پسندیدہ کتابوں میں شامل کریں

 

 

 

 

 

قل قلِ آبِ وضو

 

 

 

 

 

               صفدر

 

 

 

مطبوعہ:

1995

 

دیگر مطبوعات

 

شاعری اور شیوۂ  پیغمبری

جدید شعری تنقید

لفظوں پہ رم

 

رابطہ:

ڈاکٹر سیّد صفدر

نزد توکّل کرانہ اسٹورس، تاج نگر  نمبر1  ،

امراؤتی444601

ضلع امراؤتی،مہاراشٹر،بھارت

 

 

 

 

بسم اللہ الرحمٰن الرحیم

 

ہنس رہی ہیں سبزہ زاروں پر پڑی بینا ئیاں

چار جانب  رنگ،نکہت،نرمیاں،  رعنائیاں

سج رہے ہیں آنکھ کی حد سے ادھر جام وسبو

مسجدوں میں قل قلِ آبِ وضو

گا رہے ہیں طائرانِ خوش گلو

اللہ ہو اللہ ہو

 

سطح  پر پانی کے منہ کھولے ہوئے ہیں سیپیاں

آؤ بھر لیں مٹّھیاں

صرف رنگ و نور سورج کی ضیاء

سانس اطمینان کے لیتی  ہوا

ہنس رہا ہے آسمانوں پر خدا

۔۔۔۔۔۔۔۔۔۔۔۔۔۔۔۔۔۔۔۔۔

 

 

 

 

سبز  ہاتھ

 

چمچماتی سر پہ بے سایہ ببول

تھر تھراتا ایک صحرا دھوپ رنگ

جس طرف جاؤں چلے چلے یہ سنگ سنگ

بے صدا بے آب بارش سلسلہ

دھول شعلہ قطرہ قطرہ آبلہ

سورجوں کے سائے میں چلتے ہوئے

ریگِ صحرا کی طرح جلتے ہوئے

ایک دن ایساہوا

صبح جب سو کر اٹھا

ٹھنڈ مین لپٹا ہوا

سائے میں بھیگا ہوا

جا بجا بکھری کھجوریں رس بھری

سر پہ جھکتا مہرباں اک سبز ہاتھ

مل گئی راہِ نجات

جس طرف جاؤں چلیں اب ساتھ ساتھ

نرم گہرا سایہ اور یہ سبز ہاتھ !

۔۔۔۔۔۔۔۔۔۔۔۔۔۔

 

 

 

 

 

مناجات

 

اے خدا اے خدا

میرے خالق میرے مالک

میری باتوں میں تو،میری آنکھوں میں تو، میری سانسوں میں تو

مِلک تیری زمیں آسماں اور وہ سب جو ہے درمیاں

سب زمینوں میں سب آسمانوں میں اعلٰی تیری شان ہے

پاک ہے تیری ذات

روبرو تیرے میرےیہ آلودہ ہاتھ

ہاتھ ایسے نہیں  یہ جنھیں چومنے کو بڑھیں بارشیں

ابر پارے پکاریں عمر!اے عمر!

میں گناہوں کے دلدل میں لتھڑا ہوا اک بشر

آنسوؤں سے ندامت کے دھوتا ہوں دھل جائیں

میرے یہ آلودہ ہاتھ

خلق کی آرزوؤں  مرادوں کی تکمیل میں

پاک ہر عجز کے عیب سے تیری ذات

۔۔۔۔۔۔۔۔۔۔۔۔۔۔۔

 

 

 

واصف کے لئے طلوعِ صبح کی نظم

 

مصلّےسے پلٹ کر دیکھتا ہوں

طلوعِ صبح

افق روشن

ہمکتا آفتاب

ہمکتا ہے اسے لےلوں

اٹھا لوں گود میں، چوموں

اچھالوں باہوں میں جھیلوں

میری آنکھوں مری سانسوں میں

میری روح کی گہرائی میں

کلکاریاں تیری چمکتی ہیں

میرے آگے  سیہ بھاری چٹانیں

چٹانیں کاٹتا آگے بڑھا میں

ترےآگےچمکتے راستے شفّاف جھرنے ہیں

ہمیشہ

ترے آگے چمکتے راستے شفّاف جھرنے ہوں

۔۔۔۔۔۔۔۔۔۔۔۔۔۔

واصف میرے بڑے لڑکے کا نام ہے۔

 

 

پہلا پڑاؤ

 

یوں بھی سارا جہاں سمٹتا ہے

اس جگہ کائنات ذرّہ ہے

مَیں ہی میں شش جہات پھیلا ہے

سب طرف میں ہے،  میں اکیلا ہے

 

اب تجھے ڈھونڈنے کہاں جاؤں

اور کن وسعتوں میں لہراؤں

کچھ پتہ دے تجھے کہاں پاؤں

۔۔۔۔۔۔۔۔۔۔۔۔۔۔۔۔۔۔۔۔۔۔۔

 

 

 

پہلی  بارش کی نظم

 

بادل آئے

پانی برسا

بھیگ رہا ہے پتّہ پتّہ

پتّہ پتّہ

سرشار ہوا

جیون کا نشہ

بیدار ہوا

جگمگ کرنیں

پھوٹ رہی ہیں

ٹپ ٹپ بوندیں

چھوٹ رہی ہیں

یا رب ہم

صدیوں کے ترسے

جیون رس

ہم پر بھی برسے

جیون پتھ پر

ہانپ رہے ہیں

ہاتھ دعا کے

کانپ رہے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

فرار کا راستہ نہیں ہے

 

 

اڑان بھرتے ہیں کیسے پنچھی کھلی ہوا میں

فضیل ،واصف کلیلیں کرتے ہیں میرے گھر میں

وہ ایک لڑکی جو میری ہیئت پہ مسکرائے

ہے کیسی آزاد روح سے جسم تک سفر میں

چٹان کی شق سے جیسے پانی ابل رہا ہے

ڈھلان پر جیسے ایک جھرنا مچل رہا ہے

دشائیں پھیلائیں بیکراں تو نے تیری مخلوق

ان میں پائے سفر کے امکاں تلاشتی ہے

یہ سانس میری رکی رکی ہے

فرار کا راستہ نہیں اور کوئی مجھ کو تمام سمتوں سے

گھیرتا ہے

اگر چہ مجھ سے چھپا ہوا ہے

ابھی تو وہ ساعتِ  معّینحجاب میں ہے

تری طلب میں چلا تو جاتا کہ

زندگی کا شمار روزِ حساب میں ہے ۔

۔۔۔۔۔۔۔۔۔

 

 

 

 

 

زم زم

 

 

روم کی بتّی بجھائی ریک پر کتاب رکھی

مون لائٹ آن کرکے میں نے چاہا سو رہوں

اب تھک گیا ہوں

دیکھتا ہوں

ایک عورت سو رہی ہے بے خبر

ٹوٹ کر بکھرا ہے اس کے جسم پر

خواب کا اک ریگزار

سینے سے لپٹا ہوا ہے شیر خوار

یونہی تو حیرانیاں دیتا ہے عزرائیل کو

آبِ زم زم جب عطا کرتا ہے اسماعیل کو

نیند آنکھوں میں نہیں پر ور دگار!!

۔۔۔۔۔۔۔۔۔۔۔۔۔۔

 

 

واشکروا لی ولاتکفرون

 

آسماں پر گرم سورج کے بھیانک قہقہے

دوڑتی تھیں زہر لہریں، سانس کھل کر کون لے

آگ کے دریا رواں سب شاہراہیں راستے

جل رہی تھیں دھوپ کی بارش میں ساری کھیتیاں

سر اٹھائے زرد رو سوکھی نکیلی جھاڑیاں

اور ان کے درمیاں

ناچتی تھیں بے حیا کم ظرف ننگی ڈائنیں

چیخ بد روحیں سنیں کیا ؟طے کیا چپکے رہیں

بے زبانی کی وساطت سے کہیں

جوڑ کر دستِ سوال :

اے خدا ئے زوالجلال

ختم تجھ پر ہر کمال

ساعتیں پھیلا رہی ہیں موتکی نیندوں کا جال

جاگتی جیتی فقط اک تیری ذات

روزِ روشن ہو کہ رات

اک فقط تجھ کو ثبات

اے خدا ! اے پاک ذات

کون دیگا ما سوا تیرے نجات

ابر بن کر سایہ کر دے

نرم کر دے کھیتیاں

آ ہماری سوچ میں آ

تو ہمارے ہاتھ ہو جا

تو زباں

خالقِ ارض و سما

نرم مٹّی کی ردا سر سے ہٹائے

دیکھتی ہیں کونپلیں پلکیں اٹھائے

اب کسانوں کا تصّور چھو رہا ہے بالیاں

مسکرا آنکھیں ملا شرمائے ہیں گھر والیاں

سج رہی ہیں تھا لیاں

بج رہی ہیں تا لیاں

ہنس رہی ہیں گا رہی ہیں سالیاں

اب دعا ئیں ہو گئی ہیں میٹھی میٹھی گالیاں

آسماں پر اے خدا تیرا جلال

اور زمیں میری ہو ئی گہوارۂ امن و اماں

پاک بد روحوں سے ہے میرا جہاں ۔

۔۔۔۔۔۔۔۔۔۔۔۔۔۔۔۔۔۔۔۔

 

 

 

ایسا کیوں ہوتا ہے

 

ایسا کیوں ہوتا ہے

لکھنا میری ایک ضرورت ہے

لیکن

کورے کاغز پر لکھنے کو

اپنی سوچ کی تھیلی سے

جو بھی لفظ چنوں

خون میں لتھڑا ہوتا ہے ۔

۔۔۔۔۔۔۔۔۔۔۔۔۔۔۔

 

گذارش

 

ننھے بچّو!

پاک دامن بن بیاہی لڑکیو!

ہاتھ جوڑو

دیوتاؤں سے کہو

اپنے اپنے آسنوں سے اٹّھو ۔

۔۔۔۔۔۔۔۔۔۔۔۔۔۔۔۔۔۔۔

 

 

کرفیو

 

بانجھ ٹھنڈی خواب گاہوں کا اندھیرا

شام سے تا صبح پھیلا

دیکھتے ہیں سب گلی میں

فاحشہ آباد ہے

اب گلی میں!

۔۔۔۔۔۔۔۔۔۔۔۔۔۔۔۔۔۔۔۔۔

 

سینکچوریز

 

درندوں کی حفاظت

ہمارا فرض ہے یہ جانتے ہیں ہم

تڑوبا،کنھا ،شیواپوری،ڈاچی گم ،

درندے ان حفاظت گاہوں میں آزاد

اب دھوکہ نہ کوئی ڈر

ہمارا گیر کا جنگل بنا ہندوستانی شیر کا گھر

چھلانگیں مارتے ہیں بستیوں میں مین ایٹر؎  1

 

MAN EATER

۔۔۔۔۔۔۔۔۔۔۔۔۔۔۔۔۔

 

انٹرویو

 

تعارف کے لمحے

یقیں کیجے

بھول جاتا ہوں میں نام اپنا

مجھے لگتا ہے

ٹائپ ،پریس،پنسلیں ،پن

مرے نام سو گالیاں لکھ رہے ہیں

۔۔۔۔۔۔۔۔۔۔۔

 

آگہی

بادلوں کو اپنے کھیتوں پر سے اڑتا دیکھ کر

اک سمے کہتا تھا میں

بھورے بادل پانی پینے جا رہے ہیں

 

 

بادلوں کو اپنے کھیتوں پر سے اڑتا دیکھ کر

اس سمے

لفظ کوئی ذہن میں اگتا نہیں

پھول کوئی ہونٹ پر کھلتا نہیں۔

۔۔۔۔۔۔۔۔۔۔۔۔۔۔۔۔۔۔۔۔۔

 

ہرے ہرے کھیت

 

گرجتے بادل

اُمڈتے دریا

اُبلتے چشمے

مچلتی نہریں

کہیں نہیں ہیں

 

ہرے ہرے ہیں

گناہ کے کھیت

رات کی نم سے

پل رہے ہیں

۔۔۔۔۔۔۔۔۔۔۔۔۔۔۔۔۔۔

 

 

 

 

بے کواڑ دروازے

 

قہقہا دھماکہ چیخ

گوشت کی لہو کی بو

بھوک:جنس روٹی کی

فلسفے،قلم۔۔خنجر

 

دردناک ہر منظر

کون روکتا ان کو

کون ٹوکتا ان کو

بے کواڑ دروازے۔

۔۔۔۔۔۔۔۔۔۔۔۔۔۔۔۔۔

 

 

 

حاصل صفر ہے

 

راستے پر بچھی اپنی آنکھیں سمیٹو

آس کے پیڑ کی چھاؤں میں بیٹھے رہنے کا حاصل صفر ہے

انتظاروں کی گٹھری سنبھالو گے کب تک

کہ یہ تو تمہارے بھی شانے زمیں کی طرف کھینچتی ہے

مٹّیوں پر نگاہیں سجائے

دیوتاؤں کی آمد  کی خبریں سناتا تھا جو

بوڑھا کبڑا وہی

انتظاروں کی گٹھری تمہیں سونپ کر

خود زمینوں کے اندر اُتر کیوں گیا ہے

گہرے پاتال میں وہ کسے کھوجتا ہے ؟

آس کے پیڑ کی چھاؤں میں تو  بیٹھے رہنے کا حاصل صِفر ہے

۔۔۔۔۔۔۔۔۔۔۔۔۔

 

 

 

 

فرشتے

 

جب زمیں

سورج بجھا کر

تھپتھپا کر

سلا دیتی ہے ہمیں

تاروں کی اوٹ سے جھانکتے فرشتے

کود پڑتے ہیں ۔

۔۔۔۔۔۔۔۔۔۔۔۔۔۔۔۔۔۔

 

اتنا بتا

 

 

کرۂ ہستی پہ پھیلی

سانس بنتی زہر آلودہ ہوا

اتنا بتا

تھک گئی ہے زندگی

یا

اپاہج ہے فرشتہ موت کا؟

۔۔۔۔۔۔۔۔۔۔۔۔۔۔۔

 

ذائقہ

 

بے کفن

سر کٹے

لاشے چوراہے پر

سرد سفّاک ہاتھوں سے

پکڑے ہوئے قاتلوں کے گریباں

پوچھیں :

بتاؤ بتاؤ

سڑے بھیڑیو

ہمارا لہو

لپلپا تی زبانوں پہ کیسے لگا؟

۔۔۔۔۔۔۔۔۔۔۔۔۔۔۔۔۔۔۔۔

 

 

 

کون یہاں آتا ہے

 

آہستہ آہستہ

سورج کی کرن دستک دیتی ہے

آگے بڑھ جاتی ہے

ہولے ہولے

بادِ صبا زنجیر ہلاتی ہے

مڑ جاتی ہے

دروازے،دریچے ،بند کئے

اندر گھور اندھیرے رہتے ہیں

دیواروں پر لمبے لمبے سائے ہانپ رہے ہیں

سنّاٹا گونج رہا ہے یا

ڈائنیں کھِل کھِل  ہنستی ہیں

سیڑھیاں بجتی ہیں یا

دل دھڑ دھڑ کرتا ہے

سوجھ نہیں پاتاہے

کون یہاں آتا ہے ۔

۔۔۔۔۔۔۔۔۔۔۔۔۔۔

 

 

 

کنواںکہاں تک چھن چھن بولے

 

ایرانی خمینی زندہ باد

زندہ باد ۔۔مردہ باد

بھارت کے نقشہ میں

اک دھبّہ سرخ مراد آباد

سارتر،رچرڈس

ساحر اور کیسری کشور کی رحلت پر غمگین مدیر

جنگلی بلّا شاہد کی مرغی لے بھاگا ہے

آنگن میں پیلا پودا خاموش کھڑا ہے

اعظمی نمبر شاعر کا ،اوراق ،آہنگ،تحریک

آدمی اور انسان

عروض آہنگ اور بیان

صفحہ صفحہ سنّاٹا ہے

سینکڑوں جھینگر چیخ رہے ہیں

ایسے کوئی گاتا ہے!

ناپید ہے میری موت کا لمحہ

اور فرشتہ موت کا اپنی بے چارگی پر جھلّاتا ہے

 

پتّھر پھینکنے والو اب تو

پتّھر سے پتّھر ٹکراتا ہے

کنوں کہاں تک چھن چھن بولے

پانی ڈوب ہی جاتا ہے ۔

۔۔۔۔۔۔۔۔۔۔۔ّ

 

 

سرخ پیلے سبز رنگ

 

سائکلیں ، اسکوٹریں ،کاریں ،بسیں ،رکشائیں

گھوڑا گاڑیاں

انگنت انسان مرد و زن کا  اک سیلِ رواں

ہارن ٹن ٹن ،پانپ  پیں پیں ،سڑ سڑاہٹ

ہاٹ ! ہٹ جا سامنے سے

رینگتا کیوں ہے؟نکل !آگے سرک

اک روانی سے تعلّق اور سب سے بے خبر

دوڈتا ہے کس طرف یہ، کون اِس کا منتظر

یہ جواہر روڈ ہے

یا کسی بپھرے سمندر کی کوئی موجِ غضب

پھنکارتا اک اژدھا ؟

ہر بنِ مو پر کھلی حیرت سے پھیلی انگنت آنکھوں سے دیکھیں

دیو پیکر بلڈنگیں یہ محشرستاں

آؤ تو آگے بڑھیں ۔۔۔۔یہ کیا جگہ ہے ؟

چوک جے استمبھ

اس جگہ ہیں جلتے بجھتے سرخ پیلےسبز رنگ

وہ غضبناکی کہاں رخصت ہوئی ؟

جلتے بجھتے سرخ پیلےسبز رنگ

یوں پکڑتے روک لیتے ہیں اسے

ایک دھکّا دے کے ایسے چھوڑ دیتے ہیں اسے

جیسے مردہ سانپ کی دم کوئی کھینچے

ڈور سے باندھے گھسیٹے !!

میرے قلب و روح میں

میری سوچوں ،میری شریانوں ،وریدوں میں رواں ہے

یہ جواہر روڈ اک موجِ بلا پھنکارتا اک اژدھا

لیکن یہاں بھی

جلتے بجھتے  سرخ پیلےسبز رنگ

صبح دم

انگلیاں جب ہوں گلابی

خامشی ہو ہر  طرف

دیکھ تو بھی اپنےاندر جھانک کر

سرخ پیلےسبز رنگ

تیرا میرا مسئلہ ہے

سرخ پیلےسبز رنگ!!

۔۔۔۔۔۔۔۔۔۔۔۔۔۔۔۔

 

 

 

ایک فساد زدہ نظم

 

کراں  تا کراں پھیلا یہ کرّۂ باد ہے ایک صحرا

زمیں ایک بھٹکا مسافر

زمیں سرد تاریک میں

چمکتی امیدوں کو مرکز بنائے ہوئے راستہ ڈھونڈتی چل رہی ہے

کراں تا کراں پھیلا یہ کرۂ باد ہے ایک صحرا

کہیں گونجتی ہیں درندوں کی بھوکی صدائیں

کہیں غول در غول ہیں وحشی کتّے کہ مٹّی کی بو سونگھتے پھر رہے ہیں

زمیں ایک بھٹکا مسافر ہے کتّوں سےبچتی ہوئی راستہ ڈھونڈتی ہے

عراق اور ایران ،برطانیہ اور بیروت

ہندوستان

پڑےسڑ رہے گوشت کے لوتھڑے ہیں

زمیں کے دریدہ بدن سے

یہ کتّوں کی نوچی ہوئی دھجّیاں ہیں

۔۔۔۔۔۔۔۔۔۔۔۔۔۔۔۔

 

 

شہرِ خموشاں

 

اک فریب روپوشی

اک فریب بے ہوشی

اک فریب  خاموشی

چیختی ہے سر گوشی

اس طرف حجابوں کے

مرحلے حسابوں کے

سلسلے عذابوں کے

آئنے سرابوں کے

محتسب کی للکاریں

چابکوں کی پھٹکاریں

بچّھوؤں کی تلواریں

اژدھوں کی پھنکاریں

شہر ہے کہ قبرستان

قبر ہے کہ ہے انساں

سطح پر سکوں ویراں

اندرون اک طوفاں

ایک شخص یوں آئے

شاخ اکہری لائے

تا عذاب تھم جائے

آدمی سکوں پائے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

 

 

تلاش کا پہلا لمحہ

 

لڑتے لڑتے تھک گئے

دیوتا بھی راکشس بھی

پہلے تلواریں گریں

پھر زمیں  پرآرہے

دیوتا بھی راکشس بھی

کیسا سنّاٹا ہے وحشی جست بھولے

نغمہ بھولے طائرانِ خوش گلو

رقص بھولے آہوانِ خوش ادا

منجمد ہے سارا منظر،  آنکھ ہے ٹھہری ہوئی

آسمانوں سے برستی ہے سیہ سیّال گاڑھی خامشی

خامشی سب وصف پہچانے

سمیٹے جا رہی ہے

ساری سمتیں لوٹ آئی ہیں

کہیں اب کچھ نہیں !کچھ بھی نہیں !

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

 

 

 

 

 

فرشتے کیا کریں؟

 

 

 

مقرّر رفیقوں کی تعداد  محدود پرواز کے دائرے

اجالوں کے اندر یہ محفوظ بھی اور مجبور بھی

تحفّظ کا خط ایک زنجیر ہے

تعیّن کی اس بانجھ سر حد پہ ٹھہرے ہوئے دم بخود طائفے

فرشتے کیا کریں ؟

اندھیروں میں عفریت آزاد

سراپا عیش و مستی کے کیچڑ میں لتھڑے ہوئے

ایک اک انگنت ہو گئے

ا ندھیروں میں آزاد عفریت

کالی زبانوں سے چاٹیں اگر سدِّ فاصل

فرشتے کیا کریں؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

 

 

 

آخری بدکار

 

 

خداوندا زمین کا  آخری بدکار۔۔میں۔۔

حاضر ہوں تیرے روبرو

میرے چہرے پہ اپنے عہد کے لاکھوں کروڑوں رو سیاہوں کی طرح

کالک پتی ہے

خباثت کی لکیریں تنگ ماتھے پر چمکتی ہیں

لرزتا ہے سلگتی بستیوں کا عکس وحشت خیز

دو عیّار آنکھوں میں

لہو میں گھل رہی ابلیسیت کا زیر و بم اظہار پایا میری سانسوں میں

سسکتی ہے اکڑتی انگلیوں پر انگنت بد کار روحیں

جن کا مسکن اب نہیں کوئی

ہمارے جستوجوئے شر میں روز و شب گزرتے تھے

گناہوں کے فرشتے اپنے کاندھوں پر اٹھائے سب گذرتے تھے

سنہری روشنائی صاف دل انساں ،نیکی کے فرشتے پاک جذبے

ہمارے عہد میں نایاب تھے

تا حدِّ نظر پھیلا مرے اعمال کا دفتر

مِری بدکاریوں کا سلسلہ ۔۔۔لا انتہا ۔۔مِرے خدا

ترا انصاف ہے بد کار کو جو بھی سزا دے

مگر

اک جرم آخر پر نظر فر ما

کہ اسرافیل پھونکیں صور اس سے پہلے

میں کالی زمیں پر ایک دھماکہ بن کے لہرایا

خباثت سے بھری اپنی زمیں کا  ذرّہ ذرّہ میں اٹھا لایا

کہ پھر اک امرِ کن سے صاف پانی سب طرف پھیلے

سمندر سے  نئی دھرتی اگے

نئے ادم سے نیکی کا اک سلسہ پھیلے

خداوندا!

خباثت سے بھری اپنی زمین کا ذرّہ ذرّہ میں اٹھالایا

۔۔۔۔۔۔۔۔۔۔۔۔۔۔۔۔۔۔۔۔

 

 

 

فرسٹریشن

 

ہاتھ شل ہیں، پاؤں بھاری

سوچ مفلوج

دوستو! کیا تمہیں معلوم ہے جانا کہاں ہے؟

اس لئے

اپنے اپنے ہی سہی

پہینک دو لاشے یہیں

پہینک دو کہ دُکھ رہے ہیں ہاتھ اب

تھک رہے ہیں بے سبب

آؤ بیٹھو تاش کھیلیں گنگنائیں

آتے جاتے راہ گیروں پر ہنسیں

فقرے کسیں

کون تھے ہم ،کوں ہیں ہم

بھول جائیں !

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

 

نفیس حیرانیاں

 

اندھیرے اور اجالے کے درمیاں

میری نظمیں

اندھیرے اور اجالے کے درمیاں

جیسے ایک صبح

جیسے ایک شام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

ہری جھنڈیاں

 

ہری جھنڈیاں، سبز میداں ہلاتے رہے

بلندی پہ رنگوں کے پیغام آتے رہے

چٹانوں سے نغمے اترتے نہیں

فضا میں ہوا،آب،کرنیں کوئی پر کترتے نہیں

ادھر سے شکاری گزرتے نہیں

پرندے لہو ہو کے گرنے سے ڈرتے نہیں

مگر ہاتھ پودے بجاتے رہے

ہری جھنڈیاں سبز میداں لاتے رہے

چٹانوں سے نغمے اترتے نہیِں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

 

 

پانی پانی زہر

 

سوچا تھا کون خدا ہے

ہے بھی تو کیوں میرےسِوا ہے

اب اپنا خدا میں آپ ہوں لیکن

نس نس میں یہ پیاس ہے کیا

ٹوٹتی بنتی  آس ہے کیا

 

اپنی خدائی سر پہ  اٹھائے

بستی بستی گھوم رہا ہوں

منظر منظر ٹوٹ رہا ہوں

کس کو اپنا کہہ کے پکاروں

اپنے من میں کس کو اتاروں

کیسے اپنی پیاس بجھاؤں

پانی پانی زہر گھلا ہے !!

۔۔۔۔۔۔۔۔۔۔۔۔۔۔۔۔

 

 

 

مقتل

 

روشنی کے ساتھ ہی

سخت ہاتھوں میں سنبھالے اک صلیب

آگیا ہوں میں بھرے بازار میں

 

اس جگہ جو بھی  ہے انسان صورت

بس مِرے ہی روپ کی تکرار ہے

مجھ کو ہر چہرے پہ عیسیٰ کا گماں

اور ہر چہرہ مجھے تکتا ہوا

 

دیکھنا ہے

روشنی کی موت تک

کس کے ہاتھ اور پاؤں میں

آہنی کیلیں لگیں گی ۔

۔۔۔۔۔۔۔۔۔۔۔۔۔۔۔۔۔۔۔

 

 

 

کورا کاغذ

 

بہرِ تخلیق اگر اس پہ جھکا ہوتا ہوں

اس کی قربت سے بڑھی جاتی ہے حدّت تن کی

 

میری نس نس میں اُمنگ

میری رگوں میں اینٹھن

اور لذّت کی گراں باری سے بوجھل احساس

 

کورا کاغذ مجھے عورت کابدن لگتا ہے۔

۔۔۔۔۔۔۔۔۔۔۔۔۔۔۔۔۔۔۔۔

 

 

کمند

 

برف پوش آسمانی چوٹیوں کے اس طرف

کیا دھرا ہے اے پہاڑ

تو بتائے گا بھی کیا

بے زبان بِہرا تو

 

ہاں مگر

کولتار کی سڑک

برف کاٹتی چوٹیوں پہ جائے گی

کچھ پیام لائے گی ۔

۔۔۔۔۔۔۔۔۔۔۔۔۔۔۔

 

 

 

ھِی حتیٰ مطلعِ الفجر

 

تہہ بہ تہہ رات گہری خاموشی

کھلکھلاتے ہوئے ستاروں کی

کھنکھناتی صدائیں لہرائیں

 

سرسراتی ہوا کے رستے پر

پھولتے بادلوں کے رتھ گھوڑے

دور پر یوں کے قافلے جائیں

 

کوہساروں کی بیٹیاں نکلیں

ناچتی گاتی اپسراؤں کے

طائفے دیکھ دیکھ شرمائیں

 

سبزہ زاروں کے نرم قالیں پر

با وضو با ادب فلک زادے

بہرِ سجدہ نزول فر مائیں

۔۔۔۔۔۔۔۔۔۔۔۔۔۔۔۔۔۔

 

 

 

کافور کی انگلیاں

 

مخملیں چادر پہ گہری نیند کے بکھرے ہوئے

میرے لب،  رخسار، آنکھیں،  ہاتھ، پاؤں

جوڑتی ہیں انگلیاں کافور کی

 

گدگداتی ہیں جگاتی ہیں

مسکراتی ہیں بلاتی ہیں کہ ۔۔۔آ

آ!۔۔۔۔

ہماری بزم میں آ!

دور تک پھیلی ہوئی خاموشیوں کے فرش پر

گیان کے بوجھل دشالے بادلوں پر ڈال کر

بیٹھے ہیں بھاری پہاڑ

دشت دریا وادیاں

باغ، رستے، بستیاں

سب سراپا انتظار

آسماں چھوتی ہوئی اونچائیوں پر

چاند کی مسند منّور

چاند کی مسند پہ بیٹھ

ریشمی تخئیل کے دھاگوں سے بُن

اک ردائے شعر و نغمہ

اجلی ہلکی  سرسراتی نرم نم

 

پر بتوں کی بھاری بھوری

جھاڑیوں کی سخت پیلی

کونپلوں کی نرم سبز

ہر سماعت بے لباس

اک ردائے شعر و نغمہ میرے پاس۔

۔۔۔۔۔۔  ۔۔۔۔۔۔۔۔۔۔

 

شام

 

شام

اک اچّھا شوہر

اک مشفق باپ

فائلوں کی سطروں سے

کھینچ رہی ہے

 

میں اپنے نام کے پیالے میں

امرت رس بن کر

قطرہ

قطرہ

اتر رہا ہوں

۔۔۔۔۔۔۔۔۔۔۔۔۔۔۔۔۔۔۔۔

 

 

رات

 

 

گھنے جنگل کی وسعت میں

درندوں کی پکاریں گونجتی ہیں

 

نشے میں خوف کے مسرور

اندھے غار میں

ہم جھومتے ہیں

۔۔۔۔۔۔۔۔۔۔۔۔۔۔۔۔

 

 

 انعکاس

 

 

آفس بس چوراہا

سبزی منڈی ہوٹل تھیٹر

ٹھہری بہتی گلیاں

کالی  پیلی سڑکیں

ہر جا رستے پر

ایک سا منظر

 

اب میں تنہا

میرا کمرہ میرا بستر

پھر بھی میری آنکھیں

ننگی گردن ننگے بازو

ننگی رانیں

دیکھ رہی ہیں

۔۔۔۔۔۔۔۔۔۔۔۔۔۔۔۔۔۔

 

 

انتظار

 

پر اسرار مکاں کا بوڑھا

اس کے طول و عرض پہ  پھیلا

رفتہ رفتہ

اندر اندر سمٹ رہا ہے

دروازے پر ٹاٹ کا پردہ

جگہ جگہ سے بِسک رہا ہے

 

اپنے کمرے کی کھڑکی سے

میں وہ لمحہ دیکھ رہا ہوں

جب بوڑھا سمٹ کر

اک موہوم سا نُقطہ رہ جائے گا

تیز سمے کی دھار سے کٹ کر

پردہ فرش پہ آ جائے گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔

 

 

 

آخری دن

 

ڈھونڈتا ہوں شفقت اور نرمی میں کالی رات کی

آگے پیچھے دائیں بائیں دور پاس

ناچتے ہیں تیز روشن آفتاب

ہر طرف ہے دھوپ

کانپتا ہوں میں

نہ جل اٹھے

کہ میرا کاغذی ہے روپ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

مواخذہ

 

سفیدہلکا فرشتوں جیسا لباس پہنے

کھڑے ہیں کچھ فاصلے پر مجھ سے

یہ میرے وہ حوصلے ہیں

کہ قتل جن کا کیا تھا میں نے

کہ میری آنکھوں کے نیچے حلقوں پہ خون جن کا

جما ہے اب تک

 

سوال اک مجھ سے پوچھتے ہیں

بتاؤ گذری جو تم پہ اس دن کہ ہم نہیں تھے

وہ ہم ہی تھے جو کسی سہارے سے کم نہیں تھے

۔۔۔۔۔۔۔۔۔۔۔۔۔۔۔۔۔۔۔

 

 

کمزور لمحہ

 

کبھی تو ایسا لگتا ہے

جیسے میں ہوں شیر

ابھی

کچھار سے نکل کر

سارے جنگل پہ چھا جاؤں گا ۔

۔۔۔۔۔۔۔۔۔۔۔۔۔۔۔۔۔۔۔

 

 

 

کہانی

 

اُچھلتی بھاگتی الّھڑ ندی

پھیل کر دریا بنی

اور پھر

گمبھیر ساگر ہو گئی ۔

۔۔۔۔۔۔۔۔۔۔۔۔۔

 

 

 

دوشیزہ غمگین اداس

 

نامردوں کے بیچ کھڑی

دوشیزہ غمگین اداس

دوشیزہ ان سے کیا پائے گی

کہ ان کی انگلیاں ہی اٹھ سکتی ہیں

 

میری کنواری سوچ

نامردوں کے بیچ کھڑی

دوشیزہ غمگین اداس

۔۔۔۔۔۔۔۔۔۔۔۔۔۔۔۔۔۔۔۔۔۔۔

 

لیمپ پوسٹ

 

گلی کی آنکھ ہوں

اندھوں کی لکڑی ہوں

جواں؟  ہمدردیاں

بوڑھے عتاب

ہر ننّھی شرارت سے

مجھے محفوظ رکھتے ہیں

۔۔۔۔۔۔۔۔۔۔۔۔۔۔۔۔۔۔

 

 

ماں

 

ٹھنڈ بادل دھوپ

گونگے بہرے موسموں کے روپ انوپ

لجلجا نو زائیدہ ننگا بدن

جھیلتا ہے ہر ستم

کم سے کم

نرم ہلکی تھپکیاں

چند میٹھی لوریاں

ایک ماں!

 

جنم دے کر چھپ گئی ہے میری ماں

بارہا

جنم دے کر چھپ گئی ہے میری ماں

۔۔۔۔۔۔۔۔۔۔۔۔۔۔۔۔۔۔۔۔

 

 

وہ لمحے

 

وہ لمحے جب نیا بازار مسجد ،ہوٹلوں میں منتظر احبابِ خوش گفتار

سوچوں سے نکل جائیں

مِری محبوب کی اجلی جواں بانہوں کے حلقے تک پگھل جائیں

ہمکتے ننّھے بچّے کی کشش کے دائرے ٹوٹیں

کڑی بے رحم ظالم زندگی کے وار ٹل جائیں

ہواؤں سے سبک ہوکر

مکانوں سے مناروں سے اٹھوں اوپر

گلابی کالے بھورے بادلوں کی وسعتیں ناپیں میرے شہپر

تھکا سورج مِرے سائے میں تھوڑی دیر سستائے

مرے افکار کی کرنیں پڑیں صحرا سمندر پر

فلک سے شاخساروں  جانداروں سبزہ زاروں تک

بکھر کر سانس لیتا ہوں

وہ لمحے جس گھڑی مین سانس لیتا ہوں ۔

۔۔۔۔۔۔۔۔۔۔۔۔۔۔۔۔۔۔۔

 

 

 

دروازہ کھلتا ہے

 

جگ مگ کرتے میرے محل میں سو دروازے

اک دروازہ کھلتا ہے

میں دروازہ بند کردیتا ہوں

پھر اک دروازہ کھلتا ہے

ہر دروازہ پر گھور اندھیرا

اور اندھیرے میں ایک سرکتا خوف

دروازہ بند ہوتا ہے

دروازہ کھلتا ہے !!

۔۔۔۔۔۔۔۔۔۔

 

 

 

استغفر اللہ

 

راہ چلتے

آگہی ایمان شخصیت کی پر تیں توڑ کر

جسم کی مٹّی تلے رکھے گنہ کے بیج سے اٹھتی ہوئی

ایک کونپل ہنسے!

سوچ کی دھرتی پہ گرتا حیرتوں کا نم

سانس روکے چپ ہوا

ساکت شجر

دوسرے لمحے مگر

مسکراہٹ کی چمکتی گرم دھوپ

ڈال دے رخ پر وہی پہلا سا روپ !

۔۔۔۔۔۔۔۔۔۔۔۔۔۔۔۔۔۔۔

 

ودربھ

 

ہم

ودربھ کے بیٹے

ہماری انگلیوں پر

کپاس کے پھول ہنس رہے ہیں !

۔۔۔۔۔۔۔۔۔۔۔۔۔۔۔۔۔۔۔۔

 

 

 

سادگی

 

زندگی کی چاہت میں

شہر شہر پھرتا ہوں

موت کی رفاقت میں !

۔۔۔۔۔۔۔۔۔۔۔۔۔۔۔۔۔۔۔

 

دھوپ چھاؤں

 

ہم

دھوپ میں تپتی

زرخیز زمینیں

فصل اگائیں

لہلہائیں

تم برگد کی چھاؤں میں

جلی بانجھ زمین

حیرت سے تکتی رہو !

۔۔۔۔۔۔۔۔۔۔۔۔۔۔

 

 

نام کی تختیاں

 

خوب صورت جواں رس بھری عورتیں

شاہراہوں پہ اڑتی ہوئی شوخ رنگیں کلیں

ناز سے بن سنور کر کھڑی بلڈنگیں

نور کی رنگ کی سر سراتی چادریں

دائیں بائیں سجے کانچ کے کیس میں

نیم عریاں کھڑی ہنس رہی خواہشیں

جس طرف جائیں ہم ساتھ اپنے چلیں

دوستو!

دوار پر دل کے لٹکی ہوئی نام کی تختیاں

جیب میں رکھ لو ۔۔۔اندر چلو

تان کر چادریں سو رہو

بند کرکے سبھی دوار  سب کھڑکیاں

تا نہ زنجیرِ در کھٹکھٹائیں ہوس زادیاں !

۔۔۔۔۔۔۔۔۔۔۔۔۔۔۔۔

 

 

آبی خزانے

 

ہوا کے ہاتھ میں اپنی امانت سونپ کر دھرتی

پھٹے ہونٹوں پہ لکڑی سی زباں پھیرے

ہوئے ہیں گول پتّھر آنکھ کے گھیرے

زمیں کا درد کیا سفّاک جانے

بلندی پر ہوا کے سو ٹھکانے

بجاتی جائے ہے آبی خزانے

۔۔۔۔۔۔۔۔۔۔۔۔۔۔۔۔

 

 

وردھا

 

ناؤ میںبیٹھے بیٹھے لگتا ہے

میری شریانوں میں

دوڑرہی ہے وردھا!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

 

اچلپور کے نام

 

جب سوچ کا جزیرہ

یادوں کے آبِ رواں سے گھر جاتا ہے

اور تلاش پر مامور کبوتر

خالی منقار لئے

آنکھوں کی کشتی میں لوٹتے ہیں

میں لہر لہر پڑھنے لگتا ہوں

تب

روئی کا تکیہ میرے ماں کا زانو بن جاتا ہے

تیری گلیاں

اس کی انگلیاں بن کر میرے بالوں میں کنگھی کرنے لگتی ہیں

میں آنکھیں بند کر لیتا ہوں

کھوئی ہوئی نسیم کاجھونکا

ماں کے آنچل کی مخمور ہوا بن کر

گہری گہری سانسوں میں ڈھلنے لگتا ہے

کھوئے ہوئے لفظوں کے بادل گھر آتے ہیں

اور ان سے اوّلین بوندیں

اس کے کافور بوسوں کا لمس لئے

میری پلکوں پر پڑنے لگتی ہیں

۔۔۔۔

اچل پور مہاراشٹر کا ایک قدیم شہر جو اب امراؤتی ضلعے کی ایک تحصیل ہے

 

 

نفیس حیرانیاں

 

سبک فرشتو!

تمہیں اٹھائے اٹھائے پھرتے

مِرے یہ شانے جھکے نہیں ہیں

مگر بتاؤ

مِرے یہ شانے کہ ہڈّیاں ہیں

مِرے جنم سے ہو ہڈّیوں پر جمائے آسن

لطیف نازک بدن تمہارے دکھے نہیں ہیں؟

تمہارے ہاتھوں میں ہیں کتابیں

یہ میرے اعمال کا لکھا ہے کہ آئنے ہیں

شبیہ ان سے مِری بنی یا

تمہارے چہروں کے خال و خد ہیں ؟

یہ آئنے ہیں تو اے فرشتو !

بھرے پرے اس جہاں میں آئینہ داری کب تک

تم ایک سے دو ہو یہ بتاؤ

کبھی تعارف

کبھی مصافحہ؟

معانقہ بھی کبھی ہوا ہے؟

 

تمہیں اٹھائے اٹھائے پھرتے

میرے یہ شانے دکھے نہیں ہیں

مگر گھڑی دو گھڑی تو اترو

کہ ہو تعارف

معانقہ کبھی ہو !

لطیف نازک بدن فرشتو!

مِرے رفیقو!

مِرے یہ شانوں پہ جتنا عرصہ سجے ہوئے تھے

کہ دائیں بائیں میں بے تعلّق بٹے ہوئے تھے

تمام تر گردِ خامشی میں اٹے ہوئے تھے

سفید کالی مِرے عمل کے حساب کی تختیوں پہ مدّت سے تم رقم تھے

ادھورے آدھے ہی بیش و کم تھے

 

زمین پر آکے دونوں ہاتھوں مین ہاتھ ڈالے

سفید کالے

نفیس حیرانیوں کی عبا سنبھالے

زمین کے لمس کا نشہ آنکھ میں اجالے

کبھی تو اک دوسرے کی جانب

کبھی مِری سمت دیکھ کے کھلکھلا رہے ہو

بتاؤ کیسے یہ قہقہے ہیں

کہ آج تک بے صدا رہے ہو

سنو سنو آؤ

میرے شانوں پہ بیٹھ جاؤ

سبک فرشتو

تمہیں اٹھائے اٹھائے پھرتے

میرے یہ شانے دکھے نہیں ہیں

لطیف نازک بدن فرشتو!

تمہیں اٹھائے اٹھائےپھرتےمِرے یہ شانے دُکھے نہیں ہیں

مِرے یہ شانے جھُکے نہیں ہیں !

۔۔۔۔۔۔۔۔۔۔۔۔۔۔۔۔۔۔۔

 

بات کیا ہے

 

زمیں

بدن سے نکلتی اپنی

سیاہ پرچھائیوں کی تاریکیوں میں ہے غرق

رات کیا ہے

الم رسیدہ تمام ہم

اپنی اپنی پرچھائیوں کے قیدی

مگر کہوں کیا

سنے یہاں کون

بات کیا ہے !

۔۔۔۔۔۔۔۔۔۔

 

 

 

 

جھگڑا

 

سنو اے پاک دامن بن بیاہی لڑکیو

اک زندگی

تمہاری آنکھوں کے حلقوں سے ہر دم جھانکتی ہے

تمہارے ان چھوئے ہونٹوں سے ہنستی ہے

تمہارے سرخ رخساروں پہ پھیلی ہے

ہمکتی ہے تمہارے آنچلوں میں

تمہارے پیرہن میں سرسراتی ہے

 

اسی کے واسطے جھگڑا ہے میرا اور زمانے کا

زمانہ مسئلہ سمجھا ہے اس کو آب و دانے کا

کھڑکیاں

سوچوں کے مکان کے باسی

ہونٹوں کے کواڑ بند پا کر

آنکھوں کی کھڑکیوں سے

جھانکتے ہیں ۔!

۔۔۔۔۔۔۔۔۔۔۔۔۔۔

 

 

 

 

 

بند آنکھوں جاگنے والو

 

سبک رفتار اڑتے دھوپ گھوڑے پر رواں پیہم سفر میں ہوں

کریہہ بے ڈول بھاری ایک بد ہیئت سیہ عفریت

پیچھے بھاگتا ہے ۔۔ہانپتا ہے

گزرتا ہوں جدھر سے شہر قصبے دھوپ اوڑھے سو رہے ہیں

سیہ عفریت آنکھوں میں رکھے مخلوق تھر تھر کانپتی ہے

بند آنکھوں جاگتی ہے

سنو!

اے تم کہ پلکوں پر بٹھائے خوف تھر تھر کانپتے ہو

بند آنکھوں جاگتے ہو

سیہ عفریت کے ناپاک جبڑوں میں اگر یہ دھوپ گھوڑا گر پڑے گا

بھیانک چیخ گونجے گی

اٹھائے دھوپ نیزہ میں کھڑا ہوں

سنو کہ روشنی ہے روشنی ہے ۔۔آؤ آؤ !

آنکھ کھولو آنکھ کھولو

سنو اے تم ! کہ پلکوں پر اٹھائے خوف تھر تھر کانپتے ہو

بند آنکھوں جاگتے ہو !

۔۔۔۔۔۔۔۔۔۔۔۔۔

 

 

 

 

بونے ہوئے ہیں اوجھل

 

ہجوم کرتی مری صدائیں تمام سمتوں سے مجھ پہ یلغار کر رہی ہیں

مری خطابت کی گڑگڑاہٹ سے میرا سینہ دہل رہا ہے

یہ میری ہی لفظ بجلیاں میرے آسمانوں پہ کوندتی ہیں

جدھر بھی جاؤں مری ذہانت کی آگ کا فرش میرے قدموں تلے بچھا ہے

یہ نیچی نیلی چھتوں تلے مجھ پہ میرا قامت عذاب بن کر بکھر رہا ہے

یہاں وہاں جہل عافیت کے اندھیرے اوڑھے

تمام بونے ہوئے ہیں اوجھل

یہ کیا ہوا ہے

میں ایک انسان ہوں یہ انساں اکیلا تنہا کھڑا ہوا ہے

کہ بارِ وحدانیت اٹھایا نہیں تھا میں نے

کہ مجھ سے تنہائیوں میں جینے کاکوئی پیماں ہو ا نہیں تھا

قریب تر تو مری رگِ جاں سے ہے تو پھر کیوں چھپا ہوا ہے

نکل کے آ!

میں اٹھاؤں سر

کس کو پہچانوں

مجھ پر میرا عذاب ۔۔یہ سر

جھکا ہوا ہے !

۔۔۔۔۔۔۔۔۔۔۔۔

 

 

 

بیک وقت چار سمتوں میں چلتا رہا ہوں

 

یہاں چار آفاق میں

ہلاتے رہے سینکڑوں ہاتھ

صد رنگ رومال میرے لئے اور پھر

بیک وقت چار سمتوں میں چلتا رہا ہوں

 

بیک وقت میں چار سمتوں میں چلتا رہا ہوں

مگر اب کہیں بھی نہیں ہوں

وہ رنگین آفاق ،ہلتے ہوئے ہاتھ

صد رنگ رومال۔۔کچھ بھی نہیں ہیں

نکل آئی یہ پانچویں سمت کیسے

تہی چشم جس پر کھڑا ہوں

بیک وقت چار سمتوں میں چلتا رہا ہوں !

۔۔۔۔۔۔۔۔۔۔۔۔۔

 

 

 

 

 

خالی ہے آکاش

 

اک منظر میری آنکھوں میں

اک منظر تیری آنکھوں میں

تارِ نظر سے جھول رہی ہے ست رنگ دھنک

مہر باں اک مکڑی کرتی ہے سعی

اس کھڑکی سے اس کھڑکی تک

گوندھ رہی ہے ایک ڈور

مسلسل بھاگ رہی ہے

وہ! وہ! وہ! آؤ ! آؤ ! دیکھو ! دیکھو!

مخلوق گلی کی آنکھیں مل مل جاگ رہی ہے

بچّے  ،بوڑھے ، جاہل، کامل، اوباش

زہر بجھے سو بان چلے

دو تار نظر کے ٹوٹے

سب رنگ دھنک کے چھوٹے

منظر۔۔۔۔۔ منظر کی لاش

خالی ہے آکاش!

۔۔۔۔۔۔۔۔۔۔

 

 

 

 

 

محبت آئینہ ہے

 

تیری میری محبت آئینہ ہے

آئینے میں

سو عکس مسلسل بنتے اور بگڑ تے ہیں

سب جاگ اٹھے ہیں سوتے سے، اک بھیڑ

مقابل آئینے کے آتی ہے

اپنی پہچان مقرّر کرتی ہے

یہ کام مکرّ ر کرتی ہے

اپنے آپ سے مل کر خوش ہوتے ہیں

سب ہنستے باتیں کرتے ہیں

ہم، ان آتے جاتے رنگوں کا شکلوں کا

بوجھ اٹھائے چلتے ہیں !

 

تیری میری محبت آئینہ ہے

آئینے میں

سو عکس مسلسل بنتے اور بگڑتے ہیں !

۔۔۔۔۔۔۔۔۔۔۔

 

 

 

 

روشن ہیں کنول

 

جھیل کے پانی پہ کرنوں کا نزول

جھیل کے پانی میں چاندی کی چمک

جھیل کے پانی میں روشن ہیں کنول

ایک روشن صبح جیسی تیری آنکھیں

تیری آنکھوں میں چمکتے میرے عکس

تیری آنکھوں میں چمکتی گہری جھیل

عکس میرے جھیل پر ہنستے کنول

تیری پلکیں ہیں مرے دستِ دعا

عالموں کے رب سے مانگیں اے خدا !

جھیل کی تہہ کو سنبھال

صبح تیری بے مثال

روک دے وقتِ زوال !

۔۔۔۔۔۔۔۔۔۔۔۔۔

 

 

 

 

گنگا بہتی ہے

 

روشن اور سفید ہمالہ کی اجلی برف پگھلتی ہے

گنگا بہتی ہے ،یگ یگ سے

گنگا شیریں اور مطہّر پانی

ساگر کے منہ میں ڈال رہی ہے ،ساگر میں

اک گھونٹ نہیں انساں کے لئے

یگ یگ سے ساگر انسانوں کو پال رہی دھرتی کے

چاروں اور کھڑا ہے

ہر بوند میں اس کے زہر بھرا ہے

زہر کے قطروں سے جنمے ساگر کے بیٹوں نے

اب دھرتی کو گھیر لیا ہے

وقت کڑا ہے پھر بھی

روشن اور سفید ہمالہ کی اجلی برف پگھلتی ہے

گنگا بہتی ہے !

۔۔۔۔۔۔۔۔۔۔۔۔۔

 

 

 

آخری سانسیں

 

اک عمر کی تلاش کے بعد

یکایک وہ سامنے آگیا ہے

یہ میر ا میں ہے

اپنی نمود کا یہ منظر

کیسا تحیّر خیز نشاط انگیز ہے

روح کی چادر کے سب کانٹے نکل گئے

پاؤں  راستوں کے جبر سے آزاد ہیں

 

میں اپنے سمندروں میں ،اپنی کشتی کھے رہا ہوں

اپنی سانسیں مار رہا ہوں !

 

……………………………..

ٹائپنگ: محمد اسداللہ

تصحیح کتابت اور ای بک،  اعجاز عبید

مصنف کی اجازت سے