FavoriteLoadingپسندیدہ کتابوں میں شامل کریں

فہرست مضامین

پیاری پیاری نظمیں

               مختلف شعرا

جمع و ترتیب: اعجاز عبید

 

حمد باری تعالی

               اختر شیرانی

تو سب کا مالک

سب کا  خدا  تو

بے   آسرا   ہم

اور  آسرا   تو

بندوں پہ شفقت

ہے   کام  تیرا

لیتے ہیں ہر دم

ہم    نام    تیرا

تو  نے  بنائی

یہ ساری  دنیا

یہ خوب صورت

یہ   پیاری   دنیا

حیوان     انساں

تو  نے  بنائے

شہر اور  بیاباں

تو  نے  بسائے

روشن کیے ہیں

تو نے یہ تارے

یہ   ننھے  ننھے

یہ پیارے پیارے

باغوں میں تو نے

پودے      اگائے

پھول اور پھل سب

تو    نے    بنائے

تو نے سمجھ کو

بڑھنا    سکھایا

لکھنا    سکھایا

پڑھنا   سکھایا

ہے عام سب پر

احسان     تیرا

اختر کو یارب

ہے دھیان تیرا

٭٭٭

 

حمد باری تعالیٰ

               چوہدری قمر جہاں

زمانہ اس کی حُب میں کھو گیا ہے

خدا  کی   ذات  کا  جو  ہو گیا  ہے

اسے  دانائی  مل  جائے  گی  آخر

خدا کے خوف میں جو رو گیا ہے

خدا  کو اونگھ  ہے نہ  نیند  کوئی

جہاں سارا سکوں سے سو گیا ہے

فنا سے پاک ہے خالق جہاں کا

نہیں آیا  جہاں  سے جو گیا ہے

خدا کے خوف میں آنسو بہا کر

قمر اپنی خطائیں دھو گیا  ہے

٭٭٭

 

حمد باری تعالیٰ

تنہائیوں میں ہے یاد اس کی

محفلوں میں ہے بات اس کی

رنجشوں میں ملے رحمت اس کی

خوشیوں میں بھی ملے رحمت اس کی

وہ رحیم و کریم ہے لوگو

تعریف میں کیا لکھوں اس کی

نہ کہیں ہے اس جیسا کوئی

یہ کائنات بھی ہے ملکیت اس کی

وہ واحد لاشریک ہے لوگو

تعریف میں کیا لکھوں اس کی

٭٭٭

 

حمد باری تعالیٰ

               ظفر محمود انجم

تو موسم سردی کا لائے

سردی جائے گرمی آئے

تیرا ہے برسات نظارا

اور ہے موسم بہار پیارا

پربت تیرے دریا تیرے

گاؤں گاؤں قریہ تیرے

دنیا میں سب تیرے دھندے

گورے کالے تیرے بندے

تو نے قوت گفتار عطا کی

اور ہے نعمت ہزار عطا کی

ہر اک دل پر راج ہے تیرا

عظمت والا تاج ہے تیرا

٭٭٭

 

نعت رسول مقبول صلی اللہ علیہ وسلم

               انور مسعود

جب وہ سفر پر جایا کرتے

بادل  سر  پر  سایا  کرتے

ان  کا  نام  لبوں  پر  آئے

میٹھا  میٹھا   منہ  ہو جائے

ان کی یاد کے صدقے ، ہر دم

آنکھ میں  جھڑیوں  والا  موسم

ان  کے  بول  بہاروں  جیسے

اور  اصحاب  ستاروں  جیسے

ان  سا   پیارا   اور  نہ  کوئی

ان  سے بچھڑ کر لکڑی روئی

ان  کی  ذات  اک  شہر   نرالا

علم  اس  شہر  کا  رہنے  والا

کیسے  لوگ  تھے  مکے  والے

روح کے اندھے ، دل کے کالے

راس    نہ     آیا    انہیں    اجالا

چاند   کو   شہر    بدر   کر  ڈالا

جس   نے   بنائے  چاند  ستارے

روشنیوں   کے   چشمے   سارے

اس  نے  انہیں   پسند   کیا   ہے

ان   کا   ذکر    بلند    کیا   ہے

کتنی  عظیم  ہے  ان  کی  ہستی

ذکر   ہے  ان  کا   بستی   بستی

صادق    اور   امین   وہی   ہیں

طٰحہٰ     اور   یٰسین   وہی    ہیں

مولا   کی   پہچان    وہی    ہیں

سب  سے  بڑے  انسان وہی ہیں

وہ      مہمان    عرش     معلیٰ

شان         محمد       اللہ      اللہ

رحمت     ان    کی    عالم   عالم

صلی        اللہ      علیہ      وسلم

٭٭٭

 

نعت رسول مقبول صلی اللہ علیہ وسلم

               محمد مشتاق حسین

کرتے ہیں ہم دل سے اطاعت رسول ﷺ کی

روز  ازل  سے دل میں چاہت رسول ﷺ کی

یہ   بھی   کرم   ہے   خاص    خدائے    کریم    کا

دل میں بسی  ہے محبت رسول ﷺ  کی

پیغام   رب   کا   لاتے   تھے   جبرئیل   آپ   تک

اللہ رے یہ شان یہ رفعت  رسول ﷺ کی

جن     کو     نوید     خُلد     کی    دنیا   میں   مل  گئی

ہے ان کے واسطے یہ عنایت رسول ﷺ کی

مشتاق منکروں سے کہہ دو رسول صلی اللہ علیہ وسلم  کے

مہنگی بہت پڑے گی عداوت رسولﷺ کی

٭٭٭

 

 

قدرت مہربان ہو گی

               حافظ مظفر محسن

جسے بھی زیست کی پہچان ہو گی

مسرت اس کے گھر مہمان ہو گی

پریشان حال لوگوں کی مدد کر

تری مشکل بھی پھر آسان ہو گی

خرد سے کام لے تحفہ سمجھ کر

وگرنہ ہر خوشی بے جان ہو گی

ملی ہو ماں سے اچھی تربیت جو

وہ بیٹی باپ کی پہچان ہو گی

جہاں انصاف کی باتیں نہ ہوں گی

وہ بستی ایک دن ویران ہو گی

نبی صلی اللہ علیہ وسلم کے نام پر قربان محسن

جو مانگی جان تو قربانی ہو گی

٭٭٭

 

ماہ رمضان

               ضیاء الحسن ضیا

مبارک    مہینہ   ہے   رمضان   کا

خزانہ  کھلا  رب  کے  فیضان   کا

سنو!  تربیت   اس   مہینے  سے  لو

جو احکام  رب  ہیں  وہ  پورے  کرو

ہر اک  سمت برکت ہے  رمضان کی

عیاں سب پہ عظمت ہے رمضان کی

شب  و  روز عبادت   کا   پیغام  ہے

خدا  کی  طرف  سے  یہ  انعام  ہے

یہ   پورا  مہینہ   تلاوت    کا    ہے

خصوصی   زمانہ   عبادت   کا  ہے

ہے رمضان میں روز و شب مغفرت

گناہ  گار  پاتے   ہیں   سب   مغفرت

ہر  اک  سمت  ہے  نیکیوں  کی ضیا

تلاوت   سے  معمور  ہے  سب  فضا

٭٭٭

 

نعت

آئے ہیں جھولی کو پسارے پاک محمد صلی اللہ علیہ وسلم

اپنے   رب  سے  کیجئے  دعا  امت  کے حق   میں

خوب کریں روضے کے نظارے پاک محمد صلی اللہ علیہ وسلم

ہم    پہ    کرم    فرمائیں،    پھر    روضے    پہ    بلا لیں

ہم نے جو طیبہ میں گزارے پاک محمد صلی اللہ علیہ وسلم

گزرے   ہوئے   وہ   لمحے   اکثر   یاد   آتے   ہیں

اس نے سارے کام سنوارے پاک محمد صلی اللہ علیہ وسلم

ہر   مشکل   میں  "صلی  علیٰ”   ہم   پڑھ   لیتے   ہیں

آپ صلی اللہ علیہ وسلم سے مہکے گلشن سارے پاک محمد صلی اللہ علیہ وسلم

آپ صلی اللہ علیہ وسلم سے روشن چاند ستارے پاک محمد صلی اللہ علیہ وسلم

ہم سب کی آنکھوں کے تارے پاک محمد صلی اللہ علیہ وسلم

رب کے بعد ہیں سب سے پیارے پاک محمد صلی اللہ علیہ وسلم

٭٭٭

 

نبی صلی اللہ علیہ وسلم کا صحابی

               ابو الاسرار رمزی جودھپوری

بیاباں کی تپتی زمیں  سے گزرتا

چٹانوں کے سینے پہ چڑھتا اترتا

شہادت نہ  ملنے پہ  افسوس کرتا

چلا جا رہا  ہے  نبی  کا  صحابی

گلے  میں  حمائل  مقدس صحیفہ

زبان   پر  ہوا  لقاہر   کا   وظیفہ

سفر  کر رہا  ہے  خدا  کا  خلیفہ

چلا جا رہا  ہے  نبی  کا  صحابی

کہیں ٹہر جائے تو منزل صدا دے

اگر چل  پڑے  تو زمانہ دعا دے

زمیں  پر قدم ہیں  فلک پر ارادے

چلا  جا  راہا  ہے  نبی کا صحابی

ہمالہ  کو  دوش  یقیں  پر  اٹھائے

جہاں پاؤں رکھے زمیں ڈگمگائے

منازل کی دھن میں قدم کو بڑھائے

چلا جا رہا ہے نبی وسلم کا  صحابی

جبیں  پر پسینے کی  موج آفتابی

لبوں   پر  تبسم   گلابی،  گلابی

نظر   انقلابی،     قدم    انقلابی

چلا  جا رہا ہے  نبی  کا  صحابی

٭٭٭

 

 

بچارا بے قصور

               ڈاکٹر محمد دین تاثیر، پنڈت ہری چند اختر، شمس عارف

ابا سے لڑ    کر

امی نے مجھ کو

خوب آج    مارا

غصہ       اتارا

ابا سے  لڑ  کر

امی نے مجھ پر

غصہ       اتارا

میں مار  کھا    کر

بستہ    اٹھا      کر

گھرسے   چلا  اور

اسکول        پہنچا

استاد        صاحب

لڑکوں کے غل سے

بپھرے ہوئے  تھے

مجھ کو جو   دیکھا

بس       چپتایا

لڑکوں کا غصہ

مجھ  پر   اتارا

چھٹی   ہوئی  تو

میں گھر کو لوٹا

دکان    پر   سے

بنیے سے پٹ کر

دم   کو   اٹھائے

اک گائے دوڑی

سینگوں کے اوپر

مجھ کو  اٹھا  کر

دھرتی پر پٹخا

بنیے کا غصہ

مجھ  پر  اتارا

میں گھر میں پہنچا

اتنے   میں     بھیا

سیڑھی سے پھسلے

اور پھٹ اڑا دھوں

آنگن    میں   آئے

میں    سامنے  تھا

جھنجھلا کے اٹھے

اور مجھ کو مارا

گرنے کا غصہ

مجھ پر اتارا

میں   روتا  روتا

کمرے میں پہنچا

ابا    سے    امی

پھر لڑ رہی تھیں

ابا نے  مجھ  کو

روتے جو دیکھا

کانوں سے پکڑا

اور  خوب  پیٹا

اور خوب  پیٹا

امی کا   غصہ

مجھ  پر  اتارا

٭٭٭

 

چار مسافر

               آفاق صدیقی

نکلے سفر  کو پیدل، وہ چار  ہم   سفر تھے

سب اپنے راستے اور منزل سے باخبر تھے

اک  فلسفی  تھا  ان  میں  دوسرا  تھا   نائی

پھر  تیسرا  سپاہی،  گنجا  تھا جس کا بھائی

جنگل  میں  رات  آئی، لازم  تھا ان کو سونا

لے  کر  چلے  تھے  اپنے وہ اوڑھنا  بچھونا

سوئے  کچھ اس طرح وہ، اس میں  ہوشیاری

ہر  ایک  کا تھا پہرا  دو گھنٹے  باری  باری

پہلے   سپاہی   جاگا،  پھر  آدھی  رات   آئی

وہ   سوگیا   تو  پہرا   دینے  لگا   تھا   نائی

لمبے تھے اور گھنے تھے جو بال اس کے سر پر

نائی   نے   مونڈ   ڈالے  تیز  استرا   پھیر  کر

بیدار فلسفی   کو   کر   کے   یہ   بولا   نائی

باری اب  آپ کی  ہے  اٹھ  جاؤ میرے بھائی!

جب   ہاتھ   فلسفی نے  چندیا  پہ  اپنی  پھیرا

آپے  سے ہو کے باہر نائی  کو اس نے گھیرا

یہ   کیا  غصب  کیا  ہے  ناحق  اسے   اٹھایا

باری تھی فلسفی  کی  گنجے کو  کیوں جگایا

٭٭٭

 

بہت سے بچوں کا گھر

               احمد ندیم قاسمی

ابا تو چلے گئے ہیں دفتر

امی کو بخار آ رہا ہے

گھر کا سودا خریدنے کو

شیدا بازار جا رہا ہے

چپکے چپکے اک ایک بچہ

بستر سے نکلتا آ رہا ہے

کلثوم بنی ہوئی ہے گھوڑا

سوفے پہ جو کودے جا رہا ہے

ابرار کے ہاتھ میں ہے قینچی

پردوں کو کترتا جا رہا ہے

نعمان کے پاس ہے جو چاقو

کشنوں میں اترتا جا رہا ہے

گھر کا ایلبم ہے نور کے پاس

ہر فوٹو کو پھاڑے جا رہا ہے

تصویر جو نانی کی ہے اس میں

داڑھی مونچھیں بنرہا ہے

گلدان کو توڑ کر مجاہد

ٹکڑوں سے محل بنارہا ہے

تنویر نے کھولا یوں فریج کو

جو کچھ ہے وہ بہتا جا رہا ہے

ننھا اقبال لیٹے لیٹے

ندی نالے بہا رہا ہے

سنتے ہیں کہ دو دنوں میں ان کا

ایک اور بھی بھائی آ رہا ہے

٭٭٭

 

شریر ٹونی

               سدرہ محمود الحسن

ایک تھا ٹونی، ایک تھا مونی

چھوٹی بہن تھی ان کی سونی

بہت شریر تھا ان میں ٹونی

لے جاتا تھا سونی کی پونی

سونی روتی اور چلاتی

ٹونی کو پھر بھی شرم نہ آتی

سونی مونی سے پھر کہتی

میں نہ اب اس گھر میں رہتی

انکل کے گھر جاؤں گی اب

سب کچھ انہیں بتاؤں گی اب

ٹونی گھبراہٹ کے مارے

مونی کو پھر کرے اشارے

اب نہ کروں گا اسے میں تنگ

ختم ہوئی اب ان کی جنگ

٭٭٭

 

حمزہ کی گیند

               ضیاء الحسن ضیا

بہت پیاری پیاری ہے حمزہ کی گیند

کھلونا ہے بچوں کا ننھی سی گیند

ادھر سے ادھر پھینکتے ہیں اسے

کبھی گیند کو ماریں وہ پاؤں سے

اچھلتی ہے پھینکو زمیں پر اگر

لپکتے ہیں گڈو اسے دیکھ کر

اچھالیں کبھی اونچا سب گیند کو

اسے جو بھی دیکھو وہ مسرور ہو

جدھر گیند جاتی ہے جاتے ہیں سب

ضیا کس قدر غل مچاتے ہیں سب

سنو عائشہ، زین، حمزہ، سہیل

ضروری پڑھائی کے ہے ساتھ کھیل

٭٭٭

 

محنت

               نجمہ یاسین یوسف

شوق ہے میرا لکھنا پڑھنا

کام ہے میرا محنت کرنا

میں ہوں ایک غریب کا بچہ

لیکن دھن کا پکا سچا

کام ہے میرا محنت کرنا

شوق ہے میرا لکھنا پڑھنا

بوتلیں کاغذ گتے چن کے

تیری میری باتیں سن کے

پیسے جب ماں کو دیتا ہوں

اپنے اللہ سے کہتا ہوں

بھیک نہ مانگوں دنیا بھر سے

بڑا بنوں میں محنت کر کے

٭٭٭

 

اٹھو سونے والو

               محمد شاہد فیروز

سیاہی نے آخر کو دم توڑ ڈالا

شفق سے اجاگر ہوا ہے اجالا

دھندلکوں میں اک جان سی آ گئی ہے

فضا کس قدر دل نشیں ہو گئی ہے

چلی آ رہی ہے ہوا تازہ تازہ

ہر اک چیز عنوان ہے تازگی کا

شجر جھومتے ہیں عجب بے خودی میں

نیا ولولہ ہے ہر اک پنکھڑی میں

کئی پھول چٹخے ، شگوفے کھلے ہیں

چمن بوئے گل سے مہکنے لگے ہیں

حسیں کھیتیاں لہلہاتی ہیں دیکھو

کہ جشن سحر یوں مناتی ہیں دیکھو

پرندے بھی اب گیت گانے لگے ہیں

یہ وقتِ عمل ہے ، بتانے لگے ہیں

عمل سے ہی تسخیر ارض و سماں ہے

ظہور ِ سحر بھی عمل کا نشاں ہے

اٹھو خوابِ غفلت سے اے سونے والو

مقدر کو ہمت کا تابع بنا لو

٭٭

 

 

بات کرو

               سید اشرف بیتھوی

وطن کو اپنے جگمگانے کی بات کرو

اسے  اور  اچھا  بنانے  کی  بات کرو

جو بھی دیکھے ہیں خواب اے  دوستو

انہیں اب حقیقت  بنانے کی  بات  کرو

آسان   کام   تو   سب   کر لیتے   ہیں

ذرا  مشکلیں حل  کرانے کی بات کرو

ہم  پیچھے  رہ  کیوں  کر زمانے سے

قدم اور  آگے  بڑھانے  کی  بات  کرو

جہالت  کا  دور  اب  بھول  جاؤ دوستو

علم  و  فن   پھیلانے  کی   بات   کرو

جہاں  آہ  بھرنے  کی  نہ  ہو  ضرورت

ایسی  ہی  دنیا  بسانے  کی  بات   کرو

اشرف   کو   کہنا   تھا   وہ  کہہ  چکا

اب  اوروں  کو  بتانے  کی  بات  کرو

٭٭٭

 

کھانا کھاؤ بچو

               سید اشرف بیتھوی

پہلے دسترخوان بچھاؤ بچو

اس  پر  پکوان  سجاؤ بچو

دسترخوان پر بیٹھنے سے پہلے

اپنے   ہاتھ   دھو   آؤ   بچو

دسترخوان پر جیسے ہی بیٹھو

بسم  اللہ  زبان  پر   لاؤ   بچو

چھوٹے چھوٹے نوالے بنا کر

خوب   چبا  کر  کھاؤ   بچو

کھانا اچھا ہو یا برا ہو

کبھی نہ عیب لگاؤ بچو

چھینا جھپٹی کبھی نہ کرنا

اللہ  کے احکام  اپناؤ  بچو

اللہ نے یہ رزق دیا ہے

کھا کر شکر بجاؤ  بچو

اشرف کی ہے یہی نصیحت

گن   اللہ   کے   گاؤ   بچو

٭٭٭

 

 

چاند نگر سے خط آیا ہے

چاند نگر سے خط  آیا  ہے

دیکھنا اس میں کیا لکھا ہے

اس میں  لکھا ہے اے  بچو

میں  آکاش  پہ  بیٹھا  بیٹھا

تم سب  لوگوں  کی  دنیا کو

خاموشی سے دیکھ رہا ہوں

چاند    نگر  سے  خط  آیا  ہے

دیکھنا ہے اس میں کیا لکھا ہے

اس   میں   لکھا   ہے   یہ  دنیا

پہلے   کتنی     پیاری     پیاری

نیلی  برف  کے  گولے   جیسی

سمندر  سی  اچھی   لگتی  تھی

چاند   نگر  سے  خط  آیا   ہے

دیکھنا  اس  میں  کیا  لکھا  ہے

اس  میں   لکھا   ہے  اے  بچو

اب  یہ  خون  کی  رنگ جیسی

اب یہ آگ کے  شعلوں  جیسی

لال    نظر    آیا   کرتی   ہے

چاند  نگر سے خط  آیا  ہے

دیکھنا اس میں  کیا لکھا ہے

اس  میں  لکھا  ہے  دنیا  کو

کیوں تاریکی نے گھیرا ہے

نفرت کی گھنگھور، گھٹ کا

کیوں  کالا   بادل  چھایا  ہے

چاند  نگر  سے  خط  آیا ہے

دیکھنا  اس  میں کیا لکھا ہے

اس میں  لکھا  ہے  اے  بچو

پیار کے  روشن  دیے  جلاؤ

چاہے  میں  پڑ جاؤں  ماند

فقط    تمہارا    پیارا   چاند

چاند  نگر سے  خط آیا  ہے

دیکھنا اس میں کیا لکھا ہے

٭٭٭

 

ابو سات سمندر پار

               شاہنواز فاروقی

ابو   سات  سمندر   پار

میری عید کہاں کی یار

یہ مہنگے جوتے کپڑے

بن ابو کے ہیں بے کار

جیب بھری ہے عید سے

لیکن  دل  ہے  خالی یار

میٹھا   شیر  دلاتا   ہے

یاد  مجھے  ابو  کا  پیار

امی، باجی ہیں مصروف

آئے ہوئے ہیں رشتے دار

ہمسائے  کے لڑکے سے

بھیا  سیکھ رہے ہیں کار

دادا  جی بھی  بیٹھ گئے

لے  کر  بستر  پر اخبار

ابو  ہوتے  تو  مجھ  کو

خود ہی لے جاتے بازار

بہتر ہے  سو  جاؤں  میں

خوابوں میں کھو جاؤں میں

٭٭٭

 

قالین اور سیاہی

               محمد امان خان دل

ابو   نے    دیکھ   لی    ہے    قالین   پر   سیاہی

یارب   ہو  خیر  میری   لگنی    ہے   اب    پٹائی

مجھ پر ہی شک  کریں گے میں یہ  بھی جانتا  ہوں

بچہ ہوں پھر بھی گھر میں سب سے بڑا ہوں بھائی

پوچھیں گے جب وہ مجھ سے میں کیا جواب دوں گا

سوچا   تو   ذہن   میں    اک    ترکیب   میرے   آئی

کہہ دوں گا بے دھڑک میں چھوٹے کی ہے یہ حرکت

قالین    پر    گرائی    اس     نے     ہی     روشنائی

چھوٹی    بہن    نے    لیکن     بیڑا     مرا     ڈبویا

تھی    بات    جو    حقیقت   ان   کو   بتا   کے  آئی

ابو     دوات    بالکل     ٹیبل    کے    درمیاں   تھی

کرکٹ   کی   گیند  سے  یہ  بھائی  نے   ہے  گرائی

سن  کر یہ  بات اس کی  میں  نے کہا   کہ   جھوٹی

ابو   قسم    خدا    کی   میں    نے   نہیں     گرائی

پھر دوستو!   نہ  پوچھو، بعد  اس  کے  حال  میرا

تلقین   بھی   ہوئی   تھی،  اور  ساتھ   ہی   پٹائی

کمرہ   ہے    بیٹھنے   کا   میدان  تو   نہیں  ہے

اتنی   سی  بات  بھی  کیا  تم  کو  سمجھ  نہ  آئی

بیٹے !  یہ   جانتے   ہو   کتنی  بری   ہے  عادت

غلطی  بھی کی ہے تم نے جھوٹی قسم بھی  کھائی

غصے  میں  ان  کو  اکثر  کہتے  ہوئے  سنا ہے

کرکٹ  عروج    پر  ہے  اور  طاق  پر  پڑھائی

گزار جو ورلڈ کپ  ہے اس سے سبق  تو سیکھو

کیسی  ہوئی ہے توبہ! کرکٹ میں  جگ  ہنسائی

کرکٹ میں کیا رکھا ہے کیا  کھیل کر کرو گے

کاغذ  قلم  سے کھیلو ہے  جس  میں  ہر بھلائی

٭٭٭

 

خرگوش

               ضیاء الحسن ضیا

وہ خرگوش جھاڑی سے بھاگا نکل کر

مگر چھپ گیا پھر وہ جھاڑی کے اندر

کبھی منہ دکھایا کبھی  منہ چھپایا

خدا نے عجیب  جانور  ہے  بنایا

کبھی کان بھی تم نے دیکھے ہیں ان کے

بنائے  ہیں  قدرت  نے  کیسے  نرالے

ہے قد میں تو چھوٹا  مگر  کان   لمبے

جو دیکھو تو دم پھول جائے ہنسی سے

اگر غور  سے  پیر  تم  اس  کے  دیکھو

ملیں گے بڑے پچھلے ، اگلوں سے تم کو

کھڑکتا جو پتہ  بھی  وہ پا رہا  ہے

سمجھتا ہے پیچھے  کوئی  آ رہا  ہے

جبھی تو زقندیں  لگانے  لگا    ہے

یہ چھپنے کو شاید کہیں جا رہا  ہے

٭٭٭

 

گرمی

               تنویر پھول

دیکھو    موسم   گرما    آیا

فطرت نے سردی کو بھگایا

دھوپ نے ہے یہ ہم کو بتایا

           پھر گرمی کا موسم آیا

کسی فضاؤں میں ہے حدت

توبہ!  یہ  گرمی  کی  شدت

گلشن میں ہر  گل   کمھلایا

         پھر گرمی کا موسم آیا

آم  لگے ہیں   پیلے   پیلے

کتنے   میٹھے اور  رسیلے

اس پھل نے ہے دل کو لبھایا

     پھر گرمی کا موسم آیا

بھاپ سے اب بنتے ہیں بادل

کر دیں گے برسات میں جل تھل

قدرت نے  کیا  کھیلا  دکھایا

      پھر گرمی کا موسم آیا

دھوپ سے کرتے ہیں اب نفرت

چھاؤں سے ہے سب کو الفت

موسم  کی   پلٹی   ہے   کایا

        پھر گرمی کا موسم آیا

٭٭٭

 

گھر کی جھلک

               عبدالقادر

جھلک تو دیکھو ہمارے گھر کی، یہاں ہیں نانی، یہاں ہیں تائی

ہمارے ماں باپ اور چچا ہیں، یہاں ہیں بہنیں، یہاں ہیں بھائی

ہمارا گھر ہے حسین گلشن، خوشی کی کلیاں کھلی ہوئی ہیں

وفا کی خوشبو بسی ہوئی ہے ، ہوئی نہ  ہو گی  یہاں  لڑائی

ہمارے ابو کو دیکھو عظمت، ہر ایک کرتا ہے ان کی عزت

نظر میں ان کی ہیں سب برابر، انہیں سے ملتی ہے رہنمائی

کما  رہے  ہیں  حلال   روزی،  بنا دیا  ہے  ہمیں  نمازی

انہیں سے گھ  میں ہے خیر و برکت، کسی کی کرتے نہیں برائی

ہماری امی ہیں نیک سیرت، ہمیں ملی ہے انہیں سے راحت

سدا کچن میں  ہے کام  ان کا،  پکا رہی  ہیں  چکن  فرائی

لبوں پہ  ان کے  سدا  تبسم،  زبان ان  کی  ہے  خوب  شیریں

نہیں ہے کاموں سے ان کو فرصت، کبھی صفائی، کبھی سلائی

ہمیں ہے ان سے دلی محبت، انہیں کے قدموں تلے ہے جنت

بڑی محبت سے پرورش کی، ہے ان کی فطرت میں پارسائی

عجیب شے ہیں چچا ہمارے ، نہیں  کسی  کی  سمجھ  میں  آئی

لیے ہیں پیالے میں مرغ چھولے ، اسی میں ڈالی ہے رس ملائی

جو موڈ ہو تو سنائیں  نغمہ، ٹھمک ٹھمک کر  بجائیں  طبلہ

گئے وہ اک روز چھت کے اوپر، وہاں چچا نے پتنگ اڑائی

مدد وہ امی کی  کر رہے ہیں، توے پہ  چمچہ  چلا رہے  ہیں

سویرے اٹھ کر چچا ہمارے ، گلی کی کرتے ہیں خود صفائی

وہ  سیر  کرنے  گئے  ہیں  باہر،  پہن کے  بنیان اور  لنگوٹی

بڑی سی پگڑی ہے سر کے اوپر، لٹک رہی ہے گلے سے ٹائی

بڑی ہیں سب سے ہماری نانی، سناتی ہیں وہ ہمیں کہانی

زباں پہ ذکر خدا ہے جاری،  ٹھکانا  ان  کا ہے  چارپائی

ڈکارتی  ہیں  ہماری   تائی،  ہمیشہ   پیتی   ہیں   وہ   دوائی

بڑا سا تکیہ ہے سر کے نیچے ، بدن کے اوپر ہے اک رضائی

بڑی بہن کا ہے نام رضیہ، وہ  ناولوں  کی  بہت  ہے  رسیا

کشیدہ کاری میں ہے مہارت، مزے سے کھاتی ہے وہ مٹھائی

بہن  ثریا   نے  لایا  گڈا، بہن   رقیہ نے    لائی   گڑیا

سہیلیوں کو بلا کے شادی، خوشی سے دالان میں رچائی

ہمارا انور ہے دس برس کا، مصوری سے اسے ہے رغبت

بنا کے تصویر جب دکھائی، تو بھائی بہنوں سے  داد  پائی

ہے سب سے چھوٹا میاں منور، مگر ہے تعلیم سے محبت

دوات لے کر وہ لکھ رہا تھا، گرا دی  کپڑوں  پہ  روشنائی

ذرا سا اپنا بھی حال کہہ دوں، میں ایک کالج میں پڑھ رہا ہوں

کتاب سے میری دوستی ہے ، کبھی نہ چھوڑوں گا میں پڑھائی

٭٭٭

 

سگنل

               عباس العزم

دیکھ کے سنگل قدم بڑھاؤ

عقل کو اپنی کام  میں  لاؤ

سگنل پر گر عمل کرو گے

راہوں میں محفوظ رہو گے

سگنل سے یہ بات عیاں ہے

آنے جانے کا یہ نشاں  ہے

سرخ اگرسنگل ہو جائے

قدم نہ آگے بڑھنے پائے

ہے یہ اشارہ  رک جانے  کا

نظم و ضبط کے دکھلانے کا

گر تم  سگنل  پیلا  دیکھو

ہونا ہے ہشیار یہ سمجھو

سبز اگر تم سگنل پاؤ

فوراً آگے قدم  بڑھاؤ

سبز علامت جانے کی ہے

آگے قدم  بڑھانے کی  ہے

سگنل  کی  اہمیت کیا  ہے

اس کی قدر و قیمت کیا ہے

اس کی قدر و قیمت جانو

سگنل کی  تم اہمیت  مانو

٭٭٭

 

کیں کیں کوا، ٹیں ٹیں مٹھو

               احمد حاطب صدیقی

ایک ٹہنی پر بیٹھے تھے مٹھو میاں

آ گیا  ایک  کوا  بھی  اڑ  کر  وہاں

آئیے   آئیے   شوق   فرمائیے

میٹھا امرود ہے آپ بھی کھائیے

بولا کوا کہ خاموش  ٹیں ٹیں  نہ  کر

ورنہ میں پھوڑ دوں گا ابھی تیرا سر

بے وقوفوں سے میں بات کرتا نہیں

اپنے درجے سے نیچے اترتا نہیں

کون سا تو عقاب اور شاہین ہے

منہ لگانا تجھے میری توہین ہے

بولیں کوے نے جب ایسی بڑ بولیاں

تو غصے میں بولے  یہ مٹھو  میاں

تو نے کیا تیر مارے ہیں میں بھی سنوں

تیرے   چالاکیوں  پر  ذرا  سر  دھنوں

بولا کوا کہ  او  رٹو طوطے  یہ سن

میری دانش کا ہر شخص گاتا ہے گن

کر دوں روشن ابھی تیرے چودہ طبق

یاد  ہے  بچے بچے  کو  میرا  سبق

ایک دن جب بہت سخت پیاسا  تھا  میں

یہ سمجھ لے کہ بس ادھ موا سا تھا میں

ایک مٹکے میں پانی کی دیکھی جھلک

چونچ  ڈالی  تو  پہنچی  نہ  پانی  تلک

ذہن نے  کام  کرنا  شروع   کر دیا

مٹکا کنکر سے بھرنا شروع کر دیا

ان کی تعداد مٹکے میں جب بڑھ گئی

سطح پانی کی اوپر  تلک  چڑھ  گئی

میں نے پانی غٹاغٹ  غٹاغٹ  پیا

پھر پھدکتے ہوئے کائیں کائیں کیا

دیکھ لے کس قدر تیز طرار ہوں

کتنا چالاک ہوں کتنا ہوشیار ہوں

بولے مٹھو میاں مار کر قہقہہ

بے وقوفی کی بس ہو گئی انتہا

جانے مٹکے میں پانی تھا کب سے پڑا

پھر ڈھکنا بھی نہیں تھا کھلا تھا گھڑا

گندے کنکر بھی بھرتا گیا اس میں تو

پی گیا ایسے پانی کو پھر آخ تھو

ایسے پانی سے لگتی ہیں بیماریاں

پیش آتی ہیں  کتنی  ہی  دشواریاں

خود کو کہتا عقل مند و دانا ہے تو

لیکن افسوس احمق کا  نانا  ہے تو

تو اگر گندی چیزیں نہ  کھائے   پیے

لوگ پا لیں تجھے تو مزے سے جیے

صاف ہوتا تو گھر گھر  بلاتے  تجھے

اس طرح مار کر کیوں بھگاتے تجھے

کوا سنتے ہی  یہ  بات  رونے  لگا

اپنے پر آنسوؤں سے بھگونے لگا

اور  کہنے  لگا  بات  سچ  ہے  تیری

لوگ کرتے ہیں نفرت شکل سے میری

کوا  رو رو  کر جب  آہ بھرنے  لگا

اس پر مٹھو نے یہ ترس کھا کر کہا

چھوڑ دے اس تکبر بڑائی کو تو

اپنی عادت بنا لے صفائی  کی  تو

گندا پانی نہ پی، گندی چیزیں نہ کھا

ان میں  ہوتا ہے  ڈیرا  جراثیم  کا

یہ  جراثیم    بیمار  کر   دیتے  ہیں

اچھے خاصوں کو بیکار کر دیتے ہیں

یوں  بظاہر  تھا کوا  بہت   کائیاں

اس کو سمجھا کے ہر بات مٹھو میاں

اڑ گئے اپنے پر  پھڑپھڑاتے  ہوئے

مٹھو بیٹے کے نعرے لگاتے  ہوئے

٭٭٭

 

رنگین تتلیوں نے

               شام درانی

پھولوں سے دل لگایا

رنگین   تتلیوں  نے

خوشبو سے گھر بسایا

رنگین   تتلیوں   نے

اک تتلی چمپئی  ہے

اک تتلی  ہے  گلابی

کیا رنگ ہے جمایا

رنگین  تتلیوں  نے

ہو دھوپ  نہ  چہرہ

اس واسطے کیا ہے

سورج مکھی پہ سایا

رنگین  تتلیوں   نے

خوشبو کو مان دے کر

پھولوں پہ جان دے کر

جینا  ہمیں   سکھایا

رنگین  تتلیوں  نے

باغوں میں شام جاؤ

دل  باغ  باغ   ہو گا

میلہ سا ہے لگایا

رنگین تتلیوں نے

٭٭٭

 

جاگ اٹھو

               عنایت علی خان

صبح ہوئی تو مرغا جاگا

مرغا بولا ککڑوں کوں۔۔۔۔۔ جاگ اٹھو

صبح ہوئی تو چڑیاں جاگیں

چڑیاں بولیں چوں چوں چوں۔۔۔۔۔ جاگ اٹھو

صبح ہوئی تو بطخیں جاگیں

بطخیں بولیں قیں قیں قیں۔۔۔۔۔ جاگ اٹھو

صبح ہوئی تو بکری جاگی

بکری بولی میں میں میں۔۔۔۔۔ جاگ اٹھو

صبح ہوئی تو بھیڑیں جاگیں

بھیڑیں بولیں بھیں بھیں بھیں۔۔۔۔۔ جاگ اٹھو

صبح ہوئی تو امی جاگیں

امی کلمہ پڑھ کر بولیں۔۔۔۔۔ جاگ اٹھو

جاگو منے جاگ اٹھو

جاگو منی جاگ اٹھو

٭٭٭

 

چھوٹا سا لڑکا

               جمیل الدین عالی

رنگ عجب ہیں ڈاک ٹکٹ کے

بیتے دن آتے  نہیں پلٹ  کے

ان ٹکٹوں کے رنگ نرالے

مشرق والے مغرب  والے

جمع کیے ہیں گھوم کے ہم نے

لندن پیرس  روم   کے ہم  نے

دیکھے اگر سکوں کا خزانہ

رہ   جائے   حیران   زمانہ

یہ چوکور بھی گول بھی ہیں یہ

مہنگے بھی انمول  بھی  ہیں  یہ

برما  اردن   شام   کے    سکے

چین کے اور ویت نام کے سکے

سکے  اور ٹکٹے  میرے  ہیں

باقی کھلونے سب  تیرے  ہیں

٭٭٭

 

میں چھوٹا سا اک لڑکا ہوں

میں چھوٹا سا اک لڑکا ہوں

پر کام کروں گا بڑے بڑے

جتنے بھی لڑکا لڑکے  ہیں

میں سب کو نیک بناؤں گا

جو بکھرے ہوئے ہیں ہم جولی

ان  سب  کو  ایک  بناؤں  گا

سب آپس میں مل جائیں  گے

جو رہتے ہیں اب لڑے لڑے

یہ علم کی  ہیں  جو  روشنیاں

میں گھر گھر میں پھیلاؤں گا

تعلیم کا  پرچم   لہرا  کر

میں سر سید بن جاؤں گا

بے  کار  گزاروں  عمر  بھلا

کیوں اپنے گھر میں پڑے پڑے

میں چار طرف لے جاؤں گا

اقبال   نے   جو   پیغام   دیا

میں ہی وہ پرندہ ہوں جس کو

اس  نے  شہباز  کا  نام  دیا

اب میرے پروں پر چمکیں گے

سب ہیرے موتی جڑے  جڑے

٭٭٭

پرانے ٹکٹ پرانے سکے

               شبنم رومانی

رنگ عجب ہیں ڈاک ٹکٹ کے

بیتے دن آتے  نہیں پلٹ  کے

ان ٹکٹوں کے رنگ نرالے

مشرق والے مغرب  والے

جمع کیے ہیں گھوم کے ہم نے

لندن پیرس  روم   کے ہم  نے

دیکھے اگر سکوں کا خزانہ

رہ   جائے   حیران   زمانہ

یہ چوکور بھی گول بھی ہیں یہ

مہنگے بھی انمول  بھی  ہیں  یہ

برما  اردن   شام   کے    سکے

چین کے اور ویت نام کے سکے

سکے  اور ٹکٹے  میرے  ہیں

باقی کھلونے سب  تیرے  ہیں

٭٭٭

 

نیلو کا مٹھو

               غلام عباس

نیلو نے اک طوطا  پالا

پیارا  پیارا  بھولا  بھالا

چونچ تھی لال اور پنکھ ہرے تھے

قدرت نے کیا  رنگ  بھرے   تھے

نیلو  لاکھ  پڑھاتی  اس  کو

بات نہ کرنی  آتی   اس  کو

چپ چاپ  بیٹھا  اونگھتا  رہتا

ہر کوئی  اس  کو  بدھو  کہتا

نیلو   کو   یہ   حیرانی   تھی

مٹھو نے کیوں چپ ہے سادھی

بلی  بولے   مرغا    بولے

طوطا لیکن چونچ نہ کھولے

اک دن نیلو نیند  سے  جاگی

صحن میں آئی بھاگی بھاگی

صحن میں تھا طوطے کا پنجرا

کھانچے  کے  اوپر  تھا  مرغا

مرغا بھی بولا ککڑوں  کوں

طوطا بھی  بولا ککڑوں کوں

٭٭٭

 

یہ ننھے پاکستانی

               شوکت تھانوی

آج کے ننھے پھول سے بچے کل کے پاکستانی

پاکستان جواں ہو گا جب ان کی  ہو گی    جوانی

                                یہ  ننھے  پاکستانی

آزادی کی گود کے پالے جب کھولیں گے آنکھیں

ان کے لیے آزادی ہو گی   جانی   اور    پہچانی

                                یہ  ننھے  پاکستانی

چاند ستارے کا یہ پرچم  اور  بھی  اونچا  ہو گا

ان کی عزت اور غیرت کا، ہو گا جب یہ نشانی

                                یہ  ننھے  پاکستانی

گود میں لے کر، اپنے بچوں کو یہ ننھے بچے

کہیں گے قائد اعظم تھے اس آزادی  کے  بانی

                                یہ  ننھے  پاکستانی

٭٭٭

 

راوی کے کنارے

               چراغ حسن حسرت

چل   دیکھ   نظارے

چھٹکے  ہوئے تارے

اور  نور  کے دھارے

راوی   کے   کنارے

آئی  ہے   سیہ   رات

پہنے    ہوئے   بانات

زلفوں   کو   سنوارے

راوی    کے   کنارے

کرتی   ہے   ہوا   سے

گھنگھو ر   گھٹا   سے

کچھ    برق     اشارے

راوی    کے    کنارے

مینہ کا  جو تھما   زور

جھنگارتے    ہیں   مور

پنکھ   اپنے   پسارے

راوی   کے   کنارے

جگنو   ہیں    چمکتے

ہیرے   ہیں    دمکتے

اڑتے   ہیں    شرارے

راوی    کے   کنارے

٭٭٭

 

پاک وطن کے پیارے بچو

               غنی دہلوی

ہمدردی کے  نغمے  لکھو

پیار بھرے تم قصے لکھو

پاک وطن کے پیارے  بچو!

ملک کی روشن راہیں کھولو

یک جہتی کے پھول کھلاؤ

دھرتی  کو  گل  زار  بناؤ

اس میں بچو !  باغ   لگاؤ

اپنے وطن کی شان بڑھاؤ

بگڑے ہوئے حالات  سنوارو

ملک کے تم دن رات سنوارو

اپنے وطن کی لاج  رکھو تم

اچھے  اچھے  کام  کرو  تم

دنیا میں وہ کام  کرو تم

روشن اپنا نام  کرو  تم

چمکو   گے  تم  سورج  بن  کر

روشن ہوں گے تم سے گھر، در

فخر  کرے  گی   دنیا  تم  پر

اک دن بنو گے قوم کے رہبر

کرتے  رہو  تم  محنت  بچو!

جاری رکھو تم جہد و عمل کو

٭٭٭

ماخذ:

http://www.vshineworld.com/urdu/library/poems/

تدوین اور ای بک کی تشکیل: اعجاز عبید