پسندیدہ کتابوں میں شامل کریں
فہرست مضامین
رئیس امروہوی کی منتخب غزلیں
جمع و ترتیب: حسنین حیدر
رئیس امروہوی
سید محمد مہدی المعروف رئیس امروہوی۔ برِ صغیر کے بلند پایہ شاعر، ممتاز صحافی اور ماہر رموزِ علوم تھے۔ 12 ستمبر 1914 ء کو یوپی کے شہر امروہہ میں پیدا ہوئے۔ تقسیمِ ہند کے بعد 19 اکتوبر 1947ء کو ہجرت کر کے کراچی آ گئے اور روزنامہ جنگ سے منسلک ہو گئے۔
رئیس امروہوی کی تصانیف درج ذیل ہیں :
1۔ مثنوی لالہ صحرا
2۔ پسِ غبار
3۔ قطعات حصہ اول و دوم
4۔ حکایت
5۔ بحضرتِ یزداں
6۔ انا من الحسین
7۔ ملبوسِ لباسِ بہار
8۔ آثار
رئیسؔ امروہوی جون ایلیا اور سید محمد تقی کے بڑے بھائی تھے۔ 22 ستمبر 1988ء کو سر میں گولی لگنے سے انتقال ہوا۔
یہ کیسا گیت ہے اے نَے نوازِ عالمِ ہُو
کہ نے سے راگ کے بدلے ٹپک رہا ہے لہو
بہارِ صبح کے نغمہ گروں کو کیا معلوم
گزر گیا گل و غنچہ پہ کیا عذابِ نمو
اگر نقاب الٹ دے تو کیا قیامت ہو
وہ جانِ گل کہ کبھی رنگ ہے کبھی خوشبو
مئے نشاط انڈیلی تھی میں نے ساغر میں
کہاں سے آئی یہ زہرِ غمِ حیات کی بُو
ہوائے صبح نہ جانے کہاں سے آئی ہے
مچل رہی ہے فضا میں اک اجنبی خوشبو
جہاں جو وجد میں آتا ہے نعرۂ ہُو سے
عجب نہیں کہ جہاں ہو خود ایک نعرۂ ہُو
میں ایک قطرۂ لہو سے امید کیا رکھوں
یہ کائنات ہے کیا صرف ایک قطرۂ لہو
تمہیں شکستہ دلوں کا خیال ہی تو نہیں
خیال ہو تو کرم کے ہزار ہا پہلو
کسی کی بات میں تیرے سکوت میں اعجاز
کسی کے لطف میں تیرے گریز میں جادو
سزائے ہجر لرزتا ہے جس سے قلبِ حیات
مجھے قبول بشرطیکہ اس کا اجر ہو تو
متاعِ غم ہے کسی کو بہت عزیز اے دل!
بہ احتیاطِ محبت میں صَرف کر آنسو
شگفتگی کو ٹٹولا فسردگی پائی
مسرتوں کو نچوڑا ٹپک پڑے آنسو
یہ حادثاتِ شب و روز بے سبب تو نہیں
بدل رہا ہے کوئی خوابِ ناز سے پہلو
٭٭٭
ڈھل گئی ہستیِ دل یُوں تری رعنائی میں
مادہ جیسے نکھر جائے توانائی میں
پہلے منزل پسِ منزل پسِ منزل اور پھر
راستے ڈوب گئے عالمِ تنہائی میں
گاہے گاہے کوئی جگنو سا چمک اٹھتا ہے
میرے ظلمت کدۂ انجمن آرائی میں
ڈھونڈتا پھرتا ہوں خود اپنی بصارت کی حدود
کھو گئی ہیں مری نظریں مری بینائی میں
ان سے محفل میں ملاقات بھی کم تھی نہ مگر
اُف وہ آداب جو برتے گئے تنہائی میں
یوں لگا جیسے کہ بل کھا کے دھنک ٹوٹ گئی
اس نے وقفہ جو لیا ناز سے انگڑائی میں
کس نے دیکھ ہیں تری روح کے رِستے ہوئے زخم
کون اُترا ہے ترے قلب کی گہرائی میں
٭٭٭
میں جو تنہا رہِ طلب میں چلا
ایک سایہ مرے عقب میں چلا
صبح کے قافلوں سے نبھ نہ سکی
میں اکیلا سوادِ شب میں چلا
جب گھنے جنگلوں کی صف آئی
ایک تارا مرے عقب میں چلا
آگے آگے کوئی بگولا سا
عالمِ مستی و طرب میں چلا
میں کبھی حیرتِ طلب میں رکا
اور کبھی شدتِ غضب میں چلا
نہیں کھلتا کہ کون شخص ہوں میں
اور کس شخص کی طلب میں چلا
ایک انجان ذات کی جانب
الغرض میں بڑے تعب میں چلا
٭٭٭
صبحِ نَو ہم تو ترے ساتھ نمایاں ہوں گے
اور ہوں گے جو ہلاکِ شبِ ہجراں ہوں گے
میری وحشت میں ابھی اور ترقی ہو گی
تیرے گیسو تو ابھی اور پریشاں ہوں گے
آزمائے گا بہرحال ہمیں جبرِ حیات
ہم ابھی اور اسیرِ غمِ دوراں ہوں گے
عاشقی اور مراحل سے ابھی گزرے گی
امتحاں اور محبت کے مری جاں ہوں گے
قلب پاکیزہ نہاد و دلِ صافی دے کر
آئینہ ہم کو بنایا ہے تو حیراں ہوں گے
صدقۂ تیرگیِ شب سے گلہ سنج نہ ہو
کہ نئے چاند اسی شب سے فروزاں ہوں گے
آج ہے جبر و تشدد کی حکومت ہم پر
کل ہمیں بیخ کنِ قیصر و خاقاں ہوں گے
وہ کہ اوہام و خرافات کے ہیں صیدِ زبوں
آخر اس دامِ غلامی سے گریزاں ہوں گے
صرف تاریخ کی رفتار بدل جائے گی
نئی تاریخ کے وارث یہی انساں ہوں گے
صدمۂ زیست کے شکوے نہ کر اے جانِ رئیسؔ
بخدا یہ نہ ترے درد کا داماں ہوں گے
٭٭٭
سیاہ ہے دلِ گیتی سیاہ تر ہو جائے
خدا کرے کہ ہر اک شام بے سحر ہو جائے
کچھ اس روش سے چلے بادِ برگ ریز خزاں
کہ دور تک صفِ اشجار بے ثمر ہو جائے
بجائے رنگ رگِ غنچہ سے لہو ٹپکے
کھلے جو پھول تو ہر برگِ گل شرر ہو جائے
زمانہ پی تو رہا ہے شرابِ دانش کو
خدا کرے کہ یہی زہر کارگر ہو جائے
کوئی قدم نہ اٹھے سوئے منزل مقصود
دعا کرو کہ ہر اک راہ پُر خطر ہو جائے
یہ لوگ رہگزرِ زیست سے بھٹک جائیں
اجل قوافلِ ہستی کی ہم سفر ہو جائے
بہ قدرِ یک دو نفس بھی گراں ہے زحمتِ زیست
حیاتِ نوعِ بشر اور مختصر ہو جائے
٭٭٭
رقصاں ہے منڈیر پر کبوتر
دیوار سی گر رہی ہے دل پر
ٹہنی پہ خموش اک پرندہ
ماضی کے الٹ رہا ہے دفتر
اڑتے ہیں ہوا کے سمت ذرے
یادوں کے چلے ہیں لاؤ لشکر
پیڑوں کے گھنے مہیب سائے
یہ کون ہے مجھ پہ حملہ آور
پتوں میں جھپک رہی ہیں آنکھیں
شاخوں میں چمک رہے ہیں خنجر
یہ کون قریب آ رہا ہے
خود میرے ہی نقشِ پا پہ چل کر
یہ کون سہما رہا ہے مجھے
بیٹھا ہوا ہے چپ مرے برابر
یہ کس کا تنفسِ پُر اسرار
یہ کس کا تبسم فسوں گر
اک کرب سا روح پر ہے طاری
اک کیف سا چھا رہا ہے دل پر
٭٭٭
خاموش زندگی جو بسر کر رہے ہیں ہم
گہرے سمندروں میں سفر کر رہے ہیں ہم
صدیوں تک اہتمامِ شبِ ہجر میں رہے
صدیوں سے انتظارِ سحر کر رہے ہیں ہم
ذرے کے زخم دل پہ توجہ کیے بغیر
درمانِ درد شمس و قمر کر رہے ہیں ہم
ہر چند نازِ حسن پہ غالب نہ آ سکے
کچھ اور معرکے ہیں جو سر کر رہے ہیں ہم
صبحِ ازل سے شام ابد تک ہے ایک دن
یہ دن تڑپ تڑپ کے بسر کر رہے ہیں ہم
کوئی پکارتا ہے ہر اک حادثے کے ساتھ
تخلیقِ کائناتِ دگر کر رہے ہم
اے عرصۂ طلب کے سبک سیر قافلو
ٹھہرو کہ نظم راہ گزر کر رہے ہیں ہم
لکھ لکھ کے اشک و خوں سے حکایاتِ زندگی
آرائشِ کتابِ بشر کر رہے ہیں ہم
تخمینۂ حوادثِ طوفاں کے ساتھ ساتھ
بطنِ صدف میں وزنِ گہر کر رہے ہیں ہم
ہم اپنی زندگی تو بسر کر چکے رئیسؔ
یہ کس کی زیست ہے جو بسر کر رہے ہیں ہم
٭٭٭
چل اے دل!سوئے شہرِ جانانہ چل
بصد شب رَوی ہائے مستانہ چل
یہی ہے تمنائے خواب و خمار
سوئے ارضِ افسون و افسانہ چل
یہی ہے تقاضائے شعر و شباب
سوئے شہرِ مہتاب و مے خانہ چل
بہ تعمیلِ منشورِ مے خانہ اُٹھ
بہ تجدیدِ پیمان و پیمانہ چل
مبارز طلب ہیں حوادث تو کیا؟
رجز پڑھ کے تُو رزم خواہانہ چل
مصائب ہیں ہنگامہ آرا تو ہوں
عَلَم کھول کر فتح مندانہ چل
جو مقصودِ خاطر ہے تنہا روی
تو آزاد و تنہا و یگانہ چل
جو تنہا روی کا سلیقہ نہ ہو
تو انجان راہوں میں تنہا نہ چل
اُٹھا دلق و کشکول و کاسہ اُٹھا
قلندر صفت چَل فقیرانہ چل
دف و چنگ و طاؤس و طنبور و نَے
بہ قانونِ شہرود و شاہانہ چل
شُتر بانِ لیلیٰ کو زحمت نہ دے
رہِ شوق میں بے حجابانہ چل
ابھی منزلیں منزلوں تک نہیں
ابھی دُور ہے شہرِ جانانہ چل
ابھی حُسن کی خیمہ گاہیں کہاں ؟
ابھی اور ویرانہ ویرانہ چل
ابھی شہرِ جاناں کی راہیں کہاں
ابھی اور بیگانہ بیگانہ چل
جَبل در جَبل دَشت در دَشت ابھی
جواں مردِ کہسار! مردانہ چل
وہ بنتِ قبیلہ نہ ہو منتظر
ذرا تیز اے عزمِ مستانہ چل
وہ سلمائے صحرا نہ ہو مضطرب
رَہِ دوست میں عذر خواہانہ چل
حریفوں کی چالوں سے غافل نہ ہو
کٹھن وادیوں میں حریفانہ چل
غزالوں کی آبادیاں ہیں قریب
غزل خوانیاں کر غزالانہ چل
بہت اجنبیت ہے اس شہر میں
چل اے دل! سوئے شہرِ جانانہ چل
٭٭٭
ماخذ:
http://raikhtablog.blogspot.com/2015/05/blog-post_23.html
تدوین اور ای بک کی تشکیل: اعجاز عبید
