اپنی نعمت یاد دلائی، جاہلیت کے  زمانے  میں اوس و خزرج کے  درمیان بڑی لڑائیاں اور سخت عداوت تھی آپس میں برابر جنگ جاری رہتی تھی جب دونوں قبیلے  اسلام لائے  تو اللہ کریم کے  فضل سے  بالکل ایک ہو گئے  سب حسد بغض جاتا رہا اور آپس میں بھائی بھائی بن گئے  اور نیکی اور بھلائی کے  کاموں میں ایک دوسرے  کے  مددگار اور اللہ تعالیٰ کے  دین میں ایک دوسرے  کے  ساتھ متفق ہو گئے، جیسے  اور جگہ ہے  آیت (ھوالذی ایدک بنصرہ وبالمومنین والف بین قلوبھم) الخ، وہ اللہ جس نے  تیری تائید کی اپنی مدد کے  ساتھ اور مومنوں کے  ساتھ اور ان کے  دلوں میں الفت ڈال دی۔ اپنا دوسرا احسان ذکر کرتا ہے  کہ تم آگ کے  کنارے  پہنچ چکے  تھے  اور تمہارا کفر تمہیں  اس میں دھکیل دیتا لیکن ہم نے  تمہیں  اسلام کی توفیق عطا فرما کر اس سے  بھی الگ کر لیا، حنین کی فتح کے  بعد جب مال غنیمت تقسیم کرتے  ہوئے  مصلحت دینی کے  مطابق حضور علیہ السلام نے  بعض لوگوں کو زیادہ مال دیا تو کسی شخص نے  کچھ ایسے  ہی نامناسب الفاظ زبان سے  نکال دئیے  جس پر حضور صلی اللہ علیہ و سلم نے  جماعت انصار کو جمع کر کے  ایک خطبہ پڑھا اس میں یہ بھی فرمایا تھا کہ اے  جماعت انصار کیا تم گمراہ نہ تھے ؟ پھر اللہ تعالیٰ نے  میری وجہ سے  تمہیں  ہدایت دی؟ کیا تم متفرق نہ تھے  پھر رب دو عالم نے  میری وجہ سے  تمہارے  دلوں میں الفت ڈال دی کیا تم فقیر نہ تھے  اللہ تعالیٰ نے  تمہیں  میری وجہ سے  غنی کر دیا؟ ہر ہر سوال کے  جواب میں یہ پاکباز، جماعت یہ اللہ والا گروہ کہتا جاتا تھا کہ ہم پر اللہ تعالیٰ اور رسول صلی اللہ علیہ و سلم کے  احسان اور بھی بہت سے  ہیں  اور بہت بڑے  بڑے  ہیں، حضرت محمد بن اسحاق فرماتے  ہیں  کہ جب اوس و خزرج جیسے  صدیوں کے  آپس کے  دشنوں کو یوں بھائی بھائی بنا ہوا دیکھا تو یہودیوں کی آنکھوں میں کانٹا کھٹکنے  لگا انہوں نے  آدمی مقرر کئے  کہ وہ ان کی محفلوں اور مجلس میں جایا کریں اور اگلی لڑائیاں اور پرانی عداوتیں انہیں  یاد دلائیں ان کے  مقتولوں کی یاد تازہ کرائیں اور اس طرح انہیں  بھڑکائیں ۔ چنانچہ ان کا یہ داؤ ایک مرتبہ چل بھی گیا اور دونوں قبیلوں میں پرانی آگ بھڑک اٹھی یہاں تک کہ تلواریں کھچ گئیں ٹھیک دو جماعتیں ہو گئیں اور وہی جاہلیت کے  نعرے  لگنے  لگے  ہتھیار سجنے  لگے  اور ایک دوسرے  کے  خون کے  پیاسے  بن گئے  اور یہ ٹھہر گیا کہ حرہ کے  میدان میں جا کر ان سے  دل کھول کر لڑیں اور مردانگی کے  جوہر دکھائیں پیاسی زمین کو اپنے  خون سے  سیراب کریں لیکن حضور علیہ السلام کو پتہ چل گیا آپ فوراً موقع پر تشریف لائے  اور دونوں گروہ کو ٹھنڈا کیا اور فرمانے  لگے  پھر جاہلیت کے  نعرے  تم لگانے  لگے  میری موجودگی میں ہی تم نے  پھر جنگ و جدال شروع کر دیا؟ پھر آپ نے  یہی آیت پڑھ کر سنائی سب نادم ہوئے  اور اپنی دو گھڑی پہلے  کی حرکت پر افسوس کرنے  لگے  اور آپس میں نئے  سرے  سے  معانقہ مصافحہ کیا اور پھر بھائیوں کی طرح گلے  مل گئے  ہتھیار ڈال دئیے  اور صلح صفائی ہو گئی، حضرت عکرمہ رحمۃ اللہ علیہ فرماتے  ہیں  کہ یہ آیت اس وقت نازل ہوئی جب حضرت صدیقہ رضی اللہ تعالیٰ عنہا پر منافقوں نے  تہمت لگائی تھی اور آپ کی برات نازل ہوئی تھی تب ایک دوسرے  کے  مقابلہ میں تن گئے  تھے، فاللہ اعلم

۱۰۴

یوم آخرت منافق اور مومن کی پہچان

حضرت ضحاک فرماتے  ہیں  اس جماعت سے  مراد خاص صحابہ اور خاص راویان حدیث ہیں  یعنی مجاہد اور علماء امام ابو جعفر باقر رحمۃ اللہ علیہ فرماتے  ہیں  کہ رسول اللہ صلی اللہ علیہ و سلم نے  اس آیت کی تلاوت کی پھر فرمایا صبر سے  مراد قرآن و حدیث کی اتباع ہے، یاد رہے  کہ ہر ہر متنفس پر تبلیغ حق فرض ہے  لیکن تاہم ایک جماعت تو خاص اسی کام میں مشغول رہنی چاہئے ، رسول اللہ صلی اللہ علیہ و سلم فرماتے  ہیں  تم میں سے  جو کوئی کسی برائی کو دیکھے  اسے  ہاتھ سے  دفع کر دے  اگر اس کی طاقت نہ ہو تو زبان سے  روکے  اگر یہ بھی نہ کر سکتا ہو تو اپنے  دل سے  نفرت کرے  یہ ضعیف ایمان ہے، ایک اور روایت میں اس کے  بعد یہ بھی ہے  کہ اس کے  بعد رائی کے  دانے  کے  برابر بھی ایمان نہیں ، (صحیح مسلم) مسند احمد میں ہے  رسول اللہ صلی اللہ علیہ و سلم فرماتے  ہیں  اس ذات کی قسم جس کے  ہاتھ میں میری جان ہے  تم اچھائی کا حکم اور برائیوں سے  مخالفت کرتے  رہو ورنہ عنقریب اللہ تعالیٰ تم پر اپنا عذاب نازل فرما دے  گا پھر تم دعائیں کرو گے  لیکن قبول نہ ہوں گی۔ اس مضمون کی اور بھی بہت سی حدیثیں ہیں  جو کسی اور مقام پر ذکر کی جائیں گی انشاء اللہ تعالیٰ ۔ پھر فرماتا ہے  کہ تم سابقہ لوگوں کی طرح افتراق و اختلاف نہ کرنا تم نیک باتوں کا حکم اور خلاف شرع باتوں سے  روکنا نہ چھوڑنا، مسند احمد میں ہے  حضرت معاویہ بن ابو سفیان رضی اللہ تعالیٰ عنہ حج کیلئے  جب مکہ شریف میں آئے  تو ظہر کی نماز کے  بعد کھڑے  ہو کر فرمایا کہ رسول اللہ صلی اللہ علیہ و سلم نے  فرمایا ہے  اہل کتاب اپنے  دین میں اختلاف کر کے  بہتر گروہ بن گئے  اور اس میری امت کے  تہتر فرقے  ہو جائیں گے  خواہشات نفسانی اور خوش فہمی میں ہوں گے  بلکہ میری امت میں ایسے  لوگ بھی ہوں گے  جن کی رگ رگ میں نفسانی خواہشیں اس طرح گھس جائیں گی جس طرح کتے  کے  کاٹے  ہوئے  انسان کی ایک ایک رگ اور ایک ایک جوڑ میں اس کا اثر پہنچ جاتا ہے  اے  عرب کے  لوگو اگر تم ہی اپنے  نبی کی لائی ہوئی چیز پر قائم نہ رہو گے  تو اور لوگ تو بہت دور ہو جائیں گے ۔ اس حدیث کی بہت سی سندیں ہیں  پھر فرمایا اس دن سفید چہرے  اور سیاہ منہ بھی ہونگے ۔ ابن عباس کا فرمان ہے  کہ اہل سنت و الجماعت کے  منہ سفید اور نورانی ہونگے  مگر اہل بدعت و منافقت کے  کالے  منہ ہونگے ، حسن بصری فرماتے  ہیں  یہ کالے  منہ والے  منافق ہونگے  جن سے  کہا جائے  گا کہ تم نے  ایمان کے  بعد کفر کیوں کیا اب اس کا مزہ چکھو۔ اور سفید منہ والے  اللہ رحیم و کریم کی رحمت میں ہمیشہ ہمیشہ رہیں  گے ۔ حضرت ابو امامہ رضی اللہ تعالیٰ عنہ نے  جب خارجیوں کے  سر دمشق کی مسجد کے  زینوں پر لٹکے  ہوئے  دیکھے  تو فرمانے  لگے  یہ جہنم کے  کتے  ہیں  ان سے  بدر مقتول روئے  زمین پر کوئی نہیں  انہیں  قتل کرنے  والے  بہترین مجاہدین پھر آیت (یوم تبیض) تلاوت فرمائی، ابو غالب نے  کہا کہ جناب نے  رسول اللہ صلی اللہ علیہ و سلم سے  یہ سنا ہے  ؟ فرمایا ایک دو دفعہ نہیں  بلکہ سات مرتبہ اگر ایسا نہ ہوتا تو میں اپنی زبان سے  یہ الفاظ نکالتا ہی نہیں ، ابن مردویہ نے  یہاں حضرت ابوذر کی روایت سے  ایک لمبی حدیث نقل کی ہے  جو بہت ہی عجیب ہے  لیکن سنداً غریب ہے ۔ دنیا اور آخرت کی یہ باتیں ہم تم پر اے  نبی کھول رہے  ہیں  اللہ عادل حاکم ہے  وہ ظالم نہیں  اور ہر چیز کو آپ خوب جانتا ہے  اور ہر چیز پر قدرت بھی رکھتا ہے  پھر ناممکن ہے  کہ وہ کسی پر ظلم کرے  (جن کے  کالے  منہ ہوئے  وہ اسی لائق تھے) زمین اور آسمان کی کل چیزیں اس کی ملکیت میں ہیں  اور اسی کی غلامی میں اور ہر کام کا آخری حکم اسی کی طرف ہے  متصرف اور با اختیار حکم دنیا اور آخرت کا مالک وہی ہے ۔

۱۱۰

سب سے  بہتر شخص کون؟ اور سب سے  بہتر امت کا اعزاز کس کو ملا؟

 اللہ تعالیٰ خبر دے  رہا ہے  کہ امت محمدیہ تمام امتوں پر بہتر ہے  صحیح بخاری شریف میں ہے  حضرت ابوہریرہ رضی اللہ تعالیٰ عنہ اس آیت کی تفسیر میں فرماتے  ہیں  تم اوروں کے  حق میں سب سے  بہتر ہو تو لوگوں کی گردنیں پکڑ پکڑ کر اسلام کی طرف جھکاتے  ہو، اور مفسرین بھی یہی فرماتے  ہیں  مطلب یہ ہے  کہ تم تمام امتوں سے  بہتر ہو اور سب سے  زیادہ لوگوں کو نفع پہنچانے  والے  ہو، ابو لہب کی بیٹی حضرت درہ رضی اللہ تعالیٰ عنہا فرماتی ہیں  ایک مرتبہ کسی نے  رسول اللہ صلی اللہ علیہ و سلم سے  پوچھا آپ اس وقت ممبر پر تھے  کہ حضور صلی اللہ علیہ و سلم کونسا شخص بہتر ہے ؟ آپ نے  فرمایا سب لوگوں سے  بہتر وہ شخص ہے  جو سب سے  زیادہ قاری قرآن ہو سب سے  زیادہ پرہیزگار ہو، سب سے  زیادہ اچھائیوں کا حکم کرنے  والا سب سے  زیادہ برائیوں سے  روکنے  والا سب سے  زیادہ رشتے  ناتے  ملانے  والا ہو۔ (مسند احمد) حضرت ابن عباس فرماتے  ہیں  یہ وہ صحابہ ہیں  جنہوں نے  مکہ سے  مدینہ کی طرف ہجرت کی، صحیح بات یہ ہے  کہ یہ آیت ساری امت پر مشتمل ہے، بیشک یہ حدیث میں بھی ہے  کہ سب سے  بہتر میرا زمانہ ہے  پھر اس کے  بعد اس سے  ملا ہوا زمانہ پھر اس کے  بعد والا، ایک اور روایت میں ہے  آیت (وکنالک جعلنا کم امۃ وسطا) ہم نے  تمہیں  بہتر امت بنایا ہے  تاہم تم لوگوں پر گواہ بنو، رسول اللہ صلی اللہ علیہ و سلم فرماتے  ہیں  تم نے  اگلی امتوں کی تعداد ستر تک پہنچا دی ہے، اللہ کے  نزدیک تم ان سب سے  بہتر اور زیادہ بزرگ ہو، یہ مشہور حدیث ہے  امام ترمذی نے  اسے  حسن کہا ہے، اس امت کی افضلیت کی ایک بڑی دلیل اس امت کے  نبی کی افضلیت ہے، آپ تمام مخلوق کے  سردار تمام رسولوں سے  زیادہ ا کرام و عزت والے  ہیں ، آپ کی شرع اتنی کامل اور اتنی پوری ہے  کہ ایسی شریعت کسی نبی کو نہیں  تو ظاہر بات ہے  کہ ان فضائل کو سمیٹتے  والی امت بھی سب سے  اعلیٰ و افضل ہے، اس شریعت کا تھوڑا سا عمل بھی اور امتوں کے  زیادہ عمل سے  بہتر و افضل ہے، حضرت علی بن ابو طالب رضلی اللہ تعالیٰ عنہ فرماتے  ہیں  کہ رسول اللہ صلی اللہ علیہ و سلم نے  فرمایا میں وہ وہ نعمتیں دیا گیا ہوں جو مجھ سے  پہلے  کوئی نہیں  دیا گیا لوگوں نے  پوچھا وہ کیا باتیں ہیں ، آپ نے  فرمایا میری مدد رعب سے  کی گئی ہے  میں زمین کی کنجیاں دیا گیا ہوں، میرا نام احمد رکھا گیا ہے، میرے  لئے  مٹی پاک کی گئی ہے، میری امت سب امتوں سے  بہتر بنائی گئی ہے  (مسند احمد) اس حدیث کی اسناد حسن ہے، حضرت ابو الدرداء رضی اللہ تعالیٰ عنہ فرماتے  ہیں  میں نے  ابو القاسم صلی اللہ علیہ و سلم سے  سنا آپ فرماتے  ہیں  کہ اللہ تعالیٰ نے  حضرت عیسیٰ علیہ السلام سے  فرمایا کہ میں تمہارے  بعد ایک امت پیدا کرنے  والا ہوں جو راحت پر حمدو شکر کریں گے  اور مصیبت پر طلب ثواب اور صبر کریں گے  حالانکہ انہیں  حلم و علم نہ ہو گا آپ نے  تعجب سے  پوچھا کہ بغیر بردباری اور دور اندیشی اور پختہ علم کے  یہ کیسے  ممکن ہے ؟ رب العالمین نے  فرمایا میں انہیں  اپنا حلم و علم عطا فرماؤں گا، میں چاہتا ہوں یہاں پر بعض وہ حدیثیں بھی بیان کر دوں جن کا ذکر یہاں مناسب ہے  سنئے ۔ رسول اللہ صلی اللہ علیہ و سلم فرماتے  ہیں  میری امت میں سے  ستر ہزار شخص بغیر حساب کتاب کے  جنت میں جائیں گے  جن کے  چہرے  چودھویں رات کے  چاند کی طرح روشن ہوں گے  سب یک رنگ ہونگے ، میں نے  اپنے  رب سے  گزارش کی کہ اے  اللہ اس تعداد میں اور اضافہ فرما اللہ تبارک و تعالیٰ نے  فرمایا ہر ایک کے  ساتھ ستر ہزار اور بھی، حضرت صدیق اکبر رضی اللہ تعالیٰ عنہ یہ حدیث بیان کر کے  فرمایا کرتے  تھے  کہ پھر تو اس تعداد میں گاؤں اور دیہاتوں والے  بلکہ بادیہ نشین بھی آجائیں گے  (مسند احمد) حضور صلی اللہ علیہ و سلم فرماتے  ہیں  مجھے  میرے  رب نے  ستر ہزار آدمیوں کو میری امت میں سے  بغیر حساب کے  جنت میں داخل ہونے  کی خوشخبری دی، حضرت عمر نے  یہ سن کر فرمایا حضور صلی اللہ علیہ و سلم کچھ اور زیادتی طلب کرتے  آپ نے  فرمایا میں نے  اپنے  رب سے  سوال کیا تو مجھے  خوشخبری ملی کے  ہر شخص کے  ساتھ ستر ستر ہزار کا وعدہ ہوا۔ حضرت عمر نے  پھر گزارش کی کہ اللہ کے  نبی اور کچھ بھی مانگتے  آپ نے  فرمایا مانگا تو مجھے  اتنی زیادتی اور ملی اور پھر دونوں ہاتھ پھیلا کر بتایا کہ اس طرح، راوی حدیث کہتے  ہیں  اس طرح جب اللہ تعالیٰ سمیٹے  تو اللہ عزوجل ہی جانتا ہے  کہ کس قدر مخلوق اس میں آئے  گی (فسبحان اللہ وبحمدہ) (مسند احمد) حضرت ثوبان رضی اللہ تعالیٰ عنہ حمص میں بیمار ہو گئے  عبد اللہ بن قرط وہاں کے  امیر تھے  وہ عیادت کو نہ آسکے  ایک کلاعی شخص جب آپ کی بیمار پرسی کیلئے  گیا تو آپ نے  اس سے  دریافت کیا کہ لکھنا جانتے  ہو اس نے  کہا ہاں فرمایا لکھو یہ خط ثوبان کی طرف سے  امیر عبد اللہ بن قرط کی طرف سے  ہے  جو رسول اللہ صلی اللہ علیہ و سلم کے  خادم ہیں  بعد حمد و صلوٰۃ کے  واضح ہو کہ اگر حضرت عیسیٰ یا حضرت موسیٰ کا کوئی خادم یہاں ہوتا اور بیمار پڑتا تو تم عیادت کیلئے  جاتے  پھر کہا یہ خط لے  جاؤ اور امیر کو پہنچا دو جب یہ خط امیر حمص کے  پاس پہنچا تو گھبرا کر اٹھ کھڑے  ہوئے  اور سیدھے  یہاں تشریف لائے  کچھ دیر بیٹھ کر عیادت کر کے  جب جانے  کا ارادہ کیا تو حضرت ثوبان نے  ان کی چادر پکڑ روکا اور فرمایا ایک حدیث سنتے  جائیں میں نے  آنحضرت صلی اللہ علیہ و سلم کی زبان مبارک سے  سنا ہے  آپ نے  فرمایا میری امت میں سے  ستر ہزار شخص بغیر حساب و عذاب کے  جنت میں جائیں گے  ہر ہزار کے  ساتھ ستر ہزار اور ہوں گے  (مسند احمد) یہ حدیث بھی صحیح ہے، حضرت عبد اللہ بن مسعود رضی اللہ تعالیٰ عنہ فرماتے  ہیں  ایک رات ہم خدمت نبوی میں دیر تک باتیں کرتے  رہے  پھر صبح جب حاضر خدمت ہوئے  تو حضور صلی اللہ علیہ و سلم نے  ارشاد فرمایا سنو آج رات انبیاء اپنی اپنی امت سمیت مجھے  دکھائے  گئے  بعض انبیاء کے  ساتھ صرف تین شخص تھے  بعض کے  ساتھ مختصر ساگر وہ بعض کے  ساتھ ایک جماعت کسی کے  ساتھ کوئی بھی نہ تھا جب موسیٰ علیہ السلام آئے  تو ان کے  ساتھ بہت سے  لوگ تھے  مجھے  یہ جماعت پسند آئی میں نے  پوچھایہ کون ہیں  تو جواب ملا کہ یہ آپ کے  بھائی موسیٰ علیہ السلام ہیں  اور ان کے  ساتھ بنی اسرائیل ہیں  میں نے  کہا پھر میری امت کہاں ہے  جواب ملا اپنی داہنی طرف دیکھو اب جو دیکھتا ہوں تو بیشمار مجمع ہے  جس سے  پہاڑیاں بھی ڈھک گئی ہیں  اب مجھ سے  پوچھا گیا کہو خوش ہو میں نے  کہا میرے  رب میں راضی ہو گیا، فرمایا گیا سنو! ان کے  ساتھ ستر ہزار اور ہیں  جو بغیر حساب کے  جنت میں داخل ہوں گے، اب نبی صلی اللہ علیہ و سلم نے  فرمایا تم پر میرے  میں باپ فدا ہوں اگر ہو سکے  تو ان ستر ہزار میں سے  ہی ہونا اگر یہ نہ ہو سکے  تو ان میں سے  ہو جو پہاڑیوں کو چھپائے  ہوئے  تھے  اگر یہ بھی نہ ہو سکے  تو ان میں سے  ہونا جو آسمان کے  کناروں کناروں پر تھے، حضرت عکاش بن محصن نے  کھڑے  ہو کر کہا حضور صلی اللہ علیہ و سلم میرے  لئے  دعا کیجئے  کہ اللہ تعالیٰ مجھے  ان ستر ہزار میں سے  کرے  آپ نے  دعا کی تو ایک دوسرے  صحابی نے  بھی اٹھ کر یہی گزارش کی تو آپ نے  فرمایا تم پر حضرت عکاشہ سبقت کر گئے، ہم اب آپس میں کہنے  لگے  کہ شاید یہ ستر ہزار لوگ ہوں گے  جو اسلام پر ہی پیدا ہوئے  ہوں اور پوری عمر میں کبھی اللہ کے  ساتھ شرک کیا ہی نہ ہو آپ کو جب یہ معلوم ہوا تو فرمایا یہ وہ لوگ ہیں  جو دم جھاڑا نہیں  کراتے  آگ کے  داغ نہیں  لگواتے  شگون نہیں  لیتے  اور اپنے  رب پر پورا بھروسہ رکھتے  ہیں  (مسند احمد) ایک اور سند سے  اتنی زیادتی اس میں اور بھی ہے  جب میں نے  اپنی رضامندی ظاہر کی تو مجھ سے  کہا گیا اب اپنی بائیں جانب دیکھو میں نے  دیکھا تو بیشمار مجمع ہے  جس نے  آسمان کے  کناروں کو بھی ڈھک لیا ہے  ایک اور روایت میں ہے  کہ موسم حج کا یہ واقعہ ہے  آپ فرماتے  ہیں  مجھے  اپنی امت کی یہ کثرت بہت پسند آئی تمام پہاڑیاں اور میدان ان سے  پُر تھے  (مسند احمد) ایک اور روایت میں ہے  کہ حضرت عکاشہ کے  بعد کھڑے  ہونے  والے  ایک انصاری تھے  رضی اللہ تعالیٰ عنہ (طبرانی) ایک اور روایت میں ہے  کہ میری امت میں سے  ستر ہزار یا ساٹھ لاکھ آدمی جنت میں جائیں گے  جو ایک دوسرے  کا ہاتھ تھامے  ہوئے  ہوں گے  سب ایک ساتھ جنت میں جائیں گے  چمکتے  ہوئے  چودھویں رات کے  چاند جیسے  ان کے  چہرے  ہوں گے ۔ (بخاری مسلم طبرانی) حصین بن عبدالرحمن کہتے  ہیں  کہ سعید بن جیبر کے  پاس تھا تو آپ نے  دریافت کیا رات کو جو ستارہ ٹوٹا تھا تم میں سے  کسی نے  دیکھا تھا میں نے  کہا ہاں حضرت میں نے  دیکھا تھا یہ نہ سمجھئے  گا کہ میں نماز میں تھا بلکہ مجھے  بچھو نے  کاٹ کھایا تھا حضرت سعید نے  پوچھا پھر تم نے  کیا کیا میں نے  کہا دم کر دیا تھا کہا کیوں میں نے  کہا حضرت شعبی نے  بریدہ بن حصیب کی روایت سے  حدیث بیان کی ہے  کہ نظر بد اور زہریلے  جانوروں کا دم جھاڑا کرانا ہے  کہنے  لگے  خیر جسے  جو پہنچے  اس پر عمل کرے  ہمیں تو حضرت ابن عباس نے  سنایا ہے  کہ رسول اللہ صلی اللہ علیہ و سلم نے  فرمایا مجھ پر امتیں پیش کی گئیں کسی نبی کے  ساتھ ایک جماعت تھی کسی کے  ساتھ ایک شخص اور دو شخص اور کسی نبی کے  ساتھ کوئی نہ تھا اب جو دیکھا کہ ایک بڑی پر جماعت نظر پڑی میں سمجھا یہ تو میری امت ہو گی پھر معلوم ہوا کہ موسیٰ علیہ السلام کی امت ہے  مجھ سے  کہا گیا آسمان کے  کناروں کی طرف دیکھو میں نے  دیکھا تو وہاں بیشمار لوگ تھے  مجھ سے  کہا گیا یہ آپ کی امت ہے  اور ان کے  ساتھ ستر ہزار اور ہیں  جو بے  حساب اور بے  عذاب جنت میں جائیں گے  یہ حدیث بیان فرما کر حضور صلی اللہ علیہ و سلم تو مکان پر چلے  گئے  اور صحابہ آپس میں کہنے  لگے  شاید یہ حضور صلی اللہ علیہ و سلم کے  صحابی ہوں گے  کسی نے  کہا نہیں  اسلام میں پیدا ہونے  والے  اور اسلام پر ہی مرنے  والے  ہوں گے  وغیرہ وغیرہ آپ تشریف لائے  اور پوچھا کیا باتیں کر رہے  ہو ہم نے  ذکر کیا تو آپ نے  فرمایا نہیں  یہ وہ لوگ ہیں  جو نہ دم جھاڑا کریں نہ کرائیں، نہ داغ لگوائیں نہ شگون لیں بلکہ اپنے  رب پر بھروسہ رکھیں حضرت عکاشہ رضی اللہ تعالیٰ عنہ نے  دعا کی درخواست کی آپ نے  دعا کی یا اللہ تو اسے  ان میں سے  ہی بنا۔ پھر دوسرے  شخص نے  بھی یہی کہا آپ نے  فرمایا عکاشہ آگے  بڑھ گئے، یہ حدیث بخاری میں ہے  لیکن اس میں دم جھاڑا نہیں  کرنے  کا لفظ نہیں  صحیح مسلم میں یہ لفظ بھی ہے ۔ ایک اور مطول حدیث میں ہے  کہ پہلی جماعت تو نجات پائے  گی ان کے  چہرے  چودھویں رات کے  چاند کی طرح روشن ہوں گے  ان سے  حساب بھی نہ لیا جائے  گا پھر ان کے  بعد والے  سب سے  زیادہ روشن ستارے  جیسے  چمکدار چہرے  والے  ہوں گے  (مسلم) آپ فرماتے  ہیں  مجھ سے  میرے  رب کا وعدہ ہے  کہ میری امت میں سے  ستر ہزار شخص بغیر حساب و عذاب کے  داخل بہشت ہوں گے  ہر ہزار کے  ساتھ ستر ہزار ہوں گے  اور تین لپیں اور میرے  رب عزوجل کی لپوں سے  (کتاب السنن لحافظ ابی بکر بن عاصم) اس کی اسناد بہت عمدہ ہے  ایک اور حدیث میں ہے  کہ آپ سے  ستر ہزار کی تعداد سن کر یزید بن اخنس نے  کہا حضور صلی اللہ علیہ و سلم یہ تو آپ کی امت کی تعداد کے  مقابلہ میں بہت ہی تھوڑے  ہیں  تو آپ نے  فرمایا ہر ہزار کے  ساتھ ستر ہزار ہیں  اور پھر اللہ نے  تین لپیں (ہتھیلیوں کا کشکول) بھر کر اور بھی عطا فرمائے  ہیں ، اسکی اسناد بھی حسن ہے  (کتاب السنن اور ایک اور حدیث میں ہے  کہ میرے  رب نے  جو عزت اور جلال والا ہے  مجھ سے  وعدہ کیا ہے  کہ میری امت میں سے  ستر ہزار کو بلا حساب جنت میں لے  جائے  گا پھر ایک ایک ہزار کی شفاعت سے  ستر ستر ہزار آدمی اور جائیں گے  پھر میرا رب اپنے  دونوں ہاتھوں سے  تین لپیں (دونوں ہاتھوں کی ہھتیلیوں کو ملا کر کٹورا بنانا) بھر کر اور ڈالے  گا حضرت عمر نے  یہ سن کر خوش ہو کر اللہ اکبر کہا اور فرمایا کہ ان کی شفاعت ان کے  باپ دادوں اور بیٹوں اور بیٹیوں اور خاندان و قبیلہ میں ہو گی اللہ کرے  میں تو ان میں سے  ہو جاؤں جنہیں  اللہ تعالیٰ اپنی لپوں میں بھر کر آخر میں جنت میں لے  جائے  گا (طبرانی) اس حدیث کی سند میں بھی کوئی علت نہیں ، واللہ اعلم، کرید میں حضور صلی اللہ علیہ و سلم نے  ایک حدیث فرمائی جس میں جنت میں یہ بھی فرمایا یہ ستر ہزار جو بلا حساب جنت میں داخل کئے  جائیں گے  میرا خیال ہے  کہ ان کے  آتے  آتے  تو تم اپنے  لئے  اور اپنے  بال بچوں اور بیویوں کیلئے  جنت میں جگہ مقرر کر چکے  ہونگے  (مسند احمد) اس کی سند میں شرط مسلم پر ہے، ایک اور حدیث میں ہے  کہ رسول اللہ صلی اللہ علیہ و سلم نے  فرمایا اللہ کا وعدہ ہے  کہ میری امت میں سے  چار لاکھ آدمی جنت میں جائیں گے، حضرت ابوبکر صدیق رضی اللہ تعالیٰ عنہ نے  کہا حضور صلی اللہ علیہ و سلم کچھ اور زیادہ کیجئے  اسے  سن کر حضرت عمر نے  فرمایا ابوبکر بس کرو صدیق نے  جواب دیا کیوں صاحب اگر ہم سب کے  سب جنت میں چلے  جائیں گے  تو آپ کو کیا نقصان ہے  حضرت عمر نے  فرمایا اگر اللہ چاہے  تو ایک ہی ہاتھ میں ساری مخلوق کو جنت میں ڈال دے  حضور علیہ السلام نے  فرمایا عمر سچ کہتے  ہیں  (مسند عبدالرزاق) اسی حدیث کی اور سند سے  بھی بیان ہے  اس میں تعداد ایک لاکھ آئی ہے  (اصبہانی) ایک اور روایت میں ہے  کہ جب صحابہ نے  ستر ہزار اور پھر ہر ایک کے  ساتھ ستر ہزار پھر اللہ کی لپ بھر کر جنتی بنانا سنا تو کہنے  لگے  پھر تو اس کی بدنصیبی میں کیا شک رہ گیا جو باوجود اس کے  بھی جہنم میں جائے  (ابو لیلی) اوپر والی حدیث ایک اور سند سے  بھی بیان ہوئی ہے  اس میں تعداد تین لاکھ کی ہے  پھر حضرت عمر نے  فرمایا میری امت کے  سارے  مہاجر تو اس میں آ ہی جائیں گے  پھر باقی تعداد اعرابیوں سے  پوری ہو گی (محمد بن سہل) حضرت ابو سعید کہتے  ہیں  حضور صلی اللہ علیہ و سلم کے  سامنے  حساب کیا گیا تو جملہ تعداد چار کروڑ نوے  ہزار ہوئی، ایک اور حسن حدیث طبرانی میں ہے  کہ رسول اللہ صلی اللہ علیہ و سلم نے  فرمایا قسم ہے  اس ذات کی کہ جان محمد (صلی اللہ علیہ و سلم) کی اس کے  ہاتھ میں ہے  تم ایک اندھیری رات کی طرح بیشمار ایک ساتھ جنت کی طرف بڑھو گے، زمین تم سے  پر ہو جائے  گی تمام فرشتے  پکار اٹھیں گے  کہ محمد صلی اللہ علیہ و سلم کے  ساتھ جو جماعت آئی وہ تمام نبیوں کی جماعت سے  بہت زیادہ ہے، حضرت جابر رضی اللہ تعالیٰ عنہ فرماتے  ہیں  کہ میں نے  رسول اللہ صلی اللہ علیہ و سلم سے  سنا آپ نے  فرمایا صرف میری تابعدار امت اہل جنت کی چوتھائی ہو گی صحابہ نے  خوش ہو کر نعرہ تکبیر بلند کیا پھر فرمایا کہ مجھے  تو امید ہے  کہ تم اہل جنت کا تیسرا حصہ ہو جاؤ ہم نے  پھر تکبیر کہی پھر فرمایا میں امید کرتا ہوں  کہ تم آدھوں آدھ ہو جاؤ (مسند احمد) اور حدیث میں ہے  کہ آپ نے  صحابہ سے  فرمایا کہ تم راضی نہیں  ہو کہ تم تمام جنتوں کے  چوتھائی ہو ہم نے  خوش ہو کر اللہ کی بڑائی بیان کی پھر فرمایا کہ تم راضی نہیں  ہو کہ تمام اہل جنت کی تہائی ہو ہم نے  پھر تکبیر کہی آپ نے  فرمایا مجھے  تو امید ہے  کہ تم جنتیوں کے  آدھوں آدھ ہو گے  (بخاری مسلم) طبرانی میں یہ روایت حضرت عبد اللہ بن مسعود رضی اللہ تعالیٰ عنہ سے  مروی ہے  کہ رسول اللہ صلی اللہ علیہ و سلم نے  فرمایا کیا کہتے  ہو تم جنتیوں کا چوتھائی حصہ بننا چاہتے  ہو کہ چوتھائی جنت تمہارے  پاس ہو اور تین اور چوتھائیوں میں تمام امتیں ہوں ؟ ہم نے  کہا اللہ اور اس کا رسول خوب جانتا ہے  آپ نے  فرمایا اچھا تہائی حصہ ہو تو ہم نے  کہا یہ بہت ہے  فرمایا اگر آدھوں آدھ ہو تو، انہوں نے  کہا حضور صلی اللہ علیہ و سلم پھر تو بہت ہی زیادہ ہے  آپ نے  فرمایا سنو! کل اہل جنت کی ایک سو بیس صفیں ہیں  جن میں سے  اسی صفیں صرف اس میری امت کی ہیں ، مسند احمد میں بھی ہے  کہ اہل جنت کی ایک سو بیس صفیں ان میں اسی صفیں صرف اس امت کی ہیں  یہ حدیث طبرانی ترمذی وغیرہ میں بھی ہے، طبرانی ایک اور روایت میں ہے  کہ جب آیت (ثلۃ من الاولین و ثلۃ من الاخرین) اتری تو رسول اللہ صلی اللہ علیہ و سلم نے  فرمایا تم اہل جنت کی چوتھائی ہو پھر فرمایا بلکہ ثلث ہو پھر فرمایا بلکہ نصف ہو پھر فرمایا دو تہائی ہو (اے  وسیع رحمتوں والے  اور بے  روک نعمتوں والے  اللہ ہم تیرا بے  انتہا شکر ادا کرتے  ہیں  کہ تو نے  ہمیں ایسے  معزز و محترم رسول صلی اللہ علیہ و سلم کی امت میں پیدا کیا تیرے  سچے  رسول صلی اللہ علیہ و سلم کی سچی زبان سے  تیرے  اس بڑھے  چڑھے  فضل و کرم کا حال سن کر ہم گنہگاروں کے  منہ میں پانی بھر آیا، اے  ماں باپ سے  زیادہ مہربان اللہ ہماری آس نہ توڑ اور ہمیں بھی ان نیک ہستیوں کے  ساتھ جنت میں داخل فرما۔ باری تعالیٰ تیری رحمت کی ان گنت اور بیشمار بندوں میں سے  اگر ایک قطرہ بھی ہم گنہگاروں پر برس جائے  تو ہمارے  گناہوں کو دھو ڈالنے  اور ہمیں تیری رحمت و رضوان کے  لائق بنانے  کیلئے  کافی ہے، اللہ اس پاک ذکر کے  موقعہ پر ہم ہاتھ اٹھا کر دامن پھیلا کر آنسو بہا کر امیدوں بھرے  دل سے  تیری رحمت کا سہارا لے  کر تیرے  کرم کا دامن تھام کر تجھ سے  بھیک مانگتے  ہیں  تو قبول فرما اور اپنی رحمت سے  ہمیں بھی اپنی رضامندی کا گھر جنت الفردوس عطا فرما۔ (آمین الہ الحق آمین) صحیح بخاری مسلم میں ہے  رسول اللہ صلی اللہ علیہ و سلم فرماتے  ہیں  ہم دنیا میں سب سے  آخر آئے  اور جنت میں سب سے  پہلے  جائیں گے  اور ان کو کتاب اللہ پہلے  ملی ہمیں بعد میں ملی جن باتوں میں انہوں نے  اختلاف کیا ان میں اللہ نے  ہمیں صحیح طریق کی توفیق دی، جمعہ کا دن بھی ایسا ہی ہے  کہ یہود ہمارے  پیچھے  ہیں  ہفتہ کے  دن اور نصرانی ان کے  پیچھے  اتوار کے  دن دار قطنی میں ہے  رسول اللہ صلی اللہ علیہ و سلم نے  فرمایا جب تک میں جنت میں داخل نہ ہو جاؤں انبیاء پر دخول جنت حرام ہے  اور جب تک میری امت نہ داخل ہو دوسری امتوں پر دخول جنت حرام ہے ۔ یہ وہ حدیثیں تھیں جنہیں  ہم اس آیت کے  تحت وارد کرنا چاہتے  تھے  فالحمد للہ۔ امت کو بھی چاہئے  کہ یہاں اس آیت میں جتنی صفیں ہیں  ان پر مضبوطی کے  ساتھ قائم ثابت رہیں  یعنی امر بالمعروف اور نہی عن المنکر اور ایمان باللہ حضرت عمر بن خطاب رضی اللہ تعالیٰ عنہ نے  اپنے  حج میں اس آیت کی تلاوت فرما کر لوگوں سے  کہا کہ اگر تم اس آیت کی تعریف میں داخل ہونا چاہتے  ہو تو یہ اوصاف بھی اپنے  میں پیدا کرو، امام ابن جرید فرماتے ، اہل کتاب ان کاموں کو چھوڑ بیٹھے  تھے  جن کی مذمت کلام اللہ نے  کی، فرمایا آیت (کانوالا یتنا ھون عن منکر فعلوہ) وہ لوگ برائی کی باتوں سے  لوگوں کو روکتے  نہ تھے  چونکہ مندرجہ بالا آیت میں ایمان داروں کی تعریف و توصیف بیان ہوئی تو اس کے  بعد اہل کتاب کی مذمت بیان ہو رہی ہے، تو فرمایا کہ اگر یہ لوگ بھی میرے  نبی آخر الزمان پر ایمان لاتے  تو انہیں  بھی یہ فضیلتیں ملتیں لیکن ان میں سے  کفرو فسق اور گناہوں پر جمے  ہوئے  ہیں  ہاں کچھ لوگ با ایمان بھی ہیں  ۔ پھر اللہ تعالیٰ مسلمانوں کو بشارت دیتا ہے  کہ تم نہ گھبرانا اللہ تمہیں  تمہارے  مخالفین پر غالب رکھے  گا چنانچہ خیبر والے  دن اللہ تعالیٰ نے  انہیں  ذلیل کیا اور ان سے  پہلے  بنو قینقاع، بنو نضیر اور بنو قریظہ کو بھی اللہ نے  ذلیل و رسوا کیا، اسی طرح شام کے  نصرانی صحابہ کے  وقت میں مغلوب ہوئے  اور ملک شام ان کے  ہاتھوں سے   نکل گیا اور ہمیشہ کیلئے  مسلمانوں کے  قبضہ میں آگیا اور وہاں ایک حق والی جماعت حضرت عیسیٰ علیہ السلام کے  آنے  تک حق پر قائم رہے  گی، حضرت عیسیٰ آ کر ملت اسلام اور شریعت محمد کے  مطابق حکم کریں گے  صلیب توڑیں گے  خنزیر کو قتل کریں گے  جزیہ قبول نہ کریں گے  صرف اسلام ہی قبول فرمائیں گے  پھر فرمایا کہ ان کے  اوپر ذلت اور پستی ڈال دی گئی ہاں اللہ کی پناہ کے  علاوہ کہیں  بھی امن و امان اور عزت نہیں  یعنی جزیہ دینا اور مسلم بادشاہ کی اطاعت کرنا قبول کر لیں اور لوگوں کی پناہ یعنی عقد ذمہ مقرر ہو جائے  یا کوئی مسلمان امن دے  دے  اگرچہ کوئی عورت ہو یا کوئی غلام ہو، علماء کا ایک قول یہ بھی ہے، حضرت ابن عباس کا قول ہے  کہ حبل سے  مراد ہے  جو غضب کے  مستحق ہوئے  اور مسکینی چپکا دی گئی، ان کے  کفر اور انبیاء کے  تکبر، حسد، سرکشی وغیرہ کا بدلہ ہے ۔ اسی باعث ان پر ذلت پستی اور مسکینی ہمیشہ کیلئے  ڈال دی گئی ان کی نافرمانیوں اور تجاوز حق کا یہ بدلہ ہے  العیاذ باللہ، ابوداؤد طیالسی میں حدیث ہے  کہ بنی اسرائیل ایک ایک دن میں تین تین سو نبیوں کو قتل کر ڈالتے  تھے  اور دن کے  آخری حصہ میں اپنے  اپنے  کاموں پر بازاروں میں لگ جاتے  تھے ۔

۱۱۳

ظلم نہیں  سزا

 حضرت ابن مسعود رضی اللہ تعالیٰ فرماتے  ہیں  اہل کتاب اور اصحاب محمد صلی اللہ علیہ و سلم برابر نہیں ، مسند احمد میں ہے  رسول اللہ صلی اللہ علیہ و سلم نے  عشاء کی نماز میں ایک مرتبہ دیر لگا دی پھر جب آئے  تو جو اصحاب منتظر تھے  ان سے  فرمایا کسی دین والا اس وقت تک اللہ کا ذکر نہیں  کر رہا مگر صرف تم ہی اللہ کے  ذکر میں ہو اس پر یہ آیت نازل ہوئی لیکن اکثر مفسرین کا قول ہے  کہ اہل کتاب کے  علماء مثلاً حضرت عبد اللہ بن سلام حضرت اسد بن عبید، حضرت ثعلبہ بن شعبہ وغیرہ کے  بارے  میں یہ آیت آئی کہ یہ لوگ ان اہل کتاب میں شامل نہیں  جن کی مذمت پہلے  گزاری، بلکہ یہ با ایمان جماعت امر اللہ پر قائم شریعت محمدیہ کی تابع ہے  استقامت و یقین اس میں ہے  یہ پاکباز لوگ راتوں کے  وقت تہجد کی نماز میں بھی اللہ کے  کلام کی تلاوت کرتے  رہتے  ہیں  اللہ پر قیامت پر ایمان رکھتے  ہیں  اور لوگوں کو بھی انہی باتوں کا حکم کرتے  ہیں  ان کے  خلاف سے  روکتے  ہیں  نیک کاموں میں پیش پیش رہا کرتے  ہیں  اب اللہ تعالیٰ انہیں  خطاب عطا فرماتا ہے  کہ یہ صالح لوگ ہیں  اور سورت کے  آخر میں بھی فرمایا آیت (وان من اھل الکتاب لمن یومن باللہ) الخ، بعض اہل کتاب اللہ تعالیٰ پر اس قرآن پر اور توراۃ و انجیل پر بھی ایمان رکھتے  ہیں  اللہ تعالیٰ سے  ڈرتے  رہتے  ہیں  یہاں بھی فرمایا کہ ان کے  یہ نیک اعمال ضائع نہ ہوں بلکہ پورا بدلہ ملے  گا، تمام پرہیزگار لوگ اللہ کی نظروں میں ہیں  وہ کسی کے  اچھے  عمل کو برباد نہیں  کرتا۔ وہاں ان بے  دین لوگوں کو اللہ کے  ہاں نہ مال نفع دے  گا نہ اولاد یہ تو جہنمی ہیں  ۔ صر کے  معنی سخت سردی کے  ہیں  جو کھیتوں کو جلا دیتی ہے، غرض جس طرح کسی کی تیار کھیتی پر برف پڑے  اور وہ جل کر خاکستر ہو جائے  نفع چھوڑ اصل بھی غارت ہو جائے  اور امیدوں پر پانی پھر جائے  اسی طرح یہ کفار ہیں  جو کچھ یہ خرچ کرتے  ہیں  اس کا نیک بدلہ تو کہاں اور عذاب ہو گا۔ یہ اللہ تعالیٰ کی طرف سے  ظلم نہیں  بلکہ یہ ان کی بداعمالیوں کی سزا ہے ۔

۱۱۸

کافر اور منافق مسلمان کے  دوست نہیں  انہیں  اپنا ہم راز نہ بناؤ

اللہ تعالیٰ ایمانداروں کو کافروں اور منافقوں کی دوستی اور ہم راز ہونے  سے  روکتا ہے  کہ یہ تو تمہارے  دشمن ہیں  ان کی چکنی چپڑی باتوں میں خوش نہ ہو جانا اور ان کے  مکر کے  پھندے  میں پھنس نہ جانا ورنہ موقعہ پا کر یہ تمہیں  سخت ضرر پہنچائیں گے  اور اپنی باطنی عداوت نکالیں گے  تم انہیں  اپنا راز دار ہرگز نہ سمجھنا راز کی باتیں ان کے  کانوں تک ہرگز نہ پہنچانا بطانہ کہتے  ہیں  انسان کے  راز دار دوست کو اور من دو نکم سے  مراد جس خلیفہ کو مقرر کیا اس کیلئے  دو بطانہ مقرر کئے  ایک تو بھلائی کی بات سمجھانے  والا اور اس پر رغبت دینے  والا اور دوسرا برائی کی رہبری کرنے  والا اور اس پر آمادہ کرنے  والا بس اللہ جسے  بچائے  وہی بچ سکتا ہے، حضرت عمر بن خطاب رضی اللہ تعالیٰ عنہ سے  کہا گیا کہ یہاں پر حیرہ کا ایک شخص بڑا اچھا لکھنے  والا اور بہت اچھے  حافظہ والا ہے  آپ اسے  اپنا محرر اور منشی مقرر کر لیں آپ نے  فرمایا اس کا مطلب یہ ہو گا کہ غیر مومن کو بطانہ بنا لوں گا جو اللہ نے  منع کیا ہے، اس واقعہ کو اور اس آیت کو سامنے  رکھ کر ذہن اس نتیجہ پر پہنچتا ہے  کہ ذمی کفار کو بھی ایسے  کاموں میں نہ لگانا چاہئے  ایسا نہ ہو کہ وہ مخالفین کو مسلمانوں کے  پوشیدہ ارادوں سے  واقف کر دے  اور ان کے  دشمنوں کو ان سے  ہوشیار کر دے  کیونکہ انکی تو چاہت ہی مسلمانوں کو نیچا دکھانے  کی ہوتی ہے، ازہر بن راشد کہتے  ہیں  کہ لوگ حضرت انس رضی اللہ تعالیٰ عنہ سے  حدیثیں سنتے  تھے  اگر کسی حدیث کا مطلب سمجھ میں نہ آتا تو حضرت حسن بصری سے  جا کر مطلب حل کر لیتے  تھے  ایک دن حضرت انس رضی اللہ تعالیٰ عنہ نے  یہ حدیث بیان کی کہ مشرکوں کی آگ سے  روشنی طلب نہ کرو اور اپنی انگوٹھی میں عربی نقش نہ کرو انہوں نے  آ کر حسن بصری سے  اس کی تشریح دریافت کی تو آپ نے  فرمایا کہ پچھلے  جملہ کا تو یہ مطلب ہے  کہ انگوٹھی پر محمد صلی اللہ علیہ و سلم نہ کھدواؤ اور پہلے  جملہ کا یہ مطلب ہے  کہ مشرکوں سے  اپنے  کاموں میں مشورہ نہ لو، دیکھو کتاب اللہ میں بھی ہے  کہ ایمان دارو اپنے  سوا دوسروں کو ہمراز نہ بناؤ لیکن حسن بصری کی یہ تشریح قابل غور ہے  حدیث کا ٹھیک مطلب غالباً یہ ہے  کہ محمد رسول اللہ عربی خط میں اپنی انگوٹھیوں پر نقش نہ کراؤ، چنانچہ اور حدیث میں صاف ممانعت موجود ہے  یہ اس لئے  تھا کہ حضور صلی اللہ علیہ و سلم کی مہر کے  ساتھ مشابہت نہ ہو اور اول جملے  کا مطلب یہ ہے  کہ مشرکوں کی بستی کے  پاس نہ رہو اس کے  پڑوس سے  دور رہو ان کے  شہروں سے  ہجرت کر جاؤ جیسے  ابو داؤد میں ہے  کہ مسلمانوں اور مشرکوں کے  درمیان کی لڑائی کی آگ کو کیا تم نہیں  دیکھتے  اور حدیث میں ہے  جو مشرکوں سے  میل جول کرے  یا ان کے  ساتھ رہے  بسے  وہ بھی انہی جیسا ہے  پھر فرمایا ان کی باتوں سے  بھی ان کی عداوت ٹپک رہی ہے  ان کے  چہروں سے  بھی قیافہ شناس ان کی باطنی خباثتوں کو معلوم کر سکتا ہے  پھر جو ان کے  دلوں میں تباہ کن شرارتیں ہیں  وہ تو تم سے  مخفی ہیں  لیکن ہم نے  تو صاف صاف بیان کر دیا ہے  عاقل لوگ ایسے  مکاروں کی مکاری میں نہیں  آتے  پھر فرمایا دیکھو کتنی کمزوری کی بات ہے  کہ تم ان سے  محبت رکھو اور وہ تمہیں  نہ چاہیں ، تمہارا ایمان کل کتاب پر ہو اور یہ شک شبہ میں ہی پڑے  ہوئے  ہیں  ان کی کتاب کو تم تو مانو لیکن یہ تمہاری کتاب کا انکار کریں تو چاہئے  تو یہ تھا کہ تم خود انہیں  کڑی نظروں سے  دیکھتے  لیکن برخلاف اس کے  یہ تمہاری عداوت کی آگ میں جل رہے  ہیں  ۔ سامنا ہو جائے  تو اپنی ایمانداری کی داستان بیان کرنے  بیٹھ جاتے  ہیں  لیکن جب ذرا الگ ہوتے  ہیں  تو غیظ و غضب سے  جلن اور حسد سے  اپنی انگلیاں چباتے  ہیں  پس مسلمانوں کو بھی ان کی ظاہرداری سے  دھوکہ نہیں  کھانا چاہئے  یہ چاہے  جلتے  بھنتے  رہیں  لیکن اللہ تعالیٰ اسلام اور مسلمانوں کو ترقی دیتا رہے  گا مسلمان دن رات ہر حیثیت میں بڑھتے  ہی رہیں  گے  گو وہ مارے  غصے  کے  مر جائیں ۔ اللہ ان کے  دلوں کے  بھیدوں سے  بخوبی واقف ہے  ان کے  تمام منصوبوں پر خاک پڑے  گی یہ اپنی شرارتوں میں کامیاب نہ ہو سکیں گے  اپنی چاہت کے  خلاف مسلمانوں کی دن دوگنی ترقی دیکھیں گے  اور آخرت میں بھی انہیں  نعمتوں والی جنت حاصل کرتے  دیکھیں گے  برخلاف ان کے  یہ خود یہاں بھی رسوا ہوں گے  اور وہاں بھی جہنم کا ایندھن بنیں گے، ان کی شدت عداوت کی یہ کتنی بڑی دلیل ہے  کہ جہاں تمہیں  کوئی نفع پہنچتا ہے  یہ کلیجہ مسوسنے  لگے  اور اگر (اللہ نہ کرے) تمہیں  کوئی نقصان پہنچ گیا تو ان کی باچھیں کھل جاتی ہیں  بغلیں بجانے  اور خوشیاں منانے  لگتے  ہیں ، اگر اللہ تعالیٰ کی طرف سے  مومنوں کی مدد ہوئی یہ کفار پر غالب آئے  انہیں  غنیمت کا مال ملا یہ تعداد میں بڑھ گے  تو وہ جل بجھے  اور اگر مسلمانوں پر تنگی آ گئی یا دشمنوں میں گھر گئے  تو ان کے  ہاں عید منائی جانے  لگی۔ اب اللہ تعالیٰ ایمانداروں کو خطاب کر کے  فرماتا ہے  کہ ان شریروں کی شرارت اور ان بدبختوں کے  مکر سے  اگر نجات چاہتے  ہو تو صبر و تقویٰ اور توکل کرو اللہ عزوجل خود تمہارے  دشمنوں کو گھیر لے  گا کسی بھلائی کے  حاصل کرنے  کسی برائی سے  بچنے  کی کسی میں طاقت نہیں  جو اللہ تعالیٰ چاہتا ہے  ہوتا ہے  اور جو نہیں  چاہتا نہیں  ہو سکتا جو اس پر توکل کرے  اسے  وہ کافی ہے ۔ اسی مناسبت سے  اب جنگ احد کا ذکر شروع ہوتا ہے  جس پر مسلمانوں کے  صبر و تحمل کا بیان ہے  اور جس میں اللہ تعالیٰ کی آزمائش کا پورا نقشہ ہے  اور جس میں مومن و منافق کی ظاہری تمیز ہے  سنئے  ارشاد ہوتا ہے

۱۲۱

غزوہ احد کی افتاد

 یہ احد کے  واقعہ کا ذکر ہے  بعض مفسرین نے  اسے  جن خندق کا قصہ بھی کہا ہے  لیکن ٹھیک یہ ہے  کہ واقعہ جنگ احد کا ہے  جو سن ۳ ہجری ۱۱ شوال بروز ہفتہ پیش آیا تھا، جنگ بدر میں مشرکین کو کامل شکست ہوئی تھی انکے  سردار موت کے  گھاٹ اترے  تھے، اب اس کا بدلہ لینے  کیلئے  مشرکین نے  بڑی بھاری تیاری کی تھی وہ تجارتی مال جو بدر والی لڑائی کے  موقعہ پر دوسرے  راستے  سے  بچ کر آگیا تھا وہ سب اس لڑائی کیلئے  روک رکھا تھا اور چاروں طرف سے  لوگوں کو جمع کر کے  تین ہزار کا ایک لشکر جرار تیار کیا اور پورے  سازو سامان کے  ساتھ مدینہ پر چڑھائی کی، ادھر رسول اللہ صلی اللہ علیہ و سلم نے  جمعہ کی نماز کے  بعد مالک بن عمرو کے  جنازے  کی نماز پڑھائی جو قبیلہ بنی النجار میں سے  تھے  پھر لوگوں سے  مشورہ کیا کہ ان کی مدافعت کی کیا صورت تمہارے  نزدیک بہتر ہے ؟ تو عبد اللہ بن ابی نے  کہا کہ ہمیں مدینہ سے  باہر نہ نکلنا چاہئے  اگر وہ آئے  اور ٹھہرے  تو گویا ہمارے  جیل خانہ میں آ گئے  رکے  اور کھڑے  رہیں  اور اگر مدینہ میں گھسے  تو ایک طرف سے  ہمارے  بہادروں کی تلواریں ہوں گی دوسری جانب تیر اندازوں کے  بے  پناہ تیر ہوں گے  پھر اوپر سے  عورتوں اور بچوں کی سنگ باری ہو گی اور اگر یونہی لوٹ گئے  تو بربادی اور خسارے  کے  ساتھ لوٹیں گے  لیکن اس کے  برخلاف بعض صحابہ جو جنگ بدر میں شریک نہ ہو سکے  تھے  ان کی رائے  تھی کہ مدینہ کے  باہر میدان میں جا کر خوب دل کھول کر ان کا مقابلہ کرنا چاہئے، رسول اللہ صلی اللہ علیہ و سلم گھر میں تشریف لے  گئے  اور ہتھیار لگا کر باہر آئے  ان صحابہ کو اب خیال ہوا کہ کہیں  ہم نے  اللہ کے  نبی کی خلاف منشاء تو میدان کی لڑائی پر زور نہیں  دیا اس لئے  یہ کہنے  لگے  کہ حضور صلی اللہ علیہ و سلم اگر یہیں  ٹھہر کر لڑنے  کا ارادہ ہو تو یونہی کیجئے  ہماری جانب سے  کوئی اصرار نہیں ، آپ نے  فرمایا اللہ کے  نبی کو لائق نہیں  کہ وہ ہتھیار پہن کر اتارے  اب تو میں نہ لوٹوں گا جب تک کہ وہ نہ جائے  جو اللہ عزوجل کو منظور ہو چنانچہ ایک ہزار کا لشکر لے  کر آپ مدینہ شریف سے  نکل کھڑے  ہوئے، شوط پر پہنچ کر اس منافق عبد اللہ بن ابی نے  دغا بازی کی اور اپنی تین سو کی جماعت کو لے  کر واپس مڑ گیا یہ لوگ کہنے  لگے  ہم جانتے  ہیں  کہ لڑائی تو ہونے  کی نہیں  خواہ مخواہ زحمت کیوں اٹھائیں ؟ آنحضرت صلی اللہ علیہ و سلم نے  اس کی کوئی پرواہ نہ کی اور صرف سات سو صحابہ کرام کو لے  کر میدان میں اترے  اور حکم دیا کہ جب تک میں نہ کہوں لڑائی شروع نہ کرنا پچاس تیر انداز صحابیوں کو الگ کر کے  ان کا امیر حضرت عبد اللہ بن جبیر کو بنایا اور ان سے  فرما دیا کہ پہاڑی پر چڑھ جاؤ اور اس بات کا خیال رکھو کہ دشمن پیچھے  سے  حملہ آور نہ ہو دیکھو ہم غالب آ جائیں یا (اللہ نہ کرے) مغلوب ہو جائیں تم ہرگز اپنی جگہ سے  نہ ہٹنا، یہ انتظامات کر کے  خود آپ بھی تیار ہو گئے  دوہری زرہ پہنی حضرت مصعب بن عمیر رضی اللہ تعالیٰ عنہ کو جھنڈا دیا آج چند لڑکے  بھی لشکر محمدی میں نظر آتے  تھے  یہ چھوٹے  سپاہی بھی جانبازی کیلئے  ہمہ تن مستعد تھے  بعض اور بچوں کو حضور صلی اللہ علیہ و سلم نے  ساتھ لیا تھا انہیں  جنگ خندق کے  لشکر میں بھرتی کیا گیا جنگ خندق اس کے  دو سال بعد ہوئی تھی، قریشی کا لشکر بڑے  ٹھاٹھ  سے  مقابلہ پر آ ڈٹا یہ تین ہزار سپاہیوں کا گروہ تھا ان کے  ساتھ دو سو کوتل گھوڑے  تھے  جنہیں  موقعہ پر کام آنے  کیلئے  ساتھ رکھا تھا ان کے  داہنے  حصہ پر خالد بن ولید تھا اور بائیں حصہ پر عکرمہ بن ابوجہل تھا (یہ دونوں سردار بعد میں مسلمان ہو گئے  تھے  رضی اللہ تعالیٰ عنہما) ان کا جھنڈے  بردار قبیلہ بنو عبدالدار تھا، پھر لڑائی شروع ہوئی جس کے  تفصیلی واقعات انہی آیتوں کی موقعہ بہ موقعہ تفسیر کے  ساتھ آتے  رہیں  گے  انشاء اللہ تعالیٰ ۔ الغرض اس آیت میں اسی کا بیان ہو رہا ہے  کہ حضور صلی اللہ علیہ و سلم مدینہ شریف سے  نکلے  اور لوگوں کو لڑائی کے  موقعہ کی جگہ مقرر کرنے  لگے  میمنہ میسرہ لشکر کا مقرر کیا اللہ تعالیٰ تمام باتوں کو سننے  والا اور سب کے  دلوں کے  بھید جاننے  والا ہے، روایتوں میں یہ آ چکا ہے  کہ حضور علیہ السلام جمعہ کے  دن مدینہ شریف سے  لڑائی کیلئے  نکلے  اور قرآن فرماتا ہے  صبح ہی صبح تم لشکریوں کی جگہ مقرر کرتے  تھے  تو مطلب یہ ہے  کہ جمعہ کے  دن تو جا کر پڑاؤ ڈال دیا باقی کاروائی ہفتہ کی صبح شروع ہوئی۔ حضرت جابر بن عبد اللہ رضی اللہ تعالیٰ عنہ فرماتے  ہیں  ہمارے  بارے  میں یعنی بنو حارثہ اور بنو سلمہ کے  بارے  میں یہ آیت نازل ہوئی ہے  کہ تمہارے  دو گروہوں بزدلی کا ارادہ کیا تھا گو اس میں ہماری ایک کمزوری کا بیان ہے  لیکن ہم اپنے  حق میں اس آیت کو بہت بہتر جانتے  ہیں  کیونکہ اس میں یہ بھی فرما دیا گیا ہے  کہ اللہ ان دونوں کا ولی ہے  پھر فرمایا کہ دیکھو میں نے  بدر والے  دن بھی تمہیں  غالب کیا حالانکہ تم سب ہی کم اور بے  سرد سامان تھے، بدر کی لڑائی سن ۲ ہجری ۱۷ رمضان بروز جمعہ ہوئی تھی۔ اسی کا نام یوم الفرقان رکھا گیا اس دن اسلام اور اہل اسلام کی عزت ملی شرک برباد ہوا محل شرک ویران ہوا حالانکہ اس دن مسلمان صرف تین سو تیرہ تھے  ان کے  پاس صرف دو گھوڑے  تھے  فقط ستر اونٹ تھے  باقی سب پیدل تھے  ہتھیار بھی اتنے  کم تھے  کہ گویا نہ تھے  اور دشمن کی تعداد اس دن تین گنہ تھی ایک ہزار میں کچھ ہی کم تھے  ہر ایک زرہ بکتر لگائے  ہوئے  ضرورت سے  زیادہ وافر ہتھیار عمدہ عمدہ کافی سے  زیادہ مالداری گھوڑے  نشان زدہ جن کو سونے  کے  زیور پہنائے  گئے  تھے  اس موقعہ پر اللہ نے  اپنے  نبی صلی اللہ علیہ و سلم کو عزت اور غلبہ دیا حالات کے  بارے  میں ظاہر و باطن وحی کی اپنے  نبی اور آپ کے  ساتھیوں کو سرخرو کیا اور شیطان اور اس کے  لشکریوں کو ذلیل و خوار کیا اب اپنے  مومن بندوں اور جنتی لشکریوں کو اس آیت میں یہ احسان یاد دلاتا ہے  کہ تمہاری تعداد کی کمی اور ظاہری اسباب کی غیر موجودگی کے  باوجود تم ہی کو غالب رکھا تا کہ تم معلوم کر لو کہ غلبہ ظاہری اسباب پر موقوف نہیں ، اسی لئے  دوسری آیت میں صاف فرما دیا کہ جنگ حنین میں تم نے  ظاہری اسباب پر نظر ڈالی اور اپنی زیادتی دیکھ کر خوش ہوئے  لیکن اس زیادتی تعداد اور اسباب کی موجودگی نے  تمہیں  کچھ فائدہ نہ دیا، حضرت عیاض اشعری فرماتے  ہیں  کہ جنگ یرموک میں ہمارے  پانچ سردار تھے  حضرت ابو عبیدہ، حضرت یزید بن ابو سفیان حضرت ابن حسنہ حضرت خالد بن ولید اور حضرت عیاض اور خلیفۃ المسلمین حضرت عمر رضی اللہ تعالیٰ عنہ کا حکم تھا کہ لڑائی کے  وقت حضرت ابوعبیدہ سردار ہوں گے  اس لڑائی میں ہمیں چاروں طرف سے  شکست کے  آثار نظر آنے  لگے  تو ہم نے  خلیفہ وقت کو خط لکھا کہ ہمیں موت نے  گھیر رکھا ہے  امداد کیجئے ، فاروق کا مکتوب گرامی ہماری گزارش کے  جواب میں آیا جس میں تحریر تھا کہ تمہارا طلب امداد کا خط پہنچائیں تمہیں  ایک ایسی ذات بتاتا ہوں جو سب سے  زیادہ مددگار اور سب سے  زیادہ مضبوط لشکر والی ہے  وہ ذات اللہ تبارک و تعالیٰ کی ہے  جس نے  اپنے  بندے  اور رسول حضرت محمد صلی اللہ علیہ و سلم کی مدد بدر والے  دن کی تھی بدری لشکر تو تم سے  بہت ہی کم تھا میرا یہ خط پڑھتے  ہی جہاد شروع کر دو اور اب مجھے  کچھ نہ لکھنا نہ کچھ پوچھنا، اس خط سے  ہماری جراتیں بڑھ گئیں ہمتیں بلند ہو گئیں پھر ہم نے  جم کر لڑنا شروع کیا الحمد اللہ دشمن کو شکست ہوئی اور وہ بھاگے  ہم نے  بارہ میل تک انکا تعاقب کیا بہت سا مال غنیمت ہمیں ملا جو ہم نے  آپس میں بانٹ لیا پھر حضرت ابو عبیدہ کہنے  لگے  میرے  ساتھ دوڑ کون لگائے  گا؟ ایک نوجوان نے  کہا اگر آپ ناراض نہ ہوں تو میں حاضر ہوں چنانچہ دوڑنے  میں وہ آگے  نکل گئے  میں نے  دیکھا ان کی دونوں زلفیں ہوا میں اڑ رہی تھیں اور وہ اس نوجوان کے  پیچھے  گھوڑا دوڑائے  چلے  جا رہے  تھے، بدر بن نارین ایک شخص تھا اسکے  نام سے  ایک کنواں مشہور تھا اور اس میدان کا جس میں یہ کنواں تھا یہی نام ہو گیا تھا بدر کی جنگ بھی اسی نام سے  مشہور ہو گئی یہ جگہ مکہ اور مدینہ کے  درمیان ہے  پھر فرمایا کہ اللہ سے  ڈرتے  رہا کرو تا کہ شکر کی توفیق ملے  اور اطاعت گزاری کر سکو۔

۱۲۴

غزوہ بدر اور تائید الٰہی

آنحضرت صلی اللہ علیہ و سلم کا یہ تسلیاں دینا بعض تو کہتے  ہیں  بدر والے  دن تھا حسن بصری عامر شعبی ربیع بن انس وغیرہ کا یہی قول ہے  ابن جریر کا بھی اسی سے  اتفاق ہے  عامر شعبی کا قول ہے  کہ مسلمانوں کو یہ خبر ملی تھی کہ کرز بن جابر مشرکوں کی امداد میں آئے  گا اس پر اس امداد کا وعدہ ہوا تھا لیکن نہ وہ نہیں  آیا اور نہ ہی یہ گئے  ربیع بن انس فرماتے  ہیں  اللہ تعالیٰ نے  مسلمانوں کی مدد کیلئے  پہلے  تو ایک ہزار فرشتے  بھیجے  پھر تین ہزار ہو گئے  پھر پانچ ہزار، یہاں اس آیت میں تین ہزار اور پانچ ہزار سے  مدد کرنے  کا وعدہ ہے  اور بدر کے  واقعہ کے  بیان کے  وقت ایک ہزار فرشتوں کی امداد کا وعدہ ہے ۔ فرمایا آیت (انی ممدکم بالف من الملائکۃ مردفین) اور تطبیق دونوں آیتوں میں یہی ہے  کیونکہ مردفین کا لفظ موجود ہے  پس پہلے  ایک ہزار اترے  پھر ان کے  بعد تین ہزار پورے  ہوئے  آخر پانچ ہزار ہو گئے، بظاہر یہی معلوم ہوتا ہے  کہ یہ وعدہ جنگ بدر کے  لئے  تھانہ کہ جنگ احد کیلئے ، بعض کہتے  ہیں  جنگ احد کے  موقعہ پر وعدہ ہوا تھا مجاہد عکرمہ ضحاک زہری موسیٰ بن عقبہ وغیرہ کا یہی قول ہے  لیکن وہ کہتے  ہیں  کہ چونکہ مسلمان میدان چھوڑ کر ہٹ گئے  اس لئے  یہ فرشتے  نازل نہ ہوئے، کیونکہ آیت (ان تصبروا وتتقوا) ساتھ ہی فرمایا تھا یعنی اگر تم صبر کرو اور تقویٰ کرو فور کے  معنی وجہ اور غضب کے  ہیں  مسومین کے  معنی علامت والے، حضرت علی رضی اللہ تعالیٰ عنہ فرماتے  ہیں  فرشتوں کی نشانی بدر والے  دن سفید رنگ کے  لباس کی تھی اور ان کے  گھوڑوں کی نشانی ماتھے  کی سفیدی تھی، حضرت ابوہریرہ رضی اللہ تعالیٰ عنہ فرماتے  ہیں  ان کی نشانی سرخ تھی، حضرت مجاہد فرماتے  ہیں  گردن کے  بالوں اور دم کا نشان تھا اور یہی نشان آپ کے  لشکریوں کا تھا یعنی صوف کا۔ مکحول کہتے  ہیں  فرشتوں کی نشانی ان کی پگڑیاں تھیں جو سیاہ رنگ کے  عمامے  تھے  اور حنین والے  دن سرخ رنگ عمامے  تھے، ابن عباس فرماتے  ہیں  بدر کے  علاوہ فرشتے  کبھی جنگ میں شامل نہیں  ہوئے  اور سفید رنگ عماموں کی علامت تھی یہ صرف مدد کیلئے  اور تعداد بڑھانے  کیلئے  تھے  نہ کہ لڑائی کیلئے ، یہ بھی مروی ہے  کہ یہ فرشتوں کا نازل کرنا اور تمہیں  اس کی خبر دینا صرف تمہاری خوشی، دلجوئی اور اطمینان کیلئے  ہے  ورنہ اللہ کو قدرت ہے  کہ ان کو اتارے  بغیر بلکہ بغیر تمہارے  لڑے  بھی تمہیں  غالب کر دے  مدد اسی کی طرف سے  ہے  جیسے  اور جگہ ہے  آیت (ولو شاء اللہ لا نتصر منہم) الخ، اگر اللہ چاہتا تو ان سے  خود ہی بدلہ لے  لیتا لیکن وہ ہر ایک کو آزما رہا ہے  اللہ تعالیٰ کی راہ میں جو قتل کئے  جائیں ان کے  اعمال اکارت نہیں  ہوتے  اللہ انہیں  راہ دکھائے  گا ان کے  اعمال سنوار دے  گا اور انہیں  جنت میں لے  جائے  گا جس کی تعریف وہ کر چکا ہے، وہ عزت والا ہے  اور اپنے  ہر کام میں حکمت رکھتا ہے ۔ یہ جہاد کا حکم بھی طرح طرح کی حکمتوں پر مبنی ہے  اس سے  کفار ہلاک  ہوں گے  یا ذلیل ہوں گے  یا نامراد واپس ہو جائیں گے ۔ اس کے  بعد بیان ہوتا ہے  کہ دنیا اور آخرت کے  کل امور اللہ تعالیٰ کے  ہاتھ میں ہیں ، اے  نبی صلی اللہ علیہ و سلم تمہیں  کسی امر کا اختیار نہیں  جیسے  فرمایا آیت (انما علیک البلاغ و علینا الحساب) تمہارا ذمہ صرف تبلیغ ہے  حساب تو تمہارے  ذمہ ہے  اور جگہ ہے  آیت (لیس علیک ھدھم) الخ، ان کی ہدایت تمہارے  ذمہ نہیں  اللہ جسے  چاہے  ہدایت دے  اور آیت (انک لا تھدی من اجبت) الخ، تو جسے  چاہے  ہدایت نہیں  کر سکتا بلکہ اللہ جسے  چاہے  ہدایت کرتا ہے، پس میرے  بندوں میں تجھے  کوئی اختیار نہیں  جو حکم پہنچے  اسے  اوروں کو پہنچا دے  تیرے  ذمہ یہی ہے  ممکن ہے  اللہ انہیں  توبہ کی توفیق دے  اور برائی کے  بعد وہ بھلائی کرنے  لگیں اور اللہ رحیم ان کی توبہ قبول فرما لے  یا ممکن ہے  کہ انہیں  ان کے  کفرو گناہ کی بناء پر عذاب کرے  تو یہ ظالم اس کے  بھی مستحق ہیں ، صحیح بخاری میں ہے  رسول اللہ صلی اللہ علیہ و سلم صبح کی نماز میں جب دوسری رکعت کے  رکوع سے  سر اٹھاتے  اور دعا (سمع اللہ لمن حمدہ ربناولک الحمد) کہہ لیتے  تو فار پر بددعا کرتے  کہ اے  اللہ فلاں فلاں پر لعنت کر اس کے  بارے  میں یہ آیت اتری (لیس لک من الامر شئی نازل) ہوئی مسند احمد میں ان کافروں کے  نام بھی آئے  ہیں  مثلاً حارث بن ہشام سہیل بن عمرو صفوان بن امیہ اور اسی میں ہے  کہ بالآخر ان کو ہدایت نصیب ہوئی اور یہ مسلمان ہو گئے، ایک روایت میں ہے  کہ چار آدمیوں پر یہ بد دعا تھی جس سے  روک دیئے  گئے  ۔ صحیح بخاری میں ہے  کہ حضور صلی اللہ علیہ و سلم جب کسی پر بد دعا کرنا یا کسی کے  حق میں نیک دعا کرنا چاہتے  تو رکوع کے  بعد سمع اللہ اور ربنا پڑھ کر دعا مانگتے  کبھی کہتے  اے  اللہ ولید بن ولید سلمہ بن ہشام عیاش بن ابو ربیعہ اور کمزور مومنوں کو کفار سے  نجات دے  اے  اللہ قبیلہ مضر پر اپنی پکڑ اور اپنا عذاب نازل فرما اور ان پر ایسی قحط سالی بھیج جیسی حضرت یوسف کے  زمانہ میں تھی یہ دعا با آواز بلند ہوا کرتی تھی اور بعض مرتبہ صبح کی نماز کے  قنوت میں یوں بھی کہتے  کہ اے  اللہ فلاں فلاں پر لعنت بھیج اور عرب کے  بعض قبیلوں کے  نام لیتے  تھے  اور روایت میں ہے  کہ جنگ احد میں جب آپ کے  دندان مبارک شہید ہوئے  چہرہ زخمی ہوا خون بہنے  لگا تو زبان سے  نکل کیا کہ وہ قوم کیسے  فلاح پائے  گی جس نے  اپنے  نبی صلی اللہ علیہ و سلم کے  ساتھ یہ کیا حالانکہ نبی صلی اللہ علیہ و سلم اللہ خالق کل کی طرف سے  انہیں  بلاتا تھا اس وقت یہ آیت (لیس لک) الخ، نازل ہوئی، آپ اس غزوے  میں ایک گڑھ میں گر پڑے  تھے  اور خون بہت نکل گیا تھا کچھ تو اس ضعف کی وجہ سے  اور کچھ اس وجہ سے  کہ دوہری زرہ پہنے  ہوئے  تھے  اٹھ نہ سکے  حضرت حذیفہ کے  مولیٰ حضرت سالم رضی اللہ تعالیٰ عنہ پہنچے  اور چہرے  پر سے  خون پونچھا جب افاقہ ہوا تو آپ نے  یہ فرمایا اور یہ آیت نازل ہوئی پھر فرماتا ہے  کہ زمین و آسمان کی ہر چیز اسی کی ہے  سب اس کے  غلام ہیں  جسے  چاہے  بخشے  جسے  چاہے  عذاب کرے  متصرف وہی ہے  جو چاہے  حکم کرے  کوئی اس پر پرشس نہیں  کر سکتا وہ غفور اور رحیم ہے ۔

۱۳۰

سود خور جہنمی ہے  اور غصہ شیطان کی دین ہے  اس سے  بچو

 اللہ تعالیٰ اپنے  مومن بندوں کو سودی لین دین سے  اور سود خوری سے  روک رہا ہے، اہل جاہلیت سودی قرضہ دیتے  تھے  مدت مقرر ہوتی تھی اگر اس مدت پر روپیہ وصول نہ ہوتا تو مدت بڑھا کر سود پر سود بڑھا دیا کرتے  تھے  اسی طرح سود در سود ملا کر اصل رقم کئی گنا بڑھ جاتی، اللہ تعالیٰ ایمانداروں کو اس طرح ناحق لوگوں کے  مال غصب کرنے  سے  روک رہا ہے  اور تقوے  کا حکم دے  کر اس پر نجات کا وعدہ کر رہا ہے، پھر آگ سے  ڈراتا ہے  اور اپنے  عذابوں سے  دھمکاتا ہے  پھر اپنی اور اپنے  رسول صلی اللہ علیہ و سلم کی اطاعت پر آمادہ کرتا ہے  اور اس پر رحم و کرم کا وعدہ دیتا ہے  پھر سعادت دارین کے  حصول کیلئے  نیکیوں کی طرف سبقت کرنے  کو فرماتا ہے  اور جنت کی تعریف کرتا ہے، چوڑائی کو بیان کر کے  لمبائی کا اندازہ سننے  والوں پر ہی چھوڑا جاتا ہے  جس طرح جنتی فرش کی تعریف کرتے  ہوئے  فرمایا آیت (بطائنھا من استبرق) یعنی اس کا استر نرم ریشم کا ہے  تو مطلب یہ ہے  کہ جب استر ایسا ہے  تو ابرے  کا کیا ٹھکانا ہے  اسی طرح یہاں بھی بیان ہو رہا ہے  کہ جب عرض ساتوں آسمانوں اور ساتویں زمینوں کے  برابر ہے  تو طول کتنا بڑا ہو گا اور بعض نے  کہا ہے  کہ عرض و طول یعنی لمبائی چوڑائی دونوں برابر ہے  کیونکہ جنت مثل قبہ کے  عرش کے  نیچے  ہے  اور جو چیز قبہ نما ہو یا مستدیر ہو اس کا عرض و طول یکساں ہوتا ہے ۔ ایک صحیح حدیث میں ہے  جب تم اللہ سے  جنت مانگو تو فردوس کا سوال کرو وہ سب سے  اونچی اور سب سے  اچھی جنت ہے  اسی جنت سے  سب نہریں جاری ہوتی ہیں  اور اسی کی چھت اللہ تعالیٰ رحمن رحیم کا عرش ہے، مسند امام احمد میں ہے  کہ ہرقل نے  حضور صلی اللہ علیہ و سلم کی خدمت میں بطور اعتراض کے  ایک سوال لکھ بھیجا کہ آپ مجھے  اس جنت کی دعوت دے  رہے  ہیں  جس کی چوڑائی آسمان و زمین کے  برابر ہے  تو یہ فرمایئے  کہ پھر جہنم کہاں گئی؟ حضور صلی اللہ علیہ و سلم نے  فرمایا یعلیٰ بن مرہ کی ملاقات حمص میں ہوئی تھی کہتے  ہیں  اس وقت یہ بہت ہی بوڑھا ہو گیا تھا کہنے  لگا جب میں نے  یہ خط حضور صلی اللہ علیہ و سلم کو دیا تو آپ نے  اپنی بائیں طرف کے  ایک صحابی کو دیا میں نے  لوگوں سے  پوچھا ان کا کیا نام ہے ؟ لوگوں نے  کہا یہ حضرت معاویہ ہیں  رضی اللہ تعالیٰ عنہ حضرت عمر رضی اللہ تعالیٰ عنہ سے  بھی یہی سوال ہوا تھا تو آپ نے  فرمایا تھا کہ دن کے  وقت رات اور رات کے  وقت دن کہاں جاتا ہے ؟ یہودی یہ جواب سن کر کھسیانے  ہو کر کہنے  لگے  کہ یہ توراۃ سے  ماخوذ کیا ہو گا، حضرت ابن عباس رضی اللہ تعالیٰ عنہ سے  بھی یہ جواب مروی ہے، ایک مرفوع حدیث میں ہے  کسی نے  حضور صلی اللہ علیہ و سلم سے  پوچھا تو آپ نے  جواب میں فرمایا جب ہر چیز پر رات آ جاتی ہے  تو دن کہاں جاتا ہے ؟ اس نے  کہا جہاں اللہ چاہے، آپ نے  فرمایا اسی طرح جہنم بھی جہاں چاہے  (بزار) اس جملہ کے  دو معنی ہوتے  ہیں  ایک تو یہ کہ رات کے  وقت ہم گو دن کو نہیں  دیکھ سکتے  لیکن تاہم دن کا کسی جگہ ہونا ناممکن نہیں ، اسی طرح گو جنت کا عرض اتنا ہی ہے  لیکن پھر بھی جہنم کے  وجود سے  انکار نہیں  ہو سکتا جہاں اللہ چاہے  وہ بھی ہے، دوسرے  معنی یہ کہ جب دن ایک طرف چڑھنے  لگا رات دوسری جانب ہوتی ہے  اسی طرح جنت اعلیٰ علیین میں ہے  اور دوزخ اسفل السافلین میں تو کوئی نفی کا امکان ہی نہ رہا واللہ اعلم پھر اللہ تعالیٰ اہل جنت کا وصف بیان فرماتا ہے  کہ وہ سختی میں اور آسانی میں خوشی میں اور غمی میں تندرستی میں اور بیماری میں غرض ہر حال میں راہ اللہ اپنا مال خرچ کرتے  رہتے  ہیں  جیسے  اور جگہ ہے  آیت (الذین ینفقون اموالھم باللیل والنھار سرا وعلانیۃ) یعنی وہ لوگ دن رات چھپے  کھلے  خرچ کرتے  رہتے  ہیں  کوئی امر انہیں  اللہ تعالیٰ کی اطاعت سے  باز نہیں  رکھ سکتا اس کی مخلوق پر اس کے  حکم سے  احسان کرتے  رہتے  ہیں  ۔ یہ غصے  کو پی جانے  والے  اور لوگوں کی برائیوں سے  درگزر کرنے  والے  ہیں  (کظم) کے  معنی چھپانے  کے  بھی ہیں  یعنی اپنے  غصہ کا اظہار بھی نہیں  کرتے  بعض روایتوں میں ہے  اے  ابن آدم اگر غصہ کے  وقت تجھے  یاد رکھوں گا یعنی ہلاکت کے  وقت تجھے  ہلاکت سے  بچا لوں گا (ابن ابی حاتم) اور حدیث میں ہے  رسول اللہ صلی اللہ علیہ و سلم فرماتے  ہیں  جو شخص اپنا غصہ روک لے  اللہ تعالیٰ اس پر سے  اپنے  عذاب ہٹا لیتا ہے  اور جو بھی اپنی زبان (خلاف شرع باتوں سے) روک لے  اللہ تعالیٰ اس کی پردہ پوشی کرے  گا اور جو شخص اللہ تعالیٰ کی طرف معذرت لے  جائے  اللہ تعالیٰ اس کا عذر قبول فرماتا ہے  (مسند ابو یعلیٰ) یہ حدیث غریب ہے  اور اس کی سند میں بھی اختلاف ہے  اور حدیث شریف میں ہے ۔ آپ فرماتے  ہیں  پہلوان وہ نہیں  جو کسی کو پچھاڑ دے  بلکہ حقیقتاً پہلوان وہ ہے  جو غصہ کے  وقت اپنے  نفس پر قابو رکھے  (احمد) صحیح بخاری صحیح مسلم میں رسول اللہ صلی اللہ علیہ و سلم فرماتے  ہیں  تم میں سے  کوئی ایسا ہے  جسے  اپنے  وارث کا مال اپنے  مال سے  زیادہ محبوب ہو؟ لوگوں نے  کہا حضور صلی اللہ علیہ و سلم کوئی نہیں  آپ نے  فرمایا میں تو دیکھتا ہوں کہ تم اپنے  مال سے  زیادہ اپنے  وارث کا مال چاہتے  ہو اس لئے  کہ تمہارا مال تو درحقیقت وہ ہے  جو تم راہ اللہ اپنی زندگی میں خرچ کر دو اور جو چھوڑ کر جاؤ وہ تمہارا مال نہیں  بلکہ تمہارے  وارثوں کا مال ہے  تو تمہارا راہ اللہ کم خرچ کرنا اور جمع زیادہ کرنا یہ دلیل ہے  اس امر کی کہ تم اپنے  مال سے  اپنے  وارثوں کے  مال کو زیادہ عزیز رکھتے  ہو، پھر فرمایا تم پہلوان کسے  جانتے  ہو؟ لوگوں نے  کہا حضور صلی اللہ علیہ و سلم اسے  جسے  کوئی گرا نہ سکے  آپ نے  فرمایا نہیں  بلکہ حقیقتاً زور دار پہلوان وہ ہے  جو غصہ کے  وقت اپنے  جذبات پر پورا قابو رکھے، پھر فرمایا بے  اولاد کسے  کہتے  ہو؟ لوگوں نے  کہا جس کی اولاد نہ ہو، فرمایا نہیں  بلکہ فی الواقع بے  اولاد وہ ہے  جس کے  سامنے  اس کی کوئی اولاد مری نہ ہو (مسلم) ایک اور روایت میں یہ بھی ہے  کہ آپ نے  دریافت فرمایا کہ جانتے  ہو مفلس کنگال کون ہے ؟ لوگوں نے  کہا جس کے  پاس مال نہ ہو آپ نے  فرمایا بلکہ وہ جس نے  اپنا مال اپنی زندگی میں راہ اللہ نہ دیا ہو (مسند احمد) حضرت حارثہ بن قدامہ سعدی رضی اللہ تعالیٰ عنہ حاضر خدمت نبوی میں عرض کرتے  ہیں  کہ حضور صلی اللہ علیہ و سلم مجھے  کوئی نفع کی بات کہیے  جو مختصر ہو تا کہ میں یاد بھی رکھ سکوں آپ نے  فرمایا غصہ نہ کر اس نے  پھر پوچھا آپ نے  پھر یہی جواب دیا کئی کئی مرتبہ یہی کہا (مسند احمد) کسی شخص نے  حضور صلی اللہ علیہ و سلم سے  کہا مجھے  کچھ وصیت کیجئے  آپ نے  فرمایا غصہ نہ کر وہ کہتے  ہیں  میں نے  جو غور کیا تو معلوم ہوا کہ تمام برائیوں کا مرکز غصہ ہی ہے  (مسند احمد) ایک روایت میں ہے  کہ حضرت ابوذر رضی اللہ تعالیٰ عنہ غصہ آیا تو آپ بیٹھ گئے  اور پھر لیٹ گئے  ان سے  پوچھا گیا یہ کیا؟ تو فرمایا میں نے  رسول اللہ صلی اللہ علیہ و سلم سے  سنا ہے  آپ فرماتے  تھے  جسے  غصہ آئے  وہ کھڑا ہو تو بیٹھ جائے  اگر اس سے  بھی غصہ نہ جائے  تو لیٹ جائے  (مسند احمد) مسند احمد کی ایک اور روایت میں ہے  کہ عروہ بن محمد کو غصہ چڑھا آپ وضو کرنے  بیٹھ گئے  اور فرمانے  لگے  میں نے  اپنے  استادوں سے  یہ حدیث سنی ہے  کہ رسول اللہ صلی اللہ علیہ و سلم نے  فرمایا کہ غصہ شیطان کی طرف سے  ہے  اور شیطان آگ سے  پیدا ہوا ہے  اور آگ بجھانے  والی چیز پانی ہے  پس تم غصہ کے  وقت وضو کرنے  بیٹھ جاؤ حضور صلی اللہ علیہ و سلم کا یہ ارشاد ہے  کہ جو شخص کسی تنگ دست کو مہلت دے  یا اپنا قرض اسے  معاف کر دے  اللہ تعالیٰ اسے  جہنم سے  آزاد کر دیتا ہے  لوگو سنو جنت کے  اعمال سخت اور مشکل ہیں  اور جہنم کے  کام آسان اور سہل ہیں  نیک بخت وہی ہے  جو فتنوں سے  بچ جائے  کسی گھونٹ کا پینا اللہ کو ایسا پسند نہیں  جتنا غصہ کے  گھونٹ کا پی جانا ایسے  شخص کے  دل میں ایمان رچ جاتا ہے  (مسند احمد) حضور علیہ الصلوٰۃ والسلام فرماتے  ہیں  جو شخص اپنا غصہ اتارنے  کی طاقت رکھتے  ہوئے  پھر بھی ضبط کر لے  اللہ تعالیٰ اس کا دل امن و امان سے  پر کر دیتا ہے  جو شخص باوجود موجود ہونے  کے  شہرت کے  کپڑے  کو تواضع کی وجہ سے  چھوڑ دے  اسے  اللہ تعالیٰ کرامت اور عزت کا حلہ قیامت کے  دن پہنائے  گا اور جو کسی کا سرچھپائے  اللہ تعالیٰ اسے  قیامت کے  دن بادشاہت کا تاج پہنائے  گا (ابوداؤد) حضور صلی اللہ علیہ و سلم فرماتے  ہیں  جو شخص باوجود قدرت کے  اپنا غصہ ضبط کر لے  اسی اللہ تعالیٰ تمام مخلوق کے  سامنے  بلا کر اختیار دے  گا کہ جس حور کو چاہے  پسند کر لے  (مسند احمد) اس مضمون کی اور بھی حدیثیں ہیں ، پس آیت کا مطلب یہ ہوا کہ وہ اپنے  غصہ میں آپے  سے  باہر نہیں  ہوتے  لوگوں کو ان کی طرف سے  برائی نہیں  پہنچتی بلکہ اپنے  جذبات کو دبائے  رکھتے  ہیں  اور اللہ سے  ڈر کر ثواب کی امید پر معاملہ سپر ڈالا کرتے  ہیں ، لوگوں سے  درگزر کرتے  ہیں  ظالموں کے  ظلم کا بدلہ ابھی نہیں  لیتے  اسی کو احسان کہتے  ہیں  اور ان محسن بندوں سے  اللہ محبت رکھتا ہے  حدیث میں ہے  رسول مقبول صلی اللہ علیہ و سلم فرماتے  ہیں  تین باتوں پر میں قسم کھاتا ہوں ایک تو یہ کہ صدقہ سے  مال نہیں  گھٹتا دوسرے  یہ کہ عفو و درگزر کرنے  سے  انسان کی عزت بڑھتی ہے  تیسرے  یہ کہ تواضع فروتنی اور عاجزی کرنے  والے  کو اللہ تعالیٰ بلند مرتبہ عطا کرتا ہے، مستدرک کی حدیث میں ہے  جو شخص یہ چاہے  کہ اس کی بنیاد بلند ہو اور اس کے  درجے  بڑھیں تو اسے  ظالموں سے  درگزر کرنا چاہئے  اور نہ دینے  والوں کو دینا چاہئے  اور توڑنے  والوں سے  جوڑنا چاہئے  اور حدیث میں ہے  قیامت کے  دن ایک پکارے  گا کہ اے  لوگو درگزر کرنے  والو اپنے  رب کے  پاس آؤ اور اپنا اجر لو۔ مسلمانوں کی خطاؤں کے  معاف کرنے  والے  جنتی لوگ ہیں  ۔ پھر فرمایا یہ لوگ گناہ کے  بعد فوراً ذکر اللہ اور استغفار کرتے  ہیں  ۔ مسند احمد میں یہ روایت حضرت ابوہریرہ سے  مروی ہے  رسول اللہ صلی اللہ علیہ و سلم فرماتے  ہیں  جب کوئی شخص گناہ کرتا ہے  پھر اللہ رحمن و رحیم کے  سامنے  حاضر ہو کر کہتا ہے  کہ پروردگار مجھ سے  گناہ ہو گیا تو معاف فرما اللہ تعالیٰ فرماتا ہے  میرے  بندے  سے  گو گناہ ہو گیا لیکن اس کا ایمان ہے  کہ اس کا رب گناہ پر پکڑ بھی کرتا ہے  اور اگر چاہے  تو معاف بھی فرما دیتا ہے  میں نے  اپنے  بندے  کا گناہ معاف فرمایا، اس سے  پھر گناہ ہو تو فرما دیتا ہے  میں نے  اپنے  بندے  کا گناہ معاف فرمایا، اس سے  پھر گناہ ہو جاتا ہے  یہ پھر توبہ کرتا ہے  اللہ تعالیٰ پھر بخشتا ہے  چوتھی مرتبہ پھر گناہ کر بیٹھتا ہے  پھر توبہ کرتا ہے  تو اللہ تعالیٰ معاف فرما کر کہتا ہے  اب میرا بندہ جو چاہے  کرے  (مسند احمد) یہ حدیث بخاری و مسلم میں بھی ہے، حضرت ابوہریرہ رضی اللہ تعالیٰ عنہ فرماتے  ہیں  ہم نے  ایک مرتبہ جناب رسول اللہ صلی اللہ علیہ و سلم سے  کہا کہ یہ رسول اللہ صلی اللہ علیہ و سلم جب ہم آپ کو دیکھتے  ہیں  تو ہمارے  دلوں میں رقت طاری ہو جاتی ہے  اور ہم اللہ والے  بن جاتے  ہیں  لیکن جب آپ کے  پاس سے  چلے  جاتے  ہیں  تو وہ حالت نہیں  رہتی عورتوں بچوں میں پھنس جاتے  ہیں  گھر بار کے  دھندوں میں لگ جاتے  ہیں  آپ صلی اللہ علیہ و سلم نے  فرمایا۔ اگر تمہاری حالت یہی ہر وقت رہتی تو پھر فرشتے  تم سے  مصافحہ کرتے  اور تمہاری ملاقات کو تمہارے  گھر پر آتے، سنو اگر تم گناہ نہ کرو تو اللہ تمہیں  یہاں سے  ہٹا دے  اور دوسری قوم کو لے  آئے  جو گناہ کرے  پھر بخشش مانگے  اور اللہ انہیں  بخشے  ہم نے  کہا حضور صلی اللہ علیہ و سلم یہ فرماتے  کہ جنت کی بنیادیں کس طرح استوار ہیں  آپ نے  فرمایا ایک اینٹ سونے  کی تو ایک چاندی کی ہے  اس کا گارہ مشک خالص ہے  اس کے  کنکر لؤلؤ اور یاقوت ہیں ، اس کی مٹی زعفران ہے، جنتیوں کی نعمتیں کبھی ختم نہ ہوں گی ان کی زندگی ہمیشہ کی ہو گی ان کے  کپڑے  پرانے  نہیں  ہونگے  جوانی کبھی نہیں  ڈھلے  گی اور تین اشخاص کی دعا کبھی رد نہیں  ہوتی عادل بادشاہ کی دعا افطاری کے  وقت روزے  دار کی دعا اور مظلوم کی دعا بادلوں سے  اٹھائی جاتی ہے  اور اس کے  لئے  آسمانوں کے  دروازے  کھول دیئے  جاتے  ہیں  اور جناب باری ارشاد فرماتا ہے  مجھے  میری عزت کی قسم میں تیری ضرور مدد کروں گا اگرچہ کچھ وقت کے  بعد ہو (مسند احمد) امیر المومنین حضرت ابوبکر صدیق رضی اللہ تعالیٰ عنہ فرماتے  ہیں  کہ رسول اللہ صلی اللہ علیہ و سلم نے  فرمایا جو شخص کوئی گناہ کرے  پھر وضو کر کے  دو رکعت نماز ادا کرے  اور اپنے  گناہ کی معافی چاہے  تو اے  اللہ عزوجل اس کے  گناہ معاف فرما دیتا ہے  (مسند احمد) صحیح مسلم میں روایت امیر المومنین حضرت عمر بن خطاب رضی اللہ تعالیٰ عنہ مروی ہے  رسول اللہ صلی اللہ علیہ و سلم فرماتے  ہیں  تم میں سے  جو شخص کامل وضو کر کے  دعا (اشھدان لاالہ الا اللہ وحدہٗ لاشریک لہٗ واشھدان محمد اعبدہ ورسولہ) پڑھے  اس کیلئے  جنت کے  آٹھوں دروازے  کھل جاتے  ہیں  جس سے  چاہے  اندر چلا جائے، امیر المومنین حضرت عثمان بن عفان رضی اللہ تعالیٰ عنہ سنت کے  مطابق وضو کرتے  ہیں  پھر فرماتے  ہیں  میں نے  آنحضرت صلی اللہ علیہ و سلم سے  سنا ہے  آپ نے  فرمایا جو شخص مجھ جیسا وضو کرے  پھر دو رکعت نماز ادا کرے  جس میں اپنے  دل سے  باتیں نہ کرے  تو اللہ تعالیٰ اس کے  تمام گناہ معاف فرما دیتا ہے  (بخاری مسلم) پس یہ حدیث کو حضرت عثمان سے  اس سے  اگلی روایت حضرت عمر سے  اور اس سے  اگلی روایت حضرت ابوبکر سے  اور اس سے  تیسری روایت کو حضرت ابوبکر سے  حضرت علی روایت کرتے  ہیں  تو الحمد اللہ، اللہ تعالیٰ کی وسیع مغفرت اور اس کی بے  انتہاء مہربانی کی خبر سید الاولین والاخرین کی زبانی آپ کے  چاروں برحق خلفاء کی معرفت ہمیں پہنچی (آؤ اس موقعہ پر ہم گنہگار بھی ہاتھ اٹھائیں اور اپنے  مہربان رحیم و کریم اللہ کے  سامنے  اپنے  گناہوں کا اقرار کر کے  اس سے  معافی طلب کریں اللہ تعالیٰ اے  ماں باپ سے  زیادہ مہربان اے  عفوودرگزر کرنے  والے ! اور کسی بھکاری کو اپنے  در سے  خالی نہ پھیرنے  والے ! تو ہم خطاکاروں کی سیاہ کاریوں سے  بھی درگزر فرما اور ہمارے  کل گناہ معاف فرما دے ۔ مترجم) یہی وہ مبارک آیت ہے  کہ جب یہ نازل ہوئی تو ابلیس رونے  لگا (مسند عبدالرزاق)

۱۳۴

 استغفار اور لاالہ الا اللہ

 مسند ابو یعلیٰ میں ہے  رسول اللہ صلی اللہ علیہ و سلم فرماتے  ہیں  لاالہ الا اللہ کثرت سے  پڑھا کرو اور استغفار پر مداومت کرو ابلیس گناہوں سے  لوگوں کو ہلاک کرنا چاہتا ہے  اور اس کی اپنی ہلاکت لاالہ الا اللہ اور استغفار سے  ہے، یہ حدیث دیکھ کر ابلیس نے  لوگوں کو خواہش پرستی پر ڈال دیا پس وہ اپنے  آپ کو راہ راست پر جانتے  ہیں  حالانکہ ہلاکت میں ہوتے  ہیں  لیکن اس حدیث کے  دو راوی ضعیف ہیں  ۔ مسند احمد میں ہے  حضور صلی اللہ علیہ و سلم فرماتے  ہیں  کہ ابلیس نے  کہا اے  رب مجھے  تیری عزت کی قسم میں بنی آدم کو ان کے  آخری دم تک بہکاتا رہوں گا، اللہ تعالیٰ نے  فرمایا مجھے  میرے  جلال اور میری عزت کی قسم جب تک وہ مجھ سے  بخشش مانگتے  رہیں  گے  میں بھی انہیں  بخشتا رہوں گا مسند بزاز میں ہے  کہ ایک شخص نے  حضور صلی اللہ علیہ و سلم سے  کہا مجھ سے  گناہ ہو گیا آپ نے  فرمایا پھر استغفار کر اس نے  کہا مجھ سے  اور گناہ ہوا فرمایا استغفار کئے  جا، یہاں تک کہ شیطان تھک جائے  پھر فرمایا گناہ کو بخشنا اللہ ہی کے  اختیار میں ہے  مسند احمد میں ہے  رسول اللہ صلی اللہ علیہ و سلم کے  پاس ایک قیدی آیا اور کہنے  لگا یا اللہ میں تیری طرف توبہ کرتا ہوں محمد صلی اللہ علیہ و سلم کی طرف توبہ نہیں  کرتا (یعنی اللہ میں تیری ہی بخشش چاہتا ہوں) آپ نے  فرمایا اس نے  حق حقدار کو پہنچایا۔ اصرار کرنے  سے  مراد یہ ہے  کہ معصیت پر بغیر توبہ کئے  اڑ نہیں  جاتے  اگر کئی مرتبہ گناہ ہو جائے  تو کئی مرتبہ استغفار کرتے  ہیں ، مسند ابویعلیٰ میں ہے  رسول اللہ صلی اللہ علیہ و سلم فرماتے  ہیں  وہ اصرار کرنے  والا اور اڑنے  والا نہیں  جو استغفار کرتا رہتا ہے  اگرچہ (بالفرض) اس سے  ایک دن میں ستر مرتبہ بھی گناہ ہو جائے  پھر فرمایا کہ وہ جانتے  ہوں یعنی اس بات کو کہ اللہ توبہ قبول کرنے  والا ہے  جیسے  اور جگہ ہے  آیت (الم یعلموا ان اللہ ھو یقبل التوبۃ عن عبادہ) کیا یہ نہیں  جانتے  کہ اللہ تعالیٰ اپنے  بندوں کی توبہ قبول فرماتا ہے  اور جگہ ہے  آیت (ومن یعمل سوء او یظلم نفسہ) الخ، جو شخص کوئی برا کام کرے  یا گناہ کر کے  اپنی جان پر ظلم کرے  پھر اللہ تعالیٰ سے  بخشش طلب کرے  تو وہ دیکھ لے  گا کہ اللہ عزوجل بخشش کرنے  والا مہربان ہے ۔ مسند احمد میں ہے  رسول اللہ صلی اللہ علیہ و سلم نے  منبر پر بیان فرمایا لوگو تم اوروں پر رحم کرو اللہ تم پر رحم کرے  گا لوگو تم دوسروں کی خطائیں معاف کرو اللہ تعالیٰ تمہارے  گناہوں کو بخشے  گا باتیں بنانے  والوں کی ہلاکت ہے  گناہ پر جم جانے  والوں کی ہلاکت ہے  پھر فرمایا ان کاموں کے  بدلے  ان کی جزا مغفرت ہے  اور طرح طرح کی بہتی نہروں والی جنت ہے  جس میں وہ ہمیشہ رہیں  گے، یہ بڑے  اچھے  اعمال ہیں ۔

۱۳۷

شہادت اور بشارت

 چونکہ احد والے  دن ستر مسلمان صحابی شہید ہوئے  تھے  تو اللہ تعالیٰ مسلمانوں کو ڈھارس دیتا ہے  کہ اس سے  پہلے  بھی دیندار لوگ مال و جان کا نقصان اٹھاتے  رہے  لیکن بالآخر غلبہ انہی کا ہوا تم اگلے  واقعات پر ایک نگاہ ڈال لو تو یہ راز تم پر کھل جائے  گا۔ اس قرآن میں لوگوں کیلئے  اگلی امتوں کا بیان بھی ہے  اور یہ ہدایت و وعظ بھی ہے ۔ یعنی تمہارے  دلوں کی ہدایت اور تمہیں  برائی بھلائی سے  آگاہ کرنے  والا یہی قرآن ہے، مسلمانوں کو یہ واقعات یاد دلا کر پھر مزید تسلی کے  طور پر فرمایا کہ تم اس جنگ کے  نتائج دیکھ کر بد دل نہ ہو جانا نہ مغموم بن کر بیٹھ رہنا فتح و نصرت غلبہ اور بلند و بالا مقام بالآخر مومنو تمہارے  لئے  ہی ہے ۔ اگر تمہیں  زخم لگے  ہیں  تمہارے  آدمی شہید ہوئے  تو اس سے  پہلے  تمہارے  دشمن بھی تو قتل ہو چکے  ہیں  وہ بھی تو زخم خوردہ ہیں  یہ تو چڑھتی ڈھلتی چھاؤں ہے  ہاں بھلا وہ ہے  جو انجام کار غالب رہے  اور یہ ہم نے  تمہارے  لئے  لکھ دیا ہے ۔ یہ بعض مرتبہ شکست بالخصوص اس جنگ احد کی اس لئے  تھی کہ ہم صابروں کا اور غیر صابروں کا امتحان کر لیں اور جو مدت سے  شہادت کی آرزو رکھتے  تھے  انہیں  کامیاب بنائیں کہ وہ اپنا جان و مال ہماری راہ میں خرچ کریں، اللہ تعالیٰ ظالموں کو پسند نہیں  کرتا۔ یہ جملہ معترضہ بیان کر کے  فرمایا یہ اس لئے  بھی کہ ایمان والوں کے  گناہ اگر ہوں تو دور ہو جائیں اور ان کے  درجات بڑھیں اور اس میں کافروں کا مٹانا بھی ہے  کیونکہ وہ غالب ہو کر اتر آئیں گے  سرکشی اور تکبر میں اور بڑھیں گے  اور یہی ان کی ہلاکت اور بربادی کا سبب بنے  گا اور پھر مر کھپ جائیں گے  ان سختیوں اور زلزلوں اور ان آزمائشوں کے  بغیر کوئی جنت میں نہیں  جا سکتا جیسے  سورہ بقرہ میں ہے  کہ کیا تم جانتے  ہو کہ تم سے  پہلے  لوگوں کی جیسی آزمائش ہوئی ایسی تمہاری نہ ہو اور تم جنت میں چلے  جاؤ یہ نہیں  ہو گا اور جگہ ہے  آیت (الم احسب الناس ان یقولوا امنا وھم لایفتنون) کیا لوگوں نے  یہ گمان کر رکھا ہے  کہ ہم صرف ان کے  اس قول پر کہ ہم ایمان لائے  انہیں  چھوڑ دیں گے  اور انکی آزمائش نہ کی جائے  گی؟ یہاں بھی یہی فرمان ہے  کہ جب تک صبر کرنے  والے  معلوم نہ ہو جائیں یعنی دنیا میں ہی ظہور میں نہ آ جائیں تب تک جنت نہیں  مل سکتی پھر فرمایا کہ تم اس سے  پہلے  تو ایسے  موقعہ کی آرزو میں تھے  کہ تم اپنا صبر اپنی بہادری اور مضبوطی اور استقامت اللہ تعالیٰ کو دکھاؤ اللہ کی راہ میں شہادت پاؤ، لو اب ہم نے  تمہیں  یہ موقعہ دیا تم بھی اپنی ثابت قدمی اور اولوالعزمی دکھاؤ، حدیث شریف میں ہے  دشمن کی ملاقات کی آرزو نہ کرو اللہ تعالیٰ سے  عافیت طلب کرو اور جب میدان پڑ جائے  پھر لو ہے  کی لاٹ کی طرح جم جاؤ اور صبر کے  ساتھ ثابت قدم رہو اور جان لو کہ جنت تلواروں کے  سائے  تلے  ہے  پھر فرمایا کہ تم نے  اپنی آنکھوں سے  اس منظر کو دیکھ لیا کہ نیزے  تنے  ہوئے  ہیں  تلواریں کھچ رہی ہیں  بھالے  اچھل رہے  ہیں  تیر برس رہے  ہیں  گھمسان کا رن پڑا ہوا ہے  اور ادھر ادھر لاشیں گر رہی ہیں  ۔

۱۴۴

رسول اللہ صلی اللہ علیہ و سلم کی وفات کا مغالطہ اور غزوہ احد

میدان احد میں مسلمانوں کو شکست بھی ہوئی اور ان کے  بعض قتل بھی کئے  گئے ۔ اس دن شیطان نے  یہ بھی مشہور کر دیا کہ محمد صلی اللہ علیہ و سلم بھی شہید ہو گئے  اور ابن قمیہ کافر نے  مشرکوں میں جا کر یہ خبر اڑا دی کہ میں حضور صلی اللہ علیہ و سلم کو قتل کر کے  آیا ہوں اور دراصل وہ افواہ بے  اصل تھی اور اس شخص کا یہ قول بھی غلط تھا۔ اس نے  حضور صلی اللہ علیہ و سلم پر حملہ تو کیا تھا لیکن اس سے  صرف آپ صلی اللہ علیہ و سلم کا چہرہ قدرے  زخمی ہو گیا تھا اور کوئی بات نہ تھی اس غلط بات کی شہرت نے  مسلمانوں کے  دل چھوٹے  کر دیئے  ان کے  قدم اکھڑ گئے  اور لڑائی سے  بد دل ہو کر بھاگ کھڑے  ہوئے  اسی بارے  میں یہ آیت نازل ہوئی کہ اگلے  انبیاء کی طرح یہ بھی ایک نبی ہیں  ہو سکتا ہے  کہ میدان میں قتل کر دیئے  جائیں لیکن کچھ اللہ کا دین نہیں  جاتا رہے  گا ایک روایت میں ہے  کہ ایک مہاجر نے  دیکھا کہ ایک انصاری جنگ احد میں زخموں سے  چور زمین پر گرا پڑا ہے  اور خاک و خون میں لوٹ رہا ہے  اس سے  کہا کہ آپ کو بھی معلوم ہے  کہ حضور صلی اللہ علیہ و سلم قتل کر دیئے  گئے  اس نے  کہا اگر یہ صحیح ہے  تو آپ صلی اللہ علیہ و سلم تو اپنا کام کر گئے، اب آپ صلی اللہ علیہ و سلم کے  دین پر سے  تم سب بھی قربان ہو جاؤ، اسی کے  بارے  میں یہ آیت اتری پھر فرمایا کہ حضور صلی اللہ علیہ و سلم کا قتل یا انتقال ایسی چیز نہیں  کہ تم اللہ تعالیٰ کے  دین سے  پچھلے  پاؤں پلٹ جاؤ اور ایسا کرنے  والے  اللہ کا کچھ نہ بگاڑیں گے، اللہ تعالیٰ انہی لوگوں کو جزائے  خیر دے  گا جو اس کی اطاعت پر جم جائیں اور اس کے  دین کی مدد میں لگ جائیں اور اس کے  رسول صلی اللہ علیہ و سلم کی تابعداری میں مضبوط ہو جائیں خواہ رسول صلی اللہ علیہ و سلم زندہ ہوں یا نہ ہوں، صحیح بخاری شریف میں ہے  کہ حضور صلی اللہ علیہ و سلم کے  انتقال کی خبر سن کر حضرت ابوبکر صدیق جلدی سے  گھوڑے  پر سوار ہو کر آئے  مسجد میں تشریف لے  گئے  لوگوں کی حالت دیکھی بھالی اور بغیر کچھ کہے  سنے  حضرت عائشہ کے  گھر پر آئے  یہاں حضور علیہ السلام پر حبرہ کی چادر اوڑھا دی گئی تھی آپ نے  چادر کا کونہ چہرہ مبارک پر سے  ہٹا کر بے  ساختہ بوسہ لے  لیا اور روتے  ہوئے  فرمانے  لگے  میرے  ماں باپ آپ پر فدا ہوں، اللہ کی قسم اللہ تعالیٰ آپ صلی اللہ علیہ و سلم پر دو مرتبہ موت نہ لائے  گا جو موت آپ پر لکھ دی گئی تھی وہ آپ کو آ چکی۔ اس کے  بعد آپ پھر مسجد میں آئے  اور دیکھا کہ حضرت عمر خطبہ سنا رہے  ہیں  ان سے  فرمایا کہ خاموش ہو جاؤ انہیں  چپ کرا کر آپ نے  لوگوں سے  فرمایا کہ جو شخص محمد صلی اللہ علیہ و سلم کی عبادت کرتا تھا وہ جان لے  کہ محمد صلی اللہ علیہ و سلم مر گئے  اور جو شخص اللہ تعالیٰ کی عبادت کرتا تھا وہ خوش رہے  کہ اللہ تعالیٰ زندہ ہے  اس پر موت نہیں  آتی۔ پھر آپ نے  یہ آیت تلاوت فرمائی لوگوں کو ایسا معلوم ہونے  لگا گویا یہ آیت اب اتری ہے  پھر تو ہر شخص کی زبان پر یہ آیت چڑھ گئی اور لوگوں نے  یقین کر لیا کہ آپ صلی اللہ علیہ و سلم فوت ہو گئے  (صلی اللہ علیہ و سلم) حضرت صدیق اکبر کی زبانی اس آیت کی تلاوت سن کر حضرت عمر کے  تو گویا قدموں تلے  سے  زمین نکل گئی، انہیں  بھی یقین ہو گیا کہ حضور صلی اللہ علیہ و سلم اس جہان فانی کو چھوڑ کر چل بسے، حضرت علی رسول اللہ صلی اللہ علیہ و سلم کی زندگی ہی میں فرماتے  تھے  کہ نہ ہم حضور صلی اللہ علیہ و سلم کی موت پر مرتد ہوں نہ آپ کی شہادت پر اللہ کی قسم اگر حضور صلی اللہ علیہ و سلم قتل کئے  جائیں تو ہم بھی اس دین پر مر مٹیں جس پر پر شہید ہوئے  اللہ کی قسم میں آپ کا بھائی ہوں آپ کا ولی ہوں آپ کا چچا زاد بھائی ہوں اور آپ کا وارث ہوں مجھ سے  زیادہ حقدار آپ کا اور کون ہو گا۔ پھر ارشاد ہوتا ہے  کہ ہر شخص اللہ تعالیٰ کے  حکم سے  اور اپنی مدت پوری کر کے  ہی مرتا ہے  جیسے  اور جگہ ہے  وما یعمر من معمر ولا ینقص من عمرہ الی فی کتاب نہ کوئی عمر دیا جاتا ہے  نہ عمر گھٹائی جاتی ہے  مگر سب کتاب اللہ میں موجود ہے  اور جگہ ہے  ھوالذی خلقکم من طین الخ، "جس اللہ نے  تمہیں  مٹی سے  پیدا کیا پھر وقت پورا کیا اور اجل مقرر کی” اس آیت میں بزدل لوگوں کو شجاعت کی رغبت دلائی گئی ہے  اور اللہ کی راہ کے  جہاد کا شوق دلایا جا رہا ہے  اور بتایا جا رہا ہے  کہ جوانمردی کی وجہ سے  کچھ عمر گھٹ نہیں  جاتی اور پیچھے  ہٹنے  کی وجہ سے  عمر بڑھ نہیں  جاتی۔ موت تو اپنے  وقت پر آ کر ہی رہے  گی خواہ شجاعت اور بہادری برتو خواہ نامردی اور بزدلی دکھاؤ۔ حجر بن عدی جب دشمنان دین کے  مقابلے  میں جاتے  ہیں  اور دریائے  دجلہ بیچ میں آ جاتا ہے  اور لشکر اسلام ٹھٹھک کر کھڑا ہو جاتا ہے  تو آپ اس آیت کی تلاوت کر کے  فرماتے  ہیں  کہ کوئی بھی بے  اجل نہیں  مرتا آؤ اسی دجلہ میں گھوڑے  ڈال دو، یہ فرما کر آپ اپنا گھوڑا دریا میں ڈال دیتے  ہیں  آپ کی دیکھا دیکھی اور لوگ بھی اپنے  گھوڑوں کو پانی میں ڈال دیتے  ہیں  ۔ دشمن کا خون خشک ہو جاتا ہے  اور اس پر ہیبت طاری ہو جاتی ہے ۔ وہ کہنے  لگتے  ہیں  کہ یہ تو دیوانے  آدمی ہیں  یہ تو پانی کی موجوں سے  بھی نہیں  ڈرتے  بھاگو بھاگو چنانچہ سب کے  سب بھاگ کھڑے  ہوئے ۔ پھر ارشاد ہوتا ہے  کہ جس کا عمل صرف دنیا کیلئے  ہو تو اس میں سے  جتنا اس کے  مقدر میں ہوتا ہے  مل جاتا ہے  لیکن آخرت میں وہ خالی ہاتھ رہ جاتا ہے  اور جس کا مقصد آخرت طلبی ہو اسے  آخرت تو ملتی ہی ہے  لیکن دنیا میں بھی اپنے  مقدر کا پا لیتا ہے  جیسے  اور جگہ فرمایا من کان یرید حرث الاخرۃ الخ، آخرت کی کھیتی کے  چاہنے  والے  کو ہم زیادتی کے  ساتھ دیتے  ہیں  اور دنیا کی کھیتی کے  چاہنے  والے  کو ہم گو دنیا دے  دیں لیکن آخرت میں اس کا کوئی حصہ نہیں  اور جگہ ہے  من کان یرید العاجلۃ جو شخص صرف دنیا طلب ہی ہو ہم ان میں سے  جسے  چاہیں  جس قدر چاہیں  دنیا دے  دیتے  ہیں  پھر وہ جہنمی بن جاتا ہے  اور ذلت و رسوائی کے  ساتھ میں جاتا ہے  اور جو آخرت کا خواہاں ہو اور کوشاں بھی ہو اور با ایمان بھی ہو ان کی کوشش اللہ تعالیٰ کے  ہاں مشکور ہے  اسی لئے  یہاں بھی فرمایا کہ ہم شکر گزاروں کو اچھا دبلہ دے  دیتے  ہیں  پھر اللہ تعالیٰ احد کے  مجاہدین کو خطاب کرتا ہوا فرماتا ہے  کہ اس سے  پہلے  بھی بہت سے  نبی اپنی جماعتوں کو ساتھ لے  کر دشمنان دین سے  لڑے  بھڑے  اور وہ تمہاری طرح اللہ کی راہ میں تکلیفیں بھی پہنچائے  گئے  لیکن پھر بھی مضبوط دل اور صابرو شا کر رہے  نہ سست ہوئے  نہ ہمت ہاری اور اس صبر کے  بدلے  انہوں نے  اللہ کریم کی محبت مول لے  لی، ایک یہ معنی بھی بیان کئے  گئے  ہیں  کہ اے  مجاہدین احد تم یہ سن کر حضور صلی اللہ علیہ و سلم شہید ہوئے  کیوں ہمت ہار بیٹھے ؟ اور کفر کے  مقابلے  میں کیوں دب گئے ؟ حالانکہ تم سے  اگلے  لوگ اپنے  انبیاء کی شہادت کو دیکھ کر بھی نہ دبے  نہ پیچھے  ہٹے  بلکہ اور تیزی کے  ساتھ لڑے، یہ اتنی بڑی مصیبت بھی ان کے  قدم نہ ڈگمگا سکی اور کے  دل چھوٹے  نہ کر سکی پھر تم حضور صلی اللہ علیہ و سلم کی شہادت کی خبر سن کر اتنے  بودے  کیوں ہو گئے  ربیون کے  بہت سے  معنی آتے  ہیں  مثلاً علماء ابرار متقی عابد زاہد تابع فرمان وغیرہ وغیرہ ۔ پس قرآن کریم ان کی اس مصیبت کے  وقت دعا کو نقل کرتا ہے  پھر فرماتا ہے  کہ انہیں  دنیا کا ثواب نصرت و مدد ظفر  و اقبال ملا اور آخرت کی بھلائی اور اچھائی بھی اسی کے  ساتھ جمع ہوئی یہ محسن لوگ اللہ کے  چہیتے  بندے  ہیں  ۔

۱۴۹

کافر اور منافقوں کے  ارادے  اور غزوہ احد کا پھر اندوہناک تذکرہ

 اللہ تعالیٰ اپنے  ایماندار بندوں کو کافروں اور منافقوں کی باتوں کے  ماننے  سے  روک رہا ہے  اور بتا رہا ہے  کہ اگر ان کی مانی تو دنیا اور آخرت کی ذلت تم پر آئے  گی انکی چاہت تو یہی ہے  کہ تمہیں  دین اسلام سے  ہٹا دیں پھر فرماتا ہے  مجھ ہی کو اپنا والی اور مددگار جانو مجھی سے  دوستی کرو مجھی پر بھروسہ کرو مجھی سے  مدد چاہو پھر فرمایا کہ ان شریروں کے  دلوں میں ان کے  کفر کے  سبب ڈر خوف ڈال دوں گا، بخاری مسلم میں حضرت جابر بن عبد اللہ سے  روایت ہے  کہ رسول اللہ صلی اللہ علیہ و سلم نے  فرمایا مجھے  پانچ باتیں دی گئیں ہیں  جو مجھ سے  پہلے  کسی نبی کو نہیں  دی گئیں میری مدد مہینہ بھر کی راہ تک رعب سے  کی گئی ہے  میرے  لئے  زمین مسجد اور اس کی مٹی وضو کی پاک چیز بنائی گئی، میرے  لئے  غنیمت کے  مال حلال کئے  گئے  اور مجھے  شفاعت دی گئی اور ہر نبی اپنی اپنی قوم کی طرف سے  مخصوص بھیجا جاتا تھا اور میری بعثت میری نبوت تمام دنیا کیلئے  عام ہوئی، مسند احمد میں ہے  آپ فرماتے  ہیں  اللہ تعالیٰ نے  تمام نبیوں پر اور بعض روایتوں میں ہے  تمام امتوں پر مجھے  چار فضیلتیں عطا فرمائی ہیں ، مجھے  تمام دنیا کی طرف رسول بنا کر بھیجا گیا، میرے  اور میری امت کیلئے  تمام زمین مسجد اور پاک بنائی گئی، میرے  امتی کو جہاں نماز کا وقت آ جائے  وہیں  اس کی مسجد اور اس کا وضو ہے، میرا دشمن مجھ سے  مہینہ بھر کی راہ پر ہو وہیں  سے  اللہ تعالیٰ اس کا دل رعب سے  پُر کر دیتا ہے  اور وہ کانپنے  لگتا ہے  اور میرے  لئے  غنیمت کے  مال حلال کئے  گئے  اور روایت میں ہے  کہ میں مدد کیا گیا ہوں میرے  رعب سے  ہر دشمن پر، مسند کی ایک اور حدیث میں ہے  مجھے  پانچ چیزیں دی گئیں میں ہر سرخ و سفید کی طرف بھیجا گیا میرے  لئے  تمام زمین وضو اور مسجد بنائی گی۔ میرے  لئے  غنیمتوں کے  مال حلال کئے  گئے  جو میرے  پہلے  کسی کے  حلال نہ تھے  اور میری مدد مہینہ بھر کی راہ تک رعب سے  کی گئی اور مجھے  شفاعت دی گئی تمام انبیاء نے  شفاعت مانگ لی لیکن میں نے  اپنی شفاعت کو اپنی امت کے  لوگوں کیلئے  جنہوں نے  اللہ کے  ساتھ کسی کو شریک نہ کیا ہو بچا رکھی ہے ، حضرت ابن عباس فرماتے  ہیں  اللہ تعالیٰ نے  ابوسفیان کے  دل میں رعب ڈال دیا اور وہ لڑائی سے  لوٹ گیا پھر ارشاد ہوتا ہے  کہ اللہ تعالیٰ نے  اپنا وعدہ سچا کر دکھایا اور تمہاری مدد کی اس سے  بھی یہ استدلال ہو سکتا ہے  کہ یہ وعدہ احد کے  دن کا تھا تین ہزار دشمن کا لشکر تھا تاہم مقابلہ پر آتے  ہی ان کے  قدم اکھڑ گئے  اور مسلمانوں کو فتح حاصل ہوئی لیکن پھر تیر اندازوں کی نافرمانی کی وجہ سے  اور بعض حضرات کی پست ہمتی کی بناء پر وہ وعدہ جو مشروط تھا رک گیا پس فرماتا ہے  کہ تم انہیں  اپنے  ہاتھوں سے  کاٹتے  تھے ۔ شروع دن میں ہی اللہ نے  تمہیں  ان پر غالب کر دیا لیکن تم نے  پھر بزدلی دکھائی اور نبی کی نافرمانی کی ان کی بتائی ہوئی جگہ سے  ہٹ گئے  اور آپس میں اختلاف کرنے  لگے  حالانکہ اللہ عزوجل نے  تمہیں  تمہاری پسند کی چیز فتح دکھا دی تھی یعنی مسلمان صاف طور پر غالب آ گئے  تھے  مال غنیمت آنکھوں کے  سامنے  موجود تھا کفار پیٹھ پھیر کر بھاگ کھڑے  ہوئے  تھے  تم میں سے  بعض نے  دنیا طلبی کی اور کفار کی ہزیمت کو دیکھ کر نبی صلی اللہ علیہ و سلم کے  فرمان کا خیال نہ کر کے  مال غنیمت کی طرف لپکے  گو بعض اور نیک آخرت طلب بھی تھے  لیکن اس نافرمانی وغیرہ کی بنا پر کفار کی پھر بن آئی اور ایک مرتبہ تمہاری پوری آزمائش ہو گئی غالب ہو کر مغلوب ہو گئے  فتح کے  بعد شکست ہو گئی لیکن پھر بھی اللہ تعالیٰ نے  تمہارے  اس جرم کو معاف فرما دیا کیونکہ وہ جانتا ہے  کہ بظاہر تم ان سے  تعداد میں اور اسباب میں کم تھے  خطا کا معاف ہونا بھی عفاعنکم میں داخل ہے  اور یہ بھی مطلب ہے  کہ کچھ یونہی سی گوشمالی کر کے  کچھ بزرگوں کی شہادت کے  بعد اس نے  اپنی آزمائش کو اٹھا لیا اور باقی والوں کو معاف فرما دیا، اللہ تعالیٰ با ایمان لوگوں پر فضل و کرم لطف و رحم ہی کرتا ہے، حضرت عبد اللہ بن عباس سے  مروی ہے  کہ حضور صلی اللہ علیہ و سلم کی مدد جیسی احد میں ہوئی ہے  کہیں  نہیں  ہوئی اسی کے  بارے  میں ارشاد باری ہے  کہ اللہ نے  تم سے  اپنا وعدہ سچا کر دکھایا لیکن پھر تمہارے  کرتوتوں سے  معاملہ برعکس ہو گیا، بعض لوگوں نے  دنیا طلبی کر کے  رسول صلی اللہ علیہ و سلم کی نافرمانی کی یعنی بعض تیر اندوزوں نے  جنہیں  حضور صلی اللہ علیہ و سلم نے  پہاڑ کے  درے  پر کھڑا کیا تھا اور فرما دیا تھا کہ تم یہاں سے  دشمنوں کی نگہبانی کرو وہ تمہاری پیٹھ کی طرف سے  نہ آ جائیں، اگر تم ہار دیکھو بھی اپنی جگہ سے  نہ ہٹنا اور اگر تم ہر طرح غالب آ گئے  تو بھی تم غنیمت جمع کرنے  کیلئے  بھی اپنی جگہ کو نہ چھوڑنا، جب حضور صلی اللہ علیہ و سلم غالب آ گئے  تو تیر اندوزوں نے  حکم عدولی کی اور وہ اپنی جگہ کو چھوڑ کر مسلمانوں میں آملے  اور مال غنیمت جمع کرنا شروع کر دیا صفوں کا کوئی خیال نہ رہا درے  کو خالی پا کر مشرکوں نے  بھاگنا بند کیا اور غور و فکر کر کے  اس جگہ حملہ کر دیا، چند مسلمانوں کی پیٹھ کے  پیچھے  سے  ان کی بے  خبری میں اس زور کا حملہ کیا کہ مسلمانوں کے  قدم نہ جم سکے  اور شروع دن کی فتح اب شکست سے  بدل گئی اور یہ مشہور ہو گیا کہ حضور صلی اللہ علیہ و سلم بھی شہید ہو گئے  اور لڑائی کے  رنگ نے  مسلمانوں کو اس بات کا یقین بھی دلا دیا، تھوڑی دیر بعد جبکہ مسلمانوں کی نظریں چہرہ مبارک پر پڑیں تو وہ اپنی سب کوفت اور ساری مصیبت بھول گئے  اور خوشی کے  مارے  حضور صلی اللہ علیہ و سلم کی طرف لپکے  آپ ادھر آرہے  تھے  اور فرماتے  تھے  کہ اللہ تعالیٰ کا سخت غضب نازل ہو ان لوگوں پر جنہوں نے  اللہ کے  رسول صلی اللہ علیہ و سلم کے  چہرے  کو خون آلودہ کر دیا، انہیں  کوئی حق نہ تھا کہ اس طرح ہم پر غالب رہ جائیں، تھوڑی دیر میں ہم نے  سنا کہ ابوسفیان پہاڑ کے  نیچے  کھڑا ہوا کہہ رہا تھا اعل ہبل اعل ھبل ہبل بت کا بول بالا ہو ابوبکر کہاں ہے ؟ عمر کہاں ہے ؟ حضرت عمر نے  پوچھا حضور صلی اللہ علیہ و سلم اسے  جواب دوں ؟ آپ صلی اللہ علیہ و سلم نے  اجازت دی تو حضرت عمر فاروق نے  اس کے  جواب میں فرمایا اللہ اعلی واجل اللہ اعلی واجل اللہ بہت بلند ہے  اور جلال و عزت والا ہے  اللہ بہت بلند اور جلال و عزت والا ہے، وہ پوچھنے  لگا بتاؤ محمد صلی اللہ علیہ و سلم کہاں ہیں  ؟ ابوبکر کہاں ہیں  ؟ عمر کہاں ہیں  ؟ آپ نے  فرمایا یہ ہیں  رسول اللہ صلی اللہ علیہ و سلم اور یہ ہیں  حضرت ابوبکر اور یہ ہوں میں عمر فاروق ابوسفیان کہنے  لگا یہ بدر کا بدلہ ہے  یونہی دھوپ چھاؤں الٹتی پلٹتی رہتی ہے، لڑائی کی مثال کنویں کے  ڈول کی سی ہے، حضرت عمر نے  فرمایا برابری کا معاملہ ہرگز نہیں  تمہارے  مقتول تو جہنم میں گئے  اور ہمارے  شہید جنت میں پہنچے، ابوسفیان کہنے  لگا اگر یونہی ہو تو یقیناً ہم نقصان اور گھاٹے  میں رہے، سنو تمہارے  مقتولین میں بعض ناک کان کٹے  لوگ بھی تم پاؤ گے  گو یہ ہمارے  سرداروں کی رائے  سے  نہیں  ہوا لیکن ہمیں کچھ برا بھی نہیں  معلوم ہوا، یہ حدیث غریب ہے  اور یہ قصہ بھی عجیب ہے، یہ ابن عباس کی مرسلات سے  ہے  اور وہ یا ان کے  والد جنگ احد میں موجود نہ تھے، مستدرک حاکم میں بھی یہ روایت موجود ہے  ابن ابی حاتم اور بیہقی فی دلائل النبوۃ میں بھی یہ مروی ہے  اور صحیح احادیث میں اس کے  بعض حصوں کے  شواہد بھی ہیں  کہ احد والے  دن عورتیں مسلمانوں کے  پیچھے  تھیں جو زخمیوں کی دیکھ بھال کرتی تھیں تو پوری طرح یقین تھا کہ آج کے  دن ہم میں کوئی ایک بھی طالب دنیا نہیں  بلکہ اس وقت اگر مجھے  اس بات پر قسم کھلوائی جاتی تو کھا لیتا لیکن قرآن میں یہ آیت اتری (منکم من یرید الدنیا) یعنی تم میں سے  بعض طالب دنیا بھی ہیں ، جب صحابہ سے  حضور صلی اللہ علیہ و سلم کے  حکم کے  خلاف آپ کی نافرمانی سرزد ہوئی تو انکے  قدم اکھڑ گئے  حضور صلی اللہ علیہ و سلم کے  ساتھ صرف سات انصاری اور دو مہاجر باقی رہ گئے  جب مشرکین نے  حضور صلی اللہ علیہ و سلم کو گھیر لیا تو آپ فرمانے  لگے  اللہ تعالیٰ اس شخص پر رحم کرے  جو انہیں  ہٹائے  تو ایک انصار اٹھ کھڑے  ہوئے  اور اسجم غفیر کے  مقابل تن تنہا داد شجاعت دینے  لگے  یہاں تک کہ شہید ہو گئے  پھر کفار نے  حملہ کیا آپ نے  یہی فرمایا ایک انصاری تیار ہو گئے  اور اس بے  جگری سے  لڑے  کہ انہیں  آگے  نہ بڑھنے  دیا لیکن بالآخر یہ بھی شہید ہو گئے  یہاں تک کہ ساتوں صحابہ اللہ کے  ہاں پہنچ گئے  اللہ ان سے  خوش ہو، حضور صلی اللہ علیہ و سلم نے  مہاجرین سے  فرمایا افسوس ہم نے  اپنے  ساتھیوں سے  منصفانہ معاملہ نہ کیا، اب ابوسفیان نے  ہانک لگائی کہ اعل ہبل آپ نے  فرمایا کہو اللہ اعلی واجل ابوسفیان نے  کہا (لنا العزی ولا عزی لکم) ہمارا عزی بت ہے  تمہاری کوئی عزی نہیں ، آپ نے  فرمایا کہو اللہ مولانا والکافرون لا مولی لھم اللہ ہمارا مولی ہے  اور کافروں کا کوئی مولی نہیں ، ابوسفیان کہنے  لگا آج کے  دن بدر کے  دن کا بدلہ ہے  کوئی دن ہمارا اور کوئی دن تمہارا، یہ تو ہاتھوں ہاتھ کا سودا ہے، ایک کے  بدلے  ایک ہے ۔ حضور صلی اللہ علیہ و سلم نے  فرمایا ہرگز برابری نہیں  ہمارے  شہداء زندہ ہیں  وہاں رزق دے  جاتے  ہیں  اور تمہارے  مقتول جہنم میں عذاب کئے  جا رہے  ہیں  پھر ابوسفیان بولا تمہارے  مقتول میں تم دیکھو گے  کہ بعض کے  کان ناک وغیرہ کاٹ لئے  گئے  ہیں  لیکن میں نے  نہ یہ کہا نہ اسے  روکا نہ اسے  میں نے  پسند کیا نہ مجھے  یہ بھلا معلوم ہوا نہ برا، اب جو دیکھا تو معلوم ہوا کہ حضرت حمزہ کا پیٹ چاک کر دیا گیا تھا اور ہندہ نے  انکا کلیجہ لے  کر چبایا تھا لیکن نگل نہ سکی تو اگل دیا، حضور علیہ السلام نے  فرمایا نا ممکن تھا کہ اس کے  پیٹ میں حمزہ کا ذرا سا گوشت بھی چلا جائے  اللہ تعالیٰ حمزہ کے  کسی عضو بدن کو جہنم میں لے  جانا نہیں  چاہتا چنانچہ حمزہ کے  جنازے  کو اپنے  سامنے  رکھ کر نماز جنازہ ادا کی پھر ایک انصاری کا جنازہ لایا گیا وہ حضرت حمزہ کے  پہلو میں رکھا گیا اور آپ نے  پھر نماز جنازہ پڑھی انصاری کا جنازہ اٹھا لیا گیا لیکن حضرت حمزہ کا جنازہ وہیں  رہا اسی طرح ستر شخص لائے  گئے  اور حضرت حمزہ کی ستر دفعہ جنازے  کی نماز پڑھی گئی (مسند) صحیح بخاری شریف میں حضرت براء سے  مروی ہے  کہ احد والے  دن مشرکوں سے  ہماری مڈبھیڑ ہوئی حضور صلی اللہ علیہ و سلم نے  تیر اندازوں کی ایک جماعت کو الگ جما دیا اور انکا سردار حضرت عبد اللہ بن جیبر کو بنایا اور فرما دیا کہ اگر تم ہمیں ان پر غالب آیا ہوا دیکھو تو بھی یہاں سے  نہ ہٹنا اور وہ ہم پر غالب آ جائیں تو بھی تم اپنی جگہ نہ چھوڑنا، لڑائی شروع ہوتے  ہی اللہ کے  فضل سے  مشرکوں کے  قدم پیچھے  ہٹنے  لگے  یہاں تک کہ عورتیں بھی تہبند اونچا کر کر کے  پہاڑوں میں ادھر دوڑنے  لگیں، اب تیر انداز گروہ غنیمت غنیمت کہتا ہوا نیچے  اتر آیا، ان کے  امیر نے  انہیں  ہر چند سمجھایا لیکن کسی نے  ان کی نہ سنی، بس اب مشرکین مسلمانوں کی پیٹھ کی طرف سے  آن پڑے  اور ستر بزرگ شہید ہو گئے  ابوسفیان ایک ٹیلے  پر چڑھ کر کہنے  لگا کیا محمد صلی اللہ علیہ و سلم حیات ہیں  ؟ کیا ابوبکر موجود ہیں  ؟ کیا عمر زندہ ہیں  ؟ لیکن حضور صلی اللہ علیہ و سلم کے  فرمان سے  صحابہ خوش رہے  تو وہ خوشی کے  مارے  اچھل پڑا اور کہنے  لگا یہ سب ہماری تلواروں کے  گھاٹ اتر گئے  اگر زندہ ہوتے  تو ضرور جواب دیتے  ایک حضرت عمر کو تاب ضبط نہ رہی فرمانے  لگے، اے  اللہ کے  دشمن تو جھوٹا ہے  بحمد اللہ ہم سب موجود ہیں  اور تیری تباہی اور بربادی کرنے  والے  زندہ ہیں ، پھر وہ باتیں ہوئیں جو اوپر بیان ہو چکی ہیں ، صحیح بخاری شریف میں حضرت عائشہ سے  روایت ہے  کہ جنگ احد میں مشرکوں کو ہزیمت ہوئی اور ابلیس نے  آواز لگائی اے  اللہ کے  بندو! اپنے  پیچھے  کی خبر لو اگلی جماعتیں پچھلی جماعتوں پر ٹوٹ پڑیں، حضرت حذیفہ نے  دیکھا کہ مسلمانوں کی تلواریں ان کے  والد حضرت یمان رضی اللہ تعالیٰ عنہ پر برس رہی ہیں  ہر چند کہتے  رہے  کہ اے  اللہ کے  بندو! یہ میرے  باپ یمان ہیں  مگر کون سنتا تھا وہ یونہی شہید ہو گئے  لیکن حضرت حذیفہ نے  کچھ نہ کہا بلکہ فرمایا اللہ تمہیں  معاف کرے، حضرت حذیفہ کی یہ بھلائی ان کے  آخری دم تک ان میں رہی، سیرت ابن اسحق میں ہے  حضرت زبیر بن عوام فرماتے  ہیں  میں نے  خود دیکھا کہ مشرک مسلمانوں کے  اول حملہ میں ہی بھاگ کھڑے  ہوئے  یہاں تک کہ ان کی عورتیں ہندہ وغیرہ تہمد اٹھائے  تیز تیز دوڑ رہی تھیں لیکن اس کے  بعد جب تیر اندازوں نے  مرکز چھوڑا اور کفار نے  سمٹ کر پیچھے  کی طرف سے  ہم پر حملہ کر دیا ادھر کسی نے  آواز لگائی کہ حضور صلی اللہ علیہ و سلم شہید ہو گئے  پھر معاملہ برعکس ہو گیا ورنہ ہم مشرکین کے  علم برداروں تک پہنچ چکے  تھے  اور جھنڈا اس کے  ہاتھ سے  گر پڑا تھا لیکن عمرہ بن علقمہ حارثیہ عورت نے  اسے  تھام لیا اور قریش کا مجمع پھر یہاں جمع ہو گیا، حضرت انس بن مالک چچا حضرت انس بن نضر رضی اللہ تعالیٰ عنہ یہ رنگ دیکھ حضرت عمر حضرت طلحہ وغیرہ کے  پاس آتے  ہی اور فرماتے  ہیں  تم نے  کیوں ہمتیں چھوڑ دیں ؟ وہ جواب دیتے  ہیں  کہ حضور صلی اللہ علیہ و سلم تو شہید ہو گئے ۔ حضرت انس نے  فرمایا پھر تم جی کر کیا کرو گے ؟ یہ کہا اور مشرکین میں گھسے  پھر لڑتے  رہے  یہاں تک کہ اللہ رب العزت سے  جا ملے  رضی اللہ تعالیٰ عنہ، یہ بدر والے  دن جہاد میں نہیں  پہنچ سکے  تھے  تو عہد کیا تھا کہ آئندہ اگر کوئی موقعہ آیا تو میں دکھا دوں گا چنانچہ اس جنگ میں وہ موجود تھے  جب مسلمانوں میں کھلبلی مچی تو انہوں نے  کہا الہ میں مسلمانوں کے  اس کام سے  معذور ہوں اور مشرکوں کے  اس کام سے  بری ہوں پھر اپنی تلوار لے  کر آگے  بڑھ گئے  راہ میں حضرت سعد بن معاذ سے  ملے  اور کہنے  لگے  کہاں جا رہے  ہو؟ مجھے  تو جنت کی خوشبو کی لپٹیں احد پہاڑ سے  چلی آ رہی ہیں  چنانچہ مشرکوں میں گھس گئے  اور بڑی بے  جگری سے  لڑے  یہاں تک کہ شہادت حاصل کی اسی سے  زیادہ تیرو تلوار کے  زخم بدن پر آئے  تھے  پہچانے  نہ جاتے  تھے  انگلی کو دیکھ کر پہچانے  گئے  رضی اللہ تعالیٰ عنہ، صحیح بخاری شریف میں ہے  کہ ایک حاجی نے  بیت اللہ شریف میں ایک مجلس دیکھ کر پوچھا کہ یہ کون لوگ ہیں  ؟ لوگوں نے  کہا قریشی ہیں  پوچھا ان کے  شیخ کون ہیں  ؟ جواب ملا حضرت عبد اللہ بن عمر رضی اللہ تعالیٰ عنہ ہیں ، اب وہ آیا اور کہنے  لگا میں کچھ دریافت کرنا چاہتا ہوں حضرت عبد اللہ نے  فرمایا پوچھو اس نے  کہا آپ کو اس بیت اللہ کی حرمت کی قسم کیا آپ کو علم ہے  کہ (حضرت) عثمان بن عفان احد والے  دن بھاگ گئے  تھے ؟ آپ نے  جواب دیا ہاں ۔ کہا کیا آپ کو معلوم ہے  کہ وہ بدر والے  دن بھی حاضر نہیں  ہوئے  تھے ؟ فرمایا ہاں، کہا کیا آپ جانتے  ہیں  کہ وہ بیعت الرضوان میں بھی شریک نہیں  ہوئے  تھے ؟ فرمایا یہ بھی ٹھیک ہے، اب اس نے  (خوش ہو کر) تکبیر کہی، حضرت عبد اللہ نے  فرمایا ادھر آ، اب میں تجھے  پورے  واقعات سناؤں، احد کے  دن کا بھاگنا تو اللہ تعالیٰ نے  معاف فرما دیا، بدر کے  دن کی غیر حاضری کے  باعث یہ ہوا کہ آپ کے  گھر میں رسول اللہ صلی اللہ علیہ و سلم کی صاحبزادی تھیں اور وہ اس وقت سخت بیمار تھیں تو خود حضور صلی اللہ علیہ و سلم نے  ان سے  فرمایا تھا کہ تم نہ آؤ مدینہ میں ہی رہو تمہیں  اللہ تعالیٰ اس جنگ میں حاضر ہونے  کا اجر دے  گا اور غنیمت میں بھی تمہارا حصہ ہے، بیعت الرضوان کا واقعہ یہ ہے  کہ انہیں  رسول اللہ صلی اللہ علیہ و سلم نے  مکہ والوں کے  پاس اپنا پیغام دے  کر حضرت عثمان کو بھیجا تھا اس لئے  کہ مکہ میں جو عزت انہیں  حاصل تھی کسی اور کو اتنی نہ تھی انکے  تشریف لے  جانے  کے  بعد یہ بیعت لی گئی تو رسول اللہ صلی اللہ علیہ و سلم نے  اپنا داہنا ہاتھ کھڑا کر کے  کہا یہ عثمان کا ہاتھ ہے  پھر اپنے  دوسرے  ہاتھ پر رکھا (گویا بیعت کی) پھر اس شخص سے  کہا اب جاؤ اور اسے  ساتھ لے  جاؤ پھر فرمایا آیت (او تصعدون) الخ یعنی تم اپنے  دشمن سے  بھاگ کر پہاڑ چڑھ رہے  تھے  اور مارے  خوف و دہشت کے  دوسری جانب توجہ بھی نہیں  کرتے  تھے  رسول صلی اللہ علیہ و سلم کو بھی تم نے  وہیں  چھوڑ دیا تھا وہ تمہیں  آوازیں دے  رہے  تھے  اور سمجھا رہے  تھے  کہ بھاگو نہیں  لوٹ آؤ، حضرت سدی فرماتے  ہیں  مشرکین کے  اس خفیہ اور پر زور اور اچانک حملہ سے  مسلمانوں کے  قدم اکھڑ گئے  کچھ تو مدینہ کی طرف لوٹ آئے  کچھ پہاڑ کی چوٹی پر چڑھ گئے  اللہ کے  نبی آوازیں دیتے  رہے  کہ اللہ کے  بندوں میری طرف آؤ اللہ کے  بندو میری طرف آؤ، اس واقعہ کا بیان اس آیت میں ہے، عبد اللہ بن زحری شاعر نے  اس واقعہ کو نظم میں بھی ادا کیا ہے، آنحضرت صلی اللہ علیہ و سلم اس وقت صرف بارہ آدمیوں کے  ساتھ رہ گئے  تھے  مسند احمد کی ایک طویل حدیث میں بھی ان تمام واقعات کا ذکر ہے، دلائل النبوۃ میں ہے  کہ جب ہزیمت ہوئی تب حضور صلی اللہ علیہ و سلم کے  ساتھ صرف گیارہ شخص رہ گئے  اور ایک حضرت طلحہ بن عبید اللہ تھے، آپ پہاڑ پر چڑھنے  لگے  لیکن مشرکین نے  آ گھیرا آپ نے  اپنے  ساتھیوں یک طرف متوجہ ہو کر فرمایا کوئی ہے  جو ان سے  مقابلہ کرے، حضرت طلحہ نے  اس آواز پر فوراً لبیک کہا اور تیار ہو گئے  لیکن آپ نے  فرمایا تم ابھی ٹھہر جاؤ اب ایک انصاری تیار ہوئے  اور وہ ان سے  لڑنے  لگے  یہاں تک کہ شہید ہوئے  اسی طرح سب کے  سب ایک ایک کر کے  شہید ہو گئے  اور اب صرف حضرت طلحہ رہ گئے  گو یہ بزرگ ہر مرتبہ تیار ہو جاتے  تھے  لیکن حضور صلی اللہ علیہ و سلم انہیں  روک لیا کرتے  تھے  آخر یہ مقابلہ پر آئے  اور اس طرح جم کر لڑے  کہ ان سب کی لڑائی ایک طرف اور یہ ایک طرف اس لڑائی میں ان کی انگلیاں کٹ گئیں تو زبان سے  حس نکل گیا آپ نے  فرمایا اگر تم بسم اللہ کہہ دیتے  یا اللہ کا نام لیتے  تو تمہیں  فرشتے  اٹھا لیتے  اور آسمان کی بلندی کی طرف لے  چڑھتے  اور لوگ دیکھتے  رہتے  اب نبی صلی اللہ علیہ و سلم اپنے  صحابہ کے  مجمع میں پہنچ چکے  تھیں ۔ صحیح بخاری شریف میں ہے  حضرت قیس بن حازم فرماتے  ہیں  میں نے  دیکھا حضرت طلحہ کا وہ ہاتھ جسے  انہوں نے ڈھال بنایا تھا شل ہو گیا تھا،حضعرت سعد بن ابی وقاص فرماتے  ہیں  میرے  پاس حضور صلی اللہ علیہ و سلم نے  اپنی ترکش سے  احد والے  دن تمام تیر پھیلا دئیے  اور فرمایا تجھ پر میرے  ماں باپ فدا ہوں لے  مشرکین کو مار آپ اٹھا اٹھا کر دیتے  جاتے  تھے  اور میں تاک تاک کر مشرکین کو مارتا جاتا تھا  اس دن میں نے  دو شخصوں کو دیکھا کہ حضور صلی اللہ علیہ و سلم کے  دائیں بائیں تھے  اور سخت ترین جنگ کر رہے  تھے  میں نے  نہ تو اس سے  پہلے  کبھی انہیں  دیکھا تھا نہ اس کے  بعد یہ دونوں حضرت جبرائیل اور حضرت میکائیل علیہما السلام تھے  ایک اور روایت میں ہے  کہ جو بزرگ حضور صلی اللہ علیہ و سلم کے  ساتھ بھگدڑ کے  بعد تھے  اور ایک ایک ہو کر شہید ہوئے  تھے  انہیں  آپ فرماتے  جاتے  تھے  کہ کوئی ہے  جو انہیں  رو کے  اور جنت میں جائے  میرا رفیق ہے، ابی بن خلف نے  مکہ میں قسم کھائی تھی کہ میں رسول اللہ صلی اللہ علیہ و سلم کو قتل کروں گا، جب حضور صلی اللہ علیہ و سلم کو اس کا علم ہوا تو آپ نے  فرمایا وہ تو نہیں  بلکہ میں انشاء اللہ اسے  قتل کروں گا احد والے  دن یہ خبیث سرتاپا لوہے  میں غرق زرہ بکتر لگائے  ہوئے  حضور صلی اللہ علیہ و سلم کی طرف بڑھا اور یہ کہتا آتا تھا کہ اگر محمد صلی اللہ علیہ و سلم بچ گئے  تو میں اپنے  تئیں ہلاک کر ڈالوں گا ادھر سے  حضرت مصعب بن عمیر اس ناہنجار کی طرف بڑھے  لیکن آپ شہید ہو گئے  اب حضور صلی اللہ علیہ و سلم اس کی طرف بڑھے  اس کا سارا جسم لوہے  میں چھپا ہوا تھا صرف ذرا سی پیشانی نظر آ رہی تھی آپ نے  اپنا نیزہ تاک کر وہیں  لگایا جو ٹھیک نشانے  پر بیٹھا اور یہ تیورا کر گھوڑے  پر سے  گرا گو اس زخم سے  خون بھی نہ نکلا تھا لیکن اس کی یہ حالت تھی کہ بلبلا رہا تھا لوگوں نے  اسے  اٹھا لیا لشکر میں لے  گئے  اور تشفی دینے  لگے  کہ ایسا کوئی کاری زخم نہیں  لگا کیوں اس قدر نامردی کرتا ہے  آخر ان کے  طعنوں سے  مجبور ہو کر اس نے  کہا میں نے  سنا ہے  کہ حضور صلی اللہ علیہ و سلم نے  فرمایا ہے  میں ابی کو قتل کروں گا سچ مانو اب میں کبھی نہیں  بچ سکتا تم اس پر نہ جاؤ کہ مجھے  ذرا سی خراش ہی آئی ہے  اللہ کی قسم جس کے  قبضہ میں میری جان ہے  اگر کل اہل ذی المجاز کو اتنا زخم اس ہاتھ سے  لگ جاتا تو سب ہلاک ہو جاتے  پس یونہی تڑپتے  تڑپتے  اور بلکتے  بلکتے  اس جہنمی کی ہلاکت ہوئی اور مر کر جہنم رسید ہوا، مغازی محمد بن اسحاق میں ہے  کہ جب یہ شخص حضور صلی اللہ علیہ و سلم کے  سامنے  ہوا تو صحابہ نے  اس کے  مقابلہ کی خواہش کی لیکن آپ نے  انہیں  روک دیا اور فرمایا اسے  آنے  دو جب وہ قریب آ گیا تو آپ نے  حضرت حارث بن صمہ سے  نیزہ لے  کر اس پر حملہ کیا حضور صلی اللہ علیہ و سلم کے  ہاتھ میں نیزہ دیکھتے  ہی وہ کانپ اٹھا ہم نے  اسی وقت سمجھ لیا کہ اس کی خیر نہیں  آپ نے  اس کی گردن پر وار کیا اور وہ لڑکھڑا کر گھوڑے  پر سے  گرا، حضرت ابن عمر کا دہشت ناک شعلے  اٹھتے  ہوئے  دیکھے  اور دیکھا کہ ایک شخص کو زنجیروں میں جکڑے  ہوئے  اس آگ میں گھسیٹا جا رہا ہے  اور وہ پیاس پیاس کر رہا ہے  اور دوسرا شخص کہتا ہے  اسے  پانی نہ دینا یہ پیغمبر کے  ہاتھ کا مارا ہوا ہے  یہ ابی بن خلف ہے، بخاری و مسلم کی ایک حدیث میں ہے  آپ اپنے  سامنے  کے  چار دانتوں کی طرف جنہیں  مشرکین نے  احد والے  دن شہید کیا تھا اشارہ کر کے  فرما رہے  تھے  اللہ کا سخت تر غضب ان لوگوں پر ہے  جنہوں نے  اپنے  نبی صلی اللہ علیہ و سلم کے  ساتھ یہ کیا اور اس پر بھی اللہ تعالیٰ کا غضب ہے  جسے  اللہ کا رسول اللہ صلی اللہ علیہ و سلم کی راہ میں قتل کرے  اور روایت میں یہ لفظ ہیں  کہ جن لوگوں نے  اللہ تعالیٰ کے  رسول صلی اللہ علیہ و سلم کا چہرہ زخمی کیا، عتبہ بن ابی وقاص کے  ہاتھ سے  حضور صلی اللہ علیہ و سلم کو یہ زخم لگا تھا سامنے  کے  چار دانٹ ٹوٹ گئے  تھے ، رخسار پر زخم آیا تھا اور ہونٹ پر بھی، حضرت سعد بن ابی وقاص فرمایا کرتے  تھے  مجھے  جس قدر اس شخص کی حرص تھی کسی اور کے  قتل کی نہ تھی۔ یہ شخص بڑا بد خلق تھا اور ساری قوم سے  اس کی دشمنی تھی اس کی برائی میں حضور صلی اللہ علیہ و سلم کا یہ فرمان کافی ہے  کہ نبی صلی اللہ علیہ و سلم کو زخمی ہونے  والے  پر اللہ سخت غضبناک ہے، عبدالرزاق میں ہے  حضور صلی اللہ علیہ و سلم نے  اس کیلئے  بد دعا کی کہ اے  اللہ سال بھر میں یہ ہلاک ہو جائے  اور کفر پر اس کی موت ہو چنانچہ یہی ہوا اور یہ بدبخت کافر مرا اور جہنم واصل ہوا۔ ایک مہاجر کا بیان ہے  کہ چاروں طرف سے  احد والے  دن حضور صلی اللہ علیہ و سلم پر تیروں کی بارش ہو رہی تھی لیکن اللہ کی قدرت سے  وہ سب پھیر دیئے  جاتے  تھے، عبد اللہ بن شہاب زہری نے  اس دن قسم کھا کر کہا کہ مجھے  محمد صلی اللہ علیہ و سلم کو دکھا دو وہ آج میرے  ہاتھ سے  بچ نہیں  سکتا اگر وہ نجات پا گیا تو میری نجات نہیں  اب وہ حضور صلی اللہ علیہ و سلم کی طرف سے  لپکا اور بالکل آپ کے  پاس آ گیا اس وقت حضور صلی اللہ علیہ و سلم کے  ساتھ کوئی نہ تھا لیکن اللہ تعالیٰ نے  اس کی آنکھوں پر پردہ ڈال دیا اسے  حضور صلی اللہ علیہ و سلم نظر ہی نہ آئے  جب وہ نامراد پلٹا تو صفوان نے  اسے  طعنہ زنی کی اس نے  کہا اللہ تعالیٰ کی طرف سے  محفوظ ہیں  ہمارے  ہاتھ نہیں  لگنے  کے  سنو! ہم چار شخصوں نے  ان کے  قتل کا پختہ مشورہ کیا تھا اور آپس میں عہدو پیمان کئے  تھے  ہم نے  ہر چند چاہا لیکن کامیابی نہ ہوئی واقدی کہتے  ہیں  لیکن ثابت شدہ بات یہ ہے  کہ حضور صلی اللہ علیہ و سلم کی پیشانی کو زخمی کرنے  والا ابن قمیہ اور ہونٹ اور دانتوں پر صدمہ پہچانے  والا عتبہ بن ابی وقاص تھا۔ ام المومنین حضرت عائشہ کا بیان ہے  کہ میرے  والد حضرت ابوبکر جب احد کا ذکر فرماتے  تو صاف کہتے  کہ اس دن کی تمام تر فضلیت کا سہرا حضرت طلحہ کے  سر ہے  میں جب لوٹ کر آیا تو میں نے  دیکھا کہ ایک شخص حضور صلی اللہ علیہ و سلم کی حمایت میں جان ٹکائے  لڑ رہا ہے  میں نے  کہا اللہ کرے  یہ طلحہ ہو اب جو قریب آ کر دیکھا تو طلحہ ہی تھے  رضی اللہ تعالیٰ عنہ میں نے  کہا الحمد اللہ میری ہی قوم کا ایک شخص ہے  میرے  اور مشرکوں کے  درمیان ایک شخص تھا جو مشرکین میں کھڑا ہوا تھا لیکن اسکے  بے  پناہ حملے  مشرکوں کی ہمت توڑ رہے  تھے  غور سے  دیکھا تو وہ حضرت عبیدہ بن جراح تھے، اب جو میں نے  بغور حضور صلی اللہ علیہ و سلم کی طرف دیکھا تو آپ کے  سامنے  کے  دانت ٹوٹ گئے  ہیں  چہرہ زخمی ہو رہا ہے  اور پیشانی میں زرہ کی دو کڑیاں کھب گئی ہیں  میں آپ کی طرف لپکا لیکن آپ نے  فرمایا ابو طلحہ کی خبر لو میں نے  چاہا کہ حضور صلی اللہ علیہ و سلم کے  چہرے  میں سے  وہ دونوں کڑیاں نکالوں لیکن حضرت ابو عبیدہ نے  مجھے  قسم دے  کر روک دیا اور خود قریب آئے  اور ہاتھ سے  نکالنے  میں زیادہ تکلیف محسوس کر کے  دانتوں سے  پکڑ کر ایک کو نکال لیا لیکن اس میں ان کا دانت بھی ٹوٹ گیا میں نے  اب پھر چاہا کہ دوسری میں نکال لوں لیکن حضرت ابو عبیدہ نے  پھر قسم دی تو میں رک رہا انہوں نے  پھر دوسری کڑی نکالی اب کی مرتبہ بھی ان کے  دانت ٹوٹے  اس سے  فارغ ہو کر ہم حضرت طلحہ کی طرف متوجہ ہوئے  ہم نے  دیکھا کہ ستر سے  زیادہ زخم انہیں  لگ چکے  ہیں  انگلیاں کٹ گئی ہیں  ہم نے  پھر ان کی بھی خبر لی حضور صلی اللہ علیہ و سلم کے  زخم کا خون حضرت ابو سعید خدری نے  چوسا تاکہ خون تھم جائے  پھر ان سے  کہا گیا کہ کلی کر ڈالو لیکن انہوں نے  کہا اللہ کی قسم میں کلی نہ کروں گا پھر میدان جنگ میں چلے  گئے  حضور صلی اللہ علیہ و سلم نے  فرمایا اگر کوئی شخص جنتی شخص کو دیکھنا چاہتا ہو تو انہیں  دیکھ لے  چنانچہ یہ اسی میدان میں شہید ہوئے، صحیح بخاری شریف میں ہے  کہ حضور صلی اللہ علیہ و سلم کا چہرہ زخمی ہوا سامنے  کے  دانت ٹوٹے  سر کا خود ٹوٹا، حضرت فاطمہ خون دھوتی تھیں اور حضرت علی ڈھال میں پانی لالا کر ڈالتے  جاتے  تھے  جب دیکھا کہ خون کسی طرح تھمتا ہی نہیں  تو حضرت فاطمہ نے  بوریا جلا کر اس کا راکھ زخم پر رکھ دی جس سے  خون بند ہوا۔ پھر فرماتا ہے، تمہیں  غم پر غم پہنچا (بِغَمِّ) کا بامعنی میں علیٰ کے  ہے  جیسے  آیت (فی جذوع النخل) میں فی معنی میں علیٰ کے  ہے، ایک غم تو شکست کا تھا جبکہ یہ مشہور ہو گیا کہ (اللہ نہ کرے) حضور صلی اللہ علیہ و سلم کی جان پر بن آئی، دوسرا غم مشرکوں کو پہاڑ کے  اوپر غالب آ کر چڑھ جانے  کا جبکہ حضور صلی اللہ علیہ و سلم فرماتے  تھے  یہ بلندی کے  لائق نہ تھے، حضرت عبدالرحمن بن عوف فرماتے  ہیں  ایک غم شکست کا دوسرا غم حضور صلی اللہ علیہ و سلم کے  قتل کی خبر کا اور یہ غم پہلے  غم سے  زیادہ تھا، اسی طرح یہ بھی ہے  کہ ایک غم تو غنیمت کا ہاتھ میں آ کر نکل جانے  کا تھا دوسرا شکست ہونے  کا اسی طرح ایک اپنے  بھائیوں کے  قتل کا غم دوسرا حضور صلی اللہ علیہ و سلم کی نسبت ایسی منحوس خبر کا غم ۔ پھر فرماتا ہے  جو غنیمت اور فتح مندی تمہارے  ہاتھ سے  گئی اور جو زخم و شہادت ملی اس پر غم نہ کھاؤ اللہ سبحانہ و تعالیٰ جو بلندی اور جلال والا ہے  وہ تمہارے  اعمال سے  خبردار ہے  ۔

۱۵۴

تلواروں کے  سایہ میں ایمان کی جانچ

اللہ تعالیٰ نے  اپنے  بندوں پر اس غم و رنج کے  وقت جو احسان فرمایا تھا اس کا بیان ہو رہا ہے  کہ اس نے  ان پر اونگھ ڈال دی ہتھیار ہاتھ میں ہیں  دشمن سامنے  ہے  لیکن دل میں اتنی تسکین ہے  کہ آنکھیں اونگھ سے  جھکی جا رہی ہیں  جو امن و امان کا نشان ہے  جیسے  سورہ انفال میں بدر کے  واقعہ میں ہے  آیت (اذ یغشیکم النعاس امنۃ منہ) یعنی اللہ تعالیٰ کی طرف سے  امن بصورت اونگھ نازل ہوئی۔ حضرت عبد اللہ بن مسعود فرماتے  ہیں  لڑائی کے  وقت انکی اونگھ اللہ سبحانہ و تعالیٰ کی طرف سے  ہے  اور نماز میں اونگھ کا آنا شیطانی حکمت ہے، حضرت ابو طلحہ کا بیان ہے  کہ احد والے  دن مجھے  اس زور کی اونگھ آنے  لگی کہ بار بار تلوار میرے  ہاتھ سے  چھوٹ گئی آپ فرماتے  ہیں  جب میں نے  آنکھ اٹھا کر دیکھا تو تقریباً ہر شخص کو اسی حالت میں پایا، ہاں البتہ ایک جماعت وہ بھی تھی جن کے  دلوں میں نفاق تھا یہ مارے  خوف و دہشت کے  ہلکان ہو رہے  تھے  اور ان کی بدگمانیاں اور برے  خیال حد کو پہنچ گئے  تھے ، پس اہل ایمان اہل یقین اہل ثبات اہل توکل اور اہل صدق تو یقین کرتے  تھے  کہ اللہ تعالیٰ اپنے  رسول صلی اللہ علیہ و سلم کی ضرور مدد کرے  گا اور ان کی منہ مانگی مراد پوری ہو کر رہے  گی لیکن اہل نفاق اہل شک، بے  یقین، ڈھلمل ایمان والوں کی عجب حالت تھی ان کی جان عذاب میں تھی وہ ہائے  وائے  کر رہے  تھے  اور ان کے  دل میں طرح طرح کے  وسواس پیدا ہو رہے  تھے  انہیں  یقین کامل ہو گیا تھا کہ اب مرے، وہ جان چکے  تھے  کہ رسول اور مومن (نعوذ باللہ) اب بچ کر نہیں  جائیں گے  اب بچاؤ کی کوئی صورت نہیں ، فی الواقع منافقوں کا یہی حال ہے  کہ جہاں ذرا نیچا پانسہ دیکھا تو ناامیدی کی گھنگھور گھٹاؤں نے  انہیں  گھیر لیا ان کے  برخلاف ایماندار بد سے  بد تر حالت میں بھی اللہ تعالیٰ سے  نیک گمان رکھتا ہے ۔ ان کے  دلوں کے  خیالات یہ تھے  کہ اگر ہمارا کچھ بھی بس چلتا تو آج کی موت سے  بچ جاتے  اور چپکے  چپکے  یوں کہتے  بھی تھے  حضرت زبیر کا بیان ہے  کہ اس سخت خوف کے  وقت ہمیں تو اس قدر نیند آنے  لگی کہ ہماری ٹھوڑیاں سینوں سے  لگ گئیں میں نے  اپنی اسی حالت میں معتب بن قشیر کے  یہ الفاظ سنے  کہ اگر ہمیں کچھ بھی اختیار ہوتا تو یہاں قتل نہ ہوتے، اللہ تعالیٰ انہیں  فرماتا ہے  کہ یہ تو اللہ تعالیٰ کے  فیصلے  ہیں  مرنے  کا وقت نہیں  ٹلتا گو تم گھروں میں ہوتے  لیکن پھر بھی جن پر یہاں کٹنا لکھا جا چکا ہوتا وہ گھروں کو چھوڑ کر نکل کھڑے  ہوئے  اور یہاں میدان میں آ کر ڈٹٹ گئے  اور اللہ کا لکھا پورا اترا۔ یہ وقت اس لئے  تھا کہ اللہ تعالیٰ تمہارے  دلوں کے  ارادوں اور تمہارے  مخفی بھیدوں کو بے  نقاب کرے، اس آزمائش سے  بھلے  اور برے  نیک اور بد میں تمیز ہو گئی، اللہ تعالیٰ جو دلوں کے  بھیدوں اور ارادوں سے  پوری طرح واقف ہے  اس نے  اس ذرا سے  واقعہ سے  منافقوں کو بے  نقاب کر دیا اور مسلمانوں کا بھی ظاہری امتحان ہو گیا، اب سچے  مسلمانوں کی لغزش کا بیان ہو رہا ہے  جو انسانی کمزوری کی وجہ سے  ان سے  سرزد ہوئی فرماتا ہے  شیطان نے  یہ لغزش ان سے  کرا دی دراصل یہ سب ان کے  عمل کا نتیجہ تھا نہ یہ رسول صلی اللہ علیہ و سلم کی نافرمانی کرتے  نہ ان کے  قدم اکھڑتے  انہیں  اللہ تعالیٰ معذور جانتا ہے  اور ان سے  اس نے  درگزر فرما لیا اور ان کی اس خطا کو معاف کر دیا اللہ کا کام ہی درگزر کرنا بخشنا معاف فرمانا حلم اور بربادی برتنا تحمل اور عفو کرنا ہے  اس سے  معلوم ہوا کہ حضرت عثمان وغیرہ کی اس لغزش کو اللہ تعالیٰ نے  معاف فرما دیا۔ مسند احمد میں ہے  کہ ولید بن عقبہ نے  ایک مرتبہ حضرت عبدالرحمن بن عوف سے  کہا آخر تم امیر المومنین حضرت عثمان بن عفان سے  اس قدر کیوں بگڑے  ہوئے  ہو؟ انہوں نے  کہا اس سے  کہہ دو  کہ میں نے  احد والے  دن فرار نہیں  کیا بدر کے  غزوے  میں غیر حاضر نہیں  رہا اور نہ سنت عمر ترک کی، ولید نے  جا کر حضرت عثمان سے  یہ واقعہ بیان کیا تو آپ نے  اس کے  جواب میں فرمایا کہ قرآن کہہ رہا ہے  آیت (ولقد عفا اللہ عنھم) یعنی احد والے  دن کی اس لغزش سے  اللہ تعالیٰ نے  درگزر فرمایا پھر جس خطا کو اللہ نے  معاف کر دیا اس پر عذر لانا کیا؟ بدر والے  دن میں رسول اللہ صلی اللہ علیہ و سلم کی صاحبزادی میری بیوی حضرت رقیہ کی تیمار داری میں مصروف تھا یہاں تک کہ وہ اسی بیماری میں فوت ہو گئیں چنانچہ مجھے  رسول اللہ صلی اللہ علیہ و سلم نے  مال غنیمت میں سے  پورا حصہ دیا اور ظاہر ہے  کہ حصہ انہیں  ملتا ہے  جو موجود ہیں  پس حکماً میری موجودگی ثابت ہوا ہے، رہی سنت عمر اس کی طاقت نہ مجھ میں ہے  نہ عبدالرحمن میں، جاؤ انہیں  یہ جواب بھی پہنچا دو۔

۱۵۶

باطل خیالات کی نشاندہی

 اللہ تعالیٰ اپنے  مومن بندوں کو کافروں جیسے  فاسد اعتقاد رکھنے  کی ممانعت فرما رہا ہے  یہ کفار سمجھتے  تھے  کہ ان کے  لوگ جو سفر میں یا لڑائی میں مرے  اگر وہ سفر اور لڑائی نہ کرتے  تو نہ مرتے  پھر فرماتا ہے  کہ یہ باطل خیال بھی ان کی حسرت افسوس کا بڑھانے  والا ہے، دراصل موت و حیات اللہ کے  ہاتھ ہے  مرتا ہے  اس کی چاہت سے  اور زندگی ملتی ہے  تو اس کے  ارادے  سے  تمام امور کا جاری کرنا اس کے  قبضہ میں ہے  اس کی قضا و قدر ٹلتی نہیں  اس کے  علم سے  اور اس کی نگاہ سے  کوئی چیز باہر نہیں  تمام مخلوق کے  ہر امر کو وہ بخوبی جانتا ہے ۔ دوسری آیت بتلا رہی ہے  کہ اللہ کی راہ میں قتل ہونا یا مرنا اللہ کی مغفرت و رحمت کا ذریعہ ہے  اور یہ قطعاً دنیا و مافیہا سے  بہتر ہے  کیونکہ یہ فانی ہے  اور وہ باقی اور ابدی ہے  پھر ارشاد ہوتا ہے  کہ خواہ کسی طرح دنیا چھوڑو مر کر یا قتل ہو کر لوٹنا تو اللہ ہی کی طرف ہے  پھر اپنے  اعمال کا بدلہ اپنی آنکھوں سے  دیکھ لو گے  برا ہو تو بھلا ہو تو۔ !

۱۵۹