پسندیدہ کتابوں میں شامل کریں

 

 

لہو میں تر

کچھ اضافے کے ساتھ

 

                شکیب جلالی

 

جمع و ترتیب: اعجاز عبید

 

 

 

آ کر گرا تھا ایک پرندہ لہو میں تر

تصویر اپنی چھوڑ گیا ہے چٹان پر

 

 

غزلیں

 

 

کیا کہیے کہ اب اس کی صدا تک نہیں آتی

اونچی ہوں فصیلیں تو ہوا تک نہیں آتی

 

شاید ہی کوئی آ سکے اس موڑ سے آگے

اس موڑ سے آگے تو قضا تک نہیں آتی

 

وہ گل نہ رہے نکبتِ گُل خاک ملے گی

یہ سوچ کے گلشن میں صبا تک نہیں آتی

 

اس شورِ تلاطم میں کوئی کس کو پکارے

کانوں میں یہاں اپنی صدا تک نہیں آتی

 

خوددار ہوں کیوں آؤں درِ اہلِ کرم پر

کھیتی کبھی خود چل کے گھٹا تک نہیں آتی

 

اس دشت میں قدموں کے نشاں ڈھونڈ رہے ہو

پیڑوں سے جہاں چھن کے ضیا تک نہیں آتی

 

یا جاتے ہوئے مجھ سے لپٹ جاتی تھیں شاخیں

یا میرے بلانے سے صبا تک نہیں آتی

 

کیا خشک ہوا روشنیوں کا وہ سمندر

اب کوئی کرن آبلہ پا تک نہیں آتی

 

چھپ چھپ کے سدا جھانکتی ہیں خلوتِ گل میں

مہتاب کی کرنوں کو حیا تک نہیں آتی

 

یہ کون بتائے عدم آباد ہے کیسا

ٹوٹی ہوئی قبروں سےصدا تک نہیں آتی

 

بہتر ہے پلٹ جاؤ سیہ خانۂ غم سے

اس سرد گُپھا میں تو ہوا تک نہیں آتی

٭٭٭

 

 

 

 

 

جب تک غمِ جہاں کے حوالے ہوئے نہیں

ہم زندگی کے جاننے والے ہوئے نہیں

 

کہتا ہے آفتاب ذرا دیکھنا کہ ہم

ڈوبے تھے گہری رات میں، کالے ہوئے نہیں

 

چلتے ہو سینہ تان کے دھرتی پہ کس لیے

تم آسماں تو سر پہ سنبھالے ہوئے نہیں

 

انمول وہ گہر ہیں جہاں کی نگاہ میں

دریا کی جو تہوں سے نکالے ہوئے نہیں

 

طے کی ہے ہم نے صورتِ مہتاب راہِ شب

طولِ سفر سے پاؤں میں چھالے ہوئے نہیں

 

ڈس لیں تو ان کے زہر کا آسان ہے اُتار

یہ سانپ آستین کے پالے ہوئے نہیں

 

تیشے کا کام ریشۂ گُل سے لیا شکیبؔ

ہم سے پہاڑ کاٹنے والے ہوئے نہیں

٭٭٭

 

 

 

 

کچھ دن اگر یہی رہا دیوار و در کا رنگ

دیوار و در پہ دیکھنا خونِ جگر کا رنگ

 

بھولا نہیں ہوں مقتلِ امید کا سماں

تحلیل ہو رہا تھا شفق میں سحر کا رنگ

 

دنیا غریقِ شعبدۂ جام جم ہوئی

دیکھے گا کون خونِ دلِ کو زہ گر کا رنگ

 

الجھتے ہوئے دھوئیں کی فضا میں ہے اک لکیر

کیا پوچھتے ہو شمع سرِ رہ گزر کا رنگ

 

دامانِ فصل گل پہ خزاں کی لگی ہے چھاپ

ذوقِ نظر پہ بار ہے برگ و ثمر کا رنگ

 

جمنے لگی شکیبؔ جو پلکوں پہ گردِ شب

آنکھوں میں پھیلنے لگا خوابِ سحر کا رنگ

٭٭٭

 

 

 

 

 

 

 

 

ہر ایک بات ہے منّت کشِ زباں لوگو

نہیں ہے کوئی بھی اپنا مزاج داں لوگو

 

کچھ اس طرح وہ حقائق کو سن کے چونک اٹھے

بکھر گئیں سرِ محفل پہیلیاں لوگو

 

مرے لبوں سے کوئی بات بھی نہیں نکلی

مگر تراش ،کیں تم نے کہانیاں لوگو

 

بہارِ نو بھی انھیں پھر سجا نہیں سکتی

بکھر گئی ہیں جو پھولوں کی پتّیاں لوگو

 

بڑا زمانہ ہوا آشیاں کو راکھ ہوئے

مگر نگاہ ہے اب تک دھواں دھواں لوگو

 

خطا معاف کہ مے سے شکیبؔ منکر ہے

اسے عزیز ہیں دنیا کی تلخیاں لوگو

٭٭٭

 

 

 

 

 

یہ جلوہ گاہِ ناز تماشائیوں سے ہے

رونق جہاں کی انجمن آرائیوں سے ہے

 

روتے ہیں دل کے زخم تو ہنستا نہیں کوئی

اتنا تو فائدہ مجھے تنہائیوں سے ہے

 

دیوانۂ حیات کو اک شغل چاہئیے

نادانیوں سے کام نہ دانائیوں سے ہے

 

قیدِ بیاں میں آئے جو ناگفتنی نہ ہو

وہ رابطہ جو قلب کی گہرائیوں سے  ہے

 

نادِم نہیں ہوں داغِ فرو مائیگی پہ میں

تیرا بھرم بھی میری جبیں سائیوں سے ہے

٭٭٭

 

 

 

 

 

وہ دوریوں کا رہِ آب پر نشان کھلا

وہ رینگنے لگی کشتی وہ بادبان کھلا

 

مرے ہی کان میں سرگوشیاں سکوت نے کیں

مرے سوا کبھی کس سے یہ بے زبان کھلا

 

سمجھ رہا تھا ستارے جنہیں وہ آنکھیں ہیں

مری طرف نگران ہیں کئی جہان کھلا

 

مرا خزانہ ہے محفوظ میرے سینے میں

میں سو رہوں گا یونہی چھوڑ کر مکان کھلا

 

ہر آن میرا نیا رنگ ہے نیا چہرہ

وہ بھید ہوں جو کسی سے نہ میری جان کھلا

 

جزا کہیں کہ سزر اس کو بال و پر والے

زمیں سکڑتی  گئی، جتنا آسمان کھلا

 

لہو لہو ہوں سلاخوں سے سر کو ٹکرا کر

شکیبؔ بابِ قفس کیا کہوں کس آن کھلا

٭٭٭

 

 

 

 

 

دل میں لرزاں ہے ترا شعلۂ رخسار اب تک

میری منزل میں نہیں رات کے آثار اب تک

 

پھول مُرجھا گئے، گُلدان بھی گِر کر ٹوٹا

کیسی خوشبو میں بسے ہیں در و دیوار اب تک

 

حسرتِ دادِ نہاں ہے مرے دل میں شاید

یاد آتی ہے مجھے قامتِ دلدار اب تک

 

وہ اُجالے کا کوئی سیلِ رواں تھا، کیا تھا؟

میری آنکھوں میں ہے اک ساعتِ دیدار اب تک

 

تیشۂ غم سے ہوئی روح تو ٹکڑے ٹکڑے

کیوں سلامت ہے مرے جسم کی دیوار اب تک

٭٭٭

 

 

 

 

 

وہاں کی روشنیوں نے بھی ظلم ڈھائے بہت

میں اس گلی میں اکیلا تھا اور سائےبہت

 

کسی کے سر پہ کبھی ٹوٹ کرا گرا ہی نہیں

اس آسماں نے ہوا میں قدم جمائے بہت

 

نہ جانے رت کا تصرف تھا یا نظر کا فریب

کلی وہی تھی مگر رنگ جھلملائے بہت

 

ہوا کا رخ ہی اچانک بدل گیا ورنہ

مہک کے قافلے صحرا کی سمت آئے بہت

 

یہ کائنات ہے میری ہی خاک کا ذرہ

میں اپنے دشت سے گزارا تو بھید پائے بہت

 

جو موتیوں کی طلب نے کبھی اداس کیا

تو ہم بھی راہ سے کنکر سمیٹ لائے بہت

 

بس ایک رات ٹھہرنا ہے کیا گلہ کیجے

مسافروں کو غنیمت ہے یہ سرائے بہت

 

جمی رہے گی نگاہوں پہ تیرگی دن بھر

کہ رات خواب میں تارے اُتر کے آئے بہت

 

شکیبؔ کیسی اُڑان، اب وہ پر ہی ٹوٹ گئے

کہ زیرِ دام جب آئے تھے، پھڑپھڑائے بہت

٭٭٭

 

 

 

 

 

دشت و صحرا اگر بسائے ہیں

ہم گلستاں میں کب سمائے ہیں

 

آپ نغموں کے منتظر ہوں گے

ہم تو فریاد لے کے آئے ہیں

 

ایک اپنا دیا جلانے کو

تم نے لاکھوں دئے بجھائے ہیں

 

کیا نظر آئے گا ابھی ہم کو

یک بیک روشنی سے آئے ہیں

 

یوں تو سارا چمن ہمارا ہے

پھول جتنے بھی ہیں پرائے ہیں

٭٭٭

 

 

 

 

اتر گیا تن نازک سے پتیوں کا لباس

کسی کے ہاتھ نہ آئی مگر گلاب کی باس

 

اب اپنے جسم کے سائے میں تھک کے بیٹھ رہو

کہیں درخت نہیں راستے میں دور نہ پاس

 

ہزار رنگ کی ظلمت میں لے گئی مجھ کو

بس اک چراغ کی خواہش بس اک شرار کی آس

 

تمہارے کام نہ آئے گا جو بھی دانا ہے

ہر ایک شخص پہ کیوں کر رہے ہو اپنا قیاس

 

کسی کی آس تو ٹوٹی کوئی تو ہار گیا

کہ نیم باز دریچوں میں روشنی ہے اداس

 

وہ کالے کو کی دوری اب ایک خواب سی ہے

تم آ گئے ہو مگر کب نہ تھے ہمارے پاس

 

یہ کیا طلسم ہے، جب سے کنارِ دریا ہوں

شکیبؔ اور بھی کچھ بڑھ گئی یے روح کی پیاس

٭٭٭

 

 

 

 

پاس رہ کر بھی بہت دور ہیں دوست

اپنے حالات سے مجبور ہیں دوست

 

ترکِ الفت بھی نہیں کر سکتے

ساتھ دینے سے بھی معذور ہیں دوست

 

گفتگو کے لئے عنواں بھی نہیں

بات کرنے پہ بھی مجبور ہیں دوست

 

یہ چراغ اپنے لیے رہنے دو

تیری راتیں بھی تو بے نور ہیں دوست

 

سبھی پژ مردہ ہیں محفل میں شکیبؔ

میں پریشان ہوں رنجور ہیں دوست

٭٭٭

 

 

 

 

 

موج غم اس لئے شاید نہیں گزری سر سے

میں جو ڈوبا تو نہ ابھروں گا کبھی ساگر سے

 

اور دنیا سے بھلائی کا صلہ کیا ملتا

آئنہ میں نے دکھایا تھا کہ پتھر برسے

 

کتنی گم سم مرے آنگن سے صبا گزری ہے

اک شرر بھی نہ اڑا روح کی خاکستر سے

 

پیار کی جو سے گھر گھر ہے چراغاں ورنہ

اک بھی شمع نہ روشن ہو ہوا کے ڈر سے

 

اڑتے بادل کے تعاقب میں پھرو گے کب تک

درد کی دھوپ میں نکلا نہیں کرتے گھر سے

 

کتنی رعنائیاں آباد ہیں میرے دل میں

اک خرابہ نظر آتا ہے مگر باہر سے

 

وادیِ خواب میں اس گل کا گزر کیوں نہ ہوا

رات بھر آتی رہی جس کی مہک بستر سے

 

طعنِ اغیار سنیں آپ خموشی سے شکیبؔ

خود پلٹ جاتی ہے ٹکرا کے صدا پتھر سے

٭٭٭

 

 

 

 

 

غمِ دل حیطۂ تحریر میں آتا ہی نہیں

جو کناروں میں سمٹ جائے وہ دریا ہی نہیں

 

اوس کی بوندوں میں بکھرا ہوا منظر جیسے

سب کا اس دور میں یہ حال ہے، میرا ہی نہیں

 

برق کیوں ان کو جلانے پہ کمر بستہ ہے

مَیں تو چھاؤں میں کسی پیڑ کے بیٹھا ہی نہیں

 

اک کرن تھام کے میں دھوپ نگر تک پہنچا

کون سا عرش ہے جس کا کوئی زینا ہی نہیں

 

کوئی بھولا ہوا چہرہ نظر آئے شاید

آئینہ غور سے تو نے کبھی دیکھا ہی نہیں

 

بوجھ لمحوں کا ہر اک سر پہ اُٹھائے گزرا

کوئی اس شہر میں سُستانے کو ٹھہرا ہی نہیں

 

سایہ کیوں جل کے ہوا خاک تجھے کیا معلوم

تو کبھی آگ کے دریاؤں میں اترا ہی نہیں

 

موتی کیا کیا نہ پڑے ہیں تہِ دریا لیکن

برف لہروں کی کوئی توڑنے والا ہی نہیں

 

اس کے پردوں پہ منقش تری آواز بھی ہے

خانۂ  دل میں فقط تیرا سراپا ہی نہیں

 

حائلِ راہ تھے کتنے ہی ہوا کے پر بت

تو وہ بادل کہ مرے شہر سے گزرا ہی نہیں

 

یاد کے دائرے کیوں پھیلتے جاتے ہیں شکیبؔ

اس نے تالاب میں کنکر ابھی پھینکا ہی نہیں

٭٭٭

 

 

 

 

غمِ الفت مرے چہرے سے عیاں کیوں نہ ہوا

آگ جب دل میں سلگتی تھی، دھواں کیوں نہ ہوا

 

سیلِ غم رکتا نہیں ضبط کی دیواروں سے

جوشِ گریہ تھا تو میں گریہ کناں کیوں نہ ہوا

 

کہتے ہیں حسن خد و خال کا پابند نہیں

ہر حسیں شے پہ مجھے تیرا گماں کیوں نہ ہوا

 

دشت بھی اس کے مکیں، شہر بھی اس سے آباد

تو جہاں آن بسے، دل وہ مکاں کیوں نہ ہوا

 

۔۔ق۔۔۔

تو وہی ہے جو مرے دل میں چھپا بیٹھا ہے

اک یہی راز کبھی مجھ پہ عیاں کیوں نہ ہوا

یہ سمجھتے ہوئے مقصودِ نظر ہے تو ہی

میں ترے حسن کی جانب نگراں کیوں نہ ہوا

 

اس سے پہلے کہ ترے لمس کی خوشبو کھو جائے

تجھ کو پا لینے کا ارمان جواں کیوں نہ ہوا

 

تپتے صحرا تو مری منزلِ مقصود نہ تھے

میں کہیں ہم سفرِ ابرِ رواں کیوں نہ ہوا

 

اجنبی پر تو یہاں لطف سوا ہوتا ہے

میں بھی اس شہر میں بے نام و نشاں کیوں نہ ہوا

 

نارسائی تھی مرے شوق کا حاصل تو شکیبؔ

حائلِ راہ کوئی سنگِ گراں کیوں نہ ہوا

٭٭٭

 

 

 

جو بھی ہے طالبِ یک ذرّہ، اُسے صحرا دے

مجھ پہ مائل بہ کرم ہے تو مجھے دریا دے

 

کب سے ہوں حسرتی، یک نگہِ گرم، کہ جو

محفلِ شوق کے آداب مجھے سمجھا دے

 

رختِ جاں کوئی لٹانے اِدھر آ بھی نہ سکے

ایسے مشکل تو نہیں دشتِ وفا کے جادے

 

بیتی یادوں کا تقاضا تو بجا ہے لیکن

گردشِ شام و سھر کیسے کوئی ٹھہرا دے

 

مجھ کو زنداں میں بھی مل جائے گا عنوانِ جنوں

نگہتِ گُل کو کریں قید خیاباں زادے

٭٭٭

 

 

 

 

 

جہاں تلک بھی یہ صحرا دکھائی دیتا ہے

مری طرح سے اکیلا دکھائی دیتا ہے

 

نہ اتنی تیز چلے سر پھری ہوا سے کہو

شجر پہ ایک ہی پتّا دکھائی دیتا ہے

 

برا نہ مانیے لوگوں کی عیب جوئی کا

انھیں تو دن کو بھی سایا دکھائی دیتا ہے

 

یہ ایک ابر کا ٹکڑا کہاں کہاں برسے

تمام دشت ہی پیاسا دکھائی دیتا ہے

 

وہیں پہنچ کے گرائیں گے بادباں اپنے

وہ دور کوئی جزیرا دکھائی دیتا ہے

 

وہ الوداع کا منظر، وہ بھیگتی پلکیں

پسِ غبار بھی کیا کیا دکھائی دیتا ہے

 

مری نگاہ سے چھپ کر کہاں رہے گا کوئی

کہ اب تو سنگ بھی شیشہ دکھائی دیتا ہے

 

سمٹ کے رہ گئے آخر پہاڑ سے قدم بھی

زمیں سے ہر کوئی اونچا دکھائی دیتا ہے

 

کھلی ہے دل میں کسی کے بدن کی دھوپ شکیبؔ

ہر ایک پھول سنہرا دکھائی دیتا ہے

٭٭٭

 

 

 

 

مانندِ صبا جدھر گئے ہم

کلیوں کو نہال کر گئے ہم

 

زنجیر بپا اگر گئے ہم

نغموں کی طرح بکھر گئے ہم

 

سورج کی کرن تھے جانے کیا تھے

ظلمت میں اُتر اُتر گئے ہم

 

جب بھی کوئی سنگِ راہ دیکھا

طوفاں کی طرح بپھر گئے ہم

 

چلنا تھا جہاں محال یارو

اس راہ سے بھی گزر گئے ہم

 

بن جائیں گی منزلیں وہیں پر

بھولے سے جہاں ٹھہر گئے ہم

 

ہنس ہنس کے گلے ملے قضا سے

تکمیلِ حیات کر گئے ہم

٭٭٭

 

 

 

 

 

ہم ہیں آج پھر ملول یارو

مرجھا گئے کھِل کے پھول یارو

 

گزرے ہیں خزاں نصیب ادھر سے

پیڑوں پہ جمی ہے دھول یارو

 

تا حدِّ خیال  لالہ و گُل

تا حدِّ نظر ببول یارو

 

جب تک کہ ہوس رہی گُلوں کی

کانٹے بھی رہے  قبول یارو

 

ہاں کوئی خطا نہیں تمھاری

ہاں ہم سے ہوئی ہے بھول یارو

٭٭٭

 

 

 

 

 

کوئی دیکھے تو سہی یار طرح دار کا شہر

میری آنکھوں میں سجا ہے لب و رخسار کا شہر

 

دشت احساس میں شعلہ سا کوئی لپکا تھا

اسی بنیاد پہ تعمیر ہوا پیار کا شہر

 

اس کی ہر بات میں ہوتا ہے کسی بھید کا رنگ

وہ طلسمات کا پیکر ہے کہ اسرار کا شہر

 

میری نظروں میں چراغاں کا سماں رہتا ہے

میں کہیں جاؤں مرے ساتھ ہے دلدار کا شہر

 

یوں تری گرم نگاہی سے پگھلتے دیکھا

جس طرح کانچ کا گھر ہو مرے پندار کا شہر

 

دل کا آفاق سمٹتا ہی چلا جاتا ہے

اور پھیلے گا کہاں تک در و دیوار کا شہر

 

مسکراتے رہیں سینے کے دہکتے ہوئے داغ

دائم آباد رہے درد کی سرکار کا شہر

٭٭٭

 

 

 

 

 

 

خموشی بول اٹھے، ہر نظر پیغام ہو جائے

یہ سناٹا اگر حد سے بڑھے کہرام ہو جائے

 

ستارے مشعلیں لے کر مجھ بھی ڈھونڈنے نکلیں

میں رستہ بھول جاؤں، جنگلوں میں شام ہو جائے

 

میں وہ آدم گزیدہ ہوں جو تنہائی کے صحرا میں

خود اپنی چاپ سن کر لرز بر اندام ہو جائے

 

مثال ایسی ہے اس دورِ خرد کے ہوش مندوں کی

نہ ہو دامن میں ذرّہ اور صحرا نام ہو جائے

 

شکیبؔ اپنے تعارف کیلئے یہ بات کافی ہے

ہم اس سے بچ کے چلتے ہیں جو رستہ عام ہو جائے

٭٭٭

 

 

 

 

دیکھتی رہ گئی محرابِ حرم

ہائے انسان کی انگڑائی کا خم

 

جب بھی اوہام مقابل آئے

مثلِ شمشیر چلی نوکِ قلم

 

پرِ پرواز پہ یہ راز کھُلا

پستیوں سے تھا بلندی کا بھرم

 

غم کی دیوار گری تھی جن پر

ہم وہ لوگ ہیں اے قصرِ اِرم

 

چاندنی غازۂ پائے جولاں

کہکشاں جادۂ ابنِ آدم

 

ایک تارہ بھی نہ پامال ہوا

ایسے گزرے رہِ افلاک سے ہم

٭٭٭

 

 

 

 

باقی ہے یہی ایک نشاں موسمِ گل کا

جاری رہے گلشن میں بیاں موسمِ گل کا

 

جب پھول مرے چاکِ گریباں پہ ہنسے تھے

لمحہ وہی گزرا ہے گراں موسمِ گل کا

 

نادان گھٹاؤں کے طلب گار ہوئے ہیں

شعلوں کو بنا کر نگَراں موسمِ گل کا

 

سوکھے ہوئے پتّوں کے جہاں ڈھیر ملے ہیں

دیکھا تھا وہیں سیلِ رواں موسمِ گل کا

٭٭٭

 

 

 

 

دنیا والوں نے چاہت کا مجھ کو صلا انمول دیا

پیروں میں زنجیریں دالیں ہاتھوں میں کشکول دیا

 

اتنا گہرا رنگ کہاں تھا رات کے میلے آنچل کا

یہ کس نے رو رو کے گگن میں اپنا کاجل گھول دیا

 

یہ کیا کم ہے اس نے بخشا ایک مہکتا درد مجھے

وہ بھی ہیں جن کو بس رنگوں کا اک چمکیلا خول دیا

 

مجھ سا بے مایہ اپنوں کی اور تو کیا خاطر کرتا

جب بھی ستم کا پیکاں آیا، میں نے سینہ کھول دیا

 

بیتے لمحے دھیان میں آ کر مجھ سے سوالی ہوتے ہیں

تو نے کس بنجر مٹّی میں من کا امرت ڈول دیا

 

اشکوں کی اُجلی کلیاں ہوں یا سپنوں کے کندن پھول

الفت کی میزان میں میں نے جو تھا سب کچھ تول دیا

٭٭٭

 

 

 

 

برگِ دل کی طرح ہے زرد ہَوا

پھانکتی ہے کہاں کی گرد ہَوا

 

دل میں یادوں کا زہر گھول دیا

کتنی قاتل ہے بن کی سرد ہَوا

 

روز لاتی ہے ان کہے پیغام

شہرِ خوباں سے کوچہ گرد ہَوا

 

۔۔۔ق۔۔۔۔

 

دَم نہ مارے مری طرح جو سہے

اس زمانے کے گرم و سرد ہَوا

 

میں ہوں شعلہ بجاں، چراغ بدست

کس خلا کی ہے رہ نورد ہَوا

٭٭٭

 

 

 

 

 

جلتے صحراؤں میں پھیلا ہوتا

کاش میں پیڑوں کا سایہ ہوتا

 

تو جو اس راہ سے گزرا ہوتا

تیرا ملبوس بھی کالا ہوتا

 

میں گھٹا ہوں، نہ پَون ہوں، نہ چراغ

ہم نشیں میرا کوئی کیا ہوتا

 

زخم عریاں تو نہ دیکھے کوئی

میں نے کچھ بھیس ہی بدلا ہوتا

 

کیوں سفینے میں چھپاتا دریا

گر تجھے پار اترنا ہوتا

 

بن میں بھی ساتھ گئے ہیں سائے

میں کسی جا تو اکیلا ہوتا

 

مجھ سے شفّاف ہے سینہ کس کا

چاند اس جھیل میں اترا ہوتا

 

اور بھی ٹوٹ کے آتی تری یاد

میں جو کچھ دن تجھے بھولا ہوتا

 

راکھ کر دیتے جلا کر شعلے

یہ دھواں دل میں نہ پھیلا ہوتا

 

کچھ تو آتا مری باتوں کا جواب

یہ کنواں اور جو گہرا ہوتا

 

نہ بکھرتا جو فضا میں نغمہ

سینۂ نَے میں تڑپتا ہوتا

 

اور کچھ دور تو چلتے مرے ساتھ

اور اک موڑ تو کاٹا ہوتا

 

تھی مقدّر میں خزاں ہی تو شکیبؔ

میں کسی دشت میں مہکا ہوتا

٭٭٭

 

 

 

 

یادیں ہیں اپنے شہر کی اہل سفر کے ساتھ

صحرا میں لوگ آئے ہیں دیوار و در کے ساتھ

 

منظر کو دیکھ کر پس منظر بھی دیکھئے

بستی نئی بسی ہے پرانے کھنڈر کے ساتھ

 

سائے میں جان پڑ گئی دیکھا جو غور سے

مخصوص یہ کمال ہے اہلِ نظر کے ساتھ

 

اک دن ملا تھا بام پہ سورج کہیں جسے

الجھے ہیں اب بھی دھوپ کے ڈورے کگر کےساتھ

 

اک یاد ہے کہ دامنِ دل چھوڑتی نہیں

اک بیل ہے کہ لپٹی ہوئی ہے شجر کے ساتھ

 

اس مرحلے کو موت بھی کہتے ہیں دوستو

اک پل میں ٹوٹ جائیں جہاں عمر بھر کے ساتھ

 

میری طرح یہ صبح بھی فنکار ہے شکیبؔ

لکھتی ہے آسماں پہ غزل آب زر کے ساتھ

٭٭٭

 

 

 

 

دستکیں دیتی ہیں شب کو درِ دل پر یادیں

کچھ نہیں ہے مگر اس گھر کا مقدّر یادیں

 

ڈھونڈھتی ہیں تری مہکی ہوئی زلفوں کی بہار

چاندنی رات کے زینے سے اتر کر یادیں

 

عشرتِ رفتہ کو آواز دیا کرتی ہیں

ہر نئے لمحے کی دہلیز پہ جا کر یادیں

 

رنگ بھرتی ہیں خلاؤں میں ہیولے کیا کیا

پیش کرتی ہیں عجب خواب کا منظر یادیں

 

نہ کسی زلف کا عنبر، نہ گلوں کی خوشبو

کر گئی ہیں مری سانسوں کو معطّر یادیں

 

کم نہیں رات کے صحرا سے مرے دل کی فضا

اور آکاش کے تاروں سے فزوں تر یادیں

 

مشعلِ غم نہ بجھاؤ کہ شکیبؔ اس کے بغیر

راستہ گھر کا بھلا دیتی ہیں اکثر یادیں

٭٭٭

 

 

 

 

 

تیز آندھیوں میں اڑتے پر وبال کی طرح

ہر شے گزشتنی ہے مہ و سال کی طرح

 

کیو ں کر کہوں کہ در پئے آزار ہے وہی

جو آسماں ہے سر پہ مرے ڈھال کی طرح

 

یوں بے سبب تو کوئی انہیں پوجتا نہیں

کچھ تو ہے پتھروں میں خدوخال کی طرح

 

کیا کچھ کیا نہ خود کو چھپانے کے واسطے

عریانیوں کو اوڑھ لیا شال کی طرح

 

اب تک مرا زمین سے رشتہ ہے استوار

رہنِ ستم ہوں سبزۂ پامال کی طرح

 

میں خود ہی جلوہ ریز ہوں، خود ہی نگاہِ شوق

شفاف پانیوں پہ جھکی ڈال کی طرح

 

ہر موڑ پر ملیں گے کئی راہ زن شکیبؔ

چلئیے چھپا کے غم بھی زر و مال کی طرح

٭٭٭

 

 

 

 

 

شاخوں  بھری بہار میں رقص برہنگی

مہکی ہوئی وہ چادرِ گل بار کیا ہوئی

 

بے نغمہ و صدا ہے وہ بت خانۂ خیال

کرتے تھے گفتگو جہاں پتھر کے ہونٹ بھی

 

وہ پھر رہے ہیں زخم بہ پا آج دشت دشت

قدموں میں جن کے شاخِ گلِ تر جھکی رہی

 

یوں بھی بڑھی ہے وسعت ایوانِ رنگ و بو

دیوارِ گلستان درِ زنداں سے جا ملی

 

رعنائیاں چمن کی تو پہلے بھی کم نہ تھیں

اب کے مگر سجائی گئی شاخِ دار بھی

٭٭٭

 

 

 

 

سمجھ سکو تو یہ تشنہ لبی سمندر ہے

بقدرِ ظرف ہر اک آدمی سمندر ہے

 

ابھر کے ڈوب گئی کشتیِ خیال کہیں

یہ چاند ایک بھنور، چاندنی سمندر ہے

 

جو داستاں نہ بنے دردِ بیکراں ہے وہی

جو آنکھ ہی میں رہے وہ نمی سمندر ہے

 

نہ سوچیے تو بہت مختصر ہے سیلِ حیات

جو سوچئے تو یہی زندگی سمندر ہے

 

تو اس میں ڈوب کے شاید ابھر سکے نہ کبھی

مرے حبیب مری خامشی سمندر ہے

٭٭٭

 

 

 

 

 

حسنِ فردا غمِ امروز سے ضَو پائے گا

چاند ڈوبا ہے تو سورج بھی اُبھر آئے گا

 

آندھیوں میں بھی فروزاں ہے چراغِ امّید

خاک ڈالے سے یہ شعلہ کہیں بجھ جائے گا

 

کو بہ کو دام بچھے ہوں کہ کڑکتی ہو کماں

طائرِ دل پرِ پرواز تو پھیلائے گا

 

توڑ کے حلقۂ شب، ڈال کے تاروں پہ کمند

آدمی عرصۂ آفاق پہ چھا جائے گا

 

ہم بھی دو چار قدم چل کے اگر بیٹھ گئے

کون پھر وقت کی رفتار کو ٹھہرائے گا

 

راہ میں جس کی دیا خونِ دل و جاں ہم نے

وہ حسیں دور بھی آئے گا، ضرور آئے گا

٭٭٭

 

 

 

 

اب یہ ویران دن کیسے ہوگا بسر

رات تو کٹ گئی درد کی سیج پر

 

بس یہیں ختم ہے پیار کی رہگزر

دوست اگلا قدم کچھ سمجھ سوچ کر

 

اس کی آوازِ پا تو بڑی بات ہے

ایک پتّہ بھی کھڑکا نہیں رات بھر

 

گھر میں طوفان آئے زمانہ ہوا

اب بھی کانوں میں بجتی ہے زنجیرِ در

 

اپنا دامن بھی اب تو میسّر نہیں

کتنے ارزاں ہوئے آنسوؤں کے گہر

 

یہ شکستہ قدم بھی ترے ساتھ تھے

اے زمانے ٹھہر، اے زمانے ٹھہر

 

اپنے غم پر تبسّم کا پردہ نہ ڈال

دوست، ہم ہیں سوار ایک ہی ناؤ پر

٭٭٭

 

 

 

 

 

روشن ہیں دل کے داغ نہ آنکھوں کے شب چراغ

کیوں شام ہی سے بجھ گئے محفل کے سب چراغ

 

وہ دن نہیں کرن سے کرن میں لگے جو آگ

وہ شب کہاں چراغ سے جلتے تھے جب چراغ

 

تیرہ ہے خاکداں،  تو فلک بے نجوم ہے

لائے کہاں سے مانگ کے دست طلب چراغ

 

روشن ضمیر آج بھی ظلمت نصیب ہیں

تم نے دیے ہیں پوچھ کے نام و نسب چراغ

 

وہ تیرگی ہے دشتِ وفا میں کہ الاماں

چمکے جو موجِ ریگ تو پائے لقب چراغ

 

دن ہو اگر تو رات سےتعبیر کیوں کریں

سورج کو اہلِ ہوش دکھاتے ہیں کب چراغ

 

اے بادِ تند وضع کے پابند ہم بھی ہیں

پتھر کی اوٹ لے کے جلائیں گے اب چراغ

٭٭٭

 

 

 

 

ساحل تمام اشکِ ندامت سے اٹ گیا

دریا سے کوئی شخص تو پیاسا پلٹ گیا

 

لگتا تھا بے کراں مجھے صحرا میں آسماں

پہونچا جو بستیوں میں تو خانوں میں بٹ گیا

 

یا اتنا سخت جان کہ تلوار بے اثر

یا اتنا نرم دل کہ رگِ گل سے کٹ گیا

 

بانہوں میں آ سکا نہ حویلی کا اک ستون

پُتلی میں میری آنکھ کی صحرا سمٹ گیا

 

اب کون جائے کوئے ملامت کو چھوڑ کر

قدموں سے آ کے اپنا ہی سایہ لپٹ گیا

 

گنبد کا کیا قصور اسے کیوں کہوں بُرا

آیا جدھر سے تیر، اُدھر ہی پلٹ گیا

 

رکھتا ہے خود سے کون حریفانہ کشمکش

میں تھا کہ رات اپنے مقابل ہی ڈٹ گیا

 

جس کی اماں میں ہوں وہ ہی اکتا گیا نہ ہو

بوندیں یہ کیوں برستی ہیں، بادل تو چھٹ گیا

 

وہ لمحۂ شعور جسے جانکنی کہیں

چہرے سے زندگی کے نقابیں الٹ گیا

 

ٹھوکر  سے میرا پاؤں تو زخمی ہوا ضرور

رستے میں جو کھڑا تھا وہ کہسار ہٹ گیا

 

اک حشر سا بپا  تھا مرے دل میں اے شکیبؔ

کھولیں جو کھڑکیاں تو ذرا شور گھٹ گیا

٭٭٭

 

 

 

 

 

آتا ہے ہر چڑھائی کے بعد  اک اُتار بھی؟

پستی سے ہم کنار ملے کوہسار بھی؟

 

دل کیوں دھڑکنے لگتا ہے اُبھرے جو کوئی چاپ

اب تو نہیں کسی کا مجھے انتظار بھی!

 

جب بھی سکوتِ شام میں آیا ترا خیال

کچھ دیر کو ٹھہر سا گیا آبشار بھی

 

کچھ ہو گیا ہے دھوپ سے خاکستری بدن

کچھ جم گیا ہے راہ کا مجھ پر غبار بھی

 

اس فاصلوں کے دشت میں رہبر وہی بنے

جس کی نگاہ دیکھ لے صدیوں کے پار بھی

 

اے دوست، پہلے قرب کا نشّہ عجیب تھا

میں سُن سکا نہ اپنے بدن کی پُکار بھی

 

رستہ بھی واپسی کا کہیں بن میں کھو گیا

اوجھل ہوئی نگاہ سے ہرنوں کی ڈار بھی

 

کچھ عقل بھی ہے باعثِ توقیر اے شکیبؔ

کچھ آ گئے ہیں بالوں میں چاندی کے تار بھی

٭٭٭

 

 

 

 

پردۂ شب کی اوٹ میں زہرہ جمال کھو گئے

دل کا کنول بجھا تو شہر تیرہ و تار ہو گئے

 

ایک ہمیں ہی اے سحر نیند نہ آئی رات بھر

زانوئے شب پہ رکھ کر سر، سارے چراغ سو گئے

 

راہ میں تھے ببول بھی رودِ شرر بھی دھول بھی

جانا ہمیں ضرور تھا گل کے طواف کو گئے

 

دیدہ ورو بتائیں کیا تم کو یقیں نہ آئے گا

چہرے تھے جن کے چاند سے سینے میں داغ بو گئے

 

داغِ شکست دوستو دیکھو کسے نصیب ہو

بیٹھے ہوئے ہیں تیز رو سست خرام تو گئے

 

اہلِ جنوں  کے دل شکیبؔ نرم تھے موم کی طرح

تیشۂ  یاس جب چلا تودۂ سنگ ہو گئے

٭٭٭

 

 

 

 

مرجھا کے کالی جھیل میں گرتے ہوئے بھی دیکھ

سورج ہوں، میرا رنگ مگر دن ڈھلے بھی دیکھ

 

ہر چند راکھ ہو کے بکھرنا ہے راہ میں

جلتے ہوئے پروں سے اڑا ہوں مجھے بھی دیکھ

 

عالم میں جس کی دھوم تھی اس شاہکار پر

دیمک نے جو لکھے کبھی وہ تبصرے بھی دیکھ

 

تو نے کہا نہ تھا کہ میں کشتی پہ بوجھ ہوں

آنکھوں کو اب نہ ڈھانپ مجھے ڈوبتے بھی دیکھ

 

بچھتی تھیں جس کی راہ میں پھولوں کی چادریں

اب اس کی خاک گھاس کے پیروں تلے بھی دیکھ

 

کیا شاخ با ثمر ہے جو تکتا ہے فرش کو

نظریں اٹھا شکیبؔ کبھی سامنے بھی دیکھ

٭٭٭

 

 

 

 

میٹھے چشموں سے خنک چھاؤں سے دور

زخم کھلتے ہیں ترے گاؤں سے دور

 

سنگ منزل نے لہو اگلا ہے

دور ہم بادیہ پیماؤں سے دور

 

کتنی شمعیں ہیں اسیر فانوس

کتنے یوسف ہیں زلیخاؤں سے دور

 

کشتِ امید سلگتی ہی رہی

ابر برسا بھی تو صحراؤں سے دور

 

جور حالات بھلا ہو تیرا

چین ملتا ہے شناساؤں سے دور

 

جنت فکر بلاتی ہے چلو

دیر و کعبہ سے کلیساؤں سے دور

 

رقصِ آشفتہ سراں دیکھیں گے

دور ان انجمن آراؤں سے دور

 

جستجو ہے در یکتا کی شکیب

سیپیاں چنتے ہیں دریاؤں سے دور

٭٭٭

 

 

 

 

اس خاکداں میں اب تک باقی ہیں کچھ شرر سے

دامن بچا کے گزرو یادوں کی رہگزر سے

 

ہر ہر قدم پہ آنکھیں تھیں فرشِ راہ لیکن

وہ روشنی کا ہالا اُترا نہ بام پر سے

 

کیوں جادۂ وفا پر مشعل بکف کھڑے ہو

اِس سیلِ تیرگی میں نکلے گا کون گھر سے

 

کس دشت کی صدا ہو، اتنا مجھے بتا دو

ہر سو بچھے ہیں رستے، آؤں تو میں کدھر سے

 

اجڑا ہوا مکاں ہے یہ دل، جہاں پہ ہر شب

پرچھائیاں لپٹ کر روتی ہیں بام و در سے

٭٭٭

 

 

 

 

 

اب میسّر نہیں فرصت کے وہ دن رات ہمیں

لے اُڑی جانے کہاں صرصرِ حالات ہمیں

 

آج وہ یوں نگہِ شوق سے بچ کر گزرے

جیسے یاد آئے کوئی بھولی ہوئی بات ہمیں

 

کیسے اڑتے ہوئے لمحوں کا تعاقب کیجے

دوستو اب تو یہی فکر ہے دن رات ہمیں

 

نہ سہی کوئی، ہجومِ گل و لالہ نہ سہی

دشت سے کم بھی نہیں کنجِ خیالات ہمیں

 

وہ اگر غیر نہ سمجھے تو کوئی بات کریں

دلِ ناداں سے بہت سی ہیں شکایات ہمیں

 

دھوپ کی لہر ہے تُو، سایۂ دیوار ہیں ہم

آج بھی ایک تعلّق ہے ترے سات ہمیں

 

رنگ و مستی کے جزیروں میں لیے پھرتے ہیں

اس کی پائل سے چُرائے ہوئے نغمات ہمیں

٭٭٭

 

 

 

 

 

ہم جنس اگر ملے نہ کوئی آسمان پر

بہتر ہے خاک ڈالیے ایسی اُڑان پر

 

آ کر گرا تھا ایک پرندہ لہو میں تر

تصویر اپنی چھوڑ گیا ہے چٹان پر

 

پوچھو سمندروں سے کبھی خاک کا پتہ

دیکھو ہوا کا نقش کبھی بادبان پر

 

یارو میں اس نظر کی بلندی کو کیا کروں

سایہ بھی اپنا دیکھتا ہوں آسمان پر

 

کتنے ہی زخم  ہی مرے اک زخم میں چھپے

کتنے ہی تیر آنے لگے اِک نشان پر

 

جل تھل ہوئی تمام زمیں آس پاس کی

پانی کی بوند بھی نہ گری سائبان پر

 

ملبوس خوشنما ہیں مگر جسم کھوکھلے

چھلکے سجے ہوں جیسے پھلوں کی دکان پر

 

سایہ نہیں تھا نیند کا آنکھوں میں دور تک

بکھرے تھے روشنی کے نگیں آسمان پر

 

حق بات آ کے رک سی گئی تھی کبھی شکیبؔ

چھالے پڑے ہوئے ہیں ابھی تک زبان پر

٭٭٭

 

 

 

جس قدر خود کو وہ چھپاتے ہیں

لوگ گرویدہ ہوتے جاتے ہیں

 

جو بھی ہمدرد بن کے آتے ہیں

غم کا احساس ہی جگاتے ہیں

 

عہدِ ماضی کے زر فِشاں لمحے

شِدّتِ غم میں مسکراتے ہیں

 

خود کو بدنام کر رہا ہوں میں

ان پہ الزام آئے جاتے ہیں

 

اجنبی بن کے جی رہا ہوں میں

لوگ مانوس ہوتے جاتے ہیں

٭٭٭

 

 

 

 

آئینۂ جذباتِ نہاں ہیں تری آنکھیں

اک کار گہِ شیشہ گراں ہیں تری آنکھیں

 

سر چشمۂ افکار جواں ہیں تری آنکھیں

تابندہ خیالات کی جاں ہیں تری آنکھیں

 

اندازِ خموشی میں ہے گفتار کا پہلو

گویا نہ سہی، چپ بھی کہاں ہیں تری آنکھیں

 

جاؤں گا کہاں توڑ کے زنجیرِ وفا کو

ہر سو مری جانب نگراں ہیں تری آنکھیں

کہنا ہے وہی جس کی توقع ہے تجھے بھی

مت پوچھ مرے دل کی زباں ہیں تری آنکھیں

 

پلکوں کے جھروکوں سے سبو جھانک رہے ہیں

امید گہِ تشنہ لباں ہیں تری آنکھیں

 

یوں ہی تو نہیں امڈی چلی آتی ہیں غزلیں

پہلو میں مرے، زمزمہ خواں ہیں تری آنکھیں

٭٭٭

 

 

 

 

موجِ صبا رواں ہوئی، رقصِ جنوں بھی چاہئے

خیمۂ گُل کے پاس ہی دجلۂ خوں بھی چاہئے

 

کشمکشِ حیات ہے، سادہ دلوں کی بات ہے

خواہشِ مرگ بھی نہیں، زہرِ سکوں بھی چاہئے

 

ضربِ خیال سے کہاں ٹوٹ سکیں گی بیڑیاں

فکرِ چمن کے ہم رکاب جوشِ جنوں بھی چاہئے

 

نغمۂ شوق خوب تھا، ایک کمی ہے مطربہ

شعلۂ لب کی خیر ہو، سوزِ دروں بھی چاہئے

 

اتنا کم تو کیجیے، بجھتا کنول نہ دیجیے

زخمِ جگر کے ساتھ ہی دردِ فزوں بھی چاہئے

 

دیکھیے ہم کو غور سے، پوچھیے اہلِ جور سے

روحِ جمیل کے لیے حالِ زبوں بھی چاہئے

٭٭٭

 

 

 

 

 

خزاں کے چاند نے پوچھا یہ جھک کے کھڑکی میں

کبھی چراغ بھی چلتا ہے اس حویلی میں

 

یہ آدمی ہیں کہ سائے ہیں آدمیت کے

گزر ہوا ہے مرا کس اجاڑ بستی میں

 

جھکی چٹان پھسلتی گرفت جھولتا جسم

میں اب گرا ہی گرا تنگ و تار گھاٹی میں

 

زمانے بھر سے نرالی ہے آپ کی منطق

ندی کو پار کیا کس نے الٹی کشتی میں

 

جلائے کیوں اگر اتنے ہی قیمتی تھے خطوط

کریدتے ہو عبث راکھ اب انگیٹھی میں

 

عجب نہیں جو اگیں یاں درخت پانی کے

کہ اشک بوئے ہیں شب بھر کسی نہ دھرتی میں

 

مری گرفت میں آ کر نکل گئی تتلی

پروں کے رنگ مگر رہ گئے ہیں مٹھی میں

 

چلو گے ساتھ مرے آگہی کی سرحد تک؟

یہ رہ گزر اترتی ہے گہرے پانی میں

 

میں اپنی بے خبری سے شکیب واقف ہوں

بتاؤ پیچ ہیں کتنے تمہاری پگڑی میں

٭٭٭

 

 

 

 

 

وہ سامنے تھا پھر بھی کہاں سامنا ہوا

رہتا ہے اپنے نور میں سورج چھپا ہوا

 

اے روشنی کی لہر کبھی تو پلٹ کے آ

تجھ کو بلا رہا ہے دریچہ کھلا ہوا

 

سیراب کس طرح ہو زمیں دور دور کی

ساحل نے ہے ندی کو مقیّد کیا ہوا

 

اے دوست چشمِ شوق نے دیکھا ہے بارہا

بجلی سے تیرا نام گھٹا پر لکھا ہوا

 

پہچانتے نہیں اسے محفل میں دوست بھی

چہرہ ہو جس کا گردِ الم سے اٹا ہوا

 

اس دور میں خلوص کا کیا کام  اے شکیبؔ

کیوں کر چلے بساط پر مہرا پِٹا ہوا

٭٭٭

 

 

 

 

 

کنار آب کھڑا خود سے کہہ رہا ہے کوئی

گماں گزرتا ہے یہ شخص دوسرا ہے کوئی

 

ہوا نے توڑ کے پتہ زمیں پہ پھینکا ہے

کہ شب کی جھیل میں پتھر گرا دیا ہے کوئی

 

بٹا سکے ہیں پڑوسی کسی کا درد کبھی

یہی بہت ہے کہ چہرے سے آشنا ہے کوئی

 

درخت راہ بتائیں ہلا ہلا کر ہاتھ

کہ قافلے سے مسافر بچھڑ گیا ہے کوئی

 

چھڑا کے ہاتھ بہت دور بہہ گیا چاند

کسی کے ساتھ سمندر میں ڈوبتا ہے کوئی

 

یہ آسمان سے ٹوٹا ہوا ستارہ ہے

کہ دشتِ شب میں بھٹکتی ہوئی صدا ہے کوئی

 

مکان اور نہیں ہے بدل گیا ہے مکیں

افق وہ ہی ہے مگر چاند دوسرا ہے کوئی

 

فصیل جسم پہ تازہ لہو کے چھینٹے ہیں

حدود وقت سے آگے نکل گیا ہے کوئی

 

شکیبؔ دیپ سے لہرا رہے ہیں پلکوں پر

دیارِ چشم میں کیا آج رت جگا ہے کوئی

٭٭٭

 

 

 

 

کون جانے کہاں ہے شہرِ سکوں

قریہ قریہ بھٹک رہا ہے جنوں

 

نورِ منزل مجھے نصیب کہاں

میں ابھی حلقۂ غبار میں ہوں

 

یہ ہے تاکید سننے والوں کی

واقعہ خوشگوار ہو تو کہوں

 

کن اندھیروں میں کھو گئی ہے سحر

چاند تاروں پہ مار کر شب خوں

 

تم جسے نورِ صبح کہتے ہو

میں اسےگردِ شام بھی نہ کہوں

 

اب تو خونِ جگر بھی ختم ہوا

میں کہاں تک خلا میں رنگ بھروں

 

جی میں آتا ہے اے رہِ ظلمت

کہکشاں کو مروڑ کر رکھ دوں

٭٭٭

 

 

 

 

کہاں رکیں گے مسافر نئے زمانوں کے

بدل رہا ہے جنوں زاوئے اُڑانوں کے

 

یہ دل کا زخم ہے اک روز بھر ہی جائے گا

شگاف پُر نہیں ہوتے فقط چٹانوں کے

 

چھلک چھلک کے بڑھا میری سمت نیند کا جام

پگھل پگھل کے گرے قفل قید خانوں کے

 

ہوا کے دشت میں تنہائی کا گزر ہی نہیں

مرے رفیق ہیں مُطرِب گئے زمانوں کے

 

کبھی ہمارے نقوشِ قدم کو ترسیں گے

وہی جو آج ستارے ہیں آسمانوں کے

٭٭٭

 

 

 

 

 

میں شاخ سے اڑا تھا ستاروں کی آس میں

مرجھا کے آ گرا ہوں مگر سرد گھاس میں

 

سوچو تو سلوٹوں سے بھری ہے تمام روح

دیکھو تو اک شکن بھی نہیں ہے لباس میں

 

صحرا کی بود باش ہے اچھی نہ کیوں لگے

سوکھی ہوئی گلاب کی ٹہنی گلاس میں

 

چمکے نہیں نظر میں ابھی نقش دور کے

مصروف ہوں ابھی عملِ انعکاس میں

 

دھوکے سے اس حسیں کو اگر چوم بھی لیا

پاؤ گے دل کا زہر لبوں کی مٹھاس میں

 

تارہ کوئی ردائے شبِ ابر میں نہ تھا

بیٹھا تھا میں اداس بیابان یاس میں

 

جوئے روانِ دشت! ابھی سوکھنا نہیں

ساون ہے دور، اور وہی شدّت کی پیاس ہے

 

رہتا تھا سامنے ترا چہرہ کھلا ہوا

پڑھتا تھا میں کتاب یہی ہر کلاس میں

 

کانٹوں کی باڑھ پھاند گیا تھا مگر شکیبؔ

رستہ نہ مل سکا مجھے پھولوں کی باس میں

٭٭٭

 

 

 

 

تارے ہیں نہ ماہتاب یارو

کچھ اس کا بھی سدِّ باب یارو

 

آنکھوں میں چتائیں جل رہی ہیں

ہونٹوں پہ ہے آب آب یارو

 

تا حدِّ خیال ریگ صحرا

تا حدِّ نظر سراب یارو

 

رہبر ہی نہیں ہے ساتھ اپنے

رہزن بھی ہے ہم رکاب یارو

 

شعلے سے جہاں لپک رہے ہیں

برسے گا وہیں سحاب یارو

٭٭٭

 

 

 

 

 

وہی جھکی ہوئی بیلیں، وہی دریچا تھا

مگر وہ پھول سا چہرہ نظر نہ آتا تھا

 

میں لوٹ آیا ہوں خاموشیوں کے صحرا سے

وہاں بھی تیری صدا کا غبار پھیلا تھا

 

قریب تیر رہا تھا بطوں کا ایک جوڑا

میں آب جو کے کنارے اداس بیٹھا تھا

 

شب سفر تھی قبا تیرگی کی پہنے ہوئے

کہیں کہیں پہ کوئی روشنی کا دھبا تھا

 

بنی نہیں جو کہیں پر، کلی کی تربت تھی

سنا نہیں جو کسی نے، ہوا کا نوحہ تھا

 

یہ آڑھی ترچھی لکیریں بنا گیا ہے کون

میں کیا کہوں مرے دل کا ورق تو سادا تھا

 

میں خاکداں سے نکل کر بھی کیا ہوا آزاد

ہر اک طرف سے مجھے آسماں نے گھیرا تھا

 

اُتر گیا ترے دل میں تو شعر کہلایا

میں اپنی گونج تھا اور گنبدوں میں رہتا تھا

 

اِدھر سے بارہا گزرا مگر خبر نہ ہوئی

کہ زیرِ سنگ خُنُک پانیوں کا چشما تھا

 

وہ اس کا عکس بدن تھا کہ چاندنی کا کنول

وہ نیلی جھیل تھی یا آسماں کا ٹکڑا تھا

 

میں ساحلوں میں اترا کر شکیبؔ کیا لیتا

ازل سے نام مرا پانیوں پہ لکھا تھا

٭٭٭

 

 

 

 

 

اتریں عجیب روشنیاں رات خواب میں

کیا کیا نہ عکس تیر رہے تھے سراب میں

 

کب سے ہیں ایک حرف پہ نظریں جمی ہوئی

وہ پڑھ رہا ہوں جو نہیں لکھا کتاب میں

 

پانی نہیں کہ اپنے ہی چہرے کو دیکھ لوں

منظر زمیں کے ڈھونڈتا ہوں ماہتاب میں

 

پھر تیرگی کے خواب سے چونکا ہے راستہ

پھر روشنی سی دوڑ گئی ہے سحاب میں

 

کب تک رہے گا روح پہ پیراہنِ بدن

کب تک ہوا اسیر رہے گی حباب میں

 

یوں آئنہ بدست ملی پربتوں کی برف

شرما کے دھوپ لوٹ آ گئی آفتاب میں

 

جینے کے ساتھ موت کا ہے ڈر لگا ہوا

خشکی دکھائی دی ہے سمندر کو خواب میں

 

گزری ہے بار بار مرے سر سے موجِ خشک

اُبھرا ہوا ہوں ڈوب کے تصویرِ آب میں

 

اک یاد ہے کہ چھین رہی ہے لبوں سے جام

اک عکس ہے کہ کانپ رہا ہے شراب میں

 

چوما ہے میرا نام لبِ سُرخ سے شکیبؔ

یا پھول رکھ دیا ہے کسی نے کتاب میں

٭٭٭

 

 

 

 

 

تمہیں بھی علم ہو اہل وفا پہ کیا گزری

تم اپنے خون جگر سے کبھی وضو تو کرو

 

نہیں ہے ریشم و کمخواب کی قبا نہ سہی

ہمارے دامن صد چاک کو رفو تو کرو

 

نگار صبح گریزاں کی تابشوں کو کبھی

ہمارے خانہ ظلمت کے رو برو تو کرو

 

طلوع مہر درخشاں ابھی کہاں یارو

سیاہیوں کے افق کو لہو لہو تو کرو

٭٭٭

 

 

 

 

شفق جو روئے سحر پر گلال ملنے لگی

یہ بستیوں کی فضا کیوں دھواں اگلنے لگی

 

اسی لئے تو ہوا رو پڑی درختوں میں

ابھی میں کھل نہ سکا تھا کہ رت بدلنے لگی

 

اتر کے ناؤ سے بھی کب سفر تمام ہوا

زمیں پہ پاؤں  دھرا تو زمین چلنے لگی

 

کسی کا جسم اگر چھو لیا خیال میں بھی

تو پور پور مری  مثل شمع جلنے لگی

 

مری نگاہ میں خواہش کا شائبہ بھی نہ تھا

یہ برف سی ترے چہرے پہ کیوں پگھلنے لگی

 

ہوا چلی سرِ صحرا تو یوں لگا جیسے

ردائے شام مرے دوش سے پھسلنے لگی

 

کہیں پڑا نہ ہو پرتَو بہارِ رفتہ کا

یہ سبز بوند سی پلکوں پہ کیا مچلنے لگی

 

نہ جانے کیا کہا اس نے بہت ہی آہستہ

فضا کی ٹھہری ہوئی سانس پھر سے چلنے لگی

 

جو دل کا زہر تھا، کاغذ پہ سب بکھیر دیا

پھر اپنے آپ طبیعت مری سنبھلنے لگی

 

جہاں شجر پہ لگا تھا تبر کا زخم شکیبؔ

وہیں پہ دیکھ لے، کونپل نئی نکلنے لگی

٭٭٭

 

 

 

 

 

ساحل سے دور جب بھی کوئی خواب دیکھتے

جلتے ہوئے چراغ تہِ آب دیکھتے

 

ہم نے فضول چھیڑ دی زخمِ نہاں کی بات

چپ چاپ رنگِ خندۂ احباب دیکھتے

 

غم کی بس ایک موج نے جن کو ڈبو دیا

اے کاش وہ بھی حلقۂ گرداب دیکھتے

 

بیتے دنوں کے زخم کریدے ہیں رات بھر

آئی نہ جن کو نیند وہ کیا خواب دیکھتے

 

کشکولِ شعرِ تر لیے پھرتے نہ ہم شکیبؔ

اس ریشمیں بدن پہ جو کمخواب دیکھتے

 

٭٭٭

 

 

 

 

رعنائیِ نگاہ کو قالب میں ڈھالیے

پتھر کے پیرہن سے سراپا نکالیے

 

گزرا ہے دل سے جو رمِ آہو سا اک خیال

لازم ہے اس کے پاؤں میں زنجیر ڈالئیے

 

دل میں پرائے درد کی اک ٹیس بھی نہیں

تخلیق کی لگن ہے تو زخموں کو پالیے

 

یہ کہر کا ہجوم درِ دل پہ تابہ کے

بامِ یقیں سے ایک نظر اس پہ ڈالیے

 

احساس میں رچائیے قوسِ قزح کے رنگ

ادراک کی کمند ستاروں پہ ڈالیے

 

ہاں کوزہ ہائے گل پہ ہے تنقید کیا ضرور

گرہو سکے تو خاک سے خورشید ڈھالیے

 

امید کی کرن ہو کہیں حسرتوں کے داغ

ہر دم نگار خانۂ  دل کو اجالیے

 

شاید کہ ان کی سمت بڑھے کوئی دستِ شوق

روندے ہوئے گلاب فضا میں اچھالیے

 

ہاں کوہِ شب کو کاٹ کے لانا ہے جوئے نور

ہاں بڑھ کے آفتاب کا تیشہ سنبھالیے

 

وجدان کی ترنگ کا مصرف بھی ہو شکیبؔ

شاعر کی عظمتوں کو ہنسی میں نہ ٹالیے

٭٭٭

 

 

 

 

پھر سن رہا ہوں گزرے زمانے کی چاپ کو

بھولا ہوا تھا دیر سے میں اپنے آپ کو

 

رہتے ہیں کچھ ملول سے چہرے پڑوس میں

اتنا نہ تیز کیجیے ڈھولک کی تھاپ کو

 

اشکوں کی ایک نہر تھی جو خشک ہو گئی

کیوں کر مٹاؤں دل سےترے غم کی چھاپ کو

 

کتنا ہی بے کنار سمندر ہو پھر بھی دوست

رہتا ہے بے قرار ندی کے ملاپ کو

 

پہلے تو میری یاد سے آئی حیا انہیں

پھر آئنے میں چوم لیا اپنے آپ کو

 

تعریف کیا ہو قامت دلدار کی شکیبؔ

تجسیم کر دیا ہے کسی نے الاپ کو

٭٭٭

 

 

 

 

گلے ملا نہ کبھی چاند بخت ایسا تھا

ہرا بھرا بدن اپنا درخت ایسا تھا

 

ستارے سسکیاں بھرتے تھے اوس روتی تھی

فسانۂ جگرِ لخت لخت ایسا تھا

 

ذرا نہ موم ہوا پیار کی حرارت سے

چٹخ کے ٹوٹ گیا، دل کا سخت ایسا تھا

 

یہ اور بات کہ وہ لب تھے پھول سے نازک

کوئی نہ سہہ سکے، لہجہ کرخت ایسا تھا

 

کہاں کی سیس نہ کی توسنِ تخیّل پر

ہمیں تو یہ بھی سلیماں کے تخت ایسا تھا

 

ادھر سے گزرا تھا ملکِ سخن کا شہزادہ

کوئی نہ جان سکا ساز و رخت ایسا تھا

٭٭٭

 

 

 

 

مجھ سے ملنے شب غم اور تو کون آئے گا

میرا سایہ ہے جو دیوار پہ جم جائے گا

 

ٹھہرو ٹھہرو مرے اصنامِ خیالی ٹھہرو

میرا دل گوشۂ تنہائی میں گھبرائے گا

 

لوگ دیتے رہے کیا کیا نہ دلاسے مجھ کو

زخم گہرا ہی سہی، زخم ہے،  بھر جائے گا

 

عزم پختہ ہی سہی ترکِ وفا کا لیکن

منتظر ہوں کوئی آ کر مجھے سمجھائے گا

 

آنکھ جھپکے نہ کہیں، راہ اندھیری ہی سہی

آگے چل کر وہ کسی موڑ پہ مل جائے گا

 

دل سا انمول رتن کون خریدے گا شکیبؔ

جب بکے گا تو یہ بے دام ہی بک جائے گا

٭٭٭

 

 

 

 

ملا نہیں اذان رقص جن کو ،کبھی تو وہ بھی شرار دیکھو

اگر ہو اہلِ نگاہ یارو،  چٹان کے آر پار دیکھو

 

یہ جان لینا وہاں بھی کوئی کسی کی آمد کا منتظر تھا

کسی مکاں کے جو بام و در پر بجھے دیوں کی قطار دیکھو

 

اگر چہ بے خانماں ہیں لیکن ہمارا ملنا نہیں ہے مشکل

اُدھر ہی صحرا میں دوڑ پڑنا، جدھر سے اٹھتا غبار دیکھو

 

عجب نہیں ہے پہاڑیوں پر شفق کا سونا پگھل رہا ہو

مکانِ تیرہ کے روزنوں میں یہ نور کے آبشار دیکھو

 

جو ابرِ  رحمت سے ہو نہ پایا کیا ہے وہ کام آندھیوں نے

نہیں ہے خار و گیاہ باقی، چمک اٹھا رہگزر دیکھو

 

وہ راگ خاموش ہو چکا ہے سنانے والا بھی سو چکا ہے

لرز رہے ہیں مگر ابھی تک شکستہ بربط کے تار دیکھو

 

اک آہ بھرنا شکیبؔ ہم سے خزاں نصیبوں کو یاد کر کے

کلائیوں میں جو ٹہنیوں کی مہکتی کلیوں کے ہار دیکھو

٭٭٭

 

 

 

 

منظر تھا اک اجاڑ نگاہوں کے سامنے

کیا کیا نہ رنگ بھر دئیے افسوس شام نے

 

اس حادثے کی نخوتِ ساقی کو کیا خبر

بادہ پیا کہ زہر پیا تشنہ کام نے

 

چہرے سے اجنبی تھا وہ میرے لئے مگر

سب راز اس کے کہہ دئے طرز خرام نے

 

نکلا نہیں ہوں آج بھی اپنے حصار سے

حدِّ نگاہ آج بھی ہے میرے سامنے

 

تھے حادثوں کے وار تو کاری مگر مجھے

مرنے نہیں دیا خلشِ انتقام نے

 

اک سانس کی طناب جو ٹوٹی تو اے شکیبؔ

دوڑے ہیں لوگ جسم کے خیمے کو تھامنے

٭٭٭

 

 

 

 

اب آپ رہِ دل جو کشادہ نہیں رکھتے

ہم بھی سفرِ جاں کا ارادہ نہیں رکھتے

 

پینا ہو تو اک جرعۂ زہراب بہت ہے

ہم تشنہ دہن تہمتِ بادہ نہیں رکھتے

 

اشکوں سے چراغإں ہے شبِ زیست، سو وہ بھی

کوتاہیِ مژگاں سے زیادہ نہیں رکھتے

 

یہ گردِ رہِ شوق ہی جم جائے بدن پر

رسوا ہیں کہ ہم کوئی لبادہ نہیں رکھتے

 

ہر گام پہ جگنو سا چمکتا ہے جو دل میں

ہم اس کے سوا مشعلِ جادہ نہیں رکھتے

 

سرخی نہیں پھولوں کی تو زخموں کی شفق ہے

دامانِ طلب ہم کبھی سادہ نہیں رکھتے

٭٭٭

 

 

 

 

آگ کے درمیان سے نکلا

میں بھی کس امتحان سے نکلا

 

پھر ہوا سے سلگ اٹھے پتے

پھر دھواں گلستان سے نکلا

 

جب بھی نکلا ستارۂ امید

کہر کے درمیان سے نکلا

 

چاندنی جھانکتی ہے گلیوں میں

کوئی سایہ مکان سے نکلا

 

ایک شعلہ پھر اک دھوئیں کی لکیر

اور کیا خاکدان سے نکلا

 

چاند جس آسمان میں ڈوبا

کب اسی آسمان سے نکلا

 

یہ گہر جس کو آفتاب کہیں

کس اندھیرے کی کان سے نکلا

 

شکر ہے اس نے بے وفائی کی

میں کڑے امتحان سے نکلا

 

لوگ دشمن ہوئے اسی کے شکیبؔ

کام جس مہربان سے نکلا

٭٭٭

 

 

 

 

 

ہوائے شب سے نہ بجھتے ہیں اور نہ جلتے ہیں

کسی کی یاد کے جگنو دھواں اگلتے ہیں

 

شب بہار میں مہتاب کے حسیں سائے

اداس پا کے ہمیں، اور بھی مچلتے ہیں

 

اسیر دام جنوں ہیں، ہمیں رہائی کہاں

یہ رنگ و بو کے قفس اپنے ساتھ چلتے ہیں

 

یہ دل وہ کار گہ مرگ و زیست ہے کہ جہاں

ستارے ڈوبتے ہیں، آفتاب ڈھلتے ہیں

 

خود اپنی آگ سے شاید گزار ہو جائیں

پرائی آگ سے کب سنگ دل پگھلتے ہیں

٭٭٭

 

 

 

 

 

چوٹ ہر گام پہ کھا کر جانا

قُربِ منزل کے لئے مر جانا

 

ہم بھی کیا سادہ نظر رکھتے تھے

سنگ ریزوں کو جواہر جانا

 

مشعلِ درد جو روشن دیکھی

خانۂ دل کو منّور جانا

 

رشتۂ غم کو غمِ جاں سمجھے

زخمِ خنداں کو گلِ تر جانا

 

یہ بھی ہے کارِ نسیمِ سحری

پتّی پتّی کو جدا کر جانا

 

اپنے حق میں وہی تلوار بنا

جسے اک پھول سا پیکر جانا

 

دشمنوں پر کبھی تکیہ کرنا

اپنے سائے سے کبھی ڈر جانا

 

کاسۂ سر کو نہ دی زخم کی بھیک

ہم کو مجنوں سے بھی کم تر جانا

 

اس لیے اور بھی خاموش تھے ہم

اہلِ محفل نے سخن ور جانا

٭٭٭

 

 

 

 

عشق پیشہ نہ رہے داد کے حق دار یہاں

پیش آتے ہیں رعونت سے جفا کار یہاں

 

سر پٹک کر درِ زنداں پہ صبا نے یہ کہا

ہے دریچہ نہ کوئی روزنِ دیوار یہاں

 

عہد و پیمانِ وفا، پیار کے نازک بندھن

توڑ دیتی ہے زر و سیم کی جھنکار یہاں

 

ننگ و ناموس کے بکتے ہوئے انمول رتن

لب و رخسار کے سجتے ہوئے بازار یہاں

 

سرخیِ دامنِ گُل کس کو میسّر آئی

اپنے ہی خوں میں نہائے لب و رخسار یہاں

٭٭٭

 

 

 

 

اس بت کدے میں تو جو حسیں تر لگا مجھے

اپنے ہی اک خیال کا پیکر لگا مجھے

 

جب تک رہی جگر میں لہو کی ذرا سی بوند

مٹھی میں اپنی بند سمندر لگا مجھے

 

مرجھا گیا جو دل میں اجالے کا سُرخ پھول

تاروں بھرا یہ کھیت بھی بنجر لگا مجھے

 

اب یہ بتا کہ روح کے شعلے کا کیا ہے رنگ

مَرمَر کا یہ لباس تو سندر لگا مجھے

 

کیا جانیے کہ اتنی اداسی تھی رات کیوں

مہتاب اپنی قبر کا پتھّر لگا مجھے

 

آنکھوں کو بند کر کے بڑی روشنی ملی

مدھّم تھا جو بھی نقش، اُجاگر لگا مجھے

 

یہ کیا کہ دل کے دیپ کی لَو ہی تراش لی

سورج اگر ہے، کرنوں کی جھالر لگا مجھے

 

صدیوں میں طے ہوا تھا بیاباں کا راستہ

گلشن کو لَوٹتے ہوئے پل بھر لگا مجھے

 

میں نے اسے شریکِ سفر کر لیا شکیبؔ

اپنی طرح سے چاند جو بے گھر لگا مجھے

٭٭٭

 

 

 

کشتیِ زیست سلامت ہے نہ پتوار یہاں

موج در موج ہیں سو رنگ کے منجدھار یہاں

 

ہم سفر چھوٹ گئے، راہنما روٹھ گئے

یوں بھی آسان ہوئی منزلِ دشوار یہاں

 

تیرگی ٹوٹ پڑی، دور سے بادل گرجا

بجھ گئی سہم کے قندیلِ رخِ یار یہاں

 

کتنے طوفان اٹھے، کتنے ستارے ٹوٹے

پھر بھی ڈوبا نہیں اب تک دلِ بیدار  یہاں

 

میرے زخمِ کفِ پا چومنے آئے گی بہار

میں اگر مر بھی گیا وادیِ پُر خار یہاں

٭٭٭

 

 

 

درد کے موسم کا کیا ہوگا اثر انجان پر

دوستو پانی کبھی رکتا نہیں ڈھلوان پر

 

آج تک اس کے تعاقب میں بگولے ہیں رواں

ابر کا ٹکڑا کبھی برسا تھا ریگستان پر

 

میں جو پربت پر چڑھا، وہ اور اونچا ہو گیا

آسماں جھکتا نظر آیا مجھے میدان پر

 

کمرے خالی ہو گئے سایوں سے آنگن بھر گیا

ڈوبتے سورج کی کرنیں جب پڑیں دالان پر

 

اب یہاں کوئی نہیں ہے کس سے باتیں کیجیے

یہ مگر چپ چاپ سی تصویر آتش دان پر

 

آج بھی شاید کوئی پھولوں کا تحفہ بھیج دے

تتلیاں منڈلا رہی ہیں کانچ کے گلدان پر

 

بس چلے تو اپنی عریانی کو اس سے ڈھانپ لوں

نیلی چادر سی تنی ہے جو کھلے میدان پر

 

وہ خموشی انگلیاں چٹخا رہی تھی اے شکیبؔ

یا کہ بوندیں بج رہی تھیں رات روشندان پر

٭٭٭

 

 

 

 

 

تو نے کیا کیا نہ اے زندگی، دشت و در میں پھِرایا مجھے

اب تو اپنے در و بام بھی جانتے ہیں پرایا مجھے

 

اور بھی کچھ بھڑکنے لگا میرے سینے کا آتش کدہ

راس تجھ بن نہ آیا کبھی سبز پیڑوں کا سایا مجھے

 

ان نئی کونپلوں سے مرا کیا کوئی بھی تعلّق نہ تھا؟

شاخ سے توڑ کر، اے صبا!، خاک میں کیوں ملایا مجھے

 

درد کا دیپ جلتا رہا، دل کا سونا پگھلتا رہا

ایک ڈوبے ہوئے چاند نے رات بھر خوں رلایا مجھے

 

اب مرے راستے میں کہیں خوفِ صحرا بھی حائل نہیں

خشک پتّے نے آوارگی کا سلیقہ سکھایا مجھے

 

مدّتوں روئے گُل کی جھلک کو ترستا رہا میں شکیبؔ

ان جو آئی بہار اس نے صحنِ چمن میں نہ پایا مجھے

٭٭٭

 

 

 

 

 

جاتی ہے دھوپ اُجلے پروں کو سمیٹ کے

زخموں کو اب گنوں گا میں بستر پہ لیٹ کے

 

میں ہاتھ کی لکیریں مٹانے پہ ہوں بضِد

گو جانتا ہوں نقش نہیں یہ سلیٹ کے

 

دنیا کو کچھ خبر نہیں کیا حادثہ ہوا

پھینکا تھا اس نے سنگ گلوں میں لپیٹ کے

 

فوّارے کی طرح نہ اُگل دے ہر ایک بات

کم کم  وہ بولتے ہیں جو گہرے ہیں پیٹ کے

 

اک نقرئی کھنک کے سوا کیا ملا شکیبؔ

ٹکڑے یہ مجھ سے کہتے ہیں ٹوٹی پلیٹ کے

٭٭٭

 

 

 

 

آ کے پتھّر تو مرے صحن میں دو چار گرے

جتنے اُس پیڑ کے پھل تھے، پسِ دیوار گِرے

 

ایسی دہشت تھی فضاؤں میں کھلے پانی کی

آنکھ جھپکی بھی نہیں، ہاتھ سے پتوار گِرے

 

مجھے گرنا ہے تو میں اپنے ہی قدموں پہ گروں

جس طرح سایۂ دیوار پہ دیوار گِرے

 

تیرگی چھوڑ گئے دل میں اجالے کے خطوط

یہ ستراے مرے گھر ٹوٹ کے بیکار گِرے

 

کیا ہَوا ہاتھ میں تلوار لئے پھرتی ہے

کیوں مجھے ڈھال بنانے کو یہ چھتنار گِرے

 

دیکھ کر اپنے در و بام لرز جاتا ہوں

میرے ہمسائے میں جب بھی کوئی دیوار گِرے

 

وقت کی ڈور خدا جانے کہاں سے ٹوٹے

کس گھڑی سر پہ لٹکتی ہوئی تلوار گِرے

 

ہم سے ٹکرا گئی خود بڑھ کے اندھیرے کی چٹان

ہم سنبھل کر جو بہت چلتے تھے، ناچار گِرے

 

کیا کہوں دیدۂ تر، یہ تو مرا چہرہ ہے

سنگ کٹ جاتے ہیں بارش کی جہاں دھار گِرے

 

ہاتھ آیا نہیں کچھ رات کی دلدل کے سوا

ہائے کس موڑ پہ خوابوں کے پرستار گِرے

 

وہ تجلّی کی شعاعیں تھیں کہ جلتے ہوئے تیر

آئینے ٹوٹ گئے، آئینہ بردار گِرے

 

دیکھتے کیوں ہو شکیبؔ اتنی بلندی کی طرف

نہ اٹھایا کرو سو کو کہ یہ دستار گِرے

٭٭٭

 

 

 

 

 

اب یہ ویران دن کیسے ہو گا بسر

رات تو کٹ گئی درد کی سیج پر

 

بس یہیں ختم ہے پیار کی رہگزر

دوست اگلا قدم کچھ سمجھ سوچ کر

 

اس کی آوازِ پا تو بڑی بات ہے

ایک پتّہ بھی کھڑکا نہیں رات بھر

 

گھر میں طوفان آئے زمانہ ہوا

اب بھی کانوں میں بجتی ہے زنجیرِ در

 

اپنا دامن بھی اب تو میسّر نہیں

کتنے ارزاں ہوئے آنسوؤں کے گہر

 

یہ شکستہ قدم بھی ترے ساتھ تھے

اے زمانے ٹھہر، اے زمانے ٹھہر

 

اپنے غم پر تبسم کا پردہ نہ ڈال

دوست، ہم ہیں سوار ایک ہی ناؤ پر

٭٭٭

 

 

 

 

 

حسنِ فردا غمِ امروز سے ضَو پائے گا

چاند ڈوبا ہے تو سورج بھی ابھر آئے گا

 

آندھیوں میں بھی فروزاں ہے چراغِ امّید

خاک ڈالے سے یہ شعلہ کہیں بجھ جائے گا

 

کو بہ کو دام بچھے ہوں کہ کڑکتی ہو کماں

طائرِ دل پرِ پرواز تو پھیلائے گا

 

توڑ کے حلقۂِ شب، ڈال کے تاروں پہ کمند

آدمی عرصۂِ آفاق پہ چھا جائے گا

 

ہم بھی دو چار قدم چل کے اگر بیٹھ گئے

کون پھر وقت کی رفتار کو ٹھہرائے گا

 

راہ میں جس کی دیا خونِ دل و جاں ہم نے

وہ حسیں دور بھی آئے گا، ضرور آئے گا

٭٭٭

 

 

 

نظمیں

 

 

 

 

 

 

 

 

پاداش

 

کبھی اس سبک روندی کے کنارے گئے ہی نہیں ہو

تمہیں کیا خبر ہے

وہاں ان گنت کھر درے پتھروں کو

سجل پانیوں نے

ملائم رسلیے مدھر گیت گا کر

امٹ چکنی گولائیوں کو ادا سونپ دی ہے

وہ پتھر نہیں تھا

جسے تم نے بے ڈول ان گھڑ سمجھ کر

پرانی چٹانو سے ٹکرا کے توڑا

اب اس کے سلگتے تراشے

اگر پاؤں میں چبھ گئے ہیں

تو کیوں چیختے ہو؟

 

 

انفرادیت پرست

 

ایک انساں کی حقیقت کیا ہے

زندگی سے اسے نسبت کیا ہے

آندھی اٹھے تو اڑا لے جائے

موج بِپھرے تو بہا لے جائے

ایک انساں کی حقیقت کیا ہے

ڈگمگائے تو سہارا نہ ملے

سامنے ہو، پہ کنارا نہ ملے

ایک انساں کی حقیقت کیا ہے

کُند تلوار قلم کر ڈالے

سرد شعلہ ہی بھسَم کر ڈالے

زندگی سے اسے نسبت کیا ہے

ایک انساں کی حقیقت کیا ہے

 

 

اندمال

 

شام کی سیڑھیاں کتنی کرنوں کا مقتل بنیں

بادِ مسموم نے توڑ کر کتنے پتے سپردِ خزاں کر دئیے

بہہ کے مشکیزۂ ابر سے کتنی بوندیں زمیں کی غذا بن گئیں

غیر ممکن تھا ان کا شمار

تھک گئیں گننے والے ہر اک ہاتھ کی انگلیاں

’ان گنت‘ کہہ کے آگے بڑھا وقت کا کارواں

ان گنت تھے مرے زخم دل

ٹوٹی کرنوں، بکھرتے ہوئے زرد پتوں، برستی ہوئی بوندیوں کی طرح

اور مرہم  بھی ناپید تھا

لیکن اس روز دیکھا جو اک طفل نو زاد کا خندۂ  زیر لب

زخمِ دل مندمل ہو گئے سب کے سب

 

لرز تا دیپ

 

دودِ شب کا سرد ہاتھ

آسماں کے خیمۂ  زنگار کی

آخری قندیل گُل کرنے بڑھا

اور کومل چاندنی

ایک دربستہ گھروندے سے پرے

مضمحل پیڑوں پہ گر کر بجھ گئی

بے نشاں سائے کی دھیمی چاپ پر

اونگھتے رستے کے ہر ذرے نے پل بھر کیلئے

اپنی پلکوں کی بجھی درزوں سے جھانکا

اور آنکھیں موند لیں

اس سمے طاق شکستہ پر لرزتے دیپ سے

میں نے پوچھا

ہم نفس

اب ترے بجھنے میں کتنی دیر ہے؟

 

 

گریز پا

 

دھیرے دھیرے گر رہی تھیں نخلِ شب سے چاندنی کی پتّیاں

بہتے بہتے ابر کا ٹکڑا کہیں سے آ گیا تھا درمیاں

ملتے ملتے رہ گئی تھیں مخملیں سبزے پہ دو پرچھائیاں

جس طرح پینے کے جھولے سے کوئی اندھے کنویں میں جا گِرے

ناگہاں کجلا گئے تھے شرمگیں آنکھوں کے نورانی دئے

جس طرح شورِ جرس سے کوئی واماندہ مسافر چونک اُٹھے

یک بیک گھبرا کے وہ نکلی تھی میرے بازوؤں کی قید سے

لب سلگتے رہ گئے تھے، چھن گیا تھا جام بھی

اور میری بے بسی پر ہنس پڑی تھی چاندنی

آج تک احساس کی چلمن سے الجھا ہے یہ مبہم سا سوال

اس نے آخر کیوں بُنا تھا بہکی نظروں سے حسیں چاہت کا جال

 

خزاں رسیدہ

 

خزاں رسیدہ چمن ہوں کہ ریت کے ٹیلے

قدم قدم پہ شگوفے کھلا کے دم لے گی

ازل سے سینۂ ویراں ہے منتظر جس کا

نفس نفس وہی خوشبو رچا کے دم لے گی

 

دلاسہ

 

ہم ملے کب تھے

جدائی پر جو ہوں ویراں نگاہ و غم بجاں

ہات میں ہو نرم ہات

لب ہوں لب پر مہرباں

اس پہ کیا موقوف ہے ربطِ بہم کی داستاں

 

رہگزارِ خاک پر

دور سے دو رویہ پیڑوں کی قطاریں

لاکھ آتی ہوں نظر

اپنے سر جوڑے ہوئے

درمیاں ان کے مگر

کب نہ حائل تھا غبارِ رہگزر

ہم ملے کب تھے

جدائی پر جو ہوں ویراں نگاہ و چشمِ تر

 

 

چھت کی تلاش

 

 

یہاں درخت کے اوپر اُگا ہوا ہے درخت

زمین تنگ ہے (جیسے کبھی فراخ نہ تھی)

ہوا کا کال پڑا ہے (نمی بھی عام نہیں)

سمندروں کو بِلو کر، فضاؤں کو مَتھ کر

جنم دئے ہیں اگر چند ابر کے ٹکڑے

جھپٹ لیا ہے انھیں یوں دراز شاخوں نے

کہ نیم جان تنے کو ذرا خبر نہ ہوئی

جڑیں بھی خاک تلے ایک ہی لگن میں رواں

نہ تیرگی سے مفر ہے، نہ روشنی کا سوال

زمیں میں پاؤں دھنسے ہیں، فضا میں ہات بلد

نئی جہت کا لگے اب درخت میں پیوند

 

 

سفیر

 

میں روشنی کا مُغنّی کرن کرن کا سفیر

وہ سیلِ مہ سے کہ رودِ شرار سے آئے

وہ جامِ مے سے کہ چشمِ نگار سے آئے

وہ موجِ  باد  سے یا آبشار سے آئے

وہ دستِ گل سے کہ پائے فگار سے آئے

وہ لوحِ جاں سے کہ طاقِ مزار سے آئے

وہ قصرِ خواب سے یا خاک زار سے آئے

وہ برگِ سبز سے یا  چوبِ  دار سے آئے

 

جہاں کہیں ہو دلِ داغ دار کی تنویر

وہیں کھلیں مری بانہیں،  وہیں کٹے زنجیر

 

 

 

 

شہرِ گُل

 

 

 

کچھ نہ تھا شوخیِ رفتارِ صبا کا حاصل

نکہتِ گل کی پھواروں پہ کڑے پہرے تھے

چپمپئی بیل کے سیال نمو پر قدغن

سرو  و سوسن کی قطاروں پہ کڑے پہرے تھے

حلقۂ برق میں ارباب گلستاں محبوس

دم بخود راہ گزاروں پہ کڑے پہرے تھے

دفعتاً شور ہوا ٹوٹ گئیں زنجیریں

زمزمہ ریز ہوئیں مہر بلب تصویریں

دو گھڑی کیلئے گھر گھر میں چراغاں سا ہوا

جیسے ضو کاریِ انجم پہ کوئی قید نہیں

بند کلیوں نے تراشیدہ لبوں کو کھولا

پھول سمجھے کہ تبسّم پہ کوئی قید نہیں

گھنگریاں باندھ کے پیروں میں صبا اٹھلائی

جیسے اندازِ ترنّم پہ کوئی قید نہیں

یہ فقط خواب تھا اس خواب کی تعبیر بھی ہے

شہرِ گل میں کوئی ہنستی ہوئی تصویر بھی ہے

 

 

 

 

دعوتِ فکر

 

 

 

کس طرح ریت کے سمندر میں

کشتیِ زیست ہے رواں، سوچو

سن کے بادِ صبا کی سرگوشی

کیوں لرزتی ہیں پتیاں۔۔، سوچو

پتھروں کی پناہ میں کیوں ہے

آئینہ ساز کی دوکاں، سوچو

اصل سر چشمۂ وفا کیا ہے

وجہِ بے مہریِ بتاں سوچو

ذوقِ رعمیر کیوں نہیں مٹتا

کیوں اُجڑتی ہیں بستیاں سوچو

فکر سقراط ہے کہ زہر کا گھونٹ

باعثِ عمرِ جاوداں سوچو

لوگ معنی تلاش ہی لیں گے

کوئی بت ربط داستاں سوچو

 

 

نئی کرن

 

 

جہاں پناہ سسکنے لگی چراغ کی لو

شعاعِ تازہ سے چھلنی ہے سینۂ ظلمات

بلند بام ہراسان ہیں رہ نشینوں سے

اک ایسے موڑ پہ آئی ہے گردشِ حالات

جسے بھی دیکھیے لب پر سجائے پھرتا ہے

نرالے دور کا قصہ،  اچھوتے دور کی بات

جنہیں تھا حکمِ خموشی وہی پکار اٹھے

ہمیں بھی اذنِ تبسم ہمیں بھی اذنِ حیات

طلب ہوئی ہے جنہیں بے کراں اجالوں کی

سرابِ نجم و قمر سے بہل نہیں سکتے

نئی کرن سے اندھیروں میں برہمی ہی سہی

نئی کرن کو اندھیرے نگل نہیں سکتے

جہاں پناہ جمال سحر کی جوئے رواں

افق افق کو درخشاں بنا کے دم لے گی

پلک پلک سے مٹائے گی داغ اشکوں کے

نظر نظر کو تبسم سکھا کے دم لے گی

خزاں رسیدہ چمن ہوں کہ ریت کے ٹیلے

قدم قدم پہ شگوفے کھِلا کے دم لے گی

ازل سے سینۂ ویراں ہے منتظر جس کا

نفس نفس وہی خوسشبو رچا کے دم لے گی

 

 

عکس اور میں

 

آبِ جو میں اک طلسمی عکس ابھرا تھا ابھی

دہکے عارض۔۔۔آئینے میں تیز شعلوں کی ضیا

احمریں لب۔۔۔۔زخمِ تازہ موجِ خوں سے آشنا

تیکھے ابرو۔۔۔کالی راتوں کا ملائم ڈھیر سا

بہتی افشاں۔۔۔۔جگمگاتی مشعلوں کا قافلہ

گہری آنکھیں۔۔۔۔دور تک منظر سہانے خواب کا

آب جو میں اک طلسمی عکس ابھرا تھا ابھی

نقرئی پانی کے جو آنچل میں جھلمل کر رہی تھی، کون تھی

حور تھی تخئیل کے رمنوں کی یا وہ جل پری تھی، کون تھی۔۔۔؟

اس پہیلی کی گرہ کھلنے سے پہلے ہی نگاہوں پر مری

ریشمیں قدموں کی آہٹ سے خلا کی سبز چلمن آ گری

آب جو میں اک طلسمی عکس ابھرا تھا ابھی

یا کفِ ساحل پہ میرے نقش پا تھے اور بس

 

 

خداوندان جمہورسے

 

 

عروسِ صبح سے آفاق ہمکنارسہی

شکستِ سلسلۂ قیدِ انتظار سہی

نگاہِ مہرِ جہاں تاب کیوں ہے شرمندہ

شفق کا رنگ شہیدوں کی یاد گار سہی

بکھرتے خواب کی کڑیوں کو آپ چن دیجے

کیا تھا عہد جو ہم نے وہ پائیدار سہی

ہجومِ لالہ و ریحاں سے داد  چاہتے ہیں

یہ چاک چاک گریباں گلے کا ہار سہی

گنے جو زخم رگ جاں، شریک جشن حیات

پیے جو ساغرِ زہراب بادہ خوار سہی

چمن میں رنگ طرب کی کوئی کمی نہ رہے

ہمارا خون جگر غازۂ بہار سہی

 

لہو ترنگ

 

جنگ آزادی کے شہیدوں کی یاد میں

پہلی آواز

 

ہمیں قبول نہیں زندگی اسیری کی

ہم آج طوق و سلال کو توڑ ڈالیں گے

ہمارے دیس پہ اغیار حکمراں کیوں ہوں

ہم اپنے ہاتھ میں لوح و فلم سنبھالیں گے

فضا مہیب سہی، مرحلے کٹھن ہی سہی

سفینہ حلقۂ طوفاں سے ہم نکالیں گے

نقوشِ راہ اگر تیرگی میں ڈوب گئے

ہم اپنے خوں سے ہزاروں دیے جلا لیں گے

دوسری آواز

 

جو لوگ لے کے اٹھے ہیں علم بغاوت کا

انھیں خود اپنی ہلاکت پہ نوحہ خواں کر دو

بجھاؤ گرم سلاخوں کو ان کی آنکھوں میں

زبانیں کھینچ لو گُدّی سے، بے زباں کر دو

ہدف بناؤ دلوں کو سلگتے تیروں کا

سِناں سے خیموں کو چھیدو، شکستہ جاں کر دو

محل سرا کی حدوں تک کوئی پہونچ نہ سکے

ہر ایک گام پی ایستادہ سولیاں کر دو

پہلی آواز

 

یہ غم نہیں کہ سرِ دار آئے جاتے ہیں

ہمیں خوشی ہے وطن کو جگائے جاتے ہیں

ہمارے بعد سہی، رات ڈھل تو جائے گی

دلوں میں شمعِ جنوں تو جلائے جاتے ہیں

ہمارے نقشِ قدم دیں گے منزلوں کا سُراغ

ہمیں شکست نہ ہوگی بتائے جاتے ہیں

جواں رہیں گی ہمارے لہو کی تحریریں

سدا بہار شگوفے کھِلائے جاتے ہیں

 

 

زاویے

 

 

رات تھی میں تھا اور اک میری سوچ کا جال

پاس سے گزرے تین مسافر دھیمی چال

پہلا بولا مت پوچھو اس کا احوال

دیکھ لو تن پر خون کی فرغل، خون کی شال

دوسرا بولا۔۔۔۔اور ہی کچھ ہے میرا خیال

یہ تو خزاں کا چاند ہے گھائل غم سے نڈھال

تیسرا بولا۔۔۔بس یوں سمجھو اس کی مثال

اندھیارے کے بن میں جیسے شب کا غزال

ان کی روح تھی خود کالی پیلی اور لال

میرا وجود ہے ورنہ اب تک ایک سوال

 

 

جاگتی آنکھیں

 

کس کو گماں تھا اک نقطے کی آغوش اتنی کشادہ ہوگی

جس میں انت سرے تک رنگ بھری پہنائی

گھل مل کر رہ جائے گی

 

کس کو خبر تھی، انجانے پن کی گرد لبادہ ہوگی

جس کے صدیوں کی سر بستہ دانائی

اپنی چھب دکھلائے گی

 

کس کو یقیں تھا، دور کے لمس کی تاثیر اتنی زیادہ ہوگی

جس سے سنگیں پیکر میں جامِد رعنائی

روح کی ندرت پائے گی

 

ایسی انہونی باتوں میں سچ کی کرنیں ٹانک چکا ہوں

میں ان جاگتی آنکھوں کے گمبھیر طلسم میں جھانک چکا ہوں

 

 

 

 

یاد

 

رات اک لڑکھڑاتے جھونکے سے

ناگہاں سنگ سرخ کی سل پر

آئینہ گر کے پاش پاش ہوا

اور ننھی نکیلی کرچوں کی

ایک بوچھاڑ دل کو چیر گئی

 

 

 

 

 

جشنِ عید

 

 

 

 

سبھی نے عید منائی مرے گلستاں میں

کسی نے پھول پروئے، کسی نے خار چُنے

بنامِ اذنِ تکلّم، بنامِ جبرِ سکوت

کسی نے ہونٹ چبائے، کسی نے گیت بُنے

 

بڑے غضب کا گلستاں میں جشنِ عید ہوا

کہیں تو بجلیاں کوندیں، کہیں چِنار جلے

کہیں کہیں کوئی فانوس بھی نظر آیا

بطورِ خاص مگر قلبِ داغدار جلے

 

عجب تھی عیدِ خمستاں، عجب تھا رنگِ نشاط

کسی نے بادہ و ساغر، کسی نے اشک پئے

کسی نے اطلس و کمخواب کی قبا پہنی

کسی نے چاکِ گریباں، کسی نے زخم سئے

 

ہمارے ذوقِ نظارہ کو عید کے دن بھی

کہیں پہ سایۂ ظلمت کہیں پہ نور ملا

کسی نے دیدہ و دل کے کنول کھِلے پائے

کسی کو ساغرِ احساس چکنا چور ملا

 

بہ فیضِ  عید بھی پیدا ہوئی نہ یک رنگی

کوئی ملول، کوئی غم سے بے نیاز رہا

بڑا غضب ہے خداوندِ کوثر و تسنیم

کہ روزِ عید بھی طبقوں کا امتیاز رہا

 

 

 

 

 

 

 

فسانۂ جگرِ لخت لخت ایسا تھا

 

 

 

ہر شاخ سے گہنے چھین لیے، ہر دال سے موتی بین لیے

اب کھیت سنہرے کھیت نہیں، ویرانے ہی ویرانے ہیں

 

کسی کا قرب اگر قربِٕ عارضی ہے شکیبؔ

فراقِ یار کی لذّت ہی پائیدار رہے

 

ہوا جو صحنِ گلستاں میں راج کانٹوں کا

صبا بھی پوچھنے آئی مزاج کانٹوں کا

ہم اپنے چاکِ قبا کو رفو تو کر لیتے

مگر وہی ہے ابھی تک مزاج کانٹوں کا

 

خاموشی کے  دکھ جھیلو گے ہنستے بولتے شہروں میں

نغموں کی خیرات نہ بانٹو جنم جنم کے بہروں میں

 

بھاگتے سایوں کی چیخیں، ٹوٹے تاروں کا شور

میں ہوں اور اک محشرِ بے خواب آدھی رات کو

 

ہمیں جیب و آستیں پر اگر اختیار ہوتا

یہ شگفتِ گل کا موسم بڑا خوش گوار ہوتا

 

دیکھ زخمی ہوا جاتا ہے دو عالم کا خلوص

ایک انساں کو تری ذات سے دُکھ پہنچا ہے

 

بات میری کہاں سمجھتے ہو

آنسوؤں کی زباں سمجھتے ہو

 

جس دم قفس میں موسمِ گل کی خبر گئی

اک بار قیدیوں پہ قیامت گزر گئی

 

اس طرح گوش بر آواز ہیں اربابِ ستم

جیسے خاموشیِ مظلوم صدا رکھتی ہے

 

خوشی کی بات نہیں ہے کوئی فسانے میں

وگرنہ عذر نہ تھا آپ کو سنانے میں

 

ہائے وہ آگ کہ جو دل میں سلگتی ہی رہے

ہائے وہ بات کہ جس کا کبھی اظہار نہ ہو

 

اب انھیں پرسشِ حالات گراں گزرے گی

بد گمانی ہے تو ہر بات گراں گزرے گی

 

سحر میں حسن ہے کیسا، بہارِ شب کیا ہے

جو دل شگفتہ نہیں ہے تو پھر یہ سب کیا ہے

 

جنگل جلے تو ان کو خبر تک نہ ہو سکی

چھائی گھٹا تو جھوم اٹھے بستیوں کے لوگ

 

آبلہ پائی کا ہم کو غم نہ تھا

رہنماؤں کی ہنسی تڑپا گئی

 

کتنے ہی لوگ صاحبِ احساس ہو گئے

اک بے نوا  کی چیخ بڑا کام کر گئی

 

اس گلبدن کی بوئے قبا یاد آ گئی

صندل کے جنگلوں کی ہوا یاد آ گئی

 

چاند کی پر بہار وادی میں

ایک دوشیزہ چن رہی ہے کپاس

 

پائلیں بجتی رہیں کان میں سودائی کے

کوئی آیا نہ گیا رات کے سنّاٹے میں

 

مجھ کو آمادۂ سفر نہ کرو

راستے پُر خطر نہ ہو جائیں

 

ہم نے گھبرا کے موند لیں آنکھیں

جب کوئی تارہ ٹوٹتا دیکھا

سچ کہو میری یاد بھی آئی؟

جب کبھی تم نے آئینہ دیکھا

 

گمرہی ہمیں شکیبؔ دے رہی ہے یہ فریب

رہنما غلط نہیں، راستہ طویل ہے

 

کمتر نہ جانیں لوگ اُسے مہر و ماہ سے

ہم نے گرا دیا جسے اپنی نگاہ سے

یا میں بھٹک گیا ہوں سرِ رہ گزر شکیب

یا ہٹ گئی ہے منزلِ مقصود راہ سے

 

یہ لطف زہر نہ بن جائے زندگی کے لیے

چلے تو آئے ہو تجدیدِ دوستی کے لیے

نہ جانے ہو گیا کیوں مطمئن تجھے پا کر

بھٹک رہا تھا مرا دل خود آگہی کے لیے

 

طلسمِ گردشِ ایّام کس طرح ٹوٹے

نظر علیل، جنوں خام، فکر آوارہ

 

ہم نے جسے آزاد کیا حلقۂ شب سے

حاصل نہیں ہم کو اسی سورج کا اجالا

 

گونجتے ہیں شکیب آنکھوں میں

آنے والی کسی صدی کے گیت

 

تھکن سے چور ہیں پاؤں کہاں کہاں بھٹکیں

ہر ایک گام نیا حسن رہ گزار سہی

سکوں بدوش کنارا بھی اب ابھر آئے

سفینہ ہائے دل و جاں بھنور کے پار سہی

٭٭٭

مجموعۂ کلام ’روشنی۔ اے روشنی‘ ا ور مزید کلام

تدوین: اعجاز عبید

کچھ مواد بتشکر: آئی پاکی اردو ڈاٹ کام ، مزید ٹائپنگ: اعجاز عبید

پروف ریڈنگ، ای بک کی تشکیل: اعجاز عبید