پسندیدہ کتابوں میں شامل کریں

غزلیں

               ماجد صدیقی

آنکھوں کو نہیں سُوجھتا، آزار کہاں ہے

احساس کے تلوے میں چھپا خار کہاں ہے

جو جھاگ سا اُٹھا تھا کبھی اپنے سروں سے

اب دیکھیے وہ طرۂ  پندار کہاں ہے

ہلچل سی مچا دیتا تھا جو کاسۂ خوں میں

جو دشمنِ جاں تھا وہ مرا یار کہاں ہے

شعلہ تو کہاں کا کہ دھُواں تک نہیں دیکھا

موجود پسِ لب ہے جو وہ نار کہاں ہے

تہہ دار ہے، اُلجھاؤ نہیں اُس کے سخن میں

ماجد کا لکھا ایسا پُر اسرار کہاں ہے

٭٭٭

اب کی بہار بھی چلتے دیکھا زور چمن پہ وہ ژالوں کا

دھجی دھجی برگ و شجر ہیں، حال بُرا ہے نہالوں کا

جبر کے ہاتھوں جسم تلک وہ سادہ منش کٹوا بیٹھے

تیغ زنی سے بھی کچھ بڑھ کر زعم جنہیں تھا ڈھالوں کا

دشت و دمن میں ایسا تو دہلاتی چپ کا راج نہ تھا

لفظ و معانی تک پہ گماں ہے ٹھٹھکے ہوئے غزالوں کا

اِتنے چلے پر بھی نہیں پہنچے جس کی خنک فضاؤں میں

اُس بگیا تک اور سفر ہے جانے کتنے سالوں کا

ماجد اب دُرّوں کی جگہ وہ ہاتھ میں پرچم رکھتے ہیں

دھندا راس جنہیں آیا جسموں سے اتری کھالوں کا  ٭٭٭

اب کے چلن ہوا کا غضب اور ڈھائے گا

موسم جو آئے گا وہ قیامت کا آئے گا

جو لٹ چکے ہیں اشک سمیٹے گا اُن کے اور

رہبر اُنہی سے دیکھنا! گوہر بنائے گا

وہ ناخدا کہ طاق ہے جو حفظِ ذات میں

ڈولی ذرا جو ناؤ تو خود کُود جائے گا

جو لفظ اُس کے عجز کے باعث سبک ہوئے

مختار کیا بھلا اُنہیں حُرمت دلائے گا

بینا ہیں جو اُنہیں بھی، مسیحائے نابکار

لگتا ہے یوں، سفید چھڑی دے کے جائے گا

ماجد شکارِ خبث ہے جو، تُو بھلا اُسے

لطفِ زبان و لب سے کہاں تک سِدھائے گا

٭٭٭

اب کے یہ کیا حشر اٹھا ہے شہروں میں

سورج نیزوں پر اُترا ہے شہروں میں

ہر سُو فکرِ معاش میں اِک بِھنّاہٹ سی

جُز اِس کے کیا اور دھرا ہے شہروں میں

جانے کب جسموں میں دانت اُتر جائیں

جنگل ہی سا، اب کھٹکا ہے شہروں میں

کھو کر گاؤں میں اخلاص نگینوں سا

تو کیا ماجد ڈھونڈ رہا ہے شہروں میں ٭٭٭

بے سمت سب علاج مسیحا کہاں ملے

خضرانِ راہ میں کوئی اچّھا کہاں ملے

گِدھ کی نظر سے جب ہوں معالج بھی دیکھتے

زخموں سے چُور تن کو مداوا کہاں ملے

اُجڑے شجر پہ فاختہ پوچھے کہ امن کا

گوشہ کہاں ملے، اُسے سایہ کہاں ملے

زیرِ قدم ہے جو بھی وہ ہے بخت کی لکیر

سیدھا ہو مانگ سا جو وہ رستا کہاں ملے

ملتا تو ہے سکوں بھی مگر ناپ تول سے

جو چاہتا ہے دِل اُسے اُتنا کہاں ملے

ہر آنکھ میں جہاں ہو رعونت پئے مریض

ہونٹوں کے درمیاں اُسے پُرسا کہاں ملے

ماجدؔ غضب بھی جس میں تلّطف بھی جس میں ہو

تجھ کو عطا ہے جو سخن ایسا کہاں ملے

٭٭٭

پڑے ہیں دیکھنے کیا کربِ آشکار کے دن

زوالِ عمر کے دن، ٹُوٹتے خمار کے دن

بنامِ کم نظراں، لطفِ لمحۂ گزراں

ہمارے نام نئی رُت کے انتظار کے دن

بدن سے گردِ شرافت نہ جھاڑ دیں ہم بھی

لپک کے چھین نہ لیں ہم بھی کچھ نکھار کے دن

طویل ہوں بھی تو آخر کو مختصر ٹھہریں

چمن پہ رنگ پہ، خوشبو پہ اختیار کے دن

نئے دنوں میں وہ پہلا سا رس نہیں شاید

کہ یاد آنے لگے ہیں گئی بہار کے دن

فلک کی اوس سے ہوں گے نم آشنا کیسے

زمین پر جو دھوئیں کے ہیں اور غبار کے دن

یہ وقت بٹنے لگا ناپ تول میں کیونکر

یہ کس طرح کے ہیں ماجدؔ گِنَت شُمار کے دن

٭٭٭

تھے جتنے ذائقے وہ اپنا لطف کھونے لگے

شجر پہ پات تھے جتنے ، وہ زرد ہونے لگے

وہی جو کھینچ کے لائے تھے کشتیوں سے ہمیں

بھنور کے بیچ وہ ناؤ ہیں اب ڈبونے لگے

کٹے ہیں جن کے بھی رشتے، کہ تھے جو جزوِ بدن

سکوں کی نیند بھلا، وہ کہاں ہیں سونے لگے

ہیں جتنے دل بھی غرض کی تپش سے بنجر ہیں

یہ ہم کہاں ہیں محبت کے بیج بونے لگے

یہ واقعہ ہے کہ وہ حبسِ دم سے ہو آزاد

بحالِ کرب کوئی، جب بھی کھُل کے رونے لگے

ملے جو شاہ بھی ، تقلیلِ رزقِ خلق سے وُہ

رگوں میں جبر کے نشتر نئے چبھونے لگے

ترے یہ حرف کہ جگنو ہیں ، ا شک ہیں ماجد

ہیں سانس سانس میں، کیا کیا گہر پرونے لگے

٭٭٭

ٹھہرے جو بھسم ، مِلکِ ستم گار نہیں تھے

اِنساں تھے ، سرِ کوہ کے اشجار نہیں تھے

اب کے بھی پرندے وُہی ، ژالوں میں سڑے ہیں

جو ابر کی خصلت سے خبردار نہیں تھے

الزام محافظ پہ بھی تھا کچھ تو ، نقب کا

افراد اگر شہر کے بیدار نہیں تھے

رکھتے تھے مہک پاس جو ماجد کے ہنر کی

جھونکے تھے ، کچھ اُس کے وہ طرفدار نہیں تھے

٭٭٭

جس انداز کا تھا اس سے منسوب سلوک ایسا ہی کیا

وقت نے ماجد چوس کے رس، اِک سمت ہمیں بھی، پھینک دیا

سقراطوں سا سچ کہنے اور اُس پر قائم رہنے پر

اے دوراں! پہچان ہمیں، ہم وہ ہیں، جنہوں نے زہر پیا

اے دل! اب یہ تلخ حقیقت، جان بھی لے اور مان بھی لے

جس بھی کسی نے وار کیا، کب اُس نے، دہانِ زخم سیا

ان میں یار اغیار تھے کون، اور رہنما و مسیحا کون

کیا بتلائیں، اِس دل سے، کس کس نے، کیا کیا چھین لیا

ایک ہمِیں، وہ صاحبِ درد نہیں، جو جان بہ لب ہیں یہاں

جو بھی جِیا اِس قریۂ نا پرساں میں، بڑی مشکل سے جِیا

٭٭٭

جو حق میں تمہارے بند رہیں وہ لب گنجینۂ زر کر دو

اور شور اٹھے جن گلیوں سے وہ گلیاں خون سے تر کر دو

جو سادہ منش ہیں ان سب کو تم دین کے نام پہ دھوکا دو

جو کھولے ڈھول کا پول اُسے اسلام آباد بدر کر دو

جو رات وطن پر چھائی ہے تم سب کے بھاگ جگانے کو

کچھ جگنو چھوڑ کے وعدوں کے اُس میں اعلانِ سحر کر دو

جو کھیت ترستے ہیں نم کو اُن کھیتوں کے اِک کونے کو

خِفّت کے عرق سے تر کر کے وقفِ تشہیرِ ہُنر کر دو

جو ہاتھ اُٹھیں وہ کٹ جائیں جو آنکھ اٹھے وہ پھوٹ بہے

ہر چلتی سانس کچلنے کو پیمانۂ فتح و ظفر کر دو

ہاں پیڑ پہ بیٹھی چڑیوں پر، کاہے کو کرو تم وار بھلا

ہاں ان کا شور دبانے کو شاہو! تو بیِخ شجر کر دو

٭٭٭

جو آنکھیں دیکھتی ہوں دھُند کے اُس پار، کم کم ہیں

یہاں اہلِ نظر تو ہیں بہت، بیدار کم کم ہیں

بھسم کرنے کو آہن، کام میں لایا گیا کیا کیا

فلاحت اور زراعت کے مگر اوزار کم کم ہیں

سمجھ بیٹھے ہیں جب سے اصلِ حرصِ خوش خصالاں ہم

کسی بھی صورتِ حالات سے بے زار کم کم ہیں

شکم جب سے بھرا رہنے لگا ہے چھِینا جھپٹی سے

وہ کہتے ہیں یہی ، نگری میں اب نادار کم کم ہیں

فروغِ تیرگی بھی دم بہ دم ماجِد فراواں ہے

نگر میں جگنوؤں کے پاس بھی انوار کم کم ہیں

٭٭٭

جب سے اندر سے بِکے اخبار میرے شہر کے

لا دوا ہونے لگے آزار میرے شہر کے

اَنٹیوں کے مول بِکتے ہیں کئی یوسف یہاں

مصر کے بازار ہیں بازار، میرے شہر کے

لُوٹ کر شب زادگاں نے جگنوؤں کی پُونحیاں

چہرہ چہرہ مَل لئے انوار، میرے شہر کے

جانچیے تو لوگ باہم نفرتوں میں غرق ہیں

دیکھیے تو فرد ہیں تہوار، میرے شہر کے

کُو بہ کُو پسماندگی کا ہے تعفّن چار سو

اور بہت ذی شان ہیں دربار، میرے شہر کے

چوس لینے پر نمِ زر، جس کسی کے پاس ہے

کر چکے ایکا سبھی زر دار، میرے شہر کے

مکر کیا کیا لوریاں ماجد اُنہیں دینے لگا

لوگ جتنے بھی مِلے بیدار، میرے شہر کے

٭٭٭

چمن پہ ہے تو بس اِتنا سا اختیار ہمیں

کہ دم بہ دم ہے بہاروں کا انتظار ہمیں

مچلتی لُو کا فلک سے برستے ژالوں کا

نہ جانے کون سا موسم ہو ساز گار ہمیں

ہر اِک قدم پہ وہی تجربہ سکندر سا

کسی بھی خضر پہ کیا آئے اعتبار ہمیں

ذرا سا سر جو اٹھا بھی تو سیل آلے گا

یہی خبر ہے سُنائے جو، اِنکسار ہمیں

مہک تلک نہ ہماری کسی پہ کھُلنے دے

کِیا سیاستِ درباں نے یوں شکار ہمیں

جو نقش چھوڑ چلے ہم اُنہی کے ناطے سے

عزیز، جان سے جانیں گے تاجدار ہمیں

بپا جو ہو بھی تو ہو بعدِ زندگی ماجد

یہ حشر کیا ہے جلائے جو، بار بار ہمیں

٭٭٭

چہرۂ سرو قداں پر داغِ ندامت ٹھہرے

بَونے بانس لگا کر صاحبِ قامت ٹھہرے

اُس کے لیے جو خود شامت ہے بستی بھر کی

جانے کونسی ساعت، ساعتِ شامت ٹھہرے

جس کے طلوع پہ خود سورج بھی شرمندہ ہے

اور وہ کون سا دن ہو گا جو قیامت ٹھہرے

اہلِ نشیمن کو آندھی سے طلب ہے بس اتنی

پیڑ اکھڑ جائے پر شاخ سلامت ٹھہرے

کون یزید کی بیعت سے منہ پھیر دکھائے

کون حسین ہو، دائم جس کی امامت ٹھہرے

خائف ہیں فرعون عصائے قلم سے تیرے

اور بھلا ماجد کیا تیری کرامت ٹھہرے

٭٭٭

حرص و نخوت کے اندھے نگر میں باپ ہیں جو جواں بیٹیوں کے

کس زباں سے کسی سے کہیں وہ ہیں مسافر وہ کن دلدلوں کے

شاخچوں کا جو اندوختہ تھا رس وہ چوسا ہے حبسِ زمیں نے

دھوپ ابکے چھتوں پر وہ اُتری پھول کملا گئے آنگنوں کے

خون میں خوف کی آہٹیں ہیں جسم در جسم کھولاہٹیں ہیں

ایک ہلچل سی اعصاب میں ہے ذہن مرکز ہیں یوں زلزلوں کے

شہرِ خفتہ کی گدلی فضا میں جانے کیا کیا دکھائی دیے ہیں

چشمِ بیدار میں چبھنے والے تُند کنکر نئے رتجگوں کے

زندگی دشتِ تاریک میں ہے جیسے بھٹکا ہوا شاہزادہ

جس کے ہر کُنج میں ایستادہ دیو ہیں نو بہ نو الجھنوں کے

وہ خودی ہو کہ خود انحصاری محض خوش فہمیاں ہیں کہ ہم نے

ہاتھ مصروف دیکھے ہیں جو بھی اُن میں پائے تھے بیساکھیوں کے

اِن مکینانِ فردوس پر بھی جیسے دوزخ کے در کھُل چلے ہوں

دِن بُرے آنے والے ہیں ماجد باغ میں سارے کچّے پھلوں کے

٭٭٭

حق طلبی سے اب کے دھیان ہٹانے لگے ہیں

لوگ تماشا بننے سے کترانے لگے ہیں

نرم ہوا کانٹوں سے الجھنا سیکھ رہی ہے

اور بگولے پھولوں کو سہلانے لگے ہیں

مہلتِ شر کو دیکھ کے جو ابلیس نے پائی

خیر کے جتنے قصّے ہیں افسانے لگے ہیں

صاحبِ قامت، اور بلندیِ فرق کی خاطر

سب کوتاہ قدوں کو پاس بلانے لگے ہیں

زردیِ رنگ پہ شور مچانے والے پتّے

ابر کے ہاتھوں ماجد خوب ٹھکانے لگے ہیں

٭٭٭

خلق نے تو اس کو ایسے میں بھی ذی شاں کہہ دیا

پر شہِ بے پیرہن کو میں نے عریاں کہہ دیا

رزق نے جس کے مجھے پالا ہے جس کا رزق ہوں

کہہ دیا اس خاک کو میں نے رگِ جاں کہہ دیا

اِس تمنّا پر کہ ہاتھ آ جائے نخلستاں کوئی

خود غرض نے دیکھ صحرا کو گلستاں کہہ دیا

ہم زبانِ شاہ وہ بھی تھے جنہوں نے آز میں

رات تک کو، یار کی زلفِ پریشاں کہہ دیا

میں وہ خوش خُو جس نے دو ٹانگوں پہ چلتا دیکھ کر

شہر کے بن مانسوں تک کو بھی انساں کہہ دیا

کیا کہوں کیوں میں نے سادہ لوح چڑیوں کی طرح

وقفۂ شب کو بھی تھا صبحِ درخشاں کہہ دیا

اس کے ناطے، درگزر جو محض عُجلت میں ہوئی

گرگ کو بھی بھیڑ نے ماجدؔ پشیماں کہہ دیا

٭٭٭

خونِ مظلوماں سے ہیں شاداب ہونے لگ پڑیں

ابکے یُوں بھی کھیتیاں سیراب ہونے لگ پڑیں

غاصبانِ تخت کی خود ساختہ آفات سے

جانے کیا کیا ہستیاں، غرقاب ہونے لگ پڑیں

حق طلب ہیں جس قدر خاموش رکھنے کو اُنہیں

اجتماع گاہیں تلک برقاب ہونے لگ پڑیں

حرص زادوں کے تدّبر کی تہِ شیریں لئے

گالیاں بھی شاملِ آداب ہونے لگ پڑیں

جب سے ماجدؔ مکر کا غلبہ مناصب پر ہُوا

دیکھ کیا کیا حرمتیں بے آب ہونے لگ پڑیں

٭٭٭

دستِ شفقت کیوں بہ حقِ جور بن جانے لگا

آسماں کیوں ٹوٹ کر نیچے نہیں آنے لگا

کھیت جلنے پر بڑھا کر عمر، اپنے سود کی

کس طرح بنیا، کسانوں کو ہے بہلانے لگا

جانے کیا طغیانیاں کرنے لگیں گھیرے درست

گھونسلوں تک میں بھی جن کا خوف دہلانے لگا

خون کس نے خاک پر چھڑکا تھا جس کی یاد میں

اِک پھریرا سا فضاؤں میں ہے لہرانے لگا

مہد میں مٹی کے جھونکا برگِ گل کو ڈال کر

کس صفائی سے اُسے رہ رہ کے سہلانے لگا

٭٭٭

دمِ زوال ، رعونت زباں پہ لائے بہت

چراغ بجھنے پہ آئے تو پھڑپھڑائے بہت

یہی تو ڈُوبتے سُورج کا اِک کرشمہ ہے

بڑھائے قامتِ کوتاہ تک کے، سائے بہت

قلم کے چاک سے پھوٹے وہ، مثل بیلوں کے

جو لفظ ہم نے زباں کے تلے دبائے بہت

ستم ستم ہے کوئی جان دار ہو اُس کو

نگل کے آب بھی اِک بار تھرتھرائے بہت

ہمارے گھر ہی اُترتی نہ کیوں سحر ماجد

تمام رات ہمِیں تھے جو کلبلائے بہت

٭٭٭

دوسروں کے واسطے جیا تھا مر گیا

وہ بڑوں کو جو بڑا کچھ اور کر گیا

جگنوؤں تلک کی روشنی لگے فریب

رہبروں سے ہُوں کچھ اِس طرح کا ڈر گیا

ناز تھا کہ ہم سفیرِ انقلاب ہیں

پر یہ زعم بھی نشہ سا تھا اُتر گیا

خانۂ خدا سے بُت جہاں جہاں گئے

بار بار میں نجانے کیوں اُدھر گیا

پاؤں کے تلے کی خاک نے نگل لیا

میں تو تھا کنارِ آب باخبر گیا

لعل تھا اٹا تھا گرد سے، پہ جب دھُلا

ماجدِ حزیں کچھ اور بھی نکھر گیا

٭٭٭

دھڑکتی گونجتی اِک خامشی سی شہر میں ہے

پسِ خیال عجب سنسنی سی شہر میں ہے

لب و زباں پہ نہیں ہے، نظر نظر میں تو ہے

کوئی تو بات ہے جو اَن کہی سی شہر میں ہے

چھپا سکے نہ جسے کوئی بھی اَپَھل جوڑا

کچھ اِس طرح کی حزیں بیدلی سی شہر میں ہے

جھٹک رہے ہوں جسے آہوانِ رم خوردہ

وفورِ خوف میں وہ کھلبلی سی شہر میں ہے

ہُوا جو اُس کی خبر بھی ہے اور خبر بھی نہیں

چہار سُو یہی ناآگہی سی شہر میں ہے

دہک رہے ہیں گلابوں سے بام و در ماجد

جو آنچ میں ہو وہی تازگی سی شہر میں ہے

٭٭٭

ذرّوں سے پہچان ہے ضو کی، ماہِ مبیں کوئی اور

ہم تم پائے تخت کے ہیں اور تخت نشیں کوئی اور

بال یہ پُوچھے منکرِ یزداں ہیں جو ہیں اور کثیر

اُنکے نصیبوں میں بھی ہے کیا فردوسِ بریں کوئی اور

آتی جاتی سانسوں کا بھی رکھ نہ سکیں جو حساب

دشمن ہیں تو ایک ہمِیں اپنے ہیں ،نہیں کوئی اور

چاند کو بس گھٹتا ہی دیکھیں اور رہیں رنجور

اِس دنیا میں شاید ہی ہو ہم سا حزیں کوئی اور

دل جس کو دینا تھا دیا اور اب ہے کہاں یہ تاب

دل کی لگن میں دیکھ لیا ہے جیسے حسیں کوئی اور

ہم ذی جوہر ہیں، یہ گماں ماجدؔ تھا گمانِ محض

اوج کی انگوٹھی میں سجا ہے دیکھ! نگیں کوئی اور

٭٭٭

رہِ سفر میں ہوئیں ہم پہ سختیاں کیا کیا

کِیا ہے چاک ہواؤں نے بادباں کیا کیا

نہ احتساب ہی بس میں، نہ احتجاج اُن کے

عوام اپنے یہاں کے ہیں بے زباں کیا کیا

فساد و فتنہ و شر کے ہم اہلِ مشرق کو

دِکھا رہا ہے نئے رنگ آسماں کیا کیا

وہ جسکے ہاتھ میں کرتب ہیں اُس کی چالوں سے

لٹیں گے اور بھی ہم ایسے خوش گماں کیا کیا

ہم ایسے اڑتے پرندوں کو کیا خبر ماجدؔ

دکھائے اور ہنر حرص کی کماں کیا کیا

٭٭٭

ریا کی زد پہ ہے کب سے اسے سنبھلنے دو

رگوں سے شہر کی، فاسد لہو نکلنے دو

جو اُن کے جسم پہ سج بھی سکے مہک بھی سکے

رُتوں کو ایسا لبادہ کوئی بدلنے دو

کسی بھی بام پہ اب لَو کسی دئیے کی نہیں

چراغِ چشم بچا ہے اسے تو جلنے دو

بچے گا خیر سے شہ رگ کٹے پہ بسمل کیا

ذرا سی ڈھیل اِسے دو، اِسے اُچھلنے دو

چلن حیات کا ماجدؔ بدل بھی لو اپنا

جو سر سے ٹلنے لگی ہے بلا وہ ٹلنے دو

٭٭٭

رگ بہ رگ پیہم لئے برگ و ثمر کا انتظار

ختم ہونے ہی نہیں پاتا شجر کا انتظار

کوئی منزل ہو ٹھہرتی ہے وہ کیوں مل کر سراب

ہر مسافر کو ہے کیوں تازہ سفر کا انتظار

رزق تک بھی روٹھنے کو جیسے ہم ایسوں سے ہے

جو بھی ہے کھلیان اُس کو ہے شرر کا انتظار

کاوشِ اظہارِ حق سے کب بہم ہو گا اِنہیں

اہلِفن کو جانے کیوں ہے سیم و زر کا انتظار

تشنہ لب خوشوں کی آنکھیں بوندیوں پر ہیں لگی

بحر کو بہرِ تموّج ہے قمر کا انتظار

اک سے اک بے جان سُورج اپنے پہلو میں لیے

ہر سحر سونپے ہمیں، اگلی سحر کا انتظار

کرب کے آنسو طرب کے آنسوؤں میں کب ڈھلیں

آنکھ کو ماجدؔ ہے کیوں پھر بھی گہر کا انتظار

٭٭٭

زچ ہوئے پر جو ذرا سا تھا بدل جانے لگا

وہ ستمگر پھر ڈگر پہلی سی اپنانے لگا

بچ کے پچھلے دشت میں نکلے تھے جس کے سِحر سے

پھر نگاہوں میں وہی اژدر ہے لہرانے لگا

کر کے بوندوں کو بہ فرطِ سرد مہری منجمد

دیکھ لو نیلا گگن پھر زہر برسانے لگا

جُود جتلانے کو اپنی شاہ ہنگامِ سخا

عیب کیا کیا کچھ نہ ناداروں کے دِکھلانے لگا

سُرخرُو اس نے بھی زورآور کو ہی ٹھہرا دیا

حفظِ منصب کو ستم عادل بھی یہ ڈھانے لگا

دل میں تھا ماجدؔ جو سارے دیوتاؤں کے خلاف

اب زباں پر بھی وہ حرفِ احتجاج آنے لگا

٭٭٭

سانس روکے کھڑے ہیں شجر دیکھنا

حبس پہنچا ہے کس اَوج پر دیکھنا

خرمنوں میں ہوئیں جن کی بیجائیاں

پھولنے کو ہیں اب وہ شرر دیکھنا

لیس کر کے ہمیں رختِ بارود سے

بھیجتا ہے کدھر؟ رہبر دیکھنا

کھور ہی دے بدن کو نہ آنکھوں کی نم

دیکھنا ماجدِ بے خبر دیکھنا

٭٭٭

سجل حویلیوں کی ، بام و در کی بات اور ہے

جہاں کے ہم مکیں ہیں، اُس نگر کی بات اور ہے

محال ہو گیا ہے، دھُند سے جسے نکالنا

چمن میں آرزو کے اُس شجر کی، بات اور ہے

صدف سے چشمِ تر کے، دفعتاً ٹپک پڑا ہے جو

گراں بہا نہیں ، پہ اُس گہر کی بات اور ہے

ہُوئی ہے روشنی سی، جگنوؤں کے اجتماع سے

لگی نہیں جو ہاتھ، اُس سحر کی بات اور ہے

کوئی کوئی ہے شہر بھر میں، تجھ سا ماجدِ حزیں

ہُوا جو تجھ پہ ختم ، اُس ہنر کی بات اور ہے

٭٭٭

سُر اداسی کے بکھیریں سانس کی شہنائیاں

جبر نے بخشی ہمیں کیا گونجتی تنہائیاں

منتظر رہ رہ کے آنکھیں اِس قدر دھندلا گئیں

فرقِ روز و شب تلک جانیں نہ اب بینائیاں

رنگ پھیکے پڑ گئے کیا کیا رُتوں کے پھیر سے

گردشوں سے صورتیں کیا کیا نہیں گہنائیاں

جاگنے پر، تخت سے جیسے چمٹ کر رہ گئے

ہاتھ جن کے، سو کے اُٹھنے پر لگیں دارائیاں

لے کے پیمانے گلوں کی مسکراہٹ کے رُتیں

ناپنے کو آ گئیں پھر درد کی گہرائیاں

اُس سے ہم بچھڑے ہیں ماجد ابکے اِس انداز سے

پت جھڑوں میں جیسے پتوں کو ملیں رُسوائیاں

٭٭٭

شاخ پہ پھول کھِلا دیکھا ہے

آگے انت اُس کا دیکھا ہے

زور رہا جب تک سینے میں

تھا نہ روا جو، روا دیکھا ہے

فریادی ہی رہا وہ ہمیشہ

جو بھی ہاتھ اُٹھا دیکھا ہے

ہم نے کہ شاکی، خلق سے تھے جو

اب کے سلوکِ خدا دیکھا ہے

سنگدلوں نے کمزوروں سے

جو بھی کہا ، وُہ کِیا ، دیکھا ہے

جس سے کہو، کہتا ہے وُہی یہ

کر کے بَھلا بھی ، بُرا دیکھا ہے

اور نجانے کیا کیا دیکھے

ماجد نے ، کیا کیا دیکھا ہے

٭٭٭

شاخیں یہی کہتی ہیں، نہ بے دم ہمیں دیکھا

سورج نے کھُلی آنکھ سے ہے کم ہمیں دیکھا

ژالوں سے بچے ہیں تو ہوا نوچنے آئی

اِس خاک نے ہر حال میں برہم ہمیں دیکھا

ہر دیکھنے والے نے دھند لکوں میں حسد کے

مہتابِ سرِ صبح سا، مدّھم ہمیں دیکھا

ماجد ہوئے ہم اوس ، گیاہِ لبِ جو کی

ہر شخص نے ندیا ہی میں مدغم ہمیں دیکھا

٭٭٭

شرف مآب ہوئے سے جب سے مکر و فن کے گلاب

چِڑا رہے ہیں مرا منہ، مرے سخن کے گلاب

بناتِ شہر کی پژمردگی وہ کیا جانے

بہم ہر آن جسے ہوں، بدن بدن کے گلاب

ملے نہ جس کا کہیں بھی ضمیر سے رشتہ

گراں بہا ہیں اُسی فکرِ پر فتن کے گلاب

سخن میں جس کے بھی اُمڈی ریا کی صنّاعی

ہر ایک سمت سے برسے اُسی پہ دَھن کے گلاب

یہاں جو قصر نشیں ہے، یہ جان لے کہ اُسے

نظر نہ آئیں گے ماجد، تجھ ایسے بن کے گلاب

٭٭٭

عہد یہی اب اِنسانوں نے ٹھہرانا ہے

کس نے کس کو کتنا نیچا دِکھلانا ہے

چڑیوں نے ہے اپنی جان چھپائے پھرنا

شہبازوں نے اپنی دھونس پہ اِترانا ہے

دھوپ کے ہاتھوں اِن سے اوس کی نم چھننے پر

گرد نے پھولوں کو سہلانے آ جانا ہے

سورج کے ہوتے، جب تک محتاجِ ضیا ہے

چاند نے گھٹنا بڑھنا ہے اور گہنانا ہے

جانبِ تشنہ لباں پھر بڑھنے لگا مشکیزہ

جبر نے جِس پر تیر نیا پھر برسانا ہے

عاجز ہم اور قادر اور کوئی ہے ماجد

جیون بھر بس درس یہی اِک دہرانا ہے

٭٭٭

فرق نہ سمجھیں کچھ دھُتکارے جانے میں

زاغ جُتے دیکھے، پس خوردہ کھانے میں

پیڑ بحالِ ضعف بھی ہے مسرور لگا

خشک زبانوں کے پرچم لہرانے میں

پر ٹُوٹے اور ساتھ ہوا نے چھوڑ دیا

سطر بڑھا دو یہ بھی اب افسانے میں

لو اس کو بھی تکڑی تول جو رکھتا تھا

وقت نے دیر نہ کی عادل ٹھہرانے میں

اپنی جگہ امید سے پیروکار سبھی

رہبر محو ہے ماجد، مال بنانے میں

٭٭٭

کیا کہیں کیا کچھ ہمیں دنیائے دُوں کرنا پڑا

جا بجا تیرے لئے یہ سر، نگوں کرنا پڑا

ہم کہ تھے اہلِ صفا یہ راز کس پر کھولتے

قافلے کا ساتھ آخر، ترک کیوں، کرنا پڑا

سر ہم ایسوں سے کہاں ہونا تھا قلعہ جبر کا

ایک یہ دل تھا جسے ہر بار خوں کرنا پڑا

خم نہ ہو پایا تو سر ہم نے قلم کروا لیا

وُوں نہ کچھ ہم سے ہُوا ماجد تو یُوں کرنا پڑا

٭٭٭

کیا کہیں ذی مرتبت کتنے تھے اور کیا ہو گئے

فیصلہ دیتے ہوئے عادل بھی رُسوا ہو گئے

کونپلیں کیا کیا نہیں جھلسی ہیں بادِ مکر سے

گلستاں امید کے، کیا کیا نہ صحرا ہو گئے

جن دنوں کی چاہ میں بے تاب تھی خلقت بہت

شو مئی قسمت سے وہ دن اور عنقا ہو گئے

خُبث کیا کیا کھُل گیا اُن کا بھی جو تھے ذی شرف

نیّتوں کے جانے کیا کیا راز افشا ہو گئے

دم بخود ٹھہرے ہیں اُن کی پاک دامانی پہ ہم

قتل کرنے پر بھی جو ماجد مسیحا ہو گئے

٭٭٭

کیا کیا خم اور ہوں ابھی بازو کمان کے

تیور بدل چلے ہیں بہت ، آسمان کے

جیسے کوئی اُڑائے کبوتر ، بہ روزِ جشن

پُرزے ہوا کے ہاتھ تھے یوں بادبان کے

بہروپ ہی بھرے گا ، کرم بھی وہ گر کرے

نکلا جو گھر سے ، راہزنی ہی کی ٹھان کے

ماجد ہمیں بھی ، دیکھیے جھانسہ دیا ہے کیا

آنچل سا آسمان پہ ،بدلی نے تان کے

 ٭٭٭

کس نے یاد کیا ہے اتنی دیر گئے

دل کیوں بیکل سا ہے اتنی دیر گئے

کس نے کس کی پھر دیوار پھلانگی ہے

کس کا چین لٹا ہے اِتنی دیر گئے

کس کی آنکھ سے آس کا تارا ٹوٹا ہے

کس پر کون کھُلا ہے اِتنی دیر گئے

دل کے پیڑ پہ پنکھ سمیٹے سپنوں میں

ہلچل سی یہ کیا ہے اِتنی دیر گئے

کن آنکھوں کی نم میں گھلنے آیا ہے

بادل کیوں برسا ہے اِتنی دیر گئے

سو گئے سارے بچّے بھی اور جگنو بھی

پھر کیوں شور بپا ہے اِتنی دیر گئے

دیکھ کے ماجدؔ چندا نے بیدار کسے

آنگن میں جھانکا ہے اِتنی دیر گئے

٭٭٭

کافی ہے یہی، دل کو سزا اور نہ دینا

رسوائیِ خواہش کو، ہوا اور نہ دینا

پہلے ہی قفس میں ترے احسان بہت ہیں

گھاؤ کوئی، اے موجِ صبا! اور نہ دینا

کیا درد بٹاؤ گے کہ جس سِحر میں ہم ہیں

پتھر ہی نہ ہو جائیں صدا اور نہ دینا

صنّاع کہیں خود نہ کھنچا آئے زمیں پر

اِس چاند سے چہرے کو جِلا اور نہ دینا

حاصل ہے جو تجھ سے ہمیں پھولوں کی مہک سی

اُس قرب کی مہلت کو گھٹا اور نہ دینا

ہے اِس کی شرافت ہی خسارے کو کہاں کم

ماجد کو بزرگی کی رِدا اور نہ دینا

٭٭٭

کر کے غاصب کو زیر و زبر چھین لے

تجھ سے چھینے گئے جو گہر، چھین لے

ناز ہو ننّھی چڑیوں کے خوں پر جنہیں

اُن عقابوں سے تُو بال و پر چھین لے

جس کی بنیاد تیرے عرق سے اٹھی

اُس سپھل پیڑ سے برگ و بر چھین لے

نرم خُوئی تلک نرم خُو ہو، مگر

دستِ جارح سے تیغ و تبر چھین لے

حق ملے گا تجھے دشتِ وحشت میں کیا

چھین لے، چھین سکتا ہے گر، چھین لے

جس کا حقدار ہے تو وہ تکریمِ فن

تو بھی اے ماجدِ با ہنر! چھین لے

٭٭٭

کم نہیں وجدان پر اُتری ہوئی آیات سے

شاعری ماجد! عبارت ہو اگر صدمات سے

ہر تمنّا ہے اِسی کی دھند میں لپٹی ہوئی

مدّتوں سے ہے یہی رشتہ اندھیری رات سے

کر لئے بے ذائقہ وہ دن بھی جو آئے نہیں

درس کیا لیتے بھلا ہم اور جھڑتے پات سے

بن گئیں پیڑوں کی شاخیں بھی قفس کی تیلیاں

سامنا ہے باغ میں ایسے ہی کچھ حالات سے

ابنِ آدم اب کے پھر فرعون ٹھہرا ہے جسے

مل گیا زعمِ خدائی آہنی آلات سے

٭٭٭

گیاہ و برگ کو دیں بے زبانیاں کیا کیا

ملیں ہَوا کو اُدھر حکمرانیاں کیا کیا

بکھر گئی ہیں کسی مور کے پروں کی طرح

درونِ مصحفِ گل تھیں نشانیاں کیا کیا

گھرا ہے جا کے جہاں بھی ہجومِ طفلاں میں

ہوئیں بہ حقِ جنوں چھیڑ خانیاں کیا کیا

خلافِ فتنہ و شر جب بھی مستعد ٹھہریں

الٹ گئی ہیں یہاں راجدھانیاں کیا کیا

گماں تھا جن پہ کہ وہ رشکِ خضر ہیں ماجد

ہمیں اُنہی سے ہوئیں بدگمانیاں کیا کیا

 ٭٭٭

گِرا ہوں شجر سے اُڑا چاہتا ہوں

پئے رقص، لطفِ ہوا چاہتا ہوں

وہی جو منگیتر سا ہے مجھ سے، مخفی

وہ منظر، نظر پر کھُلا چاہتا ہوں

سبھی ناؤ والے ہیں، اِک میں نہیں ہوں

کہ تنکے کا جو، آسرا چاہتا ہوں

گریزاں ہوں ابنائے قابیل سے میں

کہ شانوں پہ یہ سر، سجا چاہتا ہوں

وہی شہ رگوں میں جو پنہاں ہے، اُس کا

سرِ طُور کیوں سامنا چاہتا ہوں

(ق)

گوارا ہو بے ناپ خلعت مجھے کیوں

جو زیبا مجھے ہو قبا چاہتا ہوں

نہیں چاہتا تاج میں پاپیادہ

میں توقیر، حسبِ انا چاہتا ہوں

لگے جیسے پہرے ہوں ہر اور میری

کہوں کس سے ماجدؔ، میں کیا چاہتا ہوں

٭٭٭

گھِر گیا ہے سیاستِ دل میں

ماں! ترا لاڈلا ہے مشکل میں

عمر گزری تلاش کرتے ہوئے

روشنی آنسوؤں کی جھلمل میں

اپنا عکسِ نصیب دیکھ لیا

چمپئی گال پر سجے تِل میں

ڈنک مارا تحفّظِ جاں کو

سانپ بزدل تھا گھُس گیا بِل میں

ہم نے ظالم سے یوں کہی دل کی

چھید جیسے کرے کوئی سِل میں

جانے ماجد کن آنسوؤں سے لگا

اک کٹاؤ سا جسم کی گِل میں

٭٭٭

لمحے بوجھل قدموں، ٹھٹھرے سالوں جیسے

کام مرے، کانٹوں میں اُلجھے بالوں جیسے

مچھلیوں جیسی سادہ منش امیدیں اپنی

عیّاروں کے ہتھکنڈے ہیں جالوں جیسے

دھُند سے کیونکر نکلے پار مسافت اُن کی

رہبر جنہیں میّسر ہوں نقالوں جیسے

اپنے یہاں کے حبس کی بپتا بس اتنی ہے

آنکھوں آنکھوں اشک ہیں ماجد چھالوں جیسے

٭٭٭

مجھ سے کشیدہ رو ہیں کیونکر میرے ہنر کے لوگ

اہلِ نظر میں بھی ہیں گویا تنگ نظر کے لوگ

جیسے کم سن چوزے ہوں مرغی کے پروں میں بند

جبر کی چیلوں سے دبکے ہیں یوں ہر گھر کے لوگ

ہر فریاد پہ لب بستہ ہیں مانندِ اصنام

عدل پہ بھی مامور ہوئے کیا کیا پتّھر کے لوگ

صبح و مسا ان کے چہروں پر اک جیسا اندوہ

منظر منظر ہیں جیسے اک ہی منظر کے لوگ

کچھ بھی نہیں مرغوب اِنہیں، کولہو کے سفر کے سوا

میرے نگر کے لوگ ہیں ماجد اور ڈگر کے لوگ

٭٭٭

مری ہر آس کے خیمے کی زینب بے رِدا کر دی

یزیدِ وقت نے جور و ستم کی اِنتہا کر دی

اگر سر زد ہوا حق مانگنے کا جرم تو اس پر سزا کیسی

مرے دستِ طلب نے کونسی ایسی خطا کر دی

کچھ افیونی حقائق ہی کھُلے ورنہ اِن ہونٹوں پر

سخن کیا تھا کہ خلقِ شہر تک جس نے خفا کر دی

زمیں یا آسماں کا جو خدا تھا سامنے اُس کے

جھکایا سر اٹھائے ہاتھ اور رو کر دعا کر دی

وطن کی بد دعا پر ریزہ ریزہ ہو گیا کوئی

کسی نے دیس پر جاں تک ہتھیلی پر سجا کر دی

حیا آنکھوں میں اور سچّائیاں جذبات میں ماجد

مجھے ماں باپ نے جو دی یہی پونجی کما کر دی

٭٭٭

ماتھے کی سلوٹوں سے ہے اتنا گلا مجھے

سلجھا نہیں جو بخت کا دھاگا ملا مجھے

چھابہ بغل میں اور ہے خوانچہ، کنارِ دوش

عمرِ اخیر! اور یہ کیا دے دیا مجھے

اے خاک! آرزو میں نگلنے کی تن مرا

کیسا یہ بارِ خارکشی دے دیا مجھے

ایسا ہی تیرا سبزۂ نورس پہ ہے کرم

کیا بوجھ پتھروں سا دیا اے خدا ! مجھے

کج ہو چلی زبان بھی مجھ کُوز پشت کی

کیا کیا ابھی نہیں ہے لگانی صدا مجھے

اک اک مکاں اٹھا ہے مرے سر کے راستے

کیسا یہ کارِ سخت دیا مزد کا، مجھے

بچپن میں تھا جو ہمدمِ خلوت، ملا کِیا

مکڑا قدم قدم پہ وُہی گھورتا مجھے

میں تھک گیا ہوں شامِ مسافت ہوا سے پوچھ

منزل کا آ کے دے گی بھلا کب پتا مجھے

محتاج ابر و باد ہوں پودا ہوں دشت کا

لگتی نہیں کسی بھی رہٹ کی دعا مجھے

اترا تھا ماہتاب سا کوڑے کے ڈھیر پر

لاتی ہے فکرِ روزیِ یک روز، ہر سحر

آہن یہ کس طرح کا پڑا کوٹنا مجھے

بارِ گراں حیات کا قسطوں میں بٹ کے بھی

ہر روز ہر قدم پہ جھُکاتا رہا مجھے

اتنا سا تھا قصور کہ بے خانماں تھا میں

کسبِ معاش میں بھی ملی ہے خلا مجھے

حکمِ شکم ہے شہر میں پھیری لگے ضرور

سُوجھے نہ چاہے آنکھ سے کچھ راستا مجھے

میں بار کش ہوں مجھ پہ عیاں ہے مرا مقام

اِحساسِ افتخار دلاتا ہے کیا مجھے

میری بھی ایک فصل ہے اُٹھ کر جو شب بہ شب

دیتی ہے صبح گاہ نیا حوصلہ مجھے

کہتا ہے ہجرتوں پہ گئے شخص کو مکاں

آ اے حریصِ رزق ! کبھی مل ذرا مجھے

علّت سے بے زری کی کفش دوزیاں ملیں

اکسیر ہر کسی کی ہوئی خاکِ پا مجھے

٭٭٭

منصبِ انسانی سے نیچے اترے کون

کُتا بھونکے تو آگے سے بھونکے کون

وہ کہ جو نیّتِ بد کے بطن سے پھوٹی ہو

تاب کسے ہے اُس دلدل میں الجھے کون

جز پت جھڑ کے اِس فن کا ادراک کسے

رنگ کسی کا جیسا بھی ہو بدلے کون

جسم پہ جس کے لباس ہو جھاڑ میں کانٹوں کے

حفظِ گلاب و سمن کی دھُن میں کودے کون

کون ہو جو خّرم ہو لہو میں نہا کر بھی

پیغمبر کے سوا طائف میں ٹھہرے کون

کام نہیں بس میں یہ دئیے کے ناخن کے

چہرۂ شب سے ماجدؔ ظلمت کھُرچے کون

٭٭٭

نہیں کہ تجھ سے وفا کا ہمیں خیال نہ تھا

نظر میں تھا، پہ ترا ہی وہ اک جمال نہ تھا

لبوں میں جان تھی پھر بھی ہماری آنکھوں میں

ستمگروں سے بقا کا کوئی سوال نہ تھا

ٹھہر سکا نہ بہت تیغِ موج کے آگے

ہزار سخت سہی، جسم تھا یہ ڈھال نہ تھا

کوئی نہیں تھا شکایت نہ تھی جسے ہم سے

ہمیں تھے ایک، کسی سے جنہیں ملال نہ تھا

غضب تو یہ ہے کہ تازہ شکار کرنے تک

نظر میں گرگ کی، چنداں کوئی جلال نہ تھا

بہ کُنجِ عجز فقط گن ہی گن تھے پاس اپنے

یہاں کے اوج نشینوں سا کوئی مال نہ تھا

ہمیں ہی راس نہ ماجدؔ تھی مصلحت ورنہ

یہی وہ جنس تھی، جس کا نگر میں کال نہ تھا

٭٭٭

نشۂ سَرخوشی اَوج پر دیکھنا

رہ بہ رہ جھومتا ہر شجر دیکھنا

مٹھیوں میں شگوفوں کی زر سر بہ سر

سیپیوں میں گلوں کی گہر دیکھنا

لطف جو چشمِ تشنہ کو درکار ہے

شاخ در شاخ محوِ سفر دیکھنا

دل بہ دل آرزوؤں کے جگنو اڑے

صحن در صحن رقصِ شرر دیکھنا

جی نہ ساون کے جَل سے کہیں جَل اٹھے

تم بھی ماجدؔ ہو اہلِ خبر دیکھنا

٭٭٭

نشۂ بے حسی تھی کہ نا آگہی لوگ سوئے ملے

پو پھٹے تھی ہوا کو شکایت یہی، لوگ سوئے ملے

روشنی کے سفیروں نے کیا کیا نہ گُر آزمائے مگر

سینہ سینہ بسائے ہوئے گمرہی لوگ سوئے ملے

زمزمے چہچہے کوئی تریاق ان کے نہ کام آ سکا

سم کچھ ایسی تھی سانسوں میں اِن کے گھلی لوگ سوئے ملے

صبح، پرچم لپیٹے ہوا ہو گئی اپنے سندیس کا

پھول نے جو کہی رہ گئی ان کہی لوگ سوئے ملے

بادباں کھول کر کشتیوں کے، ہوا کو انہیں سونپ کر

اور تو اور آغوشِ دریا میں بھی لوگ سوئے ملے

جانے حلقۂ بگوشی میں تھا کیا شرف، جو انہیں بھا گیا

جاگتا تھا فقط جذبۂ بندگی لوگ سوئے ملے

کتنے تھوڑے صلے سے بہلنے لگیں ان کی نادانیاں

رسم ماجدؔ یہ کیا اکتفا کی چلی لوگ سوئے ملے

٭٭٭

وسعتِ تِیرہ شبی ، تنہا روی ہے اور ہم

جگنوؤں سی اپنی اپنی روشنی ہے اور ہم

کیمیا گر تو ہمیں کندن بنا ڈالے مگر

آنچ بھر کی ایسا ہونے میں کمی ہے اور ہم

بھیڑیوں کی دھاڑ کو سمجھیں صدائے رہنما

خوش گماں بھیڑوں سی طبعی سادگی ہے اور ہم

کیا سلوک ہم سے کرے یہ منحصر ہے زاغ پر

گھونسلے کے بوٹ سی نا آگہی ہے اور ہم

ہاں یہی وہ فصل ہے پکنے میں جو آتی نہیں

زخمِ جاں کی روز افزوں تازگی ہے اور ہم

ناگہانی آندھیوں میں جو خس و خاشاک کو

جھیلنی پڑتی ہے وہ بے چارگی ہے اور ہم

ناخدا کو ناؤ سے دیکھا ہو جیسے کُودتے

دم بہ دم ماجد کچھ ایسی بے بسی ہے اور ہم

٭٭٭

وراثت میں اِنہیں ملنے لگیں عیّاریاں کیا کیا

نئی نسلوں کو لاحق ہو چلیں بیماریاں کیا کیا

کوئی فتنہ کوئی لاشہ اِنہیں مل جائے شورش کو

برائے تخت، نا اہلوں کی ہیں تیّاریاں کیا کیا

ارادت کے تسلسل کی، غلامانہ اطاعت کی

ہماری گردنوں کے گرد بھی ہیں دھاریاں کیا کیا

نمو بھی دیں، تحفّظ بھی کریں ہر پیڑ کا لیکن

جھڑیں تو نام پتوں کے، رقم ہوں خواریاں کیا کیا

جنہیں درکار ہیں قالین چلنے کو نجانے وہ

کرائیں گے لہو سے خاک پر، گُلکاریاں کیا کیا

حقائق سے ڈرانے کو، طلسمِ شر دکھانے کو

سرِ اخبار ماجدؔ نقش ہیں، چنگاریاں کیا کیا

٭٭٭

وہ کہ لمس میں تھا حریر، رنگ میں نار سا

مرے پاس بھی کوئی گلبدن تھا بہار سا

کبھی بارشوں میں بھی پھر دکھائی نہ دے سکا

اُسے دیکھنے سے فضا میں تھا جو نکھار سا

مری چاہ کو اُسے چاندنی کی قبائیں دیں

مرا بخت کس نے بنا دیا شبِ تار سا

کوئی آنکھ جیسے کھُلی ہو اِن پہ بھی مدھ بھری

ہے دل و نظر پہ عجب طرح کا خمار سا

لگے پیش خیمۂ قربِ یار گھڑی گھڑی

مری دھڑکنوں میں جو آ چلا ہے، قرار سا

٭٭٭

وقت کی شاخ پر پات پیلا پڑا اور میں کھو گیا

پَو پھٹے چاند سے اُس کا جوبن لُٹا اور میں کھو گیا

پھر نجانے معطل رہے کب تلک میرے اعصاب تک

ہاتھ جابر کا شہ رگ کی جانب بڑھا اور میں کھو گیا

آسماں پر کماں بن کے قوسِ قزح دُور ہنستی رہی

وار جو بھی ہُوا پاس ہی سے ہُوا اور میں کھو گیا

عمر کیا کیا نہیں لڑکیوں کی ڈھلی پاس ماں باپ کے

خوں کے آنسو بنے اُن کا رنگ حنا اور میں کھو گیا

میں کہ ماجد ہوں اہلِ ہنر، اہلِ مکر و ریا کیوں نہیں

بس یہ نکتہ مجھے بے زباں کر گیا اور میں کھو گیا

٭٭٭

وہ کمانڈو بھی تو ہوں ایسوں کو جو  سِیدھا کریں

ننّھی ننّھی خواہشیں خلقت کی، جو اغوا کریں

ہر نگارِ شام اُن کے واسطے ہو مہ بکف

ہم ہلالِ عید بعد از سال ہی دیکھا کریں

اُن کے جتنے تیر ہیں موزوں ہوں وہ اہداف پر

اور ہمیں تلقین یہ ،ایسا کریں ویسا کریں ،

خود ہی جب اقبال سا لکھنا پڑے اس کا جواب

اے خدا تجھ سے بھی ہم شکوہ کریں تو کیا کریں

وہ ادا کرتے ہیں جانے موسموں کو کیا خراج

بدلیاں جن کے سروں پر بڑھ کے خود سایا کریں

 (۲۲ فروری ۹۴ کو اسلام آباد میں افغانی اغوا  کنندوں کے چنگل سے پاکستانی کمانڈوز نے سکول کے ننھے منے سٹوڈنٹس کو آزاد کرایا ۔ یہ غزل اُسی واقعہ سے متاثر ہو کر لکھی گئی)

٭٭٭

ہوتا ہے ایسے ربط سے جی کا زیاں الگ

اور نا خلف کے منہ سے مِلیں، گالیاں الگ

ہونے کو ہو تو جائے ادا ایک فرضِ خاص

ماں باپ بھی ہوں خاک بہ سر، بیٹیاں الگ

جاتی ہے اپنی کم نظری سے اِدھر جو آن

اُڑتی ہیں جسم و جاں کی اُدھر دھجیاں الگ

ڈالی جو خاک سر پہ ہمارے، زمین نے

برسا کیا ہے ہم پہ اُدھر آسماں الگ

توقیر بھی بدلتی ہے، تحقیر میں کبھی

حالات جس طرح کا بھی دے دیں نشاں الگ

لیکھوں میں شخص شخص کے لکّھی ملے یہاں

ناطے سے بِنت بِنت کے اِک داستاں الگ

ہم گُل بہ کف تھے، سنگ بہ کف مل گئے ہمیں

اُترا ہے اب کے آنکھ میں ماجد سماں الگ

٭٭٭

ہم پہ کرم فرمانے آئے

جھونکے آگ بجھانے آئے

ہمیں پرانا ٹھہرانے کو

کیا کیا نئے زمانے آئے

خلق، وہ کارآمد بچّہ ہے

شاہ جسے بہلانے آئے

قیس کو جو ازبر تھا،ہم بھی

درس وہی دہرانے آئے

جنہیں بھُلاتے، خود کو بھُولے

لب پہ اُنہی کے، فسانے آئے

اپنی جگہ تھے جو بھی سہانے

دن پھر وہ نہ سہانے آئے

جن کو دیکھ کے تاپ چڑھے وہ

ماجد ہمیں منانے آئے

٭٭٭

یہ اضافہ بھی ہُوا ماں باپ کے آزار میں

مشتہر کرتے ہیں جنسِ دختراں اخبار میں

آبلہ پائی نے کر دی ہے مسافت یوں تمام

پیر چپکے رہ گئے ہیں جادۂ پر خار میں

تن بدن سے کھال تک جیسے ادھڑ جانے لگے

جیب ہی ہلکی نہیں ہوتی ہے اب بازار میں

سخت مشکل ہے کوئی تریاق اُس کا مِل سکے

زہر جو شامل ملے، ذی جاہ کے انکار میں

خلق ناداری کے ہاتھوں جان دینے پر مصر

اور زر کی بانٹ کے جھگڑے ادھر دربار میں

کیا کہیں ہر آن ماجد مضطرب، پڑنے کو ہیں

سنگ ریزے کیا سے کیا ہر دیدۂ بیدار میں

٭٭٭

یوں لوگ اب کے جادۂ گرگاں سے ہٹ گئے

چُوزے ہوں جیسے ماں کے پروں میں سمٹ گئے

پنچھی شکار ہو کے نشیمن میں آ گرا

اور خواب، عافیت کے بدن سے چمٹ گئے

کھانے لگا فضا میں لہو ان کا بازیاں

بِلّی کے سامنے تھے کبوتر جو ڈٹ گئے

مجروح کب ہوئے ہیں نہتّوں سے اہلِ تیغ

کب یوں ہوا کہ دانت زبانوں سے کٹ گئے

جھاڑا نہیں کسی نے اِنہیں حادثہ یہ ہے

دل آئنے تھے گردِ زمانہ سے اٹ گئے

ماجد ہر آن جیسے اذّیت پہ ہوں تُلے

کانٹے لباس سے ہیں کچھ ایسے چمٹ گئے

٭٭٭

مصنف کی اجازت سے، تشکر مصنف جن سے کتاب کی کمپوزنگ فائل کا حصول ہوا

ان پیج سے تبدیلی، پروف ریڈنگ اور ای بک کی تشکیل: اعجاز عبید